[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 1.125 # Naradapurana 1.125 Nāradapurāṇa 1.125 - **Language:** Sanskrit ## Contents - [1.125.50](https://indike.org/pramana/in.purana.narada.1.125.50) — 6 parts ### [1.125.1](https://indike.org/pramana/in.purana.narada.1.125.1) sūta uvāca ityevamuktvā muninā hi pṛṣṭāste vai kumārāḥ kila nāradena / saṃpūjitāḥ śāstravidāṃ variṣṭhāḥ kṛtāhnikā jagmurumeśalokam // ### [1.125.2](https://indike.org/pramana/in.purana.narada.1.125.2) tatreśamagryarkanibhairmunīndraiḥ śrīvāmadevādibhirarcitāṅghrim / surāsurendrairabhivandyamugraṃ natvājñayā tasya niṣedururvyām // ### [1.125.3](https://indike.org/pramana/in.purana.narada.1.125.3) śrutvātha tatrākhilaśāstrasāraṃ śivāgamaṃ te paśupāśamokṣaṇam / jagmustato jñānaghanasvarūpā natvā purāriṃ svapiturnikāśam // ### [1.125.4](https://indike.org/pramana/in.purana.narada.1.125.4) tatpādapadme praṇatiṃ vidhāya pitrāpi satkṛtya sabhājitāste / labdhvāśiṣo 'dyāpi caranti śaśvallokeṣu tīrthāni ca tīrthabhūtāḥ // ### [1.125.5](https://indike.org/pramana/in.purana.narada.1.125.5) jagmustato vai badarīvanānte surendravargairupasevyamānam / dadhyuściraṃ viṣṇupadābjamavyayaṃ dhyāyanti yadyatayo vītarāgāḥ // ### [1.125.6](https://indike.org/pramana/in.purana.narada.1.125.6) nārado 'pi tato viprā kumārebhyaḥ samīhitam / labdhvā jñānaṃ savijñānaṃ bhṛśaṃ prītamanā hyabhūt // ### [1.125.7](https://indike.org/pramana/in.purana.narada.1.125.7) sa tasmātsvarṇadītīrādāgatya piturantike / praṇamya satkṛtaḥ pitrā brahmaṇā niṣasāda ca // ### [1.125.8](https://indike.org/pramana/in.purana.narada.1.125.8) kumārebhyaḥ śrutaṃ yacca jñānaṃ vijñānasaṃyutam / varṇayāmāsa tattvena so 'pi śrutvā mumoda ca // ### [1.125.9](https://indike.org/pramana/in.purana.narada.1.125.9) atha praṇamya śirasā labdhāśīrmunisattamaḥ / ājagāma ca kailāsaṃ munisiddhaniṣevitam // ### [1.125.10](https://indike.org/pramana/in.purana.narada.1.125.10) nānāścaryamayaṃ śaśvatsarvarttukusumadrumaiḥ / mandāraiḥ pārijātaiśca caṃpakāśokavañjulaiḥ // ### [1.125.11](https://indike.org/pramana/in.purana.narada.1.125.11) anyaiśca vividhairvṛkṣairnānāpakṣigaṇāvṛtaiḥ / vātoddhūtaśikhaiḥ pānthānāhvayadbhirivāvṛtam // ### [1.125.12](https://indike.org/pramana/in.purana.narada.1.125.12) nānāmṛgagaṇākīrṇaṃ siddhakinnarasaṃkulam / sarobhiḥ svacchasalilairlasatkāñcanapaṅkajaiḥ // ### [1.125.13](https://indike.org/pramana/in.purana.narada.1.125.13) śobhitaṃ sārasairhaṃsaiścakrāhvādyairnināditam / svarddhanīpātanir ghṛṣṭaṃ krīḍadbhiścāpsarogaṇaiḥ // ### [1.125.14](https://indike.org/pramana/in.purana.narada.1.125.14) salile 'lakanandāyāḥ kucakuṅkumapiṅgale / āmodamuditairnāgaiḥ salilaiḥ puṣkaroddhṛtaiḥ // ### [1.125.15](https://indike.org/pramana/in.purana.narada.1.125.15) snāpayadbhiḥ kareṇūśca kalabhāṃśca samākule / atha śvetābhrasadṛśe śṛṅge tasya ca bhūbhṛtaḥ // ### [1.125.16](https://indike.org/pramana/in.purana.narada.1.125.16) vaṭaṃ kālābhrasadṛśaṃ dadarśa śatayojanam / tasyādhastātsamāsīnaṃ yogimaṇḍalamadhyagam // ### [1.125.17](https://indike.org/pramana/in.purana.narada.1.125.17) kapardinaṃ virūpākṣa vyāghracarmāṃbarāvṛtam / bhūtibhūṣitasarvāṅgaṃ nāgabhūṣaṇabhūṣitam // ### [1.125.18](https://indike.org/pramana/in.purana.narada.1.125.18) rudrākṣamālayā śaśvacchobhitaṃ candraśekharam / taṃ dṛṣṭvā nārado viprā bhaktinamrātmakandharaḥ // ### [1.125.19](https://indike.org/pramana/in.purana.narada.1.125.19) nanām śirasā tasya pādayorjagadīśituḥ / tataḥ prasannamanasā stutvā vāgbhirvṛṣadhvajam // ### [1.125.20](https://indike.org/pramana/in.purana.narada.1.125.20) niṣasādājñayā sthāṇoḥ satkṛto yogibhistadā / athāpṛcchacca kuśalaṃ nāradaṃ jagatāṃ guruḥ // ### [1.125.21](https://indike.org/pramana/in.purana.narada.1.125.21) sa ca prāha prasādena bhavataḥ sarvamasti me / sarveṣāṃ yogivaryāṇāṃ śṛṇvatāṃ tatra vāḍavāḥ // ### [1.125.22](https://indike.org/pramana/in.purana.narada.1.125.22) papraccha śāṃbhivaṃ jñānaṃ paśupāśavimokṣaṇam / sa śivaḥ sādaraṃ tasya bhaktyā saṃtuṣṭamānasaḥ // ### [1.125.23](https://indike.org/pramana/in.purana.narada.1.125.23) yogamaṣṭāṅgasaṃyuktaṃ prāha praṇatavatsalaḥ / sa labdhvā śāṃbhavaṃ jñānaṃ śaṅkarāllokaśaṅkarāt // ### [1.125.24](https://indike.org/pramana/in.purana.narada.1.125.24) suprasannamanā natvā yayau nārāyaṇāntikam / tatrāpi nārado 'bhīkṣṇaṃ gatāgataparāyaṇaḥ // ### [1.125.25](https://indike.org/pramana/in.purana.narada.1.125.25) sevitaṃ yogibhiḥ siddhairnārāyaṇamatoṣayat / etadvaḥ kīrtitaṃ viprā nāradīyaṃ mahanmayā // ### [1.125.26](https://indike.org/pramana/in.purana.narada.1.125.26) upākhyānaṃ vedasamaṃ sarvaśāstranidarśanam / catuṣpādasamāyuktaṃ śṛṇvatāṃ jñānavarddhanam // ### [1.125.27](https://indike.org/pramana/in.purana.narada.1.125.27) ya etatkīrtayedviprā nāradīyaṃ śivālaye / samāje dvijamukhyānāṃ tathā keśavamandire // ### [1.125.28](https://indike.org/pramana/in.purana.narada.1.125.28) mathurāyāṃ prayāge ca puruṣottamasannidhau / setau kāñcyāṃ kuśasthalyāṃ gaṅgādvāre kuśasthale // ### [1.125.29](https://indike.org/pramana/in.purana.narada.1.125.29) puṣkareṣu nadītīre yatra kutrāpi bhaktimān / sa labhetsarvaya jñānāṃ tīrthānāṃ ca phalaṃ mahat // ### [1.125.30](https://indike.org/pramana/in.purana.narada.1.125.30) dānānāṃ cāpi sarveṣāṃ tapasāṃ vāpyaśeṣataḥ / upavāsaparo vāpi haviṣyāśī jitendriyaḥ // ### [1.125.31](https://indike.org/pramana/in.purana.narada.1.125.31) śrotā caiva tathā vaktā nārāyaṇaparāyaṇaḥ / śivabhaktirato vāpi śṛṇvan siddhimavāpnuyāt // ### [1.125.32](https://indike.org/pramana/in.purana.narada.1.125.32) asninnaśeṣapuṇyānāṃ siddhīnāṃ ca samudbhavaḥ / kathitaḥ sarvapāpaghnaḥ paṭhatāṃ śṛṇvatāṃ sadā // ### [1.125.33](https://indike.org/pramana/in.purana.narada.1.125.33) kalidoṣaharaṃ puṃsāṃ sarvasaṃpattivarddhanam / sarveṣāmīpsitaṃ cedaṃ sarvajñānaprakāśakam // ### [1.125.34](https://indike.org/pramana/in.purana.narada.1.125.34) śaivānāṃ vaiṣṇavānāṃ ca śāktānāṃ sūyasevinām / tathaiva gāṇapatyānāṃ varṇāśramavatāṃ dvijāḥ // ### [1.125.35](https://indike.org/pramana/in.purana.narada.1.125.35) tapasāṃ ca vratānāṃ ca phalānāṃ saṃprakāśakam / mantrāṇāṃ caiva yantrāṇāṃ vedāṅgānāṃ vibhāgaśaḥ // ### [1.125.36](https://indike.org/pramana/in.purana.narada.1.125.36) tathāgamānāṃ sāṃkhyānāṃ vedānāṃ caiva saṃgraham / ya etatpaṭhate bhaktyā śṛṇuyādvā samāhitaḥ // ### [1.125.37](https://indike.org/pramana/in.purana.narada.1.125.37) sa labhedvāñchitānkāmāndevādiṣvapi durlabhān / śrutvedaṃ nāradīyaṃ tu purāṇaṃ vedasaṃmitam // ### [1.125.38](https://indike.org/pramana/in.purana.narada.1.125.38) vācakaṃ pūjayedbhaktyā dhanaratnāṃśukādibhiḥ / bhūmidānairgavāṃ dānai ratnadānaiśca saṃtatam // ### [1.125.39](https://indike.org/pramana/in.purana.narada.1.125.39) hastyaśvarathadānaiśca prīṇayetsatataṃ gurum / yastu vyākurute viprāḥ purāṇaṃ dharmasaṃgraham // ### [1.125.40](https://indike.org/pramana/in.purana.narada.1.125.40) caturvargapradaṃ nṝṇāṃ ko 'nyastatsadṛśo guruḥ / kāyena manasā vācā dhanādyairapi saṃtatam // ### [1.125.41](https://indike.org/pramana/in.purana.narada.1.125.41) priyaṃ samācarettasya gurorddharmopadeśinaḥ / śrutvā purāṇaṃ vidhivaddhomaṃ kṛtvā surārcanam // ### [1.125.42](https://indike.org/pramana/in.purana.narada.1.125.42) brāhmaṇānbhojayetpaścācchataṃ miṣṭānnapāyasaiḥ / dakṣiṇāṃ pradadecchaktyā bhaktyā prīyeta mādhavaḥ // ### [1.125.43](https://indike.org/pramana/in.purana.narada.1.125.43) yathā śreṣṭhā nadī gaṅgā puṣkaraṃ ca saro yathā / kāśī purī nago merurdevo nārāyaṇo hariḥ // ### [1.125.44](https://indike.org/pramana/in.purana.narada.1.125.44) kṛtaṃ yugaṃ sāmavedo dhenurvipro 'nnamaṃbu ca / mārgo mṛgendraḥ puruṣo 'śvatthaḥ prahlāda ānanam // ### [1.125.45](https://indike.org/pramana/in.purana.narada.1.125.45) uccaiḥ śravā vasaṃtaśca japaḥ śeṣor'yamā dhanuḥ / pāvako viṣṇurindraśca kapilo vākpatiḥ kaviḥ // ### [1.125.46](https://indike.org/pramana/in.purana.narada.1.125.46) arjuno hanumāndarbhaścittaṃ citrarathoṃ'bujam / urvaśī kāñcanaṃ yadvacchreṣṭāścaite svajātiṣu // ### [1.125.47](https://indike.org/pramana/in.purana.narada.1.125.47) tathaiva nāradīyaṃ tu purāṇeṣu prakīrtitam / śāntirastu śivaṃ cāstu sarveṣāṃ vo dvijottamāḥ // ### [1.125.48](https://indike.org/pramana/in.purana.narada.1.125.48) gamiṣyāmi guroḥ pārṃśvaṃ vyāsasyāmitatejasaḥ / ityuktvābhyarcitaḥ sūtaḥ śaunakādyairmahātmabhiḥ // ### [1.125.49](https://indike.org/pramana/in.purana.narada.1.125.49) ājñaptaśca punaḥ sarvairdarśanārthaṃ guroryayau / te 'pi sarve dvijaśreṣṭhāḥ śaunakādyāḥ samāhitāḥ / śrutaṃ samyaganuṣṭhāya tatra tasthuśca satriṇaḥ // ### [1.125.50](https://indike.org/pramana/in.purana.narada.1.125.50) kalikalmaṣaviṣanāśanaṃ hariṃ yo japapūjanavidhibheṣajopasevī / sa tu nirviṣamanasā sametya yāgaṃ labhate satamabhīpsitaṃ hi lokam // ### [1.125.50.p1](https://indike.org/pramana/in.purana.narada.1.125.50.p1) iti śrībṛhannāradīyapurāṇe bṛhadupākhyāne caturthapāde purāṇamahimāvarṇanaṃ nāma pañcaviṃśottaraśatatamo 'dhyāyaḥ ### [1.125.50.p2](https://indike.org/pramana/in.purana.narada.1.125.50.p2) samāptoyaṃ bṛhannāradīyapurāṇasya pūrvabhāgaḥ ### [1.125.50.p3](https://indike.org/pramana/in.purana.narada.1.125.50.p3) śrīrādhāmadanamohano jayati tarām ### [1.125.50.p4](https://indike.org/pramana/in.purana.narada.1.125.50.p4) uttarabhāgaḥ ### [1.125.50.p5](https://indike.org/pramana/in.purana.narada.1.125.50.p5) śrīgaṇeśāya namaḥ ### [1.125.50.p6](https://indike.org/pramana/in.purana.narada.1.125.50.p6) śrīkṛṣṇāya namaḥ --- Source: [https://indike.org/pramana/in.purana.narada.1.125](https://indike.org/pramana/in.purana.narada.1.125) · Pramāṇa