Naradapurana 1.102
Nāradapurāṇa 1.102
- Language
- Sanskrit
Contents
- 1.102.21 — 1 part
1.102.1
brahmovāca
śṛṇu putra pravakṣyāmi purāṇaṃ liṅgasaṃjñitam /
paṭhatāṃ śṛṇvatāṃ caiva bhuktimuktipradāyakam //
1.102.2
yacca liṅgābhidhaṃ tiṣṭhanvahniliṅge haro 'bhyadhāt /
mahyaṃ dharmādisiddhyarthaṃ magnikalpakathāśrayam //
1.102.3
tadeva vyāsadevena bhāgadvayasamanvitam /
purāṇaṃ liṅgamuditaṃ bahvākhyānavicitritam //
1.102.4
tadekādaśasāhasraṃ haramāhātmyasūcakam /
paraṃ sarvapurāṇānāṃ sārabhūtaṃ jagattraye //
1.102.5
purāṇopakrame praśnaḥ sṛṣṭiḥ saṃkṣepataḥ purā /
yogākhyānaṃ tataḥ proktaṃ kalpākhyānaṃ tataḥ param //
1.102.6
liṅgodbhavastadaṃbā ca kīrtitā hi tataḥ param /
sanatkumāraśailādisaṃvādaścātha pāvanaḥ //
1.102.7
tato dādhīcacaritaṃ yugadharmanirūpaṇam /
tato bhuvana kośākhyā sūryasomānvayastataḥ //
1.102.8
tataśca vistarātsargastripurākhyānakaṃ tathā /
liṅgapratiṣṭhā ca tataḥ paśupāśavimokṣaṇam //
1.102.9
śivavratāni ca tathā sadācāranirūpaṇam /
prāyaścitānyariṣṭāni kāśīśrīśailavarṇanam //
1.102.10
andhakākhyānakaṃ paścādvārāhacaritaṃ punaḥ /
nṛsiṃhacaritaṃ paścājjalandharavadhastataḥ //
1.102.11
śaivaṃ sahasranāmātha dakṣayajñavināśanam /
kāmasya dahanaṃ paścādgirijāyāḥ karagrahaḥ //
1.102.12
tato vināyakākhyānaṃ nṛpākhyānaṃ śivasya ca /
upamanyukathā cāpi pūrvabhāga itīritaḥ //
1.102.13
viṣṇumāhātmyakathanamaṃbarīṣakathā tataḥ /
sanatkumāranandīśasaṃvādaśca punarmune //
1.102.14
śivamāhā tmyaseyuktaḥ strānayāgādikaṃ tataḥ /
sūryapūjāvidhiścaiva śivapūjā ca muktidā //
1.102.15
dānāni bahudhāktāni śrāddhaprakaraṇaṃ tataḥ /
pratiṣṭhātaṃ tramuditaṃ tato 'ghorasya kīrtanam //
1.102.16
vajreśvarī mahāvidyā gāyatrīmahimā tataḥ /
tryaṃbakasya ca māhātmyaṃ purāṇaśravaṇasya ca //
1.102.17
evaṃ coparibhāgaste laiṅgasya kathito mayā /
vyāsena hi nibaddhasya rudrāmāhātmyasūcitaḥ //
1.102.18
likhitvaitatpurāṇaṃ tu tiladhenusamanvitam /
phaālgunyāṃ pūrṇimāyāṃ yo dadyādbhaktyā dvijātaye //
1.102.19
sa labhecchivasāyujyaṃ jarāmaraṇavarjitam /
yaḥ paṭecchṛṇuyādvāpi laiṅgaṃ pāpāpahaṃ naraḥ //
1.102.20
sa bhuktabhogo loke 'sminnante śivapuraṃ vrajet /
liṅgānukramaṇīmetāṃ paṭhedyaḥ śṛṇuyāttathā //
1.102.21
tāvubhau śivabhaktau tu lokadvitayabhoginau /
jāyatāṃ girijābhartuḥ prasādānnātra saṃśayaḥ //
1.102.21.p1
iti śrībṛhannāradīyapurāṇe pūrvabhāge bṛhadupākhyāne caturthapāde liṅgapurāṇānukramaṇīnirūpaṇaṃ nāma dvyuttaraśatatamo 'dhyāyaḥ
Linked texts (2)
- Nāradopapurāṇa — Sanskrit
- Satsaṅgijīvana — Śatānandamuni, Sanskrit