Mokshadharma 8

Mokṣadharma 8

yudhiṣṭhira uvāca- bhrātaraḥ pitaraḥ pautrā jñātayaḥ suhṛdaḥ sutāḥ
arthahetorhatāḥ krūrairasmābhiḥ pāpakarmabhiḥ

yeyamarthodbhavā tṛṣṇā kathametāṃ pitāmaha
nivarttayeyaṃ pāpāni tṛṣṇayā kāritā vayam

bhīṣma uvāca—
atrāpyudāharantīmamitihāsaṃ purātanam
gītaṃ videharājena māṇḍavyāyānupṛcchate

susukhaṃ bata jīvāmi yasya me nāsti kiṃcana
mithilāyāṃ pradīptāyāṃ na me dahyati kiṃcana

arthāḥ khalu samṛddhā hi bāḍhaṃ duḥkhaṃ vijānatām
asamṛddhāstvapi sadā mohayantyavicakṣaṇān

yacca kāmasukhaṃ loke yacca divyaṃ mahatsukham
tṛṣṇākṣayasukhasyaite nārhataḥ ṣoḍaśīṃ kalām

yathaiva śṛṅgaṃ goḥ kāle vardhamānasya vardhate
tathaiva tṛṣṇā vittena vardhamānena vardhate

kiṃcideva mamatvena yadā bhavati kalpitam
tadeva paritāpāya nāśe saṃpadyate punaḥ

na kāmānanurudhyeta duḥkhaṃ kāmeṣu vai ratiḥ
prāpyārthamupayuñjīta dharmaṃ kāmān visarjayet

vidvān sarveṣu bhūteṣu ātmanā sopamo bhavet
kṛtakṛtyo viśuddhātmā sarvaṃ tyajati caiva ha

ubhe satyānṛte tyaktvā śokānandau priyāpriye
bhayābhayaṃ ca saṃtyajya sa praśānto nirāmayaḥ

yā dustyajā durmatibhiryā na jīryati jīryataḥ
yo'sau prāṇāntiko rogastāṃ tṛṣṇāṃ tyajataḥ sukham

cāritramātmanaḥ paśyaṃścandraśuddhamanāmayam
dharmātmā labhate kīrti pretya ceha yathāsukham

rājñastadvacanaṃ śrutvā prītimānabhavad dvijaḥ
pūjayitvā ca tadvākyaṃ māṇḍavyo mokṣamāśritaḥ

[9781]

iti śrīma0 śānti0 mo0 māṇḍavyajanakasaṃvāde ṣaṭsaptatyadhikadviśatatamo'dhyāyaḥ || 276

Linked texts (1)