Pramāṇa · Search · About · API

Naradapurana 1.122

Nāradapurāṇa 1.122

Language
Sanskrit

Contents

1.122.1

sanātana uvāca
athātaṛ saṃpravakṣyāmi trayodaśyā vratāni te /
yāni kṛtvā naro bhaktyā subhago jāyate bhuvi //

1.122.2

madhau śuklatrayodaśyāṃ madanaṃ candanātmakam /
kṛtvā saṃpūjya yatnena vījeyavdyajanena ca //

1.122.3

tataḥ saṃkṣudhitaḥ kāmaḥ putrapautravivarddhanaḥ /
anaṅgapūjāpyatroktā tāṃ nibodha munīśvara //

1.122.4

sindūrarajanīrāgaiḥ phalake 'naṅgamālikhet /
ratiprītiyutaṃ ślakṣṇaṃ puṣpacāpeṣudhāriṇam //

1.122.5

kāmadevaṃ vasantaṃ ca vājivaktraṃ vṛṣadhvajam /
madhyāhne pūjayedbhaktyā gandhasragbhūṣaṇāṃśukaiḥ //

1.122.6

kṣabhyairnānāvidhaiścāpi mantreṇānena nārada /
namo mārāya kāmāya kāmadevasya mūrttaye //

1.122.7

brahmaviṣṇuśivendrāṇāṃ manaḥbhobhakarāya vai /
tattasyāgrato bhaktyā pūjayedaṅganāpatim //

1.122.8

vastramālyāvibhūṣādyaiḥ kāmo 'yamiti cintayet /
saṃpūjya dvijadāṃpatyaṃ gandhavastravibhūṣaṇaiḥ //

1.122.9

evaṃ yaḥ kurute vipra varṣe varṣe mahotsavam /
vasaṃtasamaye prāpte hṛṣṭaḥ puṣṭaḥ sadaiva saḥ //

1.122.10

pratimāsaṃ pūjayedvā yāvadvarṣaṃ samāpyate /
madanaṃ hṛdbhavaṃ kāmaṃ manmathaṃ ca ratipriyam //

1.122.11

anaṅgaṃ caiva kandarpaṃ pūjayenmakaradhvajam /
kusumāyudhasaṃjñaṃ ca tataḥ paścānmanobhavam //

1.122.12

viṣameṣu tathā vipra mālartāpriyamityapi /
ajāyā dānamapyuktaṃ snātvā nadyā vidhānataḥ //

1.122.13

ajāḥ payasvinīrdadyāddaridrāya kuṭuṃbine /
bhūyastvanena dānena sa loke naiva jāyate //

1.122.14

yadīyaṃ śaninā yuktā sā mahāvāruṇī smṛtā /
gaṅgāyāṃ yadi labhyeta koṭisūryagrahādhikā //

1.122.15

śubhayogaḥ śatarkṣaṃ ca śanau kāme madhau site /
mahāmaheti vikhyātā kulakoṭivimuktidā //

1.122.16

rādhaśuklatrayodaśyāṃ kāmadevavrataṃ smṛtam /
tatra gandhādibhiḥ kāmaṃ pūjayedupavāsavān //

1.122.17

pratimāsaṃ tataḥ paścāttrayodaśyāṃ site dale /
evameva vrataṃ kāryaṃ varṣānte gāmalaṅkṛtām //

1.122.18

dadyādviprāya satkṛtya vratasāṃgatvasiddhaye /
jyeṣṭhaśuklatrayodaśyāṃ daurbhāgyaśamanaṃ vratam //

1.122.19

tatra snātvā nadītoye pūjayecchucideśajam /
śvetamandāramarkaṃ vā karavīraṃ ca raktakam //

1.122.20

nirīkṣya gagane sūryaṃ prārthayenmantratastadā /
mandārakaravīrārkā bhavanto bhāskarāṃśajāḥ //

1.122.21

pūjitā mama daurbhāgyaṃ nāśayantu namo 'stu vaḥ /
itthaṃ yor'cayate bhaktyā varṣe varṣe drumatrayam //

1.122.22

naśyate tasya daurbhāgyaṃ nātra kāryā vicāraṇā /
śuciśuklatrayodaśyāmekabhaktaṃ samācaret //

1.122.23

pūjayitvā jagannāthāvumāmāheśvarī tanūḥ /
haimyau raupyau ca mṛnmapyau yathāśaktyā vidhāya ca //

1.122.24

siṃhokṣasthe devagṛhe goṣṭhe brāhmaṇaveśmani /
sthāpayitvā pratiṣṭhāpya daivamantreṇa nārada //

1.122.25

tataḥ pañcadinaṃ pūjā caikabhaktaṃ vrataṃ tathā /
tṛtīyadivase prātaḥ snātvā saṃpūjya tau punaḥ //

1.122.26

samarpaṇīyau viprāya vedavedāṅgaśāline /
varṣe varṣe tataḥ paścādvidheyaṃ varṣapañcakam //

1.122.27

tadante dhenuyugmena sahitau tau pradāpayet /
itthaṃ naro vā nārī vā kṛtvā vratamidaṃ śubham //

1.122.28

naiva dāṃpatyavicchedaṃ labhate saptajanmasu /
nabhaḥ śuklatrayodaśyāṃ ratikāmavrataṃ śubham //

1.122.29

vaidhavyavāraṇaṃ strīṇāṃ tathā saṃtānavardhanam /
kṛtopavāsā kanyaiva nārī vā dvijasattama //

1.122.30

tāmre vā mṛnmaye vāpi sauvarṇe rājate tathā /
ratikāmau pravinyasya gandhādyaiḥ samyagarcayet //

1.122.31

tatastu dvijadāṃpatyaṃ caturdaśyāṃ nimantrya ca /
satakṛtya bhojya pratime dadyāttābhyāṃ sadakṣiṇe //

1.122.32

evaṃ caturdaśābdaṃ ca kṛtvā vratamanuttamam /
dhenuyugmānvite deye vratasaṃpūrtihetave //

1.122.33

bhādraśuklatrayodaśyāṃ gotrirātravrataṃ smṛtam /
lakṣmīnārāyaṇaṃ kṛtvā sauvarṇaṃ vāpi rājatam //

1.122.34

pañcāmṛtena saṃsnāpya maṇḍale 'ṣṭadale śubhe /
pīṭhe vinyasya vastrāḍhyaṃ gandhādyaiḥ paripūjayet //

1.122.35

ārārtikaṃ tataḥ kṛtvā dadyātsānnodakaṃ ghaṭam /
evaṃ dinatrayaṃ kṛtvā vratānte māsamarcya ca //

1.122.36

samyagarthaṃ ca saṃpādya dadyānmantreṇa nārada /
pañcagāvaḥ samutpannā mathyamāne mahodadhau //

1.122.37

tāsāṃ madhye tu yā nandā tasyai dhenvai namo namaḥ /
pradakṣiṇīkṛtya tato dadyādviprāya mantrataḥ //

1.122.38

gāvo mamāgrataḥ santu gāvo me saṃtu pṛṣṭhataḥ /
gāvo me pārśvataḥ saṃtu gavāṃ madhye vasāmyaham //

1.122.39

tataśca dvijadāṃpatyaṃ samyagabhyarcya bhojayet /
lakṣmīnārāyaṇaṃ tasmai satkṛtya pratipādayet //

1.122.40

aśvamedhasahasrāṇi rājasūyaśatāni ca /
kṛtvā yatphalamāpnoti gotrirātravratācca tat //

1.122.41

iṣe śuklatrayodaśyāṃ trirātraśokakavratam /
haimaṃ hyaśokaṃ nirmāya pūjayitvā vidhānataḥ //

1.122.42

upavāsaparā nārī nityaṃ kuryātpradakṣiṇāḥ /
aṣṭottaraśataṃ vipra mantreṇānena sādaram //

1.122.43

hareṇa nirmitaḥ pūrvaṃ tvamaśoka kṛpālunā /
lokopakārakaraṇastatprasīda śivapriya //

1.122.44

tatastṛtīye divase vṛkṣe tasminvṛṣadhvajam /
samabhyarcya vidhānena dvijaṃ saṃbhojya dāpayet //

1.122.45

evaṃ kṛtavratā nārī vaidhavyaṃ nāpnuyātkvacit /
putrapautrādi sahitā bhartuśca syātsuvallabhā //

1.122.46

ūrjjakṛṣṇatrayodaśyāmekabhaktaḥ samāhitaḥ /
pradoṣe tailadīpaṃ tu prajvālyābhyarcya yatnataḥ //

1.122.47

gṛhadvāre bahirdadyādyamo me prīyatāmiti /
evaṃ kṛte tu viprendra yamapīḍā na jāyate //

1.122.48

ūrjśuklatrayodaśyāmekabhojī dvijottama /
punaḥ snātvā pradoṣe tu vāgyataḥ susamāhitaḥ //

1.122.49

pradīpānāṃ sahasreṇa śatenāpyathavā dvija /
pradīpayecchivaṃ vāpi dvātriṃśaddīpamālayā //

1.122.50

ghṛtena dīpayeddvīpāngandhādyaiḥ pūjayecchivam /
phalairnānāvidhaiścaiva naivedyairapi nārada //

1.122.51

tataḥ stuvīta deveśaṃ śivaṃ nāmnāṃ śatena ca /
tāni nāmāni kīrtyante sarvābhīṣṭapradāni vai //

1.122.52

namo rudrāya bhīmāya nīlakaṇṭhāya vedhase /
kaparddine sureśāya vyomakeśāya vai namaḥ //

1.122.53

vṛṣadhvajāya somāya somanāthāya vai namaḥ /
digaṃbarāya bhṛṅgāya umākāntāya varddhine //

1.122.54

tapomayāya vyāptāya śipiviṣyāya vai namaḥ /
vyālapriyāya vyālāya vyālānāṃ pataye namaḥ //

1.122.55

mahīdharāya vyomāya paśūnāṃ pataye namaḥ /
tripuraghnāya siṃhāya śārdūlāyārṣabhāya ca //

1.122.56

mitāya mitanāthāya siddhāya parameṣṭhine /
vedagītāya guptāya vedaguhyāya vai namaḥ //

1.122.57

dīrghāya dīrgharūpāya dīrghārthāya mahīyase /
namo jagatpratiṣṭhāya vyomarūpāya vai namaḥ //

1.122.58

kalyāṇāya viśiṣyāya śiṣṭāya paramātmane /
gajakṛtti dharāyātha andhakāsurabhedine //

1.122.59

nīlalohitaśuklāya caḍamuṇḍapriyāya ca /
bhaktipriyāya devāya yajñāntāyāvyayāya ca //

1.122.60

maheśāya namastubhyaṃ mahādevaharāya ca /
trinetrāya trivedāya vedāṅgāya namo namaḥ //

1.122.61

arthāyārthasvarūpāya paramārthāya vai namaḥ /
viśvarūpāya viśvāya viśvanāthāya vai namaḥ //

1.122.62

śaṅkarāya ca kālāya kālāvayavarūpiṇe /
arūpāya virūpāya sūkṣmasūkṣmāya vai namaḥ //

1.122.63

śmaśānavāsine tubhyaṃ namaste kṛttivāsase /
śaśāṅkaśekharāyātha rudrabhūmiśritāya ca //

1.122.64

durgāya durgapārāya durgāvayavasākṣiṇe /
liṅgarūpāya liṅgāya liṅgānapataye namaḥ //

1.122.65

namaḥ prabhāvarūpāya prabhāvārthāya vai namaḥ //

1.122.66

namo namaḥ kāraṇakāraṇāya te mṛtyuñjayāyātmabhavasvarūpiṇe /
triyaṃbakāya śitikaṇṭhabhārgiṇe gaurīyuje maṅgalahetave namaḥ //

1.122.67

nāmnāṃ śatamidaṃ vipra pinākiguṇakīrtanam /
paṭhitvā dakṣiṇīkṛtya prāyānnijaniketanam //

1.122.68

evaṃ kṛtvā vrataṃ vipra mahādevaprasādataḥ /
bhuktveha bhogānakhilānante śivapadaṃ labhet //

1.122.69

mārgaśuklatrayodaśyāṃ yo 'naṅgaṃ vidhinā yajet /
trikālamekakālaṃ vā śivasaṃgamasaṃbhavam //

1.122.70

gandhādyairupacāraistu pūjayitvā vidhānataḥ /
ghaṭe maṅgalapaṭṭe vā bhojayeddvijadaṃpatī //

1.122.71

tataśca dakṣiṇāṃ datvā svayamekāśanaṃ caret /
evaṃ kṛte tu vidhivadvratī saubhāgyabhājanaḥ //
jāyate bhuvi viprendra mahādevaprasādataḥ //

1.122.72

pauṣaśuklatrayodaśyāṃ samabhyarcyācyutaṃ harim /
ghṛtapātraṃ dvijendrāya pradadyātsarvasiddhaye //

1.122.73

māghaśuklatrayodaśyāṃ samārabhya dinatrayam /
māghasnānavrataṃ vipra nānākāmaphalāvaham //

1.122.74

prayāge māghamāse tu tryahaṃ snātasya yatphalam /
nāśvameghasahasreṇa tatphalaṃ labhate bhuvi //

1.122.75

tatra snānaṃ japo homo dānaṃ cānantyamaśnute /
phaālgune tu site pakṣe trayodaśyāmupoṣitaḥ //

1.122.76

namaskṛtya jagannāthaṃ prāraṃbhe dhanadavratam /
mahārājaṃ yakṣapatiṃ gandhādyairupacārakaiḥ //

1.122.77

likhitaṃ varṇakaiḥ paṭṭe pūjayedbhaktibhāvataḥ /
evaṃ śuklatrayodaśyāṃ pratimāsaṃ dvijottama //

1.122.78

saṃpūjayetsopavāsaścaikabhukto bhavennaraḥ /
tato vratānte tu punaḥ sauvarṇaṃ dhananāyakam //

1.122.79

vidhāya nidhibhiḥ sārddhaṃ sauvarṇābhirdvijottama /
upacāraiḥ ṣoḍaśabhiḥ snānaiḥ pañcāmṛtādibhiḥ //

1.122.80

naivedyairvividhairbhaktyā pūjayettu samāhitaḥ /
tato dhenumalaṅkṛtya vastrasraggandhabhūṣaṇaiḥ //

1.122.81

savatsāṃ dāpayedvipra samyagvedavide śubhām /
saṃbhojya viprānmiṣṭānnairdvādaśātha trayodaśa //

1.122.82

guruṃ samarcya vastrādyaiḥ pratimāṃ tāṃ nivedayet /
dvijebhyo dakṣaṇāṃ śaktyā datvā natvā visṛjya ca //

1.122.83

svayaṃ bhuñjīta matimāniṣṭaiḥ saha samāhitaḥ /
evaṃ kṛte vrate vipra nirdhanaḥ prāpya vaibhavam //

1.122.84

modate bhuvi vikhyāto rājarāja ivāparaḥ //

1.122.84.p1

iti śrībṛhannāradīyapurāṇe pūrvabhāge bṛhadupākhyāne dvādaśamāsasthitatrayodaśīvratakathanaṃ nāma dvāviṃśadadhikaśatatamo 'dhyāyaḥ

Linked texts (6)