Naradapurana 1.118
Nāradapurāṇa 1.118
- Language
- Sanskrit
Contents
- 1.118.33 — 1 part
1.118.1
sanātana uvāca
atha vakṣyāmi viprendra navamyāste vratāni vai /
yāni kṛtvā narā loke labhante vāñchitaṃ phalam //
1.118.2
caitrasya śuklapakṣe tu śrīrāmanavamīvratam /
tatropavāsaṃ vidhivacchakto bhaktaḥ samācaret //
1.118.3
aśaktaścaikabhaktaṃ vai madhyāhnotsavataḥ param /
viprānsaṃbhojya miṣṭānnai rāmaprīti sumācaret //
1.118.4
gobhūtilahariraṇyādyervastrālaṅkaraṇestathā /
eva yaḥ kurute bhaktyā śrīrāmanavamīvratam //
1.118.5
vidhūya cehapāpāni vraje dviṣṇoḥ paraṃ padam /
uktaṃ mātṛvrataṃ cātra bhairaveṇa samanvitāḥ //
1.118.6
sraggandhavasranamanaivedyaiścatuḥṣṭistu yoginīḥ /
atraiva bhadrakālo tu yoginīnāṃ mahābalā //
1.118.7
brāhmaṇaśreṣṭhaḥ sarvāsāmādhipatye 'bhiṣecitā /
tasmāttāṃ pūjayeccātra sopavāso jitendriyaḥ //
1.118.8
rādhe navamyāṃ dalayoścaṇḍikāṃ yastu pūjayet /
vidhinā sa vimānena devataiḥ saha modate //
1.118.9
jyeṣṭhaśuklanavamyāṃ tu sopavāso narottamaḥ /
umāṃ saṃpūjya vidhivatkumārīrbhojayeddvijān //
1.118.10
svabhaktyā dakṣiṇāṃ datvā śālyannaṃ payasāśnuyāt /
umāvratamidaṃ vipra yaḥ kuryādvidhivannaraḥ //
1.118.11
sa bhuktveha varānbhogānante svargagatiṃ labhet /
āṣāḍhe māsi viprendra yaḥ kuryātpakṣayordvija //
1.118.12
naktaṃ caindrīṃ samabhyarcyedairāvatagatāṃ sitām /
sa bhavedvai valoke tu bhogabhāragdevayānagaḥ //
1.118.13
śrāvaṇe māsi viprendra yaḥ kuryānnaktabhojanam /
pakṣayorupavāsaṃ vā kaumārīṃ caṇḍikāṃ yajet //
1.118.14
evaṃ pāpaharāṃ gandhaiḥ puṣpairdhūpaiśca dīpakaiḥ /
naivedyairvividhaiścaiva kumārībhojanaistathā //
1.118.15
evaṃ yaḥ kurute bhaktyā kaumārīvratamuttamam /
sa vimānena gacchedvai devīlokaṃ sanātanam //
1.118.16
bhādre tu navamī śuklā nandāhvā parikīrtitā /
tasyāṃ yaḥ pūjayeddurgāṃ vidhivaccopacārakaiḥ //
1.118.17
so 'śvamedhaphalaṃ labdhvā viṣṇuloke mahīyate /
āśvine śuklanavamī mahāpūrvā prakīrtitā //
1.118.18
aparāhne śamīpūjā kāryāsyāṃ prāgdiśi dvija /
tato niśāyāṃ prāgyāme khaḍgaṃ dhanuriṣūngadām //
1.118.19
śūlaṃ śaktiṃ ca paraśuṃ chirikāṃ carma kheṭakam /
chatraṃ dhvajaṃ gajaṃ cāśva govṛṣaṃ pustakaṃ tulām //
1.118.20
daṇḍaṃ pāśaṃ cakraśaṅkhau gandhādyairupacārakaiḥ /
saṃpūjya mahiṣaṃ tatra bhadrakālyai samālabhet //
1.118.21
evaṃ baliṃ vidhāyātha bhuktvā pakkānna meva ca /
dvijebhyo dakṣiṇāṃ datvā vrataṃ tatra samāpayet //
1.118.22
evaṃ yaḥ pūjayeddurgāṃ nṝṇāṃ durgatināśinīm /
iha bhuktvā varānbhogānante svargatimāpnuyāt //
1.118.23
kārtike śuklanavamī yākṣayā sā prakīrtatā /
tasyāmaśvatthamūle vai tarppaṇaṃ samyagācaret //
1.118.24
devānāṃ ca ṛṣīṇāṃ ca pitṝṇāṃ cāpi nārada /
svaśākhoktaistathā mantraiḥ sūryāyārghyaṃ tator'payet //
1.118.25
tato dvijānbhojayitvā miṣṭānnena munūśvara /
svayaṃ bhuktvā ca vihareddvijebhyo dattadakṣiṇaḥ //
1.118.26
evaṃ yaḥ kurute bhaktyā japadānaṃ dvijārcanam /
homaṃ ca sarvamakṣayyaṃ bhavediti vidhervayaḥ //
1.118.27
mārge tu śuklanavamī nandinī parikīrtitā /
tasyāmupoṣito yastu jagadaṃbāṃ prapūjayet //
1.118.28
gandhādyaiḥ so 'śvamedhasya phalabhāṅnātra saṃśayaḥ /
pauṣe śuklanavamyāṃ tu mahāmāyāṃ prapūjayet //
1.118.29
ekabhaktaparo vipra vājapeyaphalāptaye /
māghamāse tu vā śuklā navamī lokapūjitā //
1.118.30
mahānandeti sā proktā sadānandakarī nṛṇām /
tasyāṃ snānaṃ tathā dānaṃ japo homa upoṣaṇam //
1.118.31
sarvamakṣayatāṃ yāti nātra kāryā vicāraṇā /
phaālgunāmalapakṣasya navamī yā dvijottama //
1.118.32
ānandā sā mahāpuṇyā sarvapāpaharā smṛtā /
sopavāsor'cayettatra yastvānandāṃ dvijottama //
1.118.33
sa labhedvāñchitānkāmānsatyaṃ satyaṃ mayoditam //
1.118.33.p1
iti śrībṛhannāradīyapurāṇe pūrvabhāge bṛhadupākhyāne caturthapāde dvādaśamāsasthitanavamīvratakathanaṃ nāmāṣṭādaśādhikaśatatamo 'dhyāyaḥ
Linked texts (2)
- Brahmavaivartapurāṇa — Vyāsa, Sanskrit
- Yoginītantra — Sanskrit