[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 1.49 # Naradapurana 1.49 Nāradapurāṇa 1.49 - **Language:** Sanskrit ## Contents - [1.49.94](https://indike.org/pramana/in.purana.narada.1.49.94) — 1 part ### [1.49.1](https://indike.org/pramana/in.purana.narada.1.49.1) sanandana uvāca niśamya tasyeti vacaḥ paramārthasamanvitam / praśrayāvanato bhūtvā tamāha nṛpatirdvijam // ### [1.49.2](https://indike.org/pramana/in.purana.narada.1.49.2) rājovāca bhagavanyattvayā prokta paramārthamayaṃ vacaḥ / śrute tasminbhramantīva manaso mama vṛttayaḥ // ### [1.49.3](https://indike.org/pramana/in.purana.narada.1.49.3) etadvivekavijñānaṃ yadi śeṣeṣu jantuṣu / bhavatā darśitaṃ vipra tatparaṃ prakṛtermahat // ### [1.49.4](https://indike.org/pramana/in.purana.narada.1.49.4) nāhaṃ vahāmi śibikāṃ śibikā mayi na sthitā / śarīramanyadasmatto yeneyaṃ śibikā dhṛtā // ### [1.49.5](https://indike.org/pramana/in.purana.narada.1.49.5) guṇa pravṛttirbhūtānāṃ pravṛttiḥ karmacoditā / pravartante guṇāścaite kiṃ mameti tvayoditam // ### [1.49.6](https://indike.org/pramana/in.purana.narada.1.49.6) etasminparamārthajña mama śrotrapathaṃ gate / mano vihvalatāmeti paramārthārthatāṃ gatam // ### [1.49.7](https://indike.org/pramana/in.purana.narada.1.49.7) pūrvameva mahābhāga kapilarṣimahaṃ dvija / praṣṭumabhyudyato gatvā śreyaḥ kintvatra saṃśaye // ### [1.49.8](https://indike.org/pramana/in.purana.narada.1.49.8) tadantare ca bhavatā yadidaṃ vākyamīritam / tenaiva paramārthārthaṃ tvayi cetaḥ pradhāvati // ### [1.49.9](https://indike.org/pramana/in.purana.narada.1.49.9) kapilarṣirbhagavataḥ sarvabhūtasya vai kila / viṣṇoraṃśo jaganmohanāśāya samupāgataḥ // ### [1.49.10](https://indike.org/pramana/in.purana.narada.1.49.10) sa eva bhagavānnūnamasmākaṃ hitakāmyayā / pratyakṣatāmanugatastathaitadbhavatocyate // ### [1.49.11](https://indike.org/pramana/in.purana.narada.1.49.11) tanmahyaṃ mohanāśāya yacchreyaḥ paramaṃ dvija / tadvadākhila vijñānajalavīcyujadhirbhavān // ### [1.49.12](https://indike.org/pramana/in.purana.narada.1.49.12) brāhmaṇa uvāca bhūyaḥ pṛcchasi kiṃ śreyaḥ paramārthena pṛcchasi / śreyāṃsi paramārthāni hyaśeṣāṇyena bhūpate // ### [1.49.13](https://indike.org/pramana/in.purana.narada.1.49.13) devatārādhanaṃ kṛtvā dhanasaṃpadamicchati / putrānicchati rājyaṃ ca śreyastasyaiva tannṛpa // ### [1.49.14](https://indike.org/pramana/in.purana.narada.1.49.14) vivakinastu saṃyogaḥ śreyo 'sau paramātmanā / karmayajñādikaṃ śreyaḥ svarlokapaladāyi yat // ### [1.49.15](https://indike.org/pramana/in.purana.narada.1.49.15) śreyaḥ pradhānaṃ ca phale tadevānabhisaṃhite / ātmā dhyeyaḥ sadā bhūpa yogayuktaistathā paraiḥ // ### [1.49.16](https://indike.org/pramana/in.purana.narada.1.49.16) śreya stasyaiva saṃyogaḥ śreyo yaḥ paramātmanaḥ / śreyāṃsyevamanekāni śataśo 'tha sahasraśaḥ // ### [1.49.17](https://indike.org/pramana/in.purana.narada.1.49.17) saṃtyatra paramārthāstu na tvete śrūyatāṃ ca me / dharmo 'yaṃ tyajate kiṃ tu paramārtho dhanaṃ yadi // ### [1.49.18](https://indike.org/pramana/in.purana.narada.1.49.18) vyayaścakriyata kasmātkāmaprāptyupalakṣaṇaḥ / mutraścetparamārthākhyaḥ so 'pyanyasya nareśvara // ### [1.49.19](https://indike.org/pramana/in.purana.narada.1.49.19) paramārthabhūtaḥ so 'nyasya paramārtho hi naḥ pitā / evaṃ na paramārtho 'sti jagatyatra carācare // ### [1.49.20](https://indike.org/pramana/in.purana.narada.1.49.20) paramārtho hi kāryāṇi karaṇānāmaśeṣataḥ / rājyādiprāptiratroktā paramārthatayā yadi // ### [1.49.21](https://indike.org/pramana/in.purana.narada.1.49.21) paramārthā bhavantyatra na bhavanti ca vai tataḥ / ṛgyajuḥsāmaniṣpādyaṃ yajñakarma mataṃ tava // ### [1.49.22](https://indike.org/pramana/in.purana.narada.1.49.22) paramārthabhūtaṃ tatrāpi śrūyatāṃ gadato mama / yattu niṣpādyate kāryaṃ mṛdā kāraṇabhūtayā // ### [1.49.23](https://indike.org/pramana/in.purana.narada.1.49.23) tatkāraṇānugamanājjāyate nṛpa mṛnmayam / evaṃ vināśibhirdravyaiḥ samidājyakuśādibhiḥ // ### [1.49.24](https://indike.org/pramana/in.purana.narada.1.49.24) niṣpādyate kriyā yā tu sā bhavitrī vināśinī / anāśī paramārthastu prājñairabhyupagamyate // ### [1.49.25](https://indike.org/pramana/in.purana.narada.1.49.25) yattuṃ nāśi na saṃdeho nāśidravyopapāditam / tadevāpaladaṃ karma paramārtho mato mama // ### [1.49.26](https://indike.org/pramana/in.purana.narada.1.49.26) muktisādhanabhūtatvātparamārtho na sādhanam / dhyānamevātmano bhūpaparamārthārthaśabditam // ### [1.49.27](https://indike.org/pramana/in.purana.narada.1.49.27) bhedakāri parebhyastu paramārtho na bhedavān / paramārthātmanoryogaḥ paramārtha itīṣyate // ### [1.49.28](https://indike.org/pramana/in.purana.narada.1.49.28) mithyaitadanyaddravyaṃ hi naitaddravyamayaṃ yataḥ / tasmācchreyāṃsyaśeṣāṇi nṛpaitāni na saṃśayaḥ // ### [1.49.29](https://indike.org/pramana/in.purana.narada.1.49.29) paramārthastu bhūpāla saṃkṣepācchrūyatāṃ mama / eko vyāpī samaḥ śuddho nirguṇa prakṛteḥ paraḥ // ### [1.49.30](https://indike.org/pramana/in.purana.narada.1.49.30) janmavṛddhyādirahita ātmā sarvagato nṛpa / parijñānamayo sadbhirnāmajātyādibhivibhuḥ // ### [1.49.31](https://indike.org/pramana/in.purana.narada.1.49.31) na yogavānna yukto 'bhūnnaiva pārthivaḥ yokṣyati / tasyātmaparadeheṣu sato 'pyekamayaṃ hi tat // ### [1.49.32](https://indike.org/pramana/in.purana.narada.1.49.32) vijñānaṃ paramārtho 'sau vetti no 'tathyadarśanaḥ / veṇuraṅghravibhedena bhedaḥ ṣaṅjādisaṃjñitaḥ // ### [1.49.33](https://indike.org/pramana/in.purana.narada.1.49.33) abhedo vyāpino vāyostathā tasya mahātmanaḥ / ekatvaṃ rūpabhedaśca vāhyakarmapravṛttijaḥ // ### [1.49.34](https://indike.org/pramana/in.purana.narada.1.49.34) devādibhedamadhyāste nāstyevācaraṇo hi saḥ / śṛṇvatra bhūpa prāgvṛttaṃ yadgītamṛbhuṇā bhavet // ### [1.49.35](https://indike.org/pramana/in.purana.narada.1.49.35) avabodhaṃ janayato nidādhasya dvijanmanaḥ / ṛbhurnāmābavatputro brahmaṇaḥ parameṣṭinaḥ // ### [1.49.36](https://indike.org/pramana/in.purana.narada.1.49.36) vijñāta tattvasadbhāvo nisargādeva bhūpate / tasya śiṣyo nidāgho 'bhūtpulastyatanayaḥ purā // ### [1.49.37](https://indike.org/pramana/in.purana.narada.1.49.37) prādādaśeṣavijñānaṃ sa tasmai parayā mudā / avāptajñāna tattvasya na tasyādvaitavāsanā // ### [1.49.38](https://indike.org/pramana/in.purana.narada.1.49.38) sa ṛbhustarkayāmāsa nidāghasya nareśvara / devikāyāstaṭe vīra nāgaraṃ nāma vai puram // ### [1.49.39](https://indike.org/pramana/in.purana.narada.1.49.39) samṛddhamatiramyaṃ ca pulastyena niveśitam / ramyopavanaparyantaṃ sa tasminpārthavottama // ### [1.49.40](https://indike.org/pramana/in.purana.narada.1.49.40) nidādhanāmāyogajñastasya śiṣyo 'bhavatpurā / divye varṣasahasre tu samatīte 'sya tatpuram // ### [1.49.41](https://indike.org/pramana/in.purana.narada.1.49.41) jagāma sa ṛbhuḥ śiṣyaṃ nidāghamavalokitum / sa tasya vaiśvadevanti dvārālokanagocaraḥ // ### [1.49.42](https://indike.org/pramana/in.purana.narada.1.49.42) sthita stena gṛhītārtho nijaveśma praveśitaḥ / prakṣālitāṅghripāṇiṃ ca kṛtāsanaparigraham // ### [1.49.43](https://indike.org/pramana/in.purana.narada.1.49.43) uvāca sa dvijaśreṣṭho bhujyatāmiti sādaram / ṛbhuruvāca bho vipravarya bhoktavyaṃ yadatra bhavato gṛhe // ### [1.49.44](https://indike.org/pramana/in.purana.narada.1.49.44) tatkathyatāṃ kadanneṣu na prītiḥ satataṃ mama / nidāgha uvāca saktuyāvakavrīhīnāmapūpānāṃ ca me gṛhe // ### [1.49.45](https://indike.org/pramana/in.purana.narada.1.49.45) yadrocate dvijaśreṣṭha tāvadbhuṅkṣva yathecchayā / ṛbhuruvāca kadannāni dijaitāni miṣṭamannaṃ prayaccha me // ### [1.49.46](https://indike.org/pramana/in.purana.narada.1.49.46) saṃyāvapāyasādīni cekṣukā rasavanti ca / nidāgha uvāca gṛhe śālini madgehe yatkiñcidati śobhanam // ### [1.49.47](https://indike.org/pramana/in.purana.narada.1.49.47) bhojyeṣu sādhanaṃ miṣṭaṃ tenāsyānnaṃ prasādhaya / ityuktā tena sā patnī miṣṭamannaṃ dvijasya tat // ### [1.49.48](https://indike.org/pramana/in.purana.narada.1.49.48) prasādhitavatī tadvai bharturvacanagauravāt / na bhuktavantamicchāto miṣṭamannaṃ mahāmunim // ### [1.49.49](https://indike.org/pramana/in.purana.narada.1.49.49) nidāghaḥ prāhabhūpāla praśrayāvanataḥ sthitaḥ / nidāgha uvāca api te paramā tṛptirutpannā puṣṭireva // ### [1.49.50](https://indike.org/pramana/in.purana.narada.1.49.50) api te mānasaṃ svasthamāhāreṇa kṛtaṃ dvija / kva nivāsī bhavānvipra kva vā gantuṃ samudyataḥ // ### [1.49.51](https://indike.org/pramana/in.purana.narada.1.49.51) āgamyate ca bhavatā yatastaśca nivedyatām / ṛmuruvāca kṣudhitasya ca bhukte 'nne tṛptirbrahmanvijāyate // ### [1.49.52](https://indike.org/pramana/in.purana.narada.1.49.52) na me kṣudhā bhavettṝptiḥ kasmānmāṃ dvija pṛcchati / vahninā pārthivenādau dagdhe vai kṣurāpīśvaḥ // ### [1.49.53](https://indike.org/pramana/in.purana.narada.1.49.53) bhavatyaṃbhasi ca kṣīṇe nṛṇāṃ tṛṣṇāsamudbhavaḥ / kṣuttṛṣṇe dehadharmākhye na mamaite yato dvija // ### [1.49.54](https://indike.org/pramana/in.purana.narada.1.49.54) tataḥ kṣutsaṃbhavābhāvāttṛptirastyeva me sadā / manasaḥ svasthatā tuṣṭiścittadharmāvimau dvija // ### [1.49.55](https://indike.org/pramana/in.purana.narada.1.49.55) cetaso yasya yatpṛṣṭaṃ pumānebhirna yujyate / kva nivāsastavetyuktaṃ kva gantāsi ca yattvayā // ### [1.49.56](https://indike.org/pramana/in.purana.narada.1.49.56) kutaścāgamyate tvetātrritaye 'pi nibodha me / pumānsavargato vyāpītyākāśavadayaṃ yataḥ // ### [1.49.57](https://indike.org/pramana/in.purana.narada.1.49.57) kutaḥ kutra kva gantāsītyetadapyarthavatkatham / so 'haṃ gantā na cāgantā naikadeśaniketanaḥ // ### [1.49.58](https://indike.org/pramana/in.purana.narada.1.49.58) tvaṃ cānye ca na ca tvaṃ tvaṃ nānye naivāhamapyaham / miṣṭanne miṣṭamityeṣā jihvā sā me kṛtā tava // ### [1.49.59](https://indike.org/pramana/in.purana.narada.1.49.59) kiṃ vakṣyatīti tatrāpi śrūyatāṃ dvijasattamā / miṣṭameva yadāmiṣṭaṃ tadevodvegakāraṇam // ### [1.49.60](https://indike.org/pramana/in.purana.narada.1.49.60) amiṣṭaṃ jāyate miṣṭaṃ miṣṭādudvijate janaḥ / ādimadhyāvasāneṣu kimannaṃ rucikāraṇam // ### [1.49.61](https://indike.org/pramana/in.purana.narada.1.49.61) mṛṇmayaṃ hi mṛdā yadvadgṛhaṃ liptaṃ sthirībhavet / pārthivo 'yaṃ tathā dehaḥ pārthivaiḥ paramāṇubhiḥ // ### [1.49.62](https://indike.org/pramana/in.purana.narada.1.49.62) yavagodhūmamudgādir ghṛtaṃ tailaṃ payo dadhi / guḍaḥ phalānīti tathā pārthivāḥ paramāṇavaḥ // ### [1.49.63](https://indike.org/pramana/in.purana.narada.1.49.63) tadetadbhavatā jñātvā miṣṭāmiṣṭavicāri yat / tanmanaḥ śamanālabi kāryaṃ prāpyaṃ hi muktaye // ### [1.49.64](https://indike.org/pramana/in.purana.narada.1.49.64) ityākarṇya vacastasya paramārthāśritaṃ nṛpa / praṇipatya mahābhāgo nidāgho vākyamabravīt // ### [1.49.65](https://indike.org/pramana/in.purana.narada.1.49.65) prasīda maddhitārthāya kathyatāṃ yastvamāgataḥ / naṣṭo mohastavākarṇya vacāṃsyetāni me dvija // ### [1.49.66](https://indike.org/pramana/in.purana.narada.1.49.66) ṛbhuruvāca ṛbhurasmi tavācāryaḥ prajñādānāya te dvija / ihāgato 'haṃ dāsyāmi paramārthaṃ subodhitam // ### [1.49.67](https://indike.org/pramana/in.purana.narada.1.49.67) eka evamidaṃ viddhi na bhedi sakalaṃ jagat / vāsudevābhidheyasya svarupaṃ parātmanaḥ // ### [1.49.68](https://indike.org/pramana/in.purana.narada.1.49.68) brahmaṇa uvāca tathetyuktvā nidādhena praṇipātapuraḥ saram / pūjitaḥ parayā bhaktyānicchitaḥ prayayau vibhuḥ // ### [1.49.69](https://indike.org/pramana/in.purana.narada.1.49.69) punavaṣasahasrante samāyāto nareśvara / nidāghajñānadānāya tadeva nagaraṃ guruḥ // ### [1.49.70](https://indike.org/pramana/in.purana.narada.1.49.70) nagarasya bahiḥ so 'tha nidāghaṃ dṛṣṭavān munim / mahābalaparīvāre puraṃ viśati pārthive // ### [1.49.71](https://indike.org/pramana/in.purana.narada.1.49.71) dūrasthitaṃ mahābhāge janasaṃmardavarjakam / kṣutkṣāmakaṇṭhamāyāntamaraṇyātsasamitkuśam // ### [1.49.72](https://indike.org/pramana/in.purana.narada.1.49.72) dṛṣṭvā nidāghaṃ sa ṛbhurupāgatyābhivādya ca / uvāca kasmādekāntaṃ sthīyata bhavatā dvija // ### [1.49.73](https://indike.org/pramana/in.purana.narada.1.49.73) // nidāgha uvāca bho vipra janasaṃmarddo mahāneṣa janeśvare / pravivakṣau pure ramye tenātra sthīyate mayā // ### [1.49.74](https://indike.org/pramana/in.purana.narada.1.49.74) ṛbhuruvāca narādhipo 'tra katamaḥ katamaścetaro janaḥ / kathyatāṃ me dvijaśreṣṭha tvamabhijño mato mama // ### [1.49.75](https://indike.org/pramana/in.purana.narada.1.49.75) nidāgha uvāca yo 'yaṃ gajendramunmattamadriśṛṅgasamucchrayam / adhiruḍho narendro 'yaṃ parito yastathetaraḥ // ### [1.49.76](https://indike.org/pramana/in.purana.narada.1.49.76) ṛbhuruvāca etau hi gajarājānau dṛṣṭau hi yugapanmayā / bhavatā nirviśeṣeṇa pṛthagvedopalakṣitau // ### [1.49.77](https://indike.org/pramana/in.purana.narada.1.49.77) tatkathyatāṃ mahābhāga viśeṣo bhavatānayoḥ / jñātumicchāmyahaṃ ko 'tra gajaḥ ko vā narādhipaḥ // ### [1.49.78](https://indike.org/pramana/in.purana.narada.1.49.78) nidādha uvāca gajoyo 'yamadho brahmannuparyasyaiṣa bhūpatiḥ / vāhyavāhakasaṃbandhaṃ ko na jānāti vai dvija // ### [1.49.79](https://indike.org/pramana/in.purana.narada.1.49.79) ṛbhuruvāca brahmanyathāhaṃ jānīyāṃ tathā māmavabodhaya / adhaḥ sattvavibhāgaṃ kiṃ kiṃ corddhamabhidhīyate // ### [1.49.80](https://indike.org/pramana/in.purana.narada.1.49.80) brāhmaṇa uvāca ityuktvā sahasāruhya nidāghaḥ prāha taṃ ṛbhum / śrayatāṃ kathayāmyeṣa yanmāṃ tvaṃ paripṛcchasi // ### [1.49.81](https://indike.org/pramana/in.purana.narada.1.49.81) uparyahaṃ yathā rājā tvamadhaḥkuñjaro yathā / avabodhāya te brahmandṛṣṭānto darśito mayā // ### [1.49.82](https://indike.org/pramana/in.purana.narada.1.49.82) ṛbhuruvāca tvaṃ rājeva dvijaśreṣṭha sthito 'haṃ gajavadyadi / tadevaṃ tvaṃ samācakṣva katamastvamahaṃ tathā // ### [1.49.83](https://indike.org/pramana/in.purana.narada.1.49.83) brāhmaṇa uvāca ityuktaḥ satvarastasya caraṇāvabhivandya saḥ / nidādhaḥ prāha bhagavannācāryastvamṛbhurmam // ### [1.49.84](https://indike.org/pramana/in.purana.narada.1.49.84) nānyasyādvai vasaṃskārasaṃskṛtaṃ mānasaṃ tathā / yathācāryasya tena tvāṃ manye prāptamahaṃ gurum // ### [1.49.85](https://indike.org/pramana/in.purana.narada.1.49.85) ṛbhuruvāca tavopadeśadānāya pūrvaśuśrūṣaṇāttava / gurusnehādṛbhurnāmanidāghaṃ samupāgataḥ // ### [1.49.86](https://indike.org/pramana/in.purana.narada.1.49.86) tadetadupadiṣṭaṃ te saṃkṣepeṇa mahāmate / paramārthasārabhūtaṃ yattadadvaitamaśeṣataḥ // ### [1.49.87](https://indike.org/pramana/in.purana.narada.1.49.87) brāhmaṇa uvāca evamuktvā dadau vidyāṃ nidāghaṃ sa ṛbhurguruḥ / nidāgho 'pyupadeśena tenādvaitaparo 'bhavat // ### [1.49.88](https://indike.org/pramana/in.purana.narada.1.49.88) sarvabhūtānyabhedena dadṛśe sa tadātmanaḥ / tathā brahmatanau muktimavāca paramādvijaḥ // ### [1.49.89](https://indike.org/pramana/in.purana.narada.1.49.89) tathā tvamapi dharmajña tulyātmaripubāndhavaḥ / bhava sarvagataṃ jñānamātmānamavanīpate // ### [1.49.90](https://indike.org/pramana/in.purana.narada.1.49.90) sitanīlādibhedena yathaikaṃ dṛśyate nabhaḥ / bhrāntadṛṣṭibhirātmāpi tathaikaḥ sanpṛthak pṛthak // ### [1.49.91](https://indike.org/pramana/in.purana.narada.1.49.91) ekaḥ samastaṃ yadihāsti kiñcittadacyuto nāsti paraṃ tato 'nyat / so 'haṃ sa ca tvaṃ sa ca sarvametadātmāṃsvayaṃ bhātyapabhedamohaḥ // ### [1.49.92](https://indike.org/pramana/in.purana.narada.1.49.92) sanandana uvāca itīritastena sa rājavaryastatyāja bhedaṃ paramārthadṛṣṭiḥ / sa cāpi jātismaraṇāvabodastatraiva janmanyapavargamāpa // ### [1.49.93](https://indike.org/pramana/in.purana.narada.1.49.93) paramārthādhyātmametattubhyamuktaṃ munīśvara / brāhmaṇakṣatriyaviśāṃ śrortṛāṇāṃ cāpi muktidam // ### [1.49.94](https://indike.org/pramana/in.purana.narada.1.49.94) yathā pṛṣṭaṃ tvayā brahmaṃstathā te gaditaṃ mayā / brahmajñānamidaṃ śuddhaṃ kimanyatkathayāmi vai // ### [1.49.94.p1](https://indike.org/pramana/in.purana.narada.1.49.94.p1) iti śrībṛhannāradīyapurāṇe pūrvabhāge bṛhadupākhyāne dvi.pā.ekonapañcāśattamodhyāyaḥ ## Linked texts (5) - [Viṣṇupurāṇa (vulgate)](https://indike.org/pramana/in.purana.visnu*vulgate.2.14.1) — Sanskrit - [Agnipurāṇa](https://indike.org/pramana/in.purana.agni.379.40) — Vyāsa, Sanskrit - [Ṣaṭsandarbha](https://indike.org/pramana/in.sampradaya.vaisnava.gaudiya.siddhanta.satsandarbha.1.6.82) — Jīva Gosvāmin 1555, Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.27.p436) — Lakṣmīdhara Bhaṭṭa, Sanskrit - [Siddhāntasiddhāñjana](https://indike.org/pramana/in.darsana.advaita.sastra.siddhantasiddhanjana.3.p77) — Kṛṣṇānanda Sarasvatī 1640, Sanskrit --- Source: [https://indike.org/pramana/in.purana.narada.1.49](https://indike.org/pramana/in.purana.narada.1.49) · Pramāṇa