Naradapurana 1.115
Nāradapurāṇa 1.115
- Language
- Sanskrit
Contents
- 1.115.54 — 1 part
1.115.1
sanātana uvāca
śṛṇu vipra pravakṣyāmi ṣaṣṭhyāścaiva vratāni te /
yāni samyagvidhāyātra labhaghetsarvānmanorathān //
1.115.2
caitramāse śuklaṣaṣṭhyāṃ kumāravratamuttamam /
tatreṣṭvā ṣaṇmukhaṃ devaṃ nānāpūjā vidhānataḥ //
1.115.3
putraṃ sarvaguṇopetaṃ prāpnuyāccirajīvinam /
vaiśākhaśuklaṣaṣṭhyāṃ ca pūjayitvā ca kārtikam //
1.115.4
labhate mātṛjaṃ saukhyaṃ nātra kāryā vicāraṇā /
jyeṣṭhamāse śuklaṣaṣṭhyāṃ vidhineṣṭvā divākaram //
1.115.5
labhate vāñchitānkāmāṃstatprasādānna saṃśayaḥ /
āṣāḍhaśuklaṣaṣṭhyāṃ vai skandavratamanuttamam //
1.115.6
upoṣya pūjayitvainaṃ śivomāpriyamātmajam /
labhate 'bhīpsitānkāmānputrapautrādisaṃtatīḥ //
1.115.7
śrāvaṇe śuklaṣaṣṭhyāṃ tu śarajanmānamarcayet /
upacāraiḥ ṣoḍaśabhirbhaktyā paramayānvitaḥ //
1.115.8
labhate 'bhīpsitānarthānṣaṇmukhasya prasādataḥ /
bhādramāse kṛṣṇaṣaṣṭyāṃ lalitāvratamucyate //
1.115.9
prātaḥ snātvā vidhānena nārī śuklāmbarāvṛtā /
śuktamālyayadharā vāpi nadyāḥ saṃgamavālukām //
1.115.10
gṛhītvā vaṃśapātre tu dhṛtvā piṇḍākṛtiṃ ca tām /
pañcadhā lalitāṃ tatra dhyāyedvanavilāsinīm //
1.115.11
paṅkajaṃ karavīraṃ ca nepālīṃ mālatīṃ tathā /
nīlotpalaṃ ketakīṃ ca saṃgṛhya tagaraṃ tathā //
1.115.12
ekaikāṣṭaśataṃ grāhyamaṣṭāviṃśatireva ca /
akṣatāḥ kalikā gṛhya tābhirdevīṃ prapūjayet //
1.115.13
prārthayedagrataḥ sthitvā devīṃ tāṃ giriśapriyām /
gaṅgādvāre kuśāvartte vilvake nīlaparvate //
1.115.14
snātvā kanakhale devi harariṃ labdhavatī patim /
lalite subhagaṃ devi sukhasaubhāgyadāyini //
1.115.15
anataṃ dahi saubhāgyemahyaṃ tubhyaṃ namo 'namanaḥ /
mantreṇānena kusumaiśvaṃpakasya suśobhanaiḥ //
1.115.16
abhyarcya vidhivattasyā navaidyaṃ purato nyaset /
trapuṣairapi kūṣmāṇḍairnālikeraiḥ sudāḍimaiḥ //
1.115.17
bījapūraiḥ sutuḍīraiḥ kāravallaiḥ sacirbhaṭaiḥ /
phalaistatkālasaṃbhūtaiḥ kṛtvā śobhāṃ tadagrataḥ //
1.115.18
virūḍhadhānyāṅkurakaiḥ sudīpāvalibhistathā /
sāddhai sargaṇakaidhūpaḥ sauhālakakarañjakaiḥ //
1.115.19
guḍapuṣpaiḥ karṇaveṣṭaḍairmodakairupamodakaiḥ /
bahuprakārairnaivedyairyathā vibhavasārataḥ //
1.115.20
evamabhyarcya vidhivadrātrau jāgaraṇotsavam /
gītavādyanaṭairnṛtyaiḥ prokṣaṇīyairanekadhā //
1.115.21
sakhībhiḥ sahitā sādhvī tāṃ rātriṃ prasabhaṃ nayet /
na ca saṃmīlayennetre nārīyāmacatuṣṭayam //
1.115.22
durbhagā duṣkṛtā vandhyā netrasaṃmīlanādbhavet /
evaṃ jāgaraṇaṃ kṛtvā saptamyāṃ saritaṃ nayet //
1.115.23
gandhapuṣpaistathābhyarcya gītavādyapuraḥsaraiḥ /
tacca dadyāddvijendrāya naivedyādi dvijottama //
1.115.24
snātvā gṛhaṃ samāgatya hutvā vaiśvānaraṃ tataḥ /
devānpitṝnmanuṣyāṃśca pūjayitvā suvāsinīḥ //
1.115.25
kanyakāścaiva saṃbhojya brāhmaṇāndaśa pañca ca /
bhakṣyabhojyairbahuvidhairdatvā dānāni bhūriśaḥ //
1.115.26
lalitā me 'stu suprītā ityuktvā tānvisarjayet /
yaḥ kaścidācaredetadvrataṃ saubhāgyadaṃ param //
1.115.27
naro vā yadi vā nārī tasya puṇyaphalaṃ śṛṇu /
yadvrataiśca tapobhiśca dānairvā niyamairapi //
1.115.28
tadeteneha labhyeta kiṃ bahūktena nārada /
mṛteranantaraṃ prāpya śivalokaṃ sanātanam //
1.115.29
modate lalitādevyā śaive vai sakhivacciram /
nabhasye māsi yā śuklā ṣaṣṭhī sā candanāhvayā //
1.115.30
tasyāṃ devīṃ samabhyarcya labhate tatsalokatām /
rohiṇī pātabhaumaistu saṃyutā kapilā bhavet //
1.115.31
tasyāṃ raviṃ samabhyarcya vratī niyamatatparaḥ /
labhate vāñchitānkāmānbhāskarasya prasādataḥ //
1.115.32
annadānaṃ japo homaṃ pitṛdevarṣitarpaṇam /
sarvamevākṣayaṃ jñeyaṃ kṛtaṃ devarṣisattama //
1.115.33
kapilāṃ dhenumabhyarcya vastramālyānule panaiḥ /
pradadyādvedaviduṣe dvādaśātmapratuṣṭaye //
1.115.34
atheṣuśuklaṣaṣṭhyāṃ tu pūjyā kātyāyanī dvija /
gandhādyairmaṅgaladravyairnaivedyairvividhaistathā //
1.115.35
tataḥ kṣamāpya deveśīṃ praṇipatya visarjayet /
pūjyātra saikatī mūrtiryadvā dvijasatī mudā //
1.115.36
vastrālaṅkaraṇairbhavyaiḥ kātyāyinyāḥ pratuṣṭaye /
kanyā varaṃ prāpnuyācca vāñcitaṃ putramaṅganā //
1.115.37
kātyāyinīprasādādvai nātra kāryā vicāraṇā /
kārtike śuklaṣaṣṭhyāṃ tu ṣaṇmukhena mahātmanā //
1.115.38
devasenā mahābhāgā labdhā sarvusurārpitā /
atastasyāṃ suraśreṣṭhāṃ devasenāṃ ca ṣaṇmukham //
1.115.39
saṃpūjya nikhilaireva upacārairmanoharaiḥ /
prāpnuyādatulāṃ siddhiṃ manobhīṣṭāṃ dvijottama //
1.115.40
atraiva vahnipūjoktāṃ tāṃ ca sampaksamācaret /
vividhadravyahomaiśca vahnipūjāpuraḥ saram //
1.115.41
mārgaśīrṣe śaklaṣaṣṭhyāṃ nihatastārakāsuraḥ /
skandena satkṛtiḥ prāptā brahamādyaiḥ parikalpitā //
1.115.42
tato 'syāṃ pūjayetskandaṃ gandhapuṣpākṣataiḥ phalaiḥ /
vastrairābhūṣaṇaścāpi naivedyairvividhaistathā //
1.115.43
ravivāreṇa saṃyuktā tathā śatabhiṣānvitā /
yadi cetsā samuddiṣṭā caṃpāhvā munisattama //
1.115.44
tasyāṃ viśveśvaro devo draṣṭavyaḥ pāpanāśanaḥ /
pūjanīyo vedanīyaḥ smartavyaḥ saukhyamicchatā //
1.115.45
snānadānādikaṃ cātra sarvamakṣayyamucyate /
pauṣamāse śuklaṣaṣṭhyāṃ devo dinapatirdvija //
1.115.46
viṣṇurūpī jagattrātā pradurbhūtāḥ sanātanaḥ //
1.115.47
sa tasmātpūjanīyo 'syāṃ dravyairgandhapuraskṛtaiḥ /
naivedyairvasttrabhūṣādyaiḥ sarvasaukhyamabhīpsubhiḥ //
1.115.48
māghamāse sitā ṣaṣṭhī varuṇāhvā smṛtā tu sā /
tasyāṃ varuṇamabhyarcyedviṣṇurūpaṃ sanātanam //
1.115.49
raktairgandhāṃśukaiḥ puṣpairnaivedyairdhūpadīpakaiḥ /
evamabhyarcya vidhivadyadyaccābhilaṣennaraḥ //
1.115.50
tattacca phalato labdhvā modate tatprasādataḥ /
phaālgune śuklaṣaṣṭhyāṃ tu devaṃ paśupatiṃ dvija //
1.115.51
mṛnmayaṃ vidhinā kṛttvā pūjayedupacārakaiḥ /
saṃsnāpya śatarudreṇa pṛthakpañcāmṛtairjalaiḥ //
1.115.52
gandhairālipya suśvetairakṣataiḥ śvetapuṣpakaiḥ /
bilvapatraiśca dhattūrakusumaiśca phalaistathā //
1.115.53
sampūjya nānānaivedyairnīrājya vidhivattataḥ /
kṣamāpya praṇipatyainaṃ kailāsāya visarjayet //
1.115.54
evaṃ kṛta śivārcastu naro nāryathavā mune /
iha bhuktvā varānbhogānante śivagatiṃ labhet //
1.115.54.p1
iti śrībṛhannāradīyapurāṇe pūrvabhāge bṛhadupākhyāne caturthapāde dvādaśamāsasthitaṣaṣṭhīvratanirūpaṇaṃ nāma pañcadaśādhikaśatatamo 'dhyāyaḥ
Linked texts (1)
- Vratakhaṇḍa — Hemādri, Sanskrit