[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 1.62 # Naradapurana 1.62 Nāradapurāṇa 1.62 - **Language:** Sanskrit ## Contents - [1.62.80](https://indike.org/pramana/in.purana.narada.1.62.80) — 1 part ### [1.62.1](https://indike.org/pramana/in.purana.narada.1.62.1) sūta uvāca etacchrṛtvā tu vacanaṃ nārado bhagavānṛṣiḥ / punaḥ papraccha taṃ vipra śukābhipatanaṃ munim // ### [1.62.2](https://indike.org/pramana/in.purana.narada.1.62.2) nārada uvāca bhagavansarvamākhyātaṃ tvayātikaruṇātmanā / yacchrṛtvā mānasaṃ me 'dya śāntimagryāmupāgatam // ### [1.62.3](https://indike.org/pramana/in.purana.narada.1.62.3) punaśca mokṣaśāstraṃ me tvamādiśa mahāmune / nahi sampūrṇatāmeti tṛṣṇā kṛṣṇaguṇārṇave // ### [1.62.4](https://indike.org/pramana/in.purana.narada.1.62.4) ye tu saṃsāranirmuktā mokṣa śāstraparāyaṇāḥ / kutra te nivasaṃtīha saṃśayo me mahānayam // ### [1.62.5](https://indike.org/pramana/in.purana.narada.1.62.5) taṃ chindhi sumahābhāgatvatto nānyo vidāṃvaraḥ / sanaṃ.u dhārayāmāsa cātmānaṃ yathāśāstraṃ mahāmuniḥ // ### [1.62.6](https://indike.org/pramana/in.purana.narada.1.62.6) pādātprabhṛti gātreṣu krameṇa kramayogavit / tataḥ sa prāṅmukho vidvānādityena virocite // ### [1.62.7](https://indike.org/pramana/in.purana.narada.1.62.7) pāṇipādaṃ samādhāya vinītavadupāviśat / na tatra pakṣisaṃghāto na śabdo na ca darśanam // ### [1.62.8](https://indike.org/pramana/in.purana.narada.1.62.8) yatra vaiyāsakirddhāmni yoktuṃ samupacakrame / sa dadarśa tadātmānaṃ sarvasaṃgaviniḥsṛtaḥ // ### [1.62.9](https://indike.org/pramana/in.purana.narada.1.62.9) prajahāsa tato hāsaṃ śukaḥ samprekṣya bhāskaram / sa punaryogamāsthāya mokṣamārgopalabdhaye // ### [1.62.10](https://indike.org/pramana/in.purana.narada.1.62.10) mahāyogīśvaro bhūtvā so 'tyakrāmadvihāyasam / antarīkṣacaraḥ śrīmānvyāsaputraḥ suniścitaḥ // ### [1.62.11](https://indike.org/pramana/in.purana.narada.1.62.11) tamundyantaṃ dvijaśreṣṭhaṃ vainateyasamadyutim / dadṛśuḥ sarvabhūtāni manomārutaraṃhasam // ### [1.62.12](https://indike.org/pramana/in.purana.narada.1.62.12) yathāśakti yathānyāyaṃ pūjayāñcakrire tathā / puṣpa varṣaiśca divyaistamavacakrurdivaukasaḥ // ### [1.62.13](https://indike.org/pramana/in.purana.narada.1.62.13) taṃ dṛṣṭvā vismitāḥ sarve gandharvāpsarasāṃ gaṇāḥ / ṛṣayaścaiva saṃsiddhāḥ ko 'yaṃ siddhimupāgataḥ // ### [1.62.14](https://indike.org/pramana/in.purana.narada.1.62.14) tato 'sau svāhrayaṃ tebhyaḥ kathayāmāsa nārada / uvāca ca mahātejāstānṛṣīnsaṃpraharṣitaḥ // ### [1.62.15](https://indike.org/pramana/in.purana.narada.1.62.15) pitā yadyanugacchenmāṃ krośamānaḥ śuketi vai / tasmai prativacodeyaṃ bhavadbhistu samāhitaiḥ // ### [1.62.16](https://indike.org/pramana/in.purana.narada.1.62.16) bāḍhamuktastatastaistu lokānhitvā caturvidhān / tamo hyaṣṭavidhaṃ tyaktvā jahau pañcavidhaṃ rajaḥ // ### [1.62.17](https://indike.org/pramana/in.purana.narada.1.62.17) tataḥ satvaṃ jahau dhīmāṃstadadbhutamivābhavat / tatastasminpade nitye nirguṇe liṅgapūjite // ### [1.62.18](https://indike.org/pramana/in.purana.narada.1.62.18) tataḥ sa śṛṅge 'pratime himavanmerusannibhe / saṃśliṣṭe śvetapīte ca rukmarūpyamaye śubhe // ### [1.62.19](https://indike.org/pramana/in.purana.narada.1.62.19) śatayojanavistāre tiryāgūrddhca nārada / so 'viśaṅkena manasā tathaivābhyapatacchukaḥ // ### [1.62.20](https://indike.org/pramana/in.purana.narada.1.62.20) te śṛṅge 'tyantasaṃśliṣṭe sahasaiva dvidhākṛte / adṛśyetāṃ dvijaśreṣṭha tadadbhutamivābhavat // ### [1.62.21](https://indike.org/pramana/in.purana.narada.1.62.21) tataḥ parvataśṛṅgābhyāṃ sahasaiva viniḥsṛtaḥ / na ca pratijaghānāsya sa gatiṃ parvatottamaḥ // ### [1.62.22](https://indike.org/pramana/in.purana.narada.1.62.22) tato mandākinīṃ divyā mupariṣṭādabhivrajan / śuko dadarśa dharmātmā puṣpitadrumakānanam // ### [1.62.23](https://indike.org/pramana/in.purana.narada.1.62.23) tasyāṃ krīḍāsu niratāḥ snānti caivāpsarogaṇāḥ / nirākāraṃ tu sākārādadṛśustaṃ vivāsasaḥ // ### [1.62.24](https://indike.org/pramana/in.purana.narada.1.62.24) taṃ prakramantamājñāya pitā snehasamanvitaḥ / uttamāṃ gatimāsthāya pṛṣṭato 'nusasāra ha // ### [1.62.25](https://indike.org/pramana/in.purana.narada.1.62.25) śukastu mārutādūrddhvaṃ gatiṃ kṛtvāṃ tarikṣagām / darśayitvā prabhāvaṃ svaṃ sarvabhūto 'bhavattadā // ### [1.62.26](https://indike.org/pramana/in.purana.narada.1.62.26) atha yogagatiṃ vyāsaḥ samāsthāya mahātapāḥ / nimeṣāntaramātreṇa śukābhipatanaṃ yayau // ### [1.62.27](https://indike.org/pramana/in.purana.narada.1.62.27) sa dadarśa dvidhā kṛtvā parvatāgraṃ gataṃ śukam / śaśaṃsurmunayaḥ siddhā gatiṃ tasmai sutasya tām // ### [1.62.28](https://indike.org/pramana/in.purana.narada.1.62.28) tataḥ śuketiśabdena dīrgheṇa kranditaṃ tadāḥ / svayaṃ pitrā svareṇoñcaistrīṃllokānanunādya vai // ### [1.62.29](https://indike.org/pramana/in.purana.narada.1.62.29) śukaḥ sarvagatirbhūtvā sarvātmā sarvatomukhaḥ / pratyabhāṣata dharmātmā bhoḥ śabdenānunādayan // ### [1.62.30](https://indike.org/pramana/in.purana.narada.1.62.30) tata ekākṣaraṃ nādaṃ bhorityevamudīrayan / pratyāharajjagatsarvamuñcaiḥ sthāvarajaṅgamam // ### [1.62.31](https://indike.org/pramana/in.purana.narada.1.62.31) tataḥ prabhṛti vādyāpi śabdānuñcāritānpṛthak / girigahvarapṛṣṭeṣu vyājahāra śukaṃ prati // ### [1.62.32](https://indike.org/pramana/in.purana.narada.1.62.32) antarhitaprabhāvaṃ taṃ darśayitvā śukastadā / guṇānsaṃtyajya sattvādīnpadamadhyagamatparam // ### [1.62.33](https://indike.org/pramana/in.purana.narada.1.62.33) mahimānaṃ tu taṃ dṛṣṭvā putrasyāmitatejasaḥ / so 'nunīto bhagavatā vyāso rudreṇa nārada // ### [1.62.34](https://indike.org/pramana/in.purana.narada.1.62.34) kimu tvaṃ tāmyasi mune putraṃ prati samākulaḥ / paśyasi vipra nāyāntaṃ brahmabhūtaṃ nijāntire // ### [1.62.35](https://indike.org/pramana/in.purana.narada.1.62.35) ityevamanunīto 'sau vyāsaḥ punaruprāvrajat / śvāśramaṃ sa śuko brahmabhūto lokāṃścacāra ha // ### [1.62.36](https://indike.org/pramana/in.purana.narada.1.62.36) tata kālāntare brahmanvyāsaḥ satyavatīsutaḥ / naranārāyaṇau draṣṭuṃ yayau badarikāśramam // ### [1.62.37](https://indike.org/pramana/in.purana.narada.1.62.37) tatra dṛṣṭvā tu tau devau tapyamāno mahattapaḥ / svayaṃ ca tatra tapasi sthitaḥ śukamanusmaran // ### [1.62.38](https://indike.org/pramana/in.purana.narada.1.62.38) yāvattatra sthito vyāsaḥ śukaḥ paramayogavit / śvetadvīpaṃ gatastāta yatra tvamagamaḥ purā // ### [1.62.39](https://indike.org/pramana/in.purana.narada.1.62.39) tatra dṛṣṭaprabhāvastu śrīmānnārāyaṇaḥ prabhuḥ / dṛṣṭaḥ śrutivimṛgyo hi devadevo janārdanaḥ // ### [1.62.40](https://indike.org/pramana/in.purana.narada.1.62.40) stutaśca śukadevena prasannaḥ prāha nārada / śrībhagavānuvāca tvayā dṛṣṭo 'smi yogīndra sarvadevarahaḥsthitaḥ // ### [1.62.41](https://indike.org/pramana/in.purana.narada.1.62.41) sanatkumārādiṣṭena siddho yogena vāḍava / tvaṃ sadāgatimārgastho lokānpaśya yathecchayā // ### [1.62.42](https://indike.org/pramana/in.purana.narada.1.62.42) ityukto vāsudevena taṃ natvāraṇisaṃbhavaḥ / vaikuṇṭhaṃ prayayau vipra sarvalokanamaskṛtam // ### [1.62.43](https://indike.org/pramana/in.purana.narada.1.62.43) vaimānikaiḥ surairjuṣṭaṃ virajāpariceṣṭitam / yaṃ bhāntamanubhāntyete lokāḥ sarve 'pi nārada // ### [1.62.44](https://indike.org/pramana/in.purana.narada.1.62.44) yatra vidumasopānāḥ svarṇaratnavicitritāḥ / vāpya utpalaṃsaṃchannāḥ surastrīkrīḍanākulāḥ // ### [1.62.45](https://indike.org/pramana/in.purana.narada.1.62.45) divyairhaṃsakulairghuṣṭāḥ svacchāṃbunibhṛtāḥ sadā / tatra dvāḥsthaiścaturhastenārnābharaṇabhūṣitaiḥ // ### [1.62.46](https://indike.org/pramana/in.purana.narada.1.62.46) viṣvaksenānugaiḥ siddhaiḥ kumudādyairavā ritaḥ / praviśyābhyāntaraṃ tatra devadevaṃ caturbhujam // ### [1.62.47](https://indike.org/pramana/in.purana.narada.1.62.47) śāntaṃ prasannavadanaṃ pītakauśeyavāsasam / śaṅkhacakragadāpadmairmūrtimadbhirupāsitam // ### [1.62.48](https://indike.org/pramana/in.purana.narada.1.62.48) vakṣasthalasthayā lakṣmyā kaustubhena virājitam / kaṭīsūtrabrahmasūtrakaṭakāṅgadabhūṣitam // ### [1.62.49](https://indike.org/pramana/in.purana.narada.1.62.49) bhrājatkirīṭavalayaṃ maṇinūpuraśobhitam / dadarśa siddhani karaiḥ sevyamānamaharniśam // ### [1.62.50](https://indike.org/pramana/in.purana.narada.1.62.50) taṃ dṛṣṭvā bhaktibhāvena tuṣṭāva madhusūdanam / śuka uvāca namaste vāsudevāya sarvalokaikasākṣiṇe // ### [1.62.51](https://indike.org/pramana/in.purana.narada.1.62.51) jagadbījasvarūpāya pūrṇāya nibhṛtātmane / haraye vāsukisthāya śvetadvīpanivāsine // ### [1.62.52](https://indike.org/pramana/in.purana.narada.1.62.52) haṃsāya matsyarūpāya vārāhatanudhāriṇe / nṛsiṃhāya dhruvejyāya sāṃkhyayogeśvarāya ca // ### [1.62.53](https://indike.org/pramana/in.purana.narada.1.62.53) catuḥsanāya kūrmāya pṛthave svasuravātmane / nābheyāya jagaddhātre vidhātreṃ'takāraya ca // ### [1.62.54](https://indike.org/pramana/in.purana.narada.1.62.54) bhārgavendrāya rāmāya rāghavāya parāya ca / kṛṣṇāya vedakartre ca buddhakalkisvarūpiṇe // ### [1.62.55](https://indike.org/pramana/in.purana.narada.1.62.55) caturvyuhāya vedyāya dhyeyāya paramātmane / naranārāyaṇākhyāya śiṣiviṣṭāya viṣṇave // ### [1.62.56](https://indike.org/pramana/in.purana.narada.1.62.56) ṛtadhāmne vidhāmne ca suparṇāya svarociṣe / ṛbhave suvratākhyāya sudhāmne cājitāya ca // ### [1.62.57](https://indike.org/pramana/in.purana.narada.1.62.57) viśvarūpāya viśvāya sṛṣṭisthityantakāriṇe / yajñāya yajñabhokte ca sthaviṣṭhāyāṇave 'rthine // ### [1.62.58](https://indike.org/pramana/in.purana.narada.1.62.58) ādityasomanetrāya sahaojobalāya ca / ījyāya sākṣiṇe 'jāyabahuśīrṣāṅghribāhave // ### [1.62.59](https://indike.org/pramana/in.purana.narada.1.62.59) śrīśāya śrīnivāsāya bhaktavaśyāya śārṅgiṇe / aṣṭaprakṛtyadhīśāya brahmaṇe 'nantasaktaye // ### [1.62.60](https://indike.org/pramana/in.purana.narada.1.62.60) bṛhadāraṇyavedyāya hṛṣīkeśāya vedhase / puṇḍarīkanibhākṣāya kṣetrajñāya vibhāsine // ### [1.62.61](https://indike.org/pramana/in.purana.narada.1.62.61) govindāya jagatkartre jagannāthāya yogine / satyāya satyasaṃdhāya vaikuṇṭhāyācyutāya ca // ### [1.62.62](https://indike.org/pramana/in.purana.narada.1.62.62) adhokṣajāya dharmāya vāmanāya tridhātave / ghṛtārciṣe viṣṇave te 'nantāya kapilāyaya ca // ### [1.62.63](https://indike.org/pramana/in.purana.narada.1.62.63) viriñcaye trikakude ṛgyajuḥsāmarūpiṇe / ekaśṛṅgāya ca śuciśravase śāstrayonaye // ### [1.62.64](https://indike.org/pramana/in.purana.narada.1.62.64) vṛṣākapaya ṛddhāya prabhave viśvakarmaṇe / bhūrbhuvuḥsvaḥsvarūpāya daityaghne nirguṇāya ca // ### [1.62.65](https://indike.org/pramana/in.purana.narada.1.62.65) nirañjanāya nityāya hyavyayāyākṣarāya ca / namaste pāhi māmīśa śaraṇāgatavatsala // ### [1.62.66](https://indike.org/pramana/in.purana.narada.1.62.66) iti stutaḥ sa bhagavāñcchaṅkhacakragadādharaḥ / āraṇeyamuvācedaṃ bhṛśaṃ praṇatavatsalaḥ // ### [1.62.67](https://indike.org/pramana/in.purana.narada.1.62.67) śrībhagavānuvāca vyāsaputra mahābhāga prīto 'smi tava suvrata / vidyāmāpnuhi bhaktiṃ ca jñānī tvaṃ mama rūpadhṛk // ### [1.62.68](https://indike.org/pramana/in.purana.narada.1.62.68) yadrūpaṃ mama dṛṣṭaṃ prāk śvetadvīpe tvayā dvija / so 'hamevāvatārārthaṃ sthito viśvaṃbharātmakaḥ // ### [1.62.69](https://indike.org/pramana/in.purana.narada.1.62.69) siddho 'si tvaṃ mahābhāga mokṣadharmānunucintayā / varalokānyathā vāyuryathā ravaṃ savitā tathā // ### [1.62.70](https://indike.org/pramana/in.purana.narada.1.62.70) nityamuktasvarūpastvaṃ pūjyamānaḥ surairnaraiḥ / bhaktirhi durlabhā loke mayi sarvaparāyaṇe // ### [1.62.71](https://indike.org/pramana/in.purana.narada.1.62.71) tāṃ labdhvā nāparaṃ kiñcillabdhavyamavaśiṣyate / ākalpāntaḥ tapaḥ saṃsthau naranārāyaṇāvṛṣī // ### [1.62.72](https://indike.org/pramana/in.purana.narada.1.62.72) tayornideśato vyāso janaka stava suvrataḥ / kartā bhāgavataṃ śāstraṃ tadadhīṣva bhuvaṃ vraja // ### [1.62.73](https://indike.org/pramana/in.purana.narada.1.62.73) sa tapyati tapastvadya parvate gandhamādane / tvadviyogena khinnātmā taṃ prasādaya matpriyam // ### [1.62.74](https://indike.org/pramana/in.purana.narada.1.62.74) evamuktaḥ śuko vipra namaskṛtya caturbhujam / yathāgataṃ nivṛtto 'sau piturantikamāgamat // ### [1.62.75](https://indike.org/pramana/in.purana.narada.1.62.75) atha taṃ svantike dṛṣṭvā pārāśaryyaḥ pratāpavān / putraṃ prāpya prahṛṣṭātmā tapaso nivavarta ha // ### [1.62.76](https://indike.org/pramana/in.purana.narada.1.62.76) nārāyaṇaṃ namaskṛtya naraṃ caiva narottamam / āraṇeyasamāyuktaḥ svāśramaṃ samupāgamat // ### [1.62.77](https://indike.org/pramana/in.purana.narada.1.62.77) nārāyaṇaniyogāttu tvanmukhena munīśvara / cakāra saṃhitāṃ divyāṃ nānākhyānasamanvitām // ### [1.62.78](https://indike.org/pramana/in.purana.narada.1.62.78) vedatulyāṃ bhāgavatīṃ haribhaktivivarddhinīm / nivṛttinirataṃ putraṃ śukamadhyāpayañca tām // ### [1.62.79](https://indike.org/pramana/in.purana.narada.1.62.79) ātmārāmo 'pi bhagavānpārāśaryātmajaḥ śukaḥ / adhītavānsaṃhitāṃ vai nityaṃ viṣṇujanapriyām // ### [1.62.80](https://indike.org/pramana/in.purana.narada.1.62.80) evamete samākhyātā mokṣadharmāstavānadha / paṭhatāṃ śṛṇvatāṃ cāpi haribhaktivivarddhanāḥ // ### [1.62.80.p1](https://indike.org/pramana/in.purana.narada.1.62.80.p1) iti śrībṛhannāradīyapurāṇe pūrvabhāge dvitīyapāde bṛhadupākhyāne mokṣadharṃmanirūpaṇaṃ nāma dviṣaṣṭitamo 'dhyāyaḥ ## Linked texts (2) - [Southern recension](https://indike.org/pramana/in.lit.mahabharata.vyasa*southern.12.340.2) — Sanskrit - [Āryacarita](https://indike.org/pramana/in.lit.short_stories.aryacarita.107.2) — Sanskrit --- Source: [https://indike.org/pramana/in.purana.narada.1.62](https://indike.org/pramana/in.purana.narada.1.62) · Pramāṇa