Pramāṇa · Search · About · API

Naradapurana 1.125

Nāradapurāṇa 1.125

Language
Sanskrit

Contents

1.125.1

sūta uvāca
ityevamuktvā muninā hi pṛṣṭāste vai kumārāḥ kila nāradena /
saṃpūjitāḥ śāstravidāṃ variṣṭhāḥ kṛtāhnikā jagmurumeśalokam //

1.125.2

tatreśamagryarkanibhairmunīndraiḥ śrīvāmadevādibhirarcitāṅghrim /
surāsurendrairabhivandyamugraṃ natvājñayā tasya niṣedururvyām //

1.125.3

śrutvātha tatrākhilaśāstrasāraṃ śivāgamaṃ te paśupāśamokṣaṇam /
jagmustato jñānaghanasvarūpā natvā purāriṃ svapiturnikāśam //

1.125.4

tatpādapadme praṇatiṃ vidhāya pitrāpi satkṛtya sabhājitāste /
labdhvāśiṣo 'dyāpi caranti śaśvallokeṣu tīrthāni ca tīrthabhūtāḥ //

1.125.5

jagmustato vai badarīvanānte surendravargairupasevyamānam /
dadhyuściraṃ viṣṇupadābjamavyayaṃ dhyāyanti yadyatayo vītarāgāḥ //

1.125.6

nārado 'pi tato viprā kumārebhyaḥ samīhitam /
labdhvā jñānaṃ savijñānaṃ bhṛśaṃ prītamanā hyabhūt //

1.125.7

sa tasmātsvarṇadītīrādāgatya piturantike /
praṇamya satkṛtaḥ pitrā brahmaṇā niṣasāda ca //

1.125.8

kumārebhyaḥ śrutaṃ yacca jñānaṃ vijñānasaṃyutam /
varṇayāmāsa tattvena so 'pi śrutvā mumoda ca //

1.125.9

atha praṇamya śirasā labdhāśīrmunisattamaḥ /
ājagāma ca kailāsaṃ munisiddhaniṣevitam //

1.125.10

nānāścaryamayaṃ śaśvatsarvarttukusumadrumaiḥ /
mandāraiḥ pārijātaiśca caṃpakāśokavañjulaiḥ //

1.125.11

anyaiśca vividhairvṛkṣairnānāpakṣigaṇāvṛtaiḥ /
vātoddhūtaśikhaiḥ pānthānāhvayadbhirivāvṛtam //

1.125.12

nānāmṛgagaṇākīrṇaṃ siddhakinnarasaṃkulam /
sarobhiḥ svacchasalilairlasatkāñcanapaṅkajaiḥ //

1.125.13

śobhitaṃ sārasairhaṃsaiścakrāhvādyairnināditam /
svarddhanīpātanir ghṛṣṭaṃ krīḍadbhiścāpsarogaṇaiḥ //

1.125.14

salile 'lakanandāyāḥ kucakuṅkumapiṅgale /
āmodamuditairnāgaiḥ salilaiḥ puṣkaroddhṛtaiḥ //

1.125.15

snāpayadbhiḥ kareṇūśca kalabhāṃśca samākule /
atha śvetābhrasadṛśe śṛṅge tasya ca bhūbhṛtaḥ //

1.125.16

vaṭaṃ kālābhrasadṛśaṃ dadarśa śatayojanam /
tasyādhastātsamāsīnaṃ yogimaṇḍalamadhyagam //

1.125.17

kapardinaṃ virūpākṣa vyāghracarmāṃbarāvṛtam /
bhūtibhūṣitasarvāṅgaṃ nāgabhūṣaṇabhūṣitam //

1.125.18

rudrākṣamālayā śaśvacchobhitaṃ candraśekharam /
taṃ dṛṣṭvā nārado viprā bhaktinamrātmakandharaḥ //

1.125.19

nanām śirasā tasya pādayorjagadīśituḥ /
tataḥ prasannamanasā stutvā vāgbhirvṛṣadhvajam //

1.125.20

niṣasādājñayā sthāṇoḥ satkṛto yogibhistadā /
athāpṛcchacca kuśalaṃ nāradaṃ jagatāṃ guruḥ //

1.125.21

sa ca prāha prasādena bhavataḥ sarvamasti me /
sarveṣāṃ yogivaryāṇāṃ śṛṇvatāṃ tatra vāḍavāḥ //

1.125.22

papraccha śāṃbhivaṃ jñānaṃ paśupāśavimokṣaṇam /
sa śivaḥ sādaraṃ tasya bhaktyā saṃtuṣṭamānasaḥ //

1.125.23

yogamaṣṭāṅgasaṃyuktaṃ prāha praṇatavatsalaḥ /
sa labdhvā śāṃbhavaṃ jñānaṃ śaṅkarāllokaśaṅkarāt //

1.125.24

suprasannamanā natvā yayau nārāyaṇāntikam /
tatrāpi nārado 'bhīkṣṇaṃ gatāgataparāyaṇaḥ //

1.125.25

sevitaṃ yogibhiḥ siddhairnārāyaṇamatoṣayat /
etadvaḥ kīrtitaṃ viprā nāradīyaṃ mahanmayā //

1.125.26

upākhyānaṃ vedasamaṃ sarvaśāstranidarśanam /
catuṣpādasamāyuktaṃ śṛṇvatāṃ jñānavarddhanam //

1.125.27

ya etatkīrtayedviprā nāradīyaṃ śivālaye /
samāje dvijamukhyānāṃ tathā keśavamandire //

1.125.28

mathurāyāṃ prayāge ca puruṣottamasannidhau /
setau kāñcyāṃ kuśasthalyāṃ gaṅgādvāre kuśasthale //

1.125.29

puṣkareṣu nadītīre yatra kutrāpi bhaktimān /
sa labhetsarvaya jñānāṃ tīrthānāṃ ca phalaṃ mahat //

1.125.30

dānānāṃ cāpi sarveṣāṃ tapasāṃ vāpyaśeṣataḥ /
upavāsaparo vāpi haviṣyāśī jitendriyaḥ //

1.125.31

śrotā caiva tathā vaktā nārāyaṇaparāyaṇaḥ /
śivabhaktirato vāpi śṛṇvan siddhimavāpnuyāt //

1.125.32

asninnaśeṣapuṇyānāṃ siddhīnāṃ ca samudbhavaḥ /
kathitaḥ sarvapāpaghnaḥ paṭhatāṃ śṛṇvatāṃ sadā //

1.125.33

kalidoṣaharaṃ puṃsāṃ sarvasaṃpattivarddhanam /
sarveṣāmīpsitaṃ cedaṃ sarvajñānaprakāśakam //

1.125.34

śaivānāṃ vaiṣṇavānāṃ ca śāktānāṃ sūyasevinām /
tathaiva gāṇapatyānāṃ varṇāśramavatāṃ dvijāḥ //

1.125.35

tapasāṃ ca vratānāṃ ca phalānāṃ saṃprakāśakam /
mantrāṇāṃ caiva yantrāṇāṃ vedāṅgānāṃ vibhāgaśaḥ //

1.125.36

tathāgamānāṃ sāṃkhyānāṃ vedānāṃ caiva saṃgraham /
ya etatpaṭhate bhaktyā śṛṇuyādvā samāhitaḥ //

1.125.37

sa labhedvāñchitānkāmāndevādiṣvapi durlabhān /
śrutvedaṃ nāradīyaṃ tu purāṇaṃ vedasaṃmitam //

1.125.38

vācakaṃ pūjayedbhaktyā dhanaratnāṃśukādibhiḥ /
bhūmidānairgavāṃ dānai ratnadānaiśca saṃtatam //

1.125.39

hastyaśvarathadānaiśca prīṇayetsatataṃ gurum /
yastu vyākurute viprāḥ purāṇaṃ dharmasaṃgraham //

1.125.40

caturvargapradaṃ nṝṇāṃ ko 'nyastatsadṛśo guruḥ /
kāyena manasā vācā dhanādyairapi saṃtatam //

1.125.41

priyaṃ samācarettasya gurorddharmopadeśinaḥ /
śrutvā purāṇaṃ vidhivaddhomaṃ kṛtvā surārcanam //

1.125.42

brāhmaṇānbhojayetpaścācchataṃ miṣṭānnapāyasaiḥ /
dakṣiṇāṃ pradadecchaktyā bhaktyā prīyeta mādhavaḥ //

1.125.43

yathā śreṣṭhā nadī gaṅgā puṣkaraṃ ca saro yathā /
kāśī purī nago merurdevo nārāyaṇo hariḥ //

1.125.44

kṛtaṃ yugaṃ sāmavedo dhenurvipro 'nnamaṃbu ca /
mārgo mṛgendraḥ puruṣo 'śvatthaḥ prahlāda ānanam //

1.125.45

uccaiḥ śravā vasaṃtaśca japaḥ śeṣor'yamā dhanuḥ /
pāvako viṣṇurindraśca kapilo vākpatiḥ kaviḥ //

1.125.46

arjuno hanumāndarbhaścittaṃ citrarathoṃ'bujam /
urvaśī kāñcanaṃ yadvacchreṣṭāścaite svajātiṣu //

1.125.47

tathaiva nāradīyaṃ tu purāṇeṣu prakīrtitam /
śāntirastu śivaṃ cāstu sarveṣāṃ vo dvijottamāḥ //

1.125.48

gamiṣyāmi guroḥ pārṃśvaṃ vyāsasyāmitatejasaḥ /
ityuktvābhyarcitaḥ sūtaḥ śaunakādyairmahātmabhiḥ //

1.125.49

ājñaptaśca punaḥ sarvairdarśanārthaṃ guroryayau /
te 'pi sarve dvijaśreṣṭhāḥ śaunakādyāḥ samāhitāḥ /
śrutaṃ samyaganuṣṭhāya tatra tasthuśca satriṇaḥ //

1.125.50

kalikalmaṣaviṣanāśanaṃ hariṃ yo japapūjanavidhibheṣajopasevī /
sa tu nirviṣamanasā sametya yāgaṃ labhate satamabhīpsitaṃ hi lokam //

1.125.50.p1

iti śrībṛhannāradīyapurāṇe bṛhadupākhyāne caturthapāde purāṇamahimāvarṇanaṃ nāma pañcaviṃśottaraśatatamo 'dhyāyaḥ

1.125.50.p2

samāptoyaṃ bṛhannāradīyapurāṇasya pūrvabhāgaḥ

1.125.50.p3

śrīrādhāmadanamohano jayati tarām

1.125.50.p4

uttarabhāgaḥ

1.125.50.p5

śrīgaṇeśāya namaḥ

1.125.50.p6

śrīkṛṣṇāya namaḥ