Pramāṇa · Search · About · API

Naradapurana 1.119

Nāradapurāṇa 1.119

Language
Sanskrit

Contents

1.119.1

sanātana uvāca
atha te 'haṃ pravakṣyāmi daśamyā vai vratāni ca /
yāni kṛtvā naro bhaktyā dharmarājapriyo bhavet //

1.119.2

caitraśuklada śamyāṃ tu dharmarājaṃ prapūjayet /
tatkālasaṃbhavaiḥ puṣpaiḥ phalairgandhādibhistathā //

1.119.3

sopavāso vaikabhakto bhojayitvā dvijottamān /
caturddaśatatastebhyaḥ śaktyā dadyācca dakṣiṇām //

1.119.4

evaṃ yaḥ kurute vipra dharmarājaprapūjanam /
sa dharmasyājñayāgaccheddevaiḥ sādharmyamacyutaḥ //

1.119.5

daśamyāṃ mādhave śukle viṣṇumabhyarcya mānavaḥ /
gandhādyairupacāraiśca śvetapuṣpaiḥ sugandhibhiḥ //

1.119.6

śataṃ pradakṣiṇāḥ kṛtvā vipransaṃbhojya yatnataḥ /
labhate vaiṣṇavaṃ lokaṃ nātra kāryā vicāraṇā //

1.119.7

jyeṣṭhe śukladaśamyāṃ tu jāhnavī saritāṃ varā /
samāyātā dharāṃ svargāttasmātsā puṇyadā smṛtā //

1.119.8

jyeṣṭhaḥ śukladalaṃ hasto budhaśca daśamīḥ tithiḥ /
garānandavyatīpātāḥ kanyenduvṛṣabhāskarāḥ //

1.119.9

daśayogaḥ samākhyāto mahāpuṇyatamo dvija /
harate daśa pāpāni tasmāddaśaharaḥ smṛtaḥ //

1.119.10

asyāṃ yo jāhnavīṃ prāpya snāti saṃprītamānasaḥ /
vidhinā jāhnavītoye sa yāti harimandiram //

1.119.11

āṣāḍhaśukladaśamī puṇyā manvā dikaiḥ smṛtā /
tasyāṃ snānaṃ japo dānaṃ homo vā svargatipradāḥ //

1.119.12

śrāvaṇe śukladaśamī sarvāśāparipūrtidā /
asyāṃ śivārcanaṃ śastaṃ gandhādyai rupacārakaiḥ //

1.119.13

tatropavāso naktaṃ vā dvijānāṃ bhojanaṃ japaḥ /
hemno dāna ca dhenvādeḥ sarvapāpapraṇāśanam //

1.119.14

atho nabhasyaśuklāyāṃ daśamyāṃ dvijasattama /
vrataṃ daśāvatārākhyaṃ tatra snānaṃ jalāśaye //

1.119.15

kṛtvā saṃdhyādiniyamaṃ devarṣipitṛtarpaṇam /
tato daśāvatārāṇi samabhyarcetsa māhitaḥ //

1.119.16

matsyaṃ kūrmaṃ varāhaṃ ca narasiṃhaṃ trivikramam /
rāmaṃ rāmaṃ ca kṛṣṇaṃ ca bauddhaṃ kalkinameva ca //

1.119.17

daśamūrtistu sauvarṇīḥ pūjayitvā vidhānataḥ /
daśabhyo vipravaryebhyo dadyātsatkṛtya nārada //

1.119.18

upavāsaṃ caikabhaktaṃ kṛtvā saṃbhojya vāḍavān /
visṛjya paścādbhuñjīta svayaṃ sveṣṭaiḥ samāhitaḥ //

1.119.19

bhaktyā kṛtvā vrataṃ tvetadbhuktvā bhogānihottamān /
vimānena vrajedante viṣṇulokaṃ sanātanam //

1.119.20

āśvine śukladaśamī vijayā sā prakīrtitā /
caturgomayapiṇḍāni prātarnyasya gṛhāṅgaṇe //

1.119.21

cakravālasvarūpeṇa tanmadhye rāmalakṣmaṇau /
tathā bharataśatrughnau pūjayeccaturo 'pi hi //

1.119.22

sapidhānāsu pātrīṣu gomayīṣu catasṛṣṭa /
kinnaṃ dhānyaṃ saraupyaṃ tu dhṛtvā dhautāṃśukāvṛtam //

1.119.23

pitṛmātṛbhrātṛputrajāyā bhṛtyasamanvitam /
saṃpūjyaṃ gandhapuṣpādyairnaivedyaiśca vidhānataḥ //

1.119.24

namaskṛtyātha bhuñjīta dvijānsaṃbhojya pūjitān /
evaṃ kṛtvā vidhānaṃ tu naro varṣaṃ suravānvitaḥ //

1.119.25

dhanadhānyasamṛddhaśca niścitaṃ jāyate dvija /
athāpārāhnasamaye navamyāṃ saṃnimantritām //

1.119.26

pūrvadikṣu śamīṃ vipra gatvā tanmūlajāṃ mṛdam /
gṛhītvā svagṛhaṃ prāpya gītavāditraniḥsvanaiḥ //

1.119.27

saṃpūjya tāṃ vidhānena sajjīkṛtya svakaṃ balam /
nirgatya pūrvadvāreṇa grāmādbrahiranākulaḥ //

1.119.28

tataḥ śatrupratikṛtiṃ nirmitāṃ patrakādibhiḥ /
manasā kalpitāṃ vāpi svarṇaṃ puṃravaṃśareṇa vai //

1.119.29

vidhyediti bhṛśaṃ prītaḥ prāpnuyātsvagṛhaṃ niśi /
evaṃ kṛtavidhirvāpi gacchedvā śatrunigrahe //

1.119.30

eṣaivaṃ daśamī vipra vidhinā'caritā sadā /
dhanaṃ jayaṃ sutān gāśca gajāśvaṃ vāpyajāvikam //

1.119.31

dadyādiha śarīrānte svargatiṃ cāpi nārada /
daśamyāṃ kārtike śukle sārvabhaumavrataṃ caret //

1.119.32

kṛtopavāso vaikāśī niśīthe 'pūpakādibhiḥ /
daśadikṣu baliṃ dadyād gṛhadvāpi purādbrahiḥ //

1.119.33

maṇḍale 'ṣṭadale kḷpte goviḍliptadharātale /
mantrairebhirdvijaśreṣṭha gaṇeśādikṛtārcanaḥ //

1.119.34

yo me pūrvagataḥ pāpmā pāpakeneha karmaṇā /
tamindro devarā jo 'dya nāśayatvakhileṣṭadaḥ //

1.119.35

yo me vahnigataḥ pāpmā pāpakeneha karmaṇā /
tejorājo 'tha vahnistaṃ nāśayatvakhileṣṭadaḥ //

1.119.36

yo me dakṣagataḥ pāpmā pāpakeneha karmaṇā /
taṃ yamaḥ pretarājo vai nāśayatvakhileṣṭadaḥ //

1.119.37

yo me nairṛtigaḥ pāpmā pāpakeneha karmaṇā /
rakṣorājo nairṛtistaṃ nāśayatvakhileṣṭadaḥ //

1.119.38

yo me paścimagaḥ pāpmā pāpakenehakarmaṇā /
yādaḥ patistaṃ varuṇo nāśayatvakhileṣṭadaḥ //

1.119.39

yo me vāyugataḥ pāpmā pāpakeneha karmaṇā /
vāyustaṃ marutāṃ rājo nāśayatvakhileṣṭadaḥ //

1.119.40

yo me saumyagataḥ pāpmā pāpakeneha karmaṇā /
somastamṛkṣayakṣeśo nāśayatvakhileṣṭadaḥ //

1.119.41

yo ma īśagataḥ pāpmā pāpakeneha karmaṇā /
īśāno bhūtanāthastaṃ nāśayatvakhileṣṭadaḥ //

1.119.42

yo maṃ ūrddhvagataḥ pāpmā pāpakeneha karmaṇā /
brahmā prajāpatīśastaṃ nāśayatvakhileṣṭadaḥ //

1.119.43

yo me 'dhaḥsaṃsthitaḥ pāpmā pāpakeneha karmaṇā /
ananto nāgarājastaṃ nāśayatvakhileṣṭadaḥ //

1.119.44

ityevaṃ dikṣu daśasu baliṃ datvā samāhitaḥ /
kṣetrapālāya tadbāhye kṣipedbalimatandritaḥ //

1.119.45

evaṃ kṛtavidhiḥ śeṣaṃ niśāyāṃ ninayetsudhīḥ /
gītaiḥ sumaṅgalaprāyaiḥ stavapāṭhairjapādibhiḥ //

1.119.46

prātaḥ snātvā samabhyarcya lokapālān dvijottamān /
dvādaśābhyarcya saṃbhojya śaktito dakṣiṇāṃ dadet //

1.119.47

itthaṃ kṛtvā vrataṃ vipra bhogānbhuktaihikāñchubhān /
yugaṃ svargasukhaṃ bhuktvā sārvabhaumo nṛpo bhavet //

1.119.48

mārgaśukladaśamyāṃ tu caredā rogyakaṃ vratam /
gandhādyairarcayedviprān daśa taccaraṇodakam //

1.119.49

pītvātha dakṣiṇāṃ datvā visūjedekabhojanaṃ /
etatkṛtvā vrataṃ vipra hyārogyaṃ prāpya bhūtale //

1.119.50

dharmarājaprasādena modate divi devavat /
pauṣe daśamyāṃ śuklāyāṃ viśvedevān samarcayet //

1.119.51

ṛtuṃ dakṣaṃ vasū6nsatyaṃ kālaṃ kāmaṃ muniṃ gurum /
vipraṃ rāmaṃ ca daśadhā keśavastānsamāsthitaḥ //

1.119.52

svāpayitvā darbhamayānāsaneṣu ca saṃsthitān /
gandhairdhūpaistathā dīpairnaivedyaiścāpi nārada //

1.119.53

pratyekaṃ dakṣiṇāṃ datvā praṇiyatya visarjayet /
dakṣiṇāṃ tāṃ dvijāgryebhyo gurave vā samarpayet //

1.119.54

evaṃ kṛtavidhi ścaikabhakto bhogī vratī bhavet /
lokadvayasya viprarṣe nātra kāryā vicāraṇā //

1.119.54.p1

māghaśukladaśamyāṃ tu sopavāso jitendriyaḥ ///

1.119.55

devāṃnagiraso nāma daśa samyaksamarcayet //

1.119.56

kṛtvā svarṇamayānvipra gandhādyairupacārakaiḥ /
ātmā hyāyurmano dakṣo madaḥ prāṇastathaiva ca //

1.119.57

barhiṣmāṃśca gaviṣṭhaśca dattaḥ satyaśca te daśa /
daśa viprānbhojayitvā madhurānnena nārada //

1.119.58

mūrtīstebhyaḥ pradadyāttāḥ svargalokāptaye kramāt /
antyaśukladaśamyāṃ tu caturdaśaṃ yamānyajet //

1.119.59

yamaśca dharmarājaśca mṛtyuścaivāntakastathā /
vaivasvataśca kālaśca sarvabhūtakṣayastathā //

1.119.60

audumbaraśca daghnaśca dvau nīlaparameṣṭhinau /
vṛkodaraścacitraśca citraguptaścaturdaśa //

1.119.61

gandhādyairupacāraiśca samabhyarcyāthatarpayet /
tilāṃbumiśrāñjalibhirdarbhaiḥ pratyekaśastribhiḥ //

1.119.62

tataśca dadyātsūryārghaṃ tāmrapātreṇa nārada /
raktacandanasaṃmiśratilākṣatayavāṃbubhiḥ //

1.119.63

ehi sūryasahasrāṃśo tejorāśe jagatpate /
gṛhāṇārghyaṃ mayā dattaṃ bhaktyā māmanukaṃpaya //

1.119.64

iti mantreṇa datvārghyaṃ viprānbhojya caturddaśa /
raupyāṃ sudakṣiṇāṃ datvā visṛjyāśnīta ca svayam //

1.119.65

evaṃ kṛtavidhirvipra dharmarājaprasādataḥ /
bhuktvā bhogāṃśca putrārthānaihikāndevadurlabhān //

1.119.66

vimānavaramāsthāya dehānte viṣṇulokabhāk //

1.119.66.p1

iti śrībṛhannāradīyapurāṇe pūrvabhāge bṛhadupākhyāne caturthapāde dvādaśamāsasthitadaśamīvratanirūpaṇaṃ nāmaikonaviṃśatyadhikaśatatamo 'dhyāyaḥ

Linked texts (6)