Naradapurana 1.101
Nāradapurāṇa 1.101
- Language
- Sanskrit
Contents
- 1.101.24 — 1 part
1.101.1
śrībrahmovāca
śṛṇu vatsa pravakṣyāmi purāṇaṃ daśamaṃ tava /
brahmavaivartakaṃ nāma vedamārgānudarśakam //
1.101.2
sāvarṇiryatra bhagavānsākṣāddevarṣaye sthitaḥ /
nāradāya purāṇārthaṃ prāha sarvamalaukikam //
1.101.3
dharmārthakāmamokṣāṇāṃ sāraḥ prītirharau hare /
tayorabhedasiddhyarthaṃ brahmavaivartamuttamam //
1.101.4
rathantarasya kalpasya vṛttāntaṃ yanmayoditam /
śatakoṭipurāṇe tatsaṃkṣipya prāha vedavit //
1.101.5
vyāsaścaturddhā saṃvyasya brahmavaivartasaṃjñite /
aṣṭādaśasahasraṃ tatpurāṇaṃ parikīrtitam //
1.101.6
brahmaprakṛtivighneśakṛṣṇakhaṇḍasamanvitam /
tatra sūtarṣisaṃvāde purāṇopakramastataḥ //
1.101.7
sṛṣṭiprakaraṇaṃ tvādyaṃ tato nāradavedhasoḥ /
vivādaḥ sumahānyatra dvayorāsītparābhavaḥ //
1.101.8
śivalokagatiḥ paścājjñānalābhaḥ śivātmane /
śivavākyena tatpaścānmarīcernāradasya tu //
1.101.9
gamanaṃ caiva sāvarṇerjñānārthaṃ siddhasevite /
āśrame sumahāpuṇye trailokyāścaryakāriṇī //
1.101.10
etaddhi brahmakhaṇḍaṃ hi śrutaṃ pāpavināśanam /
tataḥ sāvarṇisaṃvādo nāradasya samīritaḥ //
1.101.11
kṛṣṇamāhātmyasaṃyukto nānākhyānakathottaram /
prakṛteraṃśabhūtānāṃ kalānāṃ cāpi varṇitam //
1.101.12
māhātmyaṃ pūjanādyaṃ ca vistareṇa yathāsthitam /
etatprakṛtikhaṇḍaṃ hi śrutaṃ bhūtividhāyakam //
1.101.13
gaṇeśajanmasaṃpraśnaḥ sapuṇyakamahāvratam /
pārvatyāḥ kārtikeyena saha vighneśasaṃbhavam //
1.101.14
caritaṃ kārtavīryasya jāmadagryasya cādbhutam /
vivādaḥ sumahānāsījjāmadagryagaṇeśayoḥ //
1.101.15
etadvighneśakhaṇḍaṃ hi sarvavighnavināśanam /
śrīkṛṣṇajanmasaṃpraśno janmākhyānaṃ tato 'dbhutam //
1.101.16
gokule gamanaṃ gaścātpūtanādivadādbhūtāḥ /
bālyakaumārajā līlā vividhāstatra varṇitāḥ //
1.101.17
rāsakrīḍā ca gopībhiḥ śāradī samudāhṛtā /
rahasye rādhayā krīḍā varṇitā bahuvistarā //
1.101.18
sahākrūreṇa tatpaścānmathurāgamanaṃ hareḥ /
kaṃsādīnāṃ vadhe vṛtte kṛṣṇasya dvijasaṃskṛtiḥ //
1.101.19
kāśyasāṃdīpaneḥ paścādvidyopādānamadbhutam /
yavanasya vadhaḥ paścāddvārakāgamanaṃ hareḥ //
1.101.20
narakādivadhastatra kṛṣṇena vihito 'dbhutaḥ /
kṛṣṇakhaṇḍamidaṃ vipra nṛṇāṃ saṃsārakhaṇḍanam //
1.101.21
paṭhitaṃ ca śrutaṃ dhyātaṃ pūjitaṃ cābhivanditam /
ityetadbrahmavaivartapurāṇaṃ cātyalaukikam //
1.101.22
vyāsoktaṃ cādi saṃbhūtaṃ paṭhañchṛṇvanvimucyate /
vijñānājñānaśamanāddhorātsaṃsārasāgarāt //
1.101.23
likhitvedaṃ ca yo dadyānmādhyāṃ dhenusamanvitam /
brahmalokamavāpnoti sa mukto 'jñānabandhanāt //
1.101.24
yaścānukramaṇīṃ cāpi paṭhedvā śṛṇuyādapi /
so 'pi kṛṣṇaprasādena labhate vāñchitaṃ phalam //
1.101.24.p1
iti śrībṛhannāradīyapurāṇe pūrvabhāge bṛhadupākhyāne brahmavaivartapurāṇānukramaṇīnirūpaṇaṃ nāmaikottaraśatatamo 'dhyāyāḥ // 101 //
Linked texts (1)
- Nāradopapurāṇa — Sanskrit