Mokshadharma 93

Mokṣadharma 93

brāhmaṇa uvāca- vivasvato gacchati paryayeṇa voḍhuṃ bhavāṃstaṃ rathamekacakrama
āścaryabhūtaṃ yadi tatra kiṃcid dṛṣṭaṃ tvayā śaṃsitumarhasi tvam

nāga uvāca- āścaryāṇāmanekānāṃ pratiṣṭhā bhagavānraviḥ
yato bhūtāḥ pravartante sarve trailokyasaṃmatāḥ

yasya raśmisahasreṣu śākhāsviva vihaṅgamāḥ
vasantyāśritya munayaḥ saṃsiddhā daivataiḥ saha

yato vāyurviniḥsṛtya sūryaraśmyāśrito mahān
vijṛmbhatyambare tacca kimāścaryamataḥ param

vibhajya taṃ tu viprarṣe prajānāṃ hitakāmyayā
toyaṃ sṛjati varṣāsu kimāścaryamataḥ param

yasya maṇḍalamadhyastho mahātmā paramativaṣā
dīptaḥ samīkṣate lokān kimāścaryamataḥ param

śukro nāmā'sitaḥ pādo yaśca vāridharo'mbare
toyaṃ sṛjati varṣāsu kimāścaryamataḥ param

yo'ṣṭamāsāṃstu śucinā kiraṇenokṣitaṃ payaḥ
pratyādatte punaḥ kāle kimāścaryamataḥ param

yasya tejoviśeṣeṣu svayamātmā pratiṣṭhitaḥ
yato bījaṃ mahī ceyaṃ dhāryate sacarācarā

yatra devo mahābāhuḥ śāśvataḥ puruṣottamaḥ
anādinidhano vipra kimāścaryamataḥ param

āścaryāṇāmivāścaryamidamekaṃ tu me śṛṇu
vimale yanmayā dṛṣṭamambare sūryasaṃśrayāt

purā madhyāhnasamaye lokāṃstapati bhāskare
pratyayādityapratīkāśaḥ sarvataḥ samadṛśyata

sa lokāṃstejasā sarvānsvabhāsā nirvibhāsayan
ādityābhimukho'bhyeti gaganaṃ pāṭayanniva

hutāhutiriva jyotirvyāpya tejomarīcibhiḥ
anirdeśyena rūpeṇa dvitīya iva bhāskaraḥ

tasyābhigamanaprāptau hastau dattau vivasvatā
tenāpi dakṣiṇo hasto dattaḥ pratyarcitā'rthinā

tato bhittvaiva gaganaṃ praviṣṭo raśmimaṇḍalam
ekībhūtaṃ ca tattejaḥ kṣaṇenādityatāṃ gatam

tatra naḥ saṃśayo jātastayostejaḥsamāgame
anayoḥ ko bhavetsūryo rathastho yo'yamāgataḥ

te vayaṃ jātasaṃdehāḥ paryapṛcchāmahe ravim
ka eṣa divamākramya gataḥ sūrya ivāparaḥ

[ 13750 ]

iti śrīmanmahābhārate śatasāhasryāṃ saṃhitāyāṃ vaiyāsikyāṃ śāntiparvaṇi mokṣadharmaparvaṇi uñchavṛttyupākhyāne dviṣṭyadhikatriśatatamo'dhyāyaḥ || 362

Linked texts (2)