[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 1.122 # Naradapurana 1.122 Nāradapurāṇa 1.122 - **Language:** Sanskrit ## Contents - [1.122.84](https://indike.org/pramana/in.purana.narada.1.122.84) — 1 part ### [1.122.1](https://indike.org/pramana/in.purana.narada.1.122.1) sanātana uvāca athātaṛ saṃpravakṣyāmi trayodaśyā vratāni te / yāni kṛtvā naro bhaktyā subhago jāyate bhuvi // ### [1.122.2](https://indike.org/pramana/in.purana.narada.1.122.2) madhau śuklatrayodaśyāṃ madanaṃ candanātmakam / kṛtvā saṃpūjya yatnena vījeyavdyajanena ca // ### [1.122.3](https://indike.org/pramana/in.purana.narada.1.122.3) tataḥ saṃkṣudhitaḥ kāmaḥ putrapautravivarddhanaḥ / anaṅgapūjāpyatroktā tāṃ nibodha munīśvara // ### [1.122.4](https://indike.org/pramana/in.purana.narada.1.122.4) sindūrarajanīrāgaiḥ phalake 'naṅgamālikhet / ratiprītiyutaṃ ślakṣṇaṃ puṣpacāpeṣudhāriṇam // ### [1.122.5](https://indike.org/pramana/in.purana.narada.1.122.5) kāmadevaṃ vasantaṃ ca vājivaktraṃ vṛṣadhvajam / madhyāhne pūjayedbhaktyā gandhasragbhūṣaṇāṃśukaiḥ // ### [1.122.6](https://indike.org/pramana/in.purana.narada.1.122.6) kṣabhyairnānāvidhaiścāpi mantreṇānena nārada / namo mārāya kāmāya kāmadevasya mūrttaye // ### [1.122.7](https://indike.org/pramana/in.purana.narada.1.122.7) brahmaviṣṇuśivendrāṇāṃ manaḥbhobhakarāya vai / tattasyāgrato bhaktyā pūjayedaṅganāpatim // ### [1.122.8](https://indike.org/pramana/in.purana.narada.1.122.8) vastramālyāvibhūṣādyaiḥ kāmo 'yamiti cintayet / saṃpūjya dvijadāṃpatyaṃ gandhavastravibhūṣaṇaiḥ // ### [1.122.9](https://indike.org/pramana/in.purana.narada.1.122.9) evaṃ yaḥ kurute vipra varṣe varṣe mahotsavam / vasaṃtasamaye prāpte hṛṣṭaḥ puṣṭaḥ sadaiva saḥ // ### [1.122.10](https://indike.org/pramana/in.purana.narada.1.122.10) pratimāsaṃ pūjayedvā yāvadvarṣaṃ samāpyate / madanaṃ hṛdbhavaṃ kāmaṃ manmathaṃ ca ratipriyam // ### [1.122.11](https://indike.org/pramana/in.purana.narada.1.122.11) anaṅgaṃ caiva kandarpaṃ pūjayenmakaradhvajam / kusumāyudhasaṃjñaṃ ca tataḥ paścānmanobhavam // ### [1.122.12](https://indike.org/pramana/in.purana.narada.1.122.12) viṣameṣu tathā vipra mālartāpriyamityapi / ajāyā dānamapyuktaṃ snātvā nadyā vidhānataḥ // ### [1.122.13](https://indike.org/pramana/in.purana.narada.1.122.13) ajāḥ payasvinīrdadyāddaridrāya kuṭuṃbine / bhūyastvanena dānena sa loke naiva jāyate // ### [1.122.14](https://indike.org/pramana/in.purana.narada.1.122.14) yadīyaṃ śaninā yuktā sā mahāvāruṇī smṛtā / gaṅgāyāṃ yadi labhyeta koṭisūryagrahādhikā // ### [1.122.15](https://indike.org/pramana/in.purana.narada.1.122.15) śubhayogaḥ śatarkṣaṃ ca śanau kāme madhau site / mahāmaheti vikhyātā kulakoṭivimuktidā // ### [1.122.16](https://indike.org/pramana/in.purana.narada.1.122.16) rādhaśuklatrayodaśyāṃ kāmadevavrataṃ smṛtam / tatra gandhādibhiḥ kāmaṃ pūjayedupavāsavān // ### [1.122.17](https://indike.org/pramana/in.purana.narada.1.122.17) pratimāsaṃ tataḥ paścāttrayodaśyāṃ site dale / evameva vrataṃ kāryaṃ varṣānte gāmalaṅkṛtām // ### [1.122.18](https://indike.org/pramana/in.purana.narada.1.122.18) dadyādviprāya satkṛtya vratasāṃgatvasiddhaye / jyeṣṭhaśuklatrayodaśyāṃ daurbhāgyaśamanaṃ vratam // ### [1.122.19](https://indike.org/pramana/in.purana.narada.1.122.19) tatra snātvā nadītoye pūjayecchucideśajam / śvetamandāramarkaṃ vā karavīraṃ ca raktakam // ### [1.122.20](https://indike.org/pramana/in.purana.narada.1.122.20) nirīkṣya gagane sūryaṃ prārthayenmantratastadā / mandārakaravīrārkā bhavanto bhāskarāṃśajāḥ // ### [1.122.21](https://indike.org/pramana/in.purana.narada.1.122.21) pūjitā mama daurbhāgyaṃ nāśayantu namo 'stu vaḥ / itthaṃ yor'cayate bhaktyā varṣe varṣe drumatrayam // ### [1.122.22](https://indike.org/pramana/in.purana.narada.1.122.22) naśyate tasya daurbhāgyaṃ nātra kāryā vicāraṇā / śuciśuklatrayodaśyāmekabhaktaṃ samācaret // ### [1.122.23](https://indike.org/pramana/in.purana.narada.1.122.23) pūjayitvā jagannāthāvumāmāheśvarī tanūḥ / haimyau raupyau ca mṛnmapyau yathāśaktyā vidhāya ca // ### [1.122.24](https://indike.org/pramana/in.purana.narada.1.122.24) siṃhokṣasthe devagṛhe goṣṭhe brāhmaṇaveśmani / sthāpayitvā pratiṣṭhāpya daivamantreṇa nārada // ### [1.122.25](https://indike.org/pramana/in.purana.narada.1.122.25) tataḥ pañcadinaṃ pūjā caikabhaktaṃ vrataṃ tathā / tṛtīyadivase prātaḥ snātvā saṃpūjya tau punaḥ // ### [1.122.26](https://indike.org/pramana/in.purana.narada.1.122.26) samarpaṇīyau viprāya vedavedāṅgaśāline / varṣe varṣe tataḥ paścādvidheyaṃ varṣapañcakam // ### [1.122.27](https://indike.org/pramana/in.purana.narada.1.122.27) tadante dhenuyugmena sahitau tau pradāpayet / itthaṃ naro vā nārī vā kṛtvā vratamidaṃ śubham // ### [1.122.28](https://indike.org/pramana/in.purana.narada.1.122.28) naiva dāṃpatyavicchedaṃ labhate saptajanmasu / nabhaḥ śuklatrayodaśyāṃ ratikāmavrataṃ śubham // ### [1.122.29](https://indike.org/pramana/in.purana.narada.1.122.29) vaidhavyavāraṇaṃ strīṇāṃ tathā saṃtānavardhanam / kṛtopavāsā kanyaiva nārī vā dvijasattama // ### [1.122.30](https://indike.org/pramana/in.purana.narada.1.122.30) tāmre vā mṛnmaye vāpi sauvarṇe rājate tathā / ratikāmau pravinyasya gandhādyaiḥ samyagarcayet // ### [1.122.31](https://indike.org/pramana/in.purana.narada.1.122.31) tatastu dvijadāṃpatyaṃ caturdaśyāṃ nimantrya ca / satakṛtya bhojya pratime dadyāttābhyāṃ sadakṣiṇe // ### [1.122.32](https://indike.org/pramana/in.purana.narada.1.122.32) evaṃ caturdaśābdaṃ ca kṛtvā vratamanuttamam / dhenuyugmānvite deye vratasaṃpūrtihetave // ### [1.122.33](https://indike.org/pramana/in.purana.narada.1.122.33) bhādraśuklatrayodaśyāṃ gotrirātravrataṃ smṛtam / lakṣmīnārāyaṇaṃ kṛtvā sauvarṇaṃ vāpi rājatam // ### [1.122.34](https://indike.org/pramana/in.purana.narada.1.122.34) pañcāmṛtena saṃsnāpya maṇḍale 'ṣṭadale śubhe / pīṭhe vinyasya vastrāḍhyaṃ gandhādyaiḥ paripūjayet // ### [1.122.35](https://indike.org/pramana/in.purana.narada.1.122.35) ārārtikaṃ tataḥ kṛtvā dadyātsānnodakaṃ ghaṭam / evaṃ dinatrayaṃ kṛtvā vratānte māsamarcya ca // ### [1.122.36](https://indike.org/pramana/in.purana.narada.1.122.36) samyagarthaṃ ca saṃpādya dadyānmantreṇa nārada / pañcagāvaḥ samutpannā mathyamāne mahodadhau // ### [1.122.37](https://indike.org/pramana/in.purana.narada.1.122.37) tāsāṃ madhye tu yā nandā tasyai dhenvai namo namaḥ / pradakṣiṇīkṛtya tato dadyādviprāya mantrataḥ // ### [1.122.38](https://indike.org/pramana/in.purana.narada.1.122.38) gāvo mamāgrataḥ santu gāvo me saṃtu pṛṣṭhataḥ / gāvo me pārśvataḥ saṃtu gavāṃ madhye vasāmyaham // ### [1.122.39](https://indike.org/pramana/in.purana.narada.1.122.39) tataśca dvijadāṃpatyaṃ samyagabhyarcya bhojayet / lakṣmīnārāyaṇaṃ tasmai satkṛtya pratipādayet // ### [1.122.40](https://indike.org/pramana/in.purana.narada.1.122.40) aśvamedhasahasrāṇi rājasūyaśatāni ca / kṛtvā yatphalamāpnoti gotrirātravratācca tat // ### [1.122.41](https://indike.org/pramana/in.purana.narada.1.122.41) iṣe śuklatrayodaśyāṃ trirātraśokakavratam / haimaṃ hyaśokaṃ nirmāya pūjayitvā vidhānataḥ // ### [1.122.42](https://indike.org/pramana/in.purana.narada.1.122.42) upavāsaparā nārī nityaṃ kuryātpradakṣiṇāḥ / aṣṭottaraśataṃ vipra mantreṇānena sādaram // ### [1.122.43](https://indike.org/pramana/in.purana.narada.1.122.43) hareṇa nirmitaḥ pūrvaṃ tvamaśoka kṛpālunā / lokopakārakaraṇastatprasīda śivapriya // ### [1.122.44](https://indike.org/pramana/in.purana.narada.1.122.44) tatastṛtīye divase vṛkṣe tasminvṛṣadhvajam / samabhyarcya vidhānena dvijaṃ saṃbhojya dāpayet // ### [1.122.45](https://indike.org/pramana/in.purana.narada.1.122.45) evaṃ kṛtavratā nārī vaidhavyaṃ nāpnuyātkvacit / putrapautrādi sahitā bhartuśca syātsuvallabhā // ### [1.122.46](https://indike.org/pramana/in.purana.narada.1.122.46) ūrjjakṛṣṇatrayodaśyāmekabhaktaḥ samāhitaḥ / pradoṣe tailadīpaṃ tu prajvālyābhyarcya yatnataḥ // ### [1.122.47](https://indike.org/pramana/in.purana.narada.1.122.47) gṛhadvāre bahirdadyādyamo me prīyatāmiti / evaṃ kṛte tu viprendra yamapīḍā na jāyate // ### [1.122.48](https://indike.org/pramana/in.purana.narada.1.122.48) ūrjśuklatrayodaśyāmekabhojī dvijottama / punaḥ snātvā pradoṣe tu vāgyataḥ susamāhitaḥ // ### [1.122.49](https://indike.org/pramana/in.purana.narada.1.122.49) pradīpānāṃ sahasreṇa śatenāpyathavā dvija / pradīpayecchivaṃ vāpi dvātriṃśaddīpamālayā // ### [1.122.50](https://indike.org/pramana/in.purana.narada.1.122.50) ghṛtena dīpayeddvīpāngandhādyaiḥ pūjayecchivam / phalairnānāvidhaiścaiva naivedyairapi nārada // ### [1.122.51](https://indike.org/pramana/in.purana.narada.1.122.51) tataḥ stuvīta deveśaṃ śivaṃ nāmnāṃ śatena ca / tāni nāmāni kīrtyante sarvābhīṣṭapradāni vai // ### [1.122.52](https://indike.org/pramana/in.purana.narada.1.122.52) namo rudrāya bhīmāya nīlakaṇṭhāya vedhase / kaparddine sureśāya vyomakeśāya vai namaḥ // ### [1.122.53](https://indike.org/pramana/in.purana.narada.1.122.53) vṛṣadhvajāya somāya somanāthāya vai namaḥ / digaṃbarāya bhṛṅgāya umākāntāya varddhine // ### [1.122.54](https://indike.org/pramana/in.purana.narada.1.122.54) tapomayāya vyāptāya śipiviṣyāya vai namaḥ / vyālapriyāya vyālāya vyālānāṃ pataye namaḥ // ### [1.122.55](https://indike.org/pramana/in.purana.narada.1.122.55) mahīdharāya vyomāya paśūnāṃ pataye namaḥ / tripuraghnāya siṃhāya śārdūlāyārṣabhāya ca // ### [1.122.56](https://indike.org/pramana/in.purana.narada.1.122.56) mitāya mitanāthāya siddhāya parameṣṭhine / vedagītāya guptāya vedaguhyāya vai namaḥ // ### [1.122.57](https://indike.org/pramana/in.purana.narada.1.122.57) dīrghāya dīrgharūpāya dīrghārthāya mahīyase / namo jagatpratiṣṭhāya vyomarūpāya vai namaḥ // ### [1.122.58](https://indike.org/pramana/in.purana.narada.1.122.58) kalyāṇāya viśiṣyāya śiṣṭāya paramātmane / gajakṛtti dharāyātha andhakāsurabhedine // ### [1.122.59](https://indike.org/pramana/in.purana.narada.1.122.59) nīlalohitaśuklāya caḍamuṇḍapriyāya ca / bhaktipriyāya devāya yajñāntāyāvyayāya ca // ### [1.122.60](https://indike.org/pramana/in.purana.narada.1.122.60) maheśāya namastubhyaṃ mahādevaharāya ca / trinetrāya trivedāya vedāṅgāya namo namaḥ // ### [1.122.61](https://indike.org/pramana/in.purana.narada.1.122.61) arthāyārthasvarūpāya paramārthāya vai namaḥ / viśvarūpāya viśvāya viśvanāthāya vai namaḥ // ### [1.122.62](https://indike.org/pramana/in.purana.narada.1.122.62) śaṅkarāya ca kālāya kālāvayavarūpiṇe / arūpāya virūpāya sūkṣmasūkṣmāya vai namaḥ // ### [1.122.63](https://indike.org/pramana/in.purana.narada.1.122.63) śmaśānavāsine tubhyaṃ namaste kṛttivāsase / śaśāṅkaśekharāyātha rudrabhūmiśritāya ca // ### [1.122.64](https://indike.org/pramana/in.purana.narada.1.122.64) durgāya durgapārāya durgāvayavasākṣiṇe / liṅgarūpāya liṅgāya liṅgānapataye namaḥ // ### [1.122.65](https://indike.org/pramana/in.purana.narada.1.122.65) namaḥ prabhāvarūpāya prabhāvārthāya vai namaḥ // ### [1.122.66](https://indike.org/pramana/in.purana.narada.1.122.66) namo namaḥ kāraṇakāraṇāya te mṛtyuñjayāyātmabhavasvarūpiṇe / triyaṃbakāya śitikaṇṭhabhārgiṇe gaurīyuje maṅgalahetave namaḥ // ### [1.122.67](https://indike.org/pramana/in.purana.narada.1.122.67) nāmnāṃ śatamidaṃ vipra pinākiguṇakīrtanam / paṭhitvā dakṣiṇīkṛtya prāyānnijaniketanam // ### [1.122.68](https://indike.org/pramana/in.purana.narada.1.122.68) evaṃ kṛtvā vrataṃ vipra mahādevaprasādataḥ / bhuktveha bhogānakhilānante śivapadaṃ labhet // ### [1.122.69](https://indike.org/pramana/in.purana.narada.1.122.69) mārgaśuklatrayodaśyāṃ yo 'naṅgaṃ vidhinā yajet / trikālamekakālaṃ vā śivasaṃgamasaṃbhavam // ### [1.122.70](https://indike.org/pramana/in.purana.narada.1.122.70) gandhādyairupacāraistu pūjayitvā vidhānataḥ / ghaṭe maṅgalapaṭṭe vā bhojayeddvijadaṃpatī // ### [1.122.71](https://indike.org/pramana/in.purana.narada.1.122.71) tataśca dakṣiṇāṃ datvā svayamekāśanaṃ caret / evaṃ kṛte tu vidhivadvratī saubhāgyabhājanaḥ // jāyate bhuvi viprendra mahādevaprasādataḥ // ### [1.122.72](https://indike.org/pramana/in.purana.narada.1.122.72) pauṣaśuklatrayodaśyāṃ samabhyarcyācyutaṃ harim / ghṛtapātraṃ dvijendrāya pradadyātsarvasiddhaye // ### [1.122.73](https://indike.org/pramana/in.purana.narada.1.122.73) māghaśuklatrayodaśyāṃ samārabhya dinatrayam / māghasnānavrataṃ vipra nānākāmaphalāvaham // ### [1.122.74](https://indike.org/pramana/in.purana.narada.1.122.74) prayāge māghamāse tu tryahaṃ snātasya yatphalam / nāśvameghasahasreṇa tatphalaṃ labhate bhuvi // ### [1.122.75](https://indike.org/pramana/in.purana.narada.1.122.75) tatra snānaṃ japo homo dānaṃ cānantyamaśnute / phaālgune tu site pakṣe trayodaśyāmupoṣitaḥ // ### [1.122.76](https://indike.org/pramana/in.purana.narada.1.122.76) namaskṛtya jagannāthaṃ prāraṃbhe dhanadavratam / mahārājaṃ yakṣapatiṃ gandhādyairupacārakaiḥ // ### [1.122.77](https://indike.org/pramana/in.purana.narada.1.122.77) likhitaṃ varṇakaiḥ paṭṭe pūjayedbhaktibhāvataḥ / evaṃ śuklatrayodaśyāṃ pratimāsaṃ dvijottama // ### [1.122.78](https://indike.org/pramana/in.purana.narada.1.122.78) saṃpūjayetsopavāsaścaikabhukto bhavennaraḥ / tato vratānte tu punaḥ sauvarṇaṃ dhananāyakam // ### [1.122.79](https://indike.org/pramana/in.purana.narada.1.122.79) vidhāya nidhibhiḥ sārddhaṃ sauvarṇābhirdvijottama / upacāraiḥ ṣoḍaśabhiḥ snānaiḥ pañcāmṛtādibhiḥ // ### [1.122.80](https://indike.org/pramana/in.purana.narada.1.122.80) naivedyairvividhairbhaktyā pūjayettu samāhitaḥ / tato dhenumalaṅkṛtya vastrasraggandhabhūṣaṇaiḥ // ### [1.122.81](https://indike.org/pramana/in.purana.narada.1.122.81) savatsāṃ dāpayedvipra samyagvedavide śubhām / saṃbhojya viprānmiṣṭānnairdvādaśātha trayodaśa // ### [1.122.82](https://indike.org/pramana/in.purana.narada.1.122.82) guruṃ samarcya vastrādyaiḥ pratimāṃ tāṃ nivedayet / dvijebhyo dakṣaṇāṃ śaktyā datvā natvā visṛjya ca // ### [1.122.83](https://indike.org/pramana/in.purana.narada.1.122.83) svayaṃ bhuñjīta matimāniṣṭaiḥ saha samāhitaḥ / evaṃ kṛte vrate vipra nirdhanaḥ prāpya vaibhavam // ### [1.122.84](https://indike.org/pramana/in.purana.narada.1.122.84) modate bhuvi vikhyāto rājarāja ivāparaḥ // ### [1.122.84.p1](https://indike.org/pramana/in.purana.narada.1.122.84.p1) iti śrībṛhannāradīyapurāṇe pūrvabhāge bṛhadupākhyāne dvādaśamāsasthitatrayodaśīvratakathanaṃ nāma dvāviṃśadadhikaśatatamo 'dhyāyaḥ ## Linked texts (6) - [Skandamahāpurāṇa (vulgate)](https://indike.org/pramana/in.purana.skanda*vulgate.1.3.15.70) — Sanskrit - [Jayasīṃhakalpadruma](https://indike.org/pramana/in.niti.dharma.nibandha.mahanibandha.jayasimhakalpadruma.10.p26) — Ratnākara 1688, Sanskrit - [Tithyarka](https://indike.org/pramana/in.niti.dharma.kala.tithi.tithyarka.5.p1.6) — Divākarabhaṭṭa 1658, Sanskrit - [Smṛtisāroddhāra](https://indike.org/pramana/in.niti.dharma.nibandha.smrtisamgraha.smrtisaroddhara.1.p143) — Nārāyaṇa, Sanskrit - [Cakranārāyaṇīyanibandha](https://indike.org/pramana/in.niti.dharma.nibandha.mahanibandha.cakranarayaniyanibandha.1.p143) — Viśvambharatrivedin 1600, Sanskrit - [Vratodyāpanakaumudī (Śaṅkara)](https://indike.org/pramana/in.niti.dharma.vrata.udyapana.vratodyapanakaumudi-sankara.p13.20) — Śaṅkara 1728, Sanskrit --- Source: [https://indike.org/pramana/in.purana.narada.1.122](https://indike.org/pramana/in.purana.narada.1.122) · Pramāṇa