Mokshadharma 85
Mokṣadharma 85
- Language
- Sanskrit
Contents
- 85.16 — 2 parts
85.1
brāhmaṇa uvāca- samutpannābhidhāno'smi vāṅmādhuryeṇa te'nagha
mitratvamabhipannastvaṃ kiṃcidvakṣyāmi tacchṛṇu
85.2
gṛhasthadharmaṃ viprandra kṛtvā putragataṃ tvaham
dharmaṃ paramakaṃ kuryāṃ ko hi mārgo bhaved dvija
85.3
ahamātmānamāsthāya eka evātmani sthitim
kartuṃ kāṅkṣāmi necchāmi baddhaḥ sādhāraṇairguṇaiḥ
85.4
yāvadetadatītaṃ me vayaḥ putraphalāśritam
tāvadicchāmi pātheyamādātuṃ pāralaukikam
85.5
asminhi lokasaṃbhāre paraṃ pāramabhīpsataḥ
utpannā me matiriyaṃ kuto dharmamayaḥ plavaḥ
85.6
saṃyujyamānāni niśamya loke niryātyamānāni ca sāttvikāni
dṛṣṭvā tu dharmadhvajaketumālāṃ prakīryamāṇāmupari prajānām
85.7
na me mano rajyati bhogakāle dṛṣṭvā yatīnprārthayataḥ paratra
tenātithe buddhivalāśnayeṇa dharmeṇa dharme viniyuṅkṣva māṃ tvam
85.8
so'tithirvacanaṃ tasya śrutvā dharmābhibhāṣiṇaḥ
provāca vacanaṃ ślakṣṇaṃ prājño madhurayā girā
85.9
atithiruvāca- ahamapyatra muhyāmi mamāpyeṣa manorathaḥ
na ca saṃniścayaṃ yāmi bahudvāre triviṣṭape
85.10
kecinmokṣaṃ praśaṃsanti kecidyajñaphalaṃ dvijāḥ
vānaprasthāśrayāḥ kecidgārhasthyaṃ kecidāsthitāḥ
85.11
rājadharmāśrayaṃ kecitkecidātmaphalāśrayam
gurudharmāśrayaṃ kecitkecidvāksaṃyamāśrayam
85.12
mātaraṃ pitaraṃ kecicchuśrūṣanto divaṃ gatāḥ
ahiṃsayā'pare svargaṃ satyena ca tathā'pare
85.13
āhave'bhimukhāḥ kecinnihatāstridivaṃ gatāḥ
keciduñchavrataiḥ siddhāḥ svargamārgaṃ samāśritāḥ
85.14
kecidadhyayane yuktā vedavrataparāḥ śubhāḥ
buddhimanto gatāḥ svargaṃ tuṣṭātmāno jitendriyāḥ
85.15
ārjavenāpare yuktā nihatānājaivairjanaiḥ
ṛjayo nākapṛṣṭhe vai śuddhātmānaḥ pratiṣṭhitāḥ
85.16
evaṃ bahuvidhairlokairdharmadvārairanāvṛtaiḥ
mamāpi matirāvignā meghalekheva vāyunā
85.16.p1
[13632]
85.16.p2
iti śrīmahābhārate śatasāhasryāṃ saṃhitāyāṃ vaiyāsikyāṃ śāntiparvaṇi mokṣadharmaparvaṇi uñchavṛttyupākhyāne catuḥpañcāśadadhikatriśatatamo'dhyāyaḥ || 354
Linked texts (1)
- Vulgate (Nīlakaṇṭha's text) — Sanskrit