Naradapurana 1.106
Nāradapurāṇa 1.106
- Language
- Sanskrit
Contents
1.106.1
brahmovāca
śṛṇu vatsa marīce tvaṃ purāṇaṃ kūrmasaṃjñakam /
lakṣmīkalpānucaritaṃ yatra kūrmavapurhariḥ //
1.106.2
dharmārthakāmamokṣāṇāṃ māhātmyaṃ ca pṛthakpṛthak /
indradyumnaprasaṃgena prāharṣibhyo dayānvitaḥ //
1.106.3
tatsaptadaśasāhasraṃ sucatuḥ saṃhitaṃ śubham /
yatra brāhmāḥ purā proktā dharmā nānāvidhā mune //
1.106.4
nānanākathāprasaṃgena nṛṇāṃ sadgatidāyakāḥ /
tatra pūrvavibhāge tu purāṇopakramaḥ purā //
1.106.5
lakṣmīndradyumnasaṃvādaḥ kūrṃmarṣigaṇasaṃkathā /
varṇāśramācārakathā jagadutpattikīrtanam //
1.106.5.p1
kālasaṃkhyā samāsena layānte stavanaṃ vibhoḥ //
1.106.6
tataḥ saṃkṣepataḥ sargaḥ śāṅkaraṃ caritaṃ tathā //
1.106.7
sahasranāma pārvatyā yogasya ca nirūpaṇam /
bhṛguvaṃśasamākhyānaṃ tataḥ svāyambhuvasya ca //
1.106.8
devādīnāṃ samutpattirdakṣayajñāhatistataḥ /
dakṣasṛṣṭikathā paścātkaśyapānvayakīrtanam //
1.106.9
ātreyavaṃśakathanaṃ kṛṣṇasyaṃ caritaṃ śubham /
mārtaṇḍakṛṣṇasaṃvādo vyāsapāṇḍavasaṃkathā //
1.106.10
yugadharmānukathanaṃ vyāsajaiminikīrtanam /
vārāṇasyāśca māhātmyaṃ prayāgasya tataḥ param //
1.106.11
trailokyavarṇanaṃ caiva vedaśākhānirūpaṇam /
uttare 'syā vibhāge tu purā gītaiśvarī tataḥ //
1.106.12
vyāsagītā tataḥ proktā nānādharmaprabodhinī /
nānāvidhānāṃ tīrthānāṃ māhātmyaṃ ca pṛthak tataḥ //
1.106.13
pratisargaprakathanaṃ brāhmīyaṃ saṃhitā smṛtā /
ataḥ paraṃ bhāgavatīsaṃhitārtha nirūpaṇam //
1.106.14
kathitā yatra varṇānāṃ pṛthakvṛttirudāhṛtā /
pāda'syāḥ prathame proktā brāhmaṇānāṃ vyavasthitiḥ //
1.106.15
sadā cāgatmikā vatsa bhogasaukhyavivarddhanī /
dvitīye kṣattriyāṇāṃ tu vṛttiḥ samyakprakīrtitā //
1.106.16
yayā tvāśritayā pāpaṃ vidhūyeha vrajeddivam /
tṛtīye vaiśyajātīnāṃ vṛttiruktā caturvidhā //
1.106.17
yayā caritayā samyaglabhe gatimuttamām /
caturthe 'syāstathā pāde śūdravṛttirudāhṛtā //
1.106.18
yayā saṃtuṣyati śrīśo nṛṇāṃ śreyovivarddhanaḥ /
pañcame 'syāstataḥ pāde vṛttiḥ saṃkarajoditā //
1.106.19
yayā caritayāpnoti bhāvinīṃ gatimuttamām /
ityeṣā pañcapadyuktā dvitīyā saṃhitā mune //
1.106.20
tṛtīyātroditā saurī nṝṇāṃ kāryavidhāyinī /
ṣoḍhā ṣaṭkarmasirddhi bodhayantī ca kāminām //
1.106.21
caturthīvaiṣṇavo nāma mokṣadā parikīrtitā /
catuṣpadī dvijātīnāṃ sākṣādbrahmasvarūriṇī //
1.106.22
tāḥ kramātṣaṭcaturdvīṣusāhasrāḥ parikīrtitāḥ //
1.106.23
etatkūrmapurāṇaṃ tu caturvargaphalapradam /
paṭhatāṃ śṛṇvatāṃ nṝṇāṃ sarvotkṛṣṭagatipradam //
1.106.24
likhitvaitattu yo bhaktyā hemakūrmasamanvitam /
brāhmaṇāyā yane dadyātsa yāti paramāṃ gatim //
1.106.24.p1
iti śrībṛhannāradīyapurāṇe pūrvabhāge bṛhadupākhyāne caturthapāde kūrmaparāṇānukramaṇīkathanaṃ nāma ṣaḍuttaraśatatamo 'dhyāyaḥ
Linked texts (5)
- Bhāgavatapurāṇa — Vyāsa, Sanskrit
- Nāradopapurāṇa — Sanskrit
- History of Dharmaśāstra (Ancient and Mediaeval Religious and Civil Law in India) — P. V. Kane, English
- Anvitārthaprakāśikā — Gaṅgāsahāya Śarman, Sanskrit
- Studies in the Upapurāṇas — R. C. Hazra, English