[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 1.113 # Naradapurana 1.113 Nāradapurāṇa 1.113 - **Language:** Sanskrit ## Contents - [1.113.91](https://indike.org/pramana/in.purana.narada.1.113.91) — 1 part ### [1.113.1](https://indike.org/pramana/in.purana.narada.1.113.1) sanātana uvāca śṛṇu vipraṃ pravakṣyāmi caturthyāste vratānyaham / yāni kṛtvā narā nāryo 'bhīṣṭānkāmānavāpnuyuḥ // ### [1.113.2](https://indike.org/pramana/in.purana.narada.1.113.2) caitramāsacaturthyāṃ tu vāsudevasvarūpiṇam / gaṇapaṃ samyagabhyarcya dattvā kāñcanadakṣiṇām // ### [1.113.3](https://indike.org/pramana/in.purana.narada.1.113.3) viprāya viṣṇulokaṃ tu gaccheddevanamaskṛtaḥ / vaiśākhasya caturthyāṃ tu prārthyaṃ saṃkarṣaṇāhvayam // ### [1.113.4](https://indike.org/pramana/in.purana.narada.1.113.4) gṛhasthadvijamukhyebhyaḥ śaṅkhaṃ dattvā vidhānavit / prāpya saṃkarṣaṇaṃ lokaṃ modate bahukalpakam // ### [1.113.5](https://indike.org/pramana/in.purana.narada.1.113.5) jyeṣṭhamāsacaturthyāṃ tu prārcya pradyumnarūpiṇam / phalaṃ mūlaṃ ca yuthebhyo dattvā svargaṃ labhennaraḥ // ### [1.113.6](https://indike.org/pramana/in.purana.narada.1.113.6) āṣāḍhasya caturthyāṃ tu saṃprapūjyāniruddhakam / yatibhyo 'lābupātrāṇi dattvābhīṣṭaṃ labhennaraḥ // ### [1.113.7](https://indike.org/pramana/in.purana.narada.1.113.7) caturmūrtivratānyevaṃ kṛtvā dvādaśavatsaram / udyāpanaṃ vidhānena kartavyaṃ phalamicchatā // ### [1.113.8](https://indike.org/pramana/in.purana.narada.1.113.8) anyajjyeṣṭhacaturthyāṃ tu satīvratamanuttamam / kṛtvā gaṇapatermāturloke modeta tatsamam // ### [1.113.9](https://indike.org/pramana/in.purana.narada.1.113.9) tathā'ṣāḍhacaturthyāṃ tu vratamanyacchubhāvaham / rathantarāhvakalpasya hyādibhūtaṃ dinaṃ yataḥ // ### [1.113.10](https://indike.org/pramana/in.purana.narada.1.113.10) śraddhāpūtena manasā gaṇeśaṃ vidhinā naraḥ / pūjayitvā labheccāpi phalaṃ devādidurgamam // ### [1.113.11](https://indike.org/pramana/in.purana.narada.1.113.11) śrāvaṇasya caturthyāṃ tu jāti candrodaye mune // ### [1.113.12](https://indike.org/pramana/in.purana.narada.1.113.12) gaṇeśāya pradadyācca hyarghyaṃ vidhividāṃvaraḥ / lambodaraṃ caturbāhuṃ trinetraṃ raktavarṇakam // ### [1.113.13](https://indike.org/pramana/in.purana.narada.1.113.13) nānāratnavibhūṣāḍhyaṃ prasannāsyaṃ vicintayet / āvāhanādibhiḥ sarvairupacāraiḥ samarcayet // ### [1.113.14](https://indike.org/pramana/in.purana.narada.1.113.14) naivedyaṃ modakaṃ dadyādgaṇeśaprītidāyakam / evaṃ vrataṃ vidhāyātha bhuktvā modakameva ca // ### [1.113.15](https://indike.org/pramana/in.purana.narada.1.113.15) sukhaṃ svapyānniśāyāṃ tu bhūmāveva kṛtārcanaḥ / vratasyāsya prabhāveṇa kāmānmanasi cintitān // ### [1.113.16](https://indike.org/pramana/in.purana.narada.1.113.16) labdhvā leke paraṃ cāpi gaṇeśapadamāpnuyāt / nānena sadṛśaṃ cānyadvratamasti jagattraye // ### [1.113.17](https://indike.org/pramana/in.purana.narada.1.113.17) tasmātkāryaṃ prayatnena sarvānkāmānabhīpsatā / athāsminneva divase dūrvāgaṇapati vratam // ### [1.113.18](https://indike.org/pramana/in.purana.narada.1.113.18) kecidicchanti devarṣe tadvidhānaṃ vadāmi te / haimaṃ nirmāya gaṇapaṃ tāmrapātropari sthitam // ### [1.113.19](https://indike.org/pramana/in.purana.narada.1.113.19) veṣṭitaṃ raktavastreṇa sarvatobhadramaṇḍale / pūjayedraktakusumaiḥ patrikābhiśca pañcabhiḥ // ### [1.113.20](https://indike.org/pramana/in.purana.narada.1.113.20) bilvapatramapāmārgaṃ śamī dūrvā haripriyā / ābhiranyaśca kusumairabhyarcya phalamodakaiḥ // ### [1.113.21](https://indike.org/pramana/in.purana.narada.1.113.21) ācāryāya vidhijñāya satkṛtya vinivedayet / upahāraṃ prakalpyātha dadyādarghaṃ samudyate / tataḥ saṃprārathya vighneśamūrtiṃ sopaskarāṃ mune // ### [1.113.22](https://indike.org/pramana/in.purana.narada.1.113.22) ācāryāya vidhijñāya satkṛtya vinivedayet / kṛtvaivaṃ pañca varṣāṇi samupāsya yathāvidhi // ### [1.113.23](https://indike.org/pramana/in.purana.narada.1.113.23) bhuktveha bhogānakhilān lokaṃ gaṇapatervrajet / atha bhādracaturthyāṃ tu bahulādhenusaṃjñakam // ### [1.113.24](https://indike.org/pramana/in.purana.narada.1.113.24) pūjanī yo 'tra yatnena sraggandhayavasādibhiḥ / tataḥ pradakṣiṇīkṛtya śaktaśceddānamācaret // ### [1.113.25](https://indike.org/pramana/in.purana.narada.1.113.25) aśaktaḥ puretāṃ tu namaskṛtya visarjayet / pañcābdaṃ vādaśābdaṃ vā ṣoḍaśābdamathāpi vā // ### [1.113.26](https://indike.org/pramana/in.purana.narada.1.113.26) vrataṃ kṛtvā samudyāpya dhenuṃ dadyātpayasvinīm / prabhāveṇa vratasyāsya bhuktvā bhogānmanoramān // ### [1.113.27](https://indike.org/pramana/in.purana.narada.1.113.27) satkṛto devatāvṛndairgolokaṃ samavāpnuyāt / atha śukla caturthyāṃ tu siddhavaināyakavratam // ### [1.113.28](https://indike.org/pramana/in.purana.narada.1.113.28) āvāhanādibhiḥ sarvairupacāraiḥ samarcanam / ekāgramānaso bhūtvā dhyāyetsiddhivināyakam // ### [1.113.29](https://indike.org/pramana/in.purana.narada.1.113.29) ekadantaṃ śūrpakarṇaṃ gajavaktraṃ caturbhujam / pāśāṅkuśadharaṃ devaṃ taptakāñcanasannibham // ### [1.113.30](https://indike.org/pramana/in.purana.narada.1.113.30) ekaviṃśati patrāṇi caikaviṃśatināmabhiḥ / samarpayedbhaktiyuktastāni nāmāni vai śṛṇu // ### [1.113.31](https://indike.org/pramana/in.purana.narada.1.113.31) sumukhāya śamīpatraṃ gaṇādhīśāya bhṛṅgajam / umāputrāya bailvaṃ tu dūrvāṃ gajamukhāya ca // ### [1.113.32](https://indike.org/pramana/in.purana.narada.1.113.32) laṃbodarāya badarīṃ dhattūraṃ harasūnave / śūrpakarṇāya tulasīṃ vakratuṇḍāya śiṃbijam // ### [1.113.33](https://indike.org/pramana/in.purana.narada.1.113.33) guhāgrajāyāpāmārgamekadantāya bārhatam / herambāya tu siṃdūraṃ catirhetre ca patrajam // ### [1.113.34](https://indike.org/pramana/in.purana.narada.1.113.34) sarveśvarāyāgastyasya patraṃ prītivivarddhanam / dūrvāyugmaṃ tato gṛhya gandhapuṣpākṣatairyutam // ### [1.113.35](https://indike.org/pramana/in.purana.narada.1.113.35) pūjāṃ nivedayedbhaktiyukto modakapañcakam / ācamayya namaskṛtya saṃprārthya ca visarjjayet // ### [1.113.36](https://indike.org/pramana/in.purana.narada.1.113.36) vināyakasya pratimāṃ haimīṃ sopaskarāṃ mune / nivedayecca gurave dvijebhyo dakṣiṇāṃ dadet // ### [1.113.37](https://indike.org/pramana/in.purana.narada.1.113.37) evaṃ kṛtārcano bhaktyā pañca varṣāṇi nārada / upāsya labhate kāmānaihikāmuṣmikān śubhān // ### [1.113.38](https://indike.org/pramana/in.purana.narada.1.113.38) asyāṃ caturthyāṃ śaśinaṃ na paśyecca kadācana / paśyan mithyābhiśāpa tu labhate nātra saṃśayaḥ / atha taddoṣanāśāya mantraṃ paurāṇikaṃ paṭhet // ### [1.113.39](https://indike.org/pramana/in.purana.narada.1.113.39) siṃhaḥ prasenamamadhītsiṃho jāṃbavatā hataḥ / sakumāraka mā rodīstava hyeṣa syamantakaḥ // ### [1.113.40](https://indike.org/pramana/in.purana.narada.1.113.40) iṣaśuklacaturthyāṃ tu kaparddīśaṃ vināyakam // ### [1.113.41](https://indike.org/pramana/in.purana.narada.1.113.41) pauruṣiṇa tu sūktena pūjayedupacārakaiḥ / akāraṇānmuṣṭigatāṃstaṇḍulānsakaparddikān // ### [1.113.42](https://indike.org/pramana/in.purana.narada.1.113.42) viprāya baṭave dadyādgandhapuṣpārcitāya ca / taṇḍulā vaiśvadaivatyā haradaivatyamiśritāḥ // ### [1.113.43](https://indike.org/pramana/in.purana.narada.1.113.43) kapardigaṇanātho 'sau prīyatāṃ taiḥ samarpitaiḥ / caturthyāṃ kārtike kṛṣṇe karakākhyaṃ vrataṃ smṛtam // ### [1.113.44](https://indike.org/pramana/in.purana.narada.1.113.44) strīṇāmevādhikāro 'tra tadvidhānamudīryate / pūjayecca gaṇādhīśaṃ snātā strīsamalaṅkṛtā // ### [1.113.45](https://indike.org/pramana/in.purana.narada.1.113.45) tadagre pūrṇapakvānnaṃ vinyasetkarakāndaśa / samarpya devadevāya bhaktyā prayatamānasā // ### [1.113.46](https://indike.org/pramana/in.purana.narada.1.113.46) devo me prīyatāmevamuccāryyātha samarpayet / suvāsinībhyo viprebhyo yathākāmaṃ ca sādaram // ### [1.113.47](https://indike.org/pramana/in.purana.narada.1.113.47) tataścandrodaye rātrau dattvārghaṃ vidhipūrvakam / bhuñjīta miṣṭamannaṃ ca vratasya paripūrtaye // ### [1.113.48](https://indike.org/pramana/in.purana.narada.1.113.48) yadvā kṣīreṇa karakaṃ pūrṇaṃ toyena vā mune / sapūgākṣataratnāḍhyaṃ dvijāya pratipādayet // ### [1.113.49](https://indike.org/pramana/in.purana.narada.1.113.49) etatkṛtvā vrataṃ nārī ṣoḍaśadvādaśābdakam / upāyanaṃ vidhāyātha vratametadvisarjjayet // ### [1.113.50](https://indike.org/pramana/in.purana.narada.1.113.50) yāvajjīvaṃ tu vā nāryā kāryyaṃ saubhāgyavāñchayā / vratenānena sadṛśaṃ strīṇāṃ saubhāgyadāyakam // ### [1.113.51](https://indike.org/pramana/in.purana.narada.1.113.51) vidyate bhuvaneṣvanyattasmānnityamiti sthitiḥ / ūrjjaśuklacaturthyāṃ tu nāgavratamudāhṛtam // ### [1.113.52](https://indike.org/pramana/in.purana.narada.1.113.52) prātarvrataṃ tu saṃkalpya dhenuśṛñjagalaṃ śuci / pītvā snātvātha madhyāhne śaṅkhapālādipannagān // ### [1.113.53](https://indike.org/pramana/in.purana.narada.1.113.53) śeṣaṃ cāhvāmapūrvaistu pūjayedupacārakaiḥ / kṣīreṇāpyāyanaṃ kuryādetannāgavrataṃ smṛtam // ### [1.113.54](https://indike.org/pramana/in.purana.narada.1.113.54) evaṅkṛte tu viprendra nṛbhirnāgavrate śubhe / viṣāṇi naśyantyacirānna daśanti ca pannagāḥ // ### [1.113.55](https://indike.org/pramana/in.purana.narada.1.113.55) mārgaśuklacaturthyāṃ tu varṣaṃ yāvanmunīśvarā / kṣapayedekabhaktena naktenātha dvitīyakam // ### [1.113.56](https://indike.org/pramana/in.purana.narada.1.113.56) ayācitopavāsābhyāṃ tṛtīyakacaturthake / evaṃ krameṇa vidhivaccatvāryabdāni mānavaḥ // ### [1.113.57](https://indike.org/pramana/in.purana.narada.1.113.57) samāpya ca tato 'syānte vratasnāto mahāvratī / kārayeddhemaghaṭitaṃ bhūgaṇermūṣakaṃ ratham // ### [1.113.58](https://indike.org/pramana/in.purana.narada.1.113.58) aśakto varṇakaireva śubhraṃ cābjaṃ supatrakam / tasyopari ghaṭaṃ sthāpya tāmrapātreṇa saṃyutam // ### [1.113.59](https://indike.org/pramana/in.purana.narada.1.113.59) pūrayettaṇḍalaiḥ śubhraistasyopari gaṇeśvaram / nyasedvastrayugācchannaṃ gandhādyaiḥ pūjayecca tam // ### [1.113.60](https://indike.org/pramana/in.purana.narada.1.113.60) naivedyaṃ modakaṃ kalpyaṃ gaṇeśaḥ prīyatāmiti / jāgarairśītavādyādyaiḥ purāṇākhyānakaiścaret // ### [1.113.61](https://indike.org/pramana/in.purana.narada.1.113.61) prabhāte vimale snātvā homaṃ kṛtvā vidhānataḥ /' tilavrīhiyavaśvetasurṣapājyaiḥ sakhaṇḍakaiḥ // ### [1.113.62](https://indike.org/pramana/in.purana.narada.1.113.62) gaṇo gaṇādhipaścaiva kūṣmāṇḍastripurāntakaḥ / laṃbodaraikadantau ca rukmadaṃṣṭraśca vighnapaḥ // ### [1.113.63](https://indike.org/pramana/in.purana.narada.1.113.63) brahmā yamo 'tha varuṇaḥ somasūryahutāśanāḥ / gandhamādī parameṣṭhītyevaṃ ṣoḍaśanāmabhiḥ // ### [1.113.64](https://indike.org/pramana/in.purana.narada.1.113.64) praṇavādyairṅeṃnamoṃ'taiḥ pratyekaṃ dahane hunet / vakratuṇḍeti ṅeṃtena barmāntenāṣṭayukchatam // ### [1.113.65](https://indike.org/pramana/in.purana.narada.1.113.65) tato vyāhṛtibhiḥ śaktyā hutvā pūrṇāhutiṃ caret / dikpālānpūjayitvā ca brāhmaṇānbhojayettataḥ // ### [1.113.66](https://indike.org/pramana/in.purana.narada.1.113.66) catutviṃśatisaṃkhyākān modakaiḥ pāyasaistathā / savatsāṃ gāṃ tato dadyādācāryāya sadakṣiṇām // ### [1.113.67](https://indike.org/pramana/in.purana.narada.1.113.67) anyobhyo 'pi yathāśakti bhūyasīṃ ca tato dadet / praṇamya dakṣiṇīkṛtya pravisṛjya dvijottamām // ### [1.113.68](https://indike.org/pramana/in.purana.narada.1.113.68) bandhubhiḥ saha bhuñjīta svayaṃ ca prītamānasaḥ / etadvrataṃ naraḥ kṛtvā bhuktvā bhogānihottamān // ### [1.113.69](https://indike.org/pramana/in.purana.narada.1.113.69) sāyujyaṃ labhate viṣṇorgaṇeśasya prasādataḥ / kecidvaravrataṃ nāma prāhuretasya nārada // ### [1.113.70](https://indike.org/pramana/in.purana.narada.1.113.70) vidhānametadevāpi phalaṃ cāpīha tatsamam / pauṣamāsacaturthyāṃ tu vighneśaṃ prārthya bhaktitaḥ // ### [1.113.71](https://indike.org/pramana/in.purana.narada.1.113.71) vipraikaṃ bhojayeccaivaṃ modakairdakṣiṇāṃ dadet / evaṃ kṛte mune bhūyādvratī saṃpattibhājanam // ### [1.113.72](https://indike.org/pramana/in.purana.narada.1.113.72) māghakṛṣṇacaturthyāṃ tu saṃkaṣṭavratamucyate / tatropavāsaṃ saṃkalpya vratī niyamapūrvakam // ### [1.113.73](https://indike.org/pramana/in.purana.narada.1.113.73) candrodayamabhivyāpya tiṣṭhetprayatamānasaḥ / tataścandrodaye prāpte mṛnmayaṃ gaṇanāyakam // ### [1.113.74](https://indike.org/pramana/in.purana.narada.1.113.74) vidhāya vinyasetpīṭhe sāyudhaṃ ca savāhanam / upacāraiḥ ṣoḍaśabhiḥ samabhyarcya vidhānataḥ // ### [1.113.75](https://indike.org/pramana/in.purana.narada.1.113.75) modakaṃ cāpi naivedyaṃ saguḍaṃ tilakuṭṭakam / tator'ghyaṃ tāmraje pātre raktacandanamiśritam // ### [1.113.76](https://indike.org/pramana/in.purana.narada.1.113.76) sakuśaṃ ca sadūrvaṃ ca puṣpākṣatasamanvitam / saśamīpatradadhi ca kṛtvā candrāya dāpayet // ### [1.113.77](https://indike.org/pramana/in.purana.narada.1.113.77) gaganārṇavamāṇikya candra dākṣāyaṇīpate / gṛhāṇārghyaṃ mayā dattaṃ gaṇeśapratirūpaka // ### [1.113.78](https://indike.org/pramana/in.purana.narada.1.113.78) evaṃ dattvā gaṇeśāya divyārghyaṃ pāpanāśanam / śaktyā saṃbhojya viprāgryānsvayaṃ bhuñjīta cājñayā // ### [1.113.79](https://indike.org/pramana/in.purana.narada.1.113.79) evaṃ kṛtvā vrataṃ vipra saṃkaṣṭākhyaṃ śūbhāvaham / samṛddho dhanadhānyaiḥ syānna ca saṃkaṣṭamāpnuyāt // ### [1.113.80](https://indike.org/pramana/in.purana.narada.1.113.80) māghaśuklacaturthyāṃ tu gaurīvratamanuttamam / tasyāṃ tu gaurī saṃpūjyā saṃyuktā yoginīgaṇaiḥ // ### [1.113.81](https://indike.org/pramana/in.purana.narada.1.113.81) naraiḥ strībhirviśeṣeṇa kundapuṣpaiḥ sakuṅkumaiḥ / raktasūtre raktapuṣpaistathaivālaktakena ca // ### [1.113.82](https://indike.org/pramana/in.purana.narada.1.113.82) dhūpairdīpaṃśca balibhiḥ saguḍainārdrakeṇa ca / payasā pāyasenāpi lavaṇena ca pālakaiḥ // ### [1.113.83](https://indike.org/pramana/in.purana.narada.1.113.83) pūjyāścāvidhavā nāryastathā viprāḥ suśobhanāḥ / saubhāgyavṛddhaye deyo bhoktavyaṃ bandhubhiḥ saha // ### [1.113.84](https://indike.org/pramana/in.purana.narada.1.113.84) idaṃ gaurīvrataṃ vipra saubhāgyārogyavarddhanam / prativarṣaṃ prakarttavyaṃ nārībhiśca naraistathā // ### [1.113.85](https://indike.org/pramana/in.purana.narada.1.113.85) ḍhuṇḍhivrataṃ paraiḥ proktaṃ kaiścitkuṇḍavrataṃ smṛtam / lalitāvratamityanyaiḥ śāntivratamathāparaiḥ // ### [1.113.86](https://indike.org/pramana/in.purana.narada.1.113.86) snānaṃ dānaṃ japo homaḥ sarvamasyāṃ kṛtaṃ mune / bhavetsaha sraguṇitaṃ prasādāddantinaḥ sadā // ### [1.113.87](https://indike.org/pramana/in.purana.narada.1.113.87) caturthyāṃ phaālgune māsi ḍhuṇḍhirājavrataṃ śubham / tilaṣiṣṭairdvijān bhojya svayaṃ cāśnīta mānavaḥ // ### [1.113.88](https://indike.org/pramana/in.purana.narada.1.113.88) gaṇeśārādhanaparo dānahomaprapūjanaiḥ / tilaireva kṛtaiḥ siddhiṃ prāpnuyāttatprasādataḥ // ### [1.113.89](https://indike.org/pramana/in.purana.narada.1.113.89) sauvarṇaṃ gajavaktraṃ ca kṛtvā saṃpūjya yatnataḥ / dvijāgryāya pradātavyaṃ sarvasaṃpatsamṛddhaye // ### [1.113.90](https://indike.org/pramana/in.purana.narada.1.113.90) yasminkasminbhavenmāsi caturthī ravivārayuk / sāṃgārakā vā viprendra sā viśeṣaphalapradā // ### [1.113.91](https://indike.org/pramana/in.purana.narada.1.113.91) sarvāsu ca caturthīṣu śuklāsvapyasitāsu ca / vighneśa eva deveśaḥ saṃpūjyo bhaktitatparaiḥ // ### [1.113.91.p1](https://indike.org/pramana/in.purana.narada.1.113.91.p1) iti śrībṛhannāradīyapurāṇe pūrvabhāge bṛhadupākhyāne caturthapāde dvādśanāsa caturthīvratānirūpaṇaṃ nāma trayodaśādhikasatatamo 'dhyāyaḥ ## Linked texts (5) - [Gaṇeśapurāṇa](https://indike.org/pramana/in.purana.upa.surya.ganesa.1.27.22) — Sanskrit - [Śāntikamalākara](https://indike.org/pramana/in.niti.dharma.santi.santikamalakara.1.1.2) — Kamalākarabhaṭṭa 1587, Sanskrit - [Jayasīṃhakalpadruma](https://indike.org/pramana/in.niti.dharma.nibandha.mahanibandha.jayasimhakalpadruma.4.p59) — Ratnākara 1688, Sanskrit - [Vratakhaṇḍa](https://indike.org/pramana/in.niti.dharma.vrata.vratakhanda.104.2.3) — Hemādri, Sanskrit - [Vratakāṇḍa](https://indike.org/pramana/in.niti.dharma.vrata.vratakanda.6.p152) — Lakṣmīdhara, Sanskrit --- Source: [https://indike.org/pramana/in.purana.narada.1.113](https://indike.org/pramana/in.purana.narada.1.113) · Pramāṇa