Mokshadharma 92

Mokṣadharma 92

bhīṣma uvāca - sa pannagapatistatra prayayau brāhmaṇaṃ prati
tameva manasā dhyāyankāryavattāṃ vicārayan

tamatikramya nāgendro matimān sa nareśvara
provāca madhuraṃ vākyaṃ prakṛtyā dharmavatsalaḥ

bho bhoḥ kṣāmyābhibhāṣe tvāṃ na roṣaṃ kartumarhasi
iha tvamabhisaṃprāptaḥ kasyārthe kiṃ prayojanam

ābhimukhyādabhikramya snehātpṛcchāmi te dvija
vivikte gomatītīre kaṃ vā tvaṃ paryupāsase

brāhmaṇa uvāca - dharmāraṇyaṃ hi māṃ viddhi nāgaṃ draṣṭumihāgatam
padmanābhaṃ dvijaśreṣṭha tatra me kāryamāhitam

tasya cāhamasānnidhye śrutavānasmi taṃ gatam
svajanāttaṃ pratīkṣāmi parjanyamiva karṣakaḥ

tasya cākleśakaraṇaṃ svastikārasamāhitam
āvartayāmi tad brahma yogayukto nirāmayaḥ

nāga uvāca —
aho kalyāṇavṛttastvaṃ sādhuḥ sajjanavatsalaḥ
avācyastvaṃ mahābhāga paraṃ snehena paśyasi

ahaṃ sa nāgo viprarṣe yathā māṃ vindate bhavān
ājñāpaya yathā svairaṃ kiṃ karomi priyaṃ tava

bhavantaṃ svajanādasmi saṃprāptaṃ śrutavānaham
atastvāṃ svayamevāhaṃ draṣṭumabhyāgato dvija

saṃprāptaśca bhavānadya kṛtārthaḥ pratiyāsyati
visrabdho māṃ dvijaśreṣṭha viṣaye yoktumarhasi

vayaṃ hi bhavatā sarve guṇakrītā viśeṣataḥ
yastvamātmahitaṃ tyaktvā māmevehānurudhyase

brāhmaṇa uvāca —
āgato'haṃ mahābhāga tava darśanalālasaḥ
kaṃ cidarthamanarthajñaḥ praṣṭukāmo bhujaṃgama

ahamātmānamātmastho mārgamāṇo'tmano gatim
vāsārthinaṃ mahāprajñaṃ calacittamupāsma ha

prakāśitastvaṃ saguṇairyaśogarbhairgabhastibhiḥ
śaśāṅkakarasaṃsparśairhṛdyairātmaprakāśitaiḥ

tasya me praśnamutpannaṃ chindhi tvamanilāśana
paścātkāryaṃ vadiṣyāmi śrotumarhasi tadbhavān

[13732]

iti śrīmahābhārate śatasāhasryāṃ saṃhitāyāṃ vaiyāsikyāṃ śāntiparvaṇi mokṣadharmaparvaṇi uñchavṛttyupākhyāne ekaṣaṣṭyadhikatriśatatamo'dhyāyaḥ || 361

Linked texts (1)