Naradapurana 1.110
Nāradapurāṇa 1.110
- Language
- Sanskrit
Contents
- 1.110.48 — 1 part
1.110.1
nārada uvāca
purāṇasūtramakhilaṃ śrutaṃ tava mukhādvibho /
marūcaye yathā proktaṃ brahmaṇā parameṣṭhinā //
1.110.2
adhunā tu mahābhāga tithīnāṃ vai kathānakam /
kramato mahyamākhyāhi yathā syādvataniścayaḥ //
1.110.3
yasminmāse tu yā puṇyā tithiryena uvāsitā /
yadvidhānaṃ ca pūjādestatsarvaṃ vada sāṃpratam //
1.110.4
sanātana uvāca
śṛṇu nārada vakṣyāmi tithīnāṃ te vrataṃ pṛthak /
tithīśānukramādeva sarvasiddhividhāyakam //
1.110.5
caitre māsi jagadbrahmā sasaja prathame 'hani /
śuklapakṣe samagraṃ vai tadā sūryodaye sati //
1.110.6
vatsarādau vasaṃtādau balirājye tathaiva ca /
pūrvaviddhaiva kartavyā pratipatsarvadā budhaiḥ //
1.110.7
tatra kāryā mahāśāntiḥ sarvakalmaṣanāśinī /
sarvotpātapraśamanī kaliduṣkṛtahāriṇī //
1.110.8
āyuḥ pradāpuṣṭikarī dhanasaubhāgyavarddhinī /
maṅgalyā ca pavitrā ca lokadvayamukhāvahā //
1.110.9
tasyāmādau tu saṃpūjyo brahmā vahnivapurdharaḥ /
pādyārdhyapuṣpadhūpaiśca vastrālaṅkārabhojanaiḥ //
1.110.10
homairbalyupahāraiśca tathā brāhmaṇatarpaṇaiḥ /
tataḥ krameṇa devebhyaḥ pūjā kāryā pṛthakpṛthak //
1.110.11
kṛtvoṅkāra namaskāraṃ kuśodakatilākṣataiḥ /
savastraṃ sahiraṇyaṃ ca tato dadyāddijātaye //
1.110.12
dakṣiṇāṃ vedaviduṣe vratasaṃpūrtihetave /
evaṃ pūjāviśeṣeṇa vrataṃ syātsaurisaṃjñakam //
1.110.13
ārogyadaṃ nṛṇāṃ vipra tasminneva dine mune /
vidyāvratamapi proktamasyāmeva tithau mune //
1.110.14
tilakaṃ nāma ca proktaṃ kṛṣṇenājātaśatrave /
atha jyeṣṭhe site pakṣe pakṣatyāṃ divasodaye //
1.110.15
devodyānabhavaṃ hṛdyaṃ karavīraṃ samarcayet /
raktatanturīdhānaṃ gandhadhūpavilepanaiḥ //
1.110.16
prarūḍhasaptadhānyaiśca nāragairbījapūrakaiḥ /
abhyukṣyākṣatatoyena mantreṇetthaṃ kṣamāpayet //
1.110.17
karavīra vṛṣāvāsa namaste bhānuvallabha /
daṃbholimṛḍadurgādidevānāṃ satataṃ priya //
1.110.18
ākṛṣṇeneti vedoktamantreṇetthaṃ kṣamāpayet /
evaṃ bhaktyā samabhyacya dattvā viprāya dakṣiṇām //
1.110.19
pradakṣiṇaṃ tataḥ kuryātpaścātsvabhavanaṃ vrajet /
nabhaḥ śukle pratipadi lakṣmībuddhipradāyakam //
1.110.20
dharmārthakāmamokṣāṇāṃ nidānaṃ paramaṃ vratam /
somavāraṃ samārabhya sārdhamāsatrayaṃ dvija //
1.110.21
kārtikāsitabhūtāyāmupoṣyaṃ vratatatparaḥ /
pūrṇāyāṃ śivamabhyarcya suvaṇa vaṃśasaṃyutam //
1.110.22
vāyanaṃ sumahatpuṇyaṃ devatāprītivardhakam /
dadyādviprāya saṃkalpya dhanavṛddhyai munīśvara //
1.110.23
bhādraśuklapratipadi vrataṃ nāmnā mahattamam /
vrataṃ maunāhvayaṃ kecitprāhuratra śivor'cyate //
1.110.24
naivedyaṃ tu pacenmaunī ṣoḍaśatriguṇāni ca /
phalāni piṣṭapakvāni dadyādviprāya ṣoḍaśa //
1.110.25
devāya ṣoḍaśānyāni bhujyante ṣoḍaśātmanā /
sauvarṇaṃ śivamabhyarcya kumbhopari vidhānavit //
1.110.26
tatsarvaṃ dhenusahitamācāryyāya pradāpayet /
idaṃ kṛtvā vrataṃ vipra deva devasya śūlinaḥ //
1.110.27
caturdaśābdaṃ dehāntaṃ bhuktabhogaḥ śivaṃ vrajet /
āśvine sitapakṣatyāṃ katvāśokavrataṃ naraḥ //
1.110.28
aśoko jāyate vipradhanadhānyasamanvitaḥ /
aśokapūjanaṃ tatra kāryaṃ niyamatatparaiḥ //
1.110.29
vratānte dvādaśe varṣe mūrtiṃ cāśokaśākhinaḥ /
samarpya gurave bhaktyā śivaloke mahīyate //
1.110.30
asyāmeva pratipadi navarātraṃ samārabhet /
pūrvāhne pūjayeddevīṃ ghaṭasthāpanapūrvakam //
1.110.31
aṅkurāropaṇaṃ kṛtvā yavairgodhūmamiśritaiḥ /
tataḥ pratidinaṃ kuryādekabhuktamayācitam //
1.110.32
upavāsaṃ yathāśakti pūjāpāṭhajapādikam /
mārkaṃṇḍeya purāṇoktaṃ caritatritayaṃ dvija //
1.110.33
paṭhanīyaṃ navadinaṃ bhuktimuktī abhīpsatā /
kumārīpūjanaṃ tatra praśastaṃ bhojanādibhiḥ //
1.110.34
itthaṃ kṛtvā vrataṃ vipra sarvasiddhyālayo naraḥ /
jāyate bhuvi durgāyāḥ prasādānnātra saṃśayaḥ //
1.110.35
athorjasitapakṣatyāṃ navarātroditaṃ caret /
viśeṣādannakūṭākhyaṃ viṣṇuprītivivardhanam //
1.110.36
sarvapākaiḥ sardadohaiḥ sarvaiḥ sarvārthasiddhaye /
kartavyamannakūṭaṃ tu govarddhanasamarcane //
1.110.37
sāyaṃ gobhiḥ saha śrīmadgovarddhanadharādharam /
samarcya dakṣiṇīkṛtya bhuktimuktī samāpnuyāt //
1.110.38
atha mārgasitādyāyāṃ dhanavratamanuttamam /
naktaṃ viṣṇvarcanaṃ homaiḥ sauvarṇīṃ hutabhuktanum //
1.110.39
raktavastrayugācchannāṃ dvijāya pratipādayet /
evaṃ kṛtvā dhanairdhānyaiḥ samṛddho jāyate bhuvi //
1.110.40
vahninā dagdhapāpastu viṣṇuloke mahīyate /
pauṣaśuklapratipadi bhānumabhyarcya bhaktitaḥ //
1.110.41
ekabhaktavrato martyo bhānulokamavāpnuyāt /
māghaśuklādyadivase vahniṃ sākṣānmaheśvaram //
1.110.42
samabhyacya vidhānena samṛddho jāyate bhuvi /
atha phaālgunaśuklādau devadevaṃ digaṃbaram //
1.110.43
dhūlidhūsarasarvāṅgaṃ jalairukṣetsamantataḥ /
karmaṇā laukikenāpi saṃtuṣṭo hi maheśvaraḥ //
1.110.44
svasāyujyaṃ pradiśati bhaktyā samyaksamarcitaḥ /
vaiśākhe tu sitādyāyāṃ viṣṇuṃ viśvavihāriṇam //
1.110.45
samabhyarcya vidhānena viprānsaṃbhojayedvatī /
evaṃ śucisitādyāyāṃ brahmāṇaṃ jagatāṃ gurum //
1.110.46
viṣṇunā sahito brahmā sarvalokeśvareśvaraḥ /
svasāyujyaṃ pradiśati sarvasiddhimavāpnuyāt //
1.110.47
āsu dvādaśamāsānāṃ pratipatsu dvijottama /
vratāni tubhyaṃ proktāni bhuktimuktipradāni ca //
1.110.48
vrateṣveteṣu sarveṣu brahmacaryaṃ vidhīyate /
bhojane tu haviṣyānnaṃ sāmānyata udāhṛtam //
1.110.48.p1
iti śrībṛhannanāradīyapurāṇe pūrvabhāge bṛhadupākhyāne caturthapāde dvādaśamāsapratipadvratanirūpaṇaṃ nāma daśottaraśatatamo 'dhyāyaḥ
Linked texts (4)
- Jayasīṃhakalpadruma — Ratnākara 1688, Sanskrit
- Smṛtikaustubha — Anantadeva 1638, Sanskrit
- Saṃvatsaradīdhiti — Anantadeva 1650, Sanskrit
- Vratakhaṇḍa — Hemādri, Sanskrit