Mokshadharma 83
Mokṣadharma 83
- Language
- Sanskrit
83.1
yudhiṣṭhira uvāca- dharmāḥ pitāmahenoktā mokṣadharmāśritāḥ śubhāḥ
dharmamāśramiṇāṃ śreṣṭhaṃ vaktumarhasi me bhavān
83.2
bhīṣma uvāca- sarvatra vihito dharmaḥ svargaḥ satyaphalaṃ mahat
bahudvārasya dharmasya nehāsti viphalā kriyā
83.3
yasminyasmiṃśca viṣaye yo yo yāti viniścayam
sa tamevābhijānāti nānyaṃ bharatasattama
83.4
imāṃ ca tvaṃ naravyāghra śrotumarhasi me kathām
purā śakrasya kathitāṃ nāradena maharṣiṇā
83.5
maharṣirnārado rājansiddhastrailokyasaṃmataḥ
paryaiti kramaśo lokān vāyuravyāhato yathā
83.6
sa kadācinmaheṣvāsadevarājālayaṃ gataḥ
satkṛtaśca mahendreṇa pratyāsannagato'bhavat
83.7
taṃ kṛtakṣaṇamāsīnaṃ paryapṛcchacchacīpatiḥ
maharṣe kiṃcidāścaryamasti dṛṣṭaṃ tvayā'nagha
83.8
yadā tvamapi viprarṣe trailokyaṃ sacarācaram
jātakautūhalo nityaṃ siddhaścarasi sākṣivat
83.9
na hyastyaviditaṃ loke devarṣe tava kiṃcana
śrutaṃ vā'pyanubhūtaṃ vā dṛṣṭaṃ vā kathayasva me
83.10
tasmai rājansurendrāya nārado vadatāṃ varaḥ
āsīnāyopapannāya proktavānvipulāṃ kathām
83.11
yathā yena ca kalpena sa tasmai dvijasattamaḥ
kathāṃ kathitavānpṛṣṭastathā tvamapi me śṛṇu
Linked texts (1)
- Vulgate (Nīlakaṇṭha's text) — Sanskrit