Mokshadharma 77
Mokṣadharma 77
- Language
- Sanskrit
Contents
- 77.22 — 2 parts
77.1
vaiśampāyana uvāca-śrutavaitannārado vākyaṃ naranārāyaṇeritam
atyantaṃ bhaktimāndeve ekāntitvamupeyivān
77.2
prauṣya varṣasahasraṃ tu naranārāyaṇāśrame
śrutvā bhagavadākhyānaṃ dṛṣṭvā ca harimavyayam
77.3
himavantaṃ jagāmā''śu yatrāsya svaka āśramaḥ
tāvapi khyātatapasau naranārāyaṇāvṛṣī
77.4
tasminnevāśrame ramye tepatustapa uttamam
tvamapyamitavikrāntaḥ pāṇḍavānāṃ kulodvahaḥ
77.5
pāvitātmā'dya saṃvṛttaḥ śrutvemāmāditaḥ kathām
naiva tasyāparo loko nāyaṃ pārthivasattama
77.6
karmaṇā manasā vācā yo dviṣyādviṣṇumavyayam
majjanti pitarastasya narake śāśvatīḥ samāḥ
77.7
yo dviṣyādvibudhaśreṣṭhaṃ devaṃ nārāyaṇaṃ harim
kathaṃ nāma bhaved dveṣya ātmā lokasya kasyacit
77.8
ātmā hi puruṣavyāghra jñeyo viṣṇuriti sthitiḥ
ya eṣa gururasmākaṃ ṛṣirgandhavatīsutaḥ
77.9
tenaitatkathitaṃ tāta māhātmyaṃ paramavyayam
tasmācchrutaṃ mayā cedaṃ kathitaṃ ca tavānagha
77.10
nāradena tu saṃprāptaḥ sarahasyaḥ sasaṃgrahaḥ
eṣa dharmo jagannāthātsākṣānnāyaṇānnṛpa
77.11
evameṣa mahāndharmaḥ sa te pūrvaṃ nṛpottama
kathito harigītāsu samāsavidhikalpitaḥ
77.12
kṛṣṇadvaipāyanaṃ vyāsaṃ viddhi nārāyaṇaṃ bhuvi
ko hyanyaḥ puruṣavyāghra mahābhāratakṛdbhavet
77.13
dharmānnānāvidhāṃścaiva ko brūyāttadṛte prabhum
77.14
vartatāṃ te mahāyajño yathāsaṅkalpitastvayā
saṅkalpitāśvamedhastvaṃ śrutadharmaśca tattvataḥ
77.15
sautiruvāca—etattu mahadākhyānaṃ śrutvā pārthivasattamaḥ
tato yajñasamāptyarthaṃ kriyāḥ sarvāḥ samārabhat
77.16
nārāyaṇīyamākhyānametatte kathitaṃ mayā
pṛṣṭena śaunakādyeha naimiṣāraṇyavāsiṣu
77.17
nāradena purā yadvai gurave tu niveditam
ṛṣīṇāṃ pāṇḍavānāṃ ca śṛṇvatoḥ kṛṣṇabhīṣmayoḥ
77.18
sa hi paramarṣirjanabhuvanapatiḥ
pṛthudharaṇidharaḥ śrutivinayavidhiḥ
śamaniyamanidhiryamaniyamaparo
dvijavarasahitastava ca bhavatu gatirhariramarahitaḥ
77.19
asuravadhakarastapasāṃ nidhiḥ sumahatāṃ yaśasāṃ ca bhājanam
madhukaiṭabhahā kṛtadharmavidāṃ
gatido'bhayado makhabhāgaharo'stu śaraṇaṃ sa te
77.20
triguṇo viguṇaścaturātmadharaḥ pūrtaiṣṭayośca phalabhāgaharaḥ
vidadhātu nityamajito'tibalo
gatimātmagāṃ sukṛtināmṛṣīṇām
77.21
taṃ lokasākṣiṇamajaṃ puruṣaṃ purāṇaṃ ravivarṇamīśvaraṃ gatiṃ bahuśaḥ
praṇamadhvamekamanaso yataḥ salilodbhavo'pi tamṛṣiṃ praṇataḥ
77.22
sa hi lokayoniramṛtasya padaṃ sūkṣmaṃ parāyaṇamacalaṃ hi padam
tat sāṃkhyayogibhirudāravṛtaṃ
buddhyā yatātmabhiridaṃ sanātanam
77.22.p1
[13288]
77.22.p2
iti śrīmahābhārate śatasāhasryāṃ saṃhitāyāṃ vaiyāsikyāṃ śāntiparvaṇi mokṣadharmaparvaṇi nārāyaṇīye ṣaṭcatvāriṃśadadhikatriśatatamo'dhyāyaḥ || 346
Linked texts (3)
- Vulgate (Nīlakaṇṭha's text) — Sanskrit
- Nārāyaṇīya — Vyāsa, Sanskrit
- Critical edition (BORI) — Sanskrit