Pramāṇa · Search · About · API

Naradapurana 1.72

Nāradapurāṇa 1.72

Language
Sanskrit

Contents

1.72.1

sanatkumāra uvāca
praṇavo hṛdayaṃ viṣṇurnentaḥ surapatistathā /
mahābalāya svāhānto mantro vasudharākṣaraḥ //

1.72.2

munirindurvirāṭ chando devatā dadhivāmanaḥ /
tāro bījaṃ tathā śaktirvahnijāyā prakīrtitā //

1.72.3

candrākṣirāmabāṇeṃṣu netrasaṃkhyairmanūdbhavaiḥ /
varṇaiḥ ṣaḍaṅgaṃ kṛtvā ca mūrdhni bhāle ca netrayoḥ //

1.72.4

karṇayorghrāṇayoroṣṭatālukaṇṭhabhujeṣu ca /
pṛṣṭe hṛdyudare nābhau guhye corusthale punaḥ //

1.72.5

jānudvayaṃ jaṅghayośca pādayorvinyasetkramāt /
aṣṭādaśaiva mantrotthāstato devaṃ vicintayet //

1.72.6

muktāgauraṃ ratnabhūṣaṃ candrasthaṃ bhṛṅgasannibhaiḥ /
alakairvilasadvaktraṃ kumbhaṃ śuddhāṃbupūritam //

1.72.7

dadhyannapūrṇacaṣakaṃ dorbhyāṃ saṃdadhanaṃ bhajet /
lakṣatrayaṃ japenmantraṃ taddaśāṃśaṃ ghṛtaplutaiḥ //

1.72.8

pāyasānnaiḥ prajuhuyāddadhyannena yathāvidhi /
candrānte kalpite pīṭhe pūrvokteṃ pūjayeñca tam //

1.72.9

saṃkalpamūrtimūlena saṃpūjya ca vidhānataḥ /
kesareṣu ṣaḍaṅgāni saṃpūjya digdaleṣu ca //

1.72.10

vāsudevaṃ saṃkarṣaṇaṃ pradyumnamaniruddhakam /
koṇapatreṣu śāntiṃ ca śriyaṃ sarasvatīṃ ratim //

1.72.11

dhvajaṃ ca vainateyaṃ ca kaustubhaṃ vanamālikam /
śaṅkhaṃ cakraṃ gadāṃ śārṅgaṃ daleṣvaṣṭasu pūjayet //

1.72.12

dalāgreṣu keśavādīndikpālāṃstadanantaram /
tadastrāṇi ca sampūjya gajānaṣṭau samarcayet //

1.72.13

airāvataḥ puṇḍarīko vāmanaḥ kumudāeṃ'janaḥ /
puṣpadantaḥ sārvabhaumaḥ supratīkaśca diggajāḥ //

1.72.14

kariṇyo 'bhramukapilopiṅgalānupamāḥ kramāt /
tāmrakarṇī śubhradantī cāṅganā hyañjanā vatī //

1.72.15

evamārādhito mantrī dadyādiṣṭāni mantriṇe /
śrīkāmaḥ pāyasājyena sahasraṃ juhuyātsudhīḥ //

1.72.16

mahatīṃ śriyamāpnoti dhānyāptirdhānya homataḥ /
śatapuṣpāsamutthaiśca bījairhutvā sahasrataḥ //

1.72.17

mahābhayaṃ nāśayeddhi nātra kāryā vicāraṇā /
daddhyodanena śuddhena hutvā mucyate durgateḥ //

1.72.18

dhyātvā traivikramaṃ rūpaṃ japenmantraṃ samāhitaḥ /
kārāgṛhādbhavanmukto baddho mantraprabhāvataḥ //

1.72.19

bhittau saṃpādya deveśaṃ phalake vā prapūjayet /
nityaṃ sugandhakusumairmahatīṃ śriyamāpnuyāt //

1.72.20

hutvā raktotpalairmantrī vaśayetsakalaṃ jagat /
annājyairjuhuyānnityamaṣṭāviṃśatisaṃkhyayā //

1.72.21

sitājyānnaṃ ca vidhivatprāpnuyādannamakṣayam /
apūpaiḥ ṣaḍrasopetairhunedvasusahasrakam //

1.72.22

alakṣmīṃ ca parābhūya mahatīṃ śriyamāpnuyāt /
juhuyādayutaṃ mantrī dadhyannaṃ ca sitānvitam //

1.72.23

yatra yatra vasetso 'pi tatrānnagirimāpnuyāt /
padmākṣarairyutaṃ bilvāntikastho juhuyānnaraḥ //

1.72.24

mahālakṣmīṃ sa labhate tatra tatra na saṃśayaḥ /
juhuyātpāyasairlakṣaṃ vācaspatisamo bhavet //

1.72.25

lakṣaṃ japtvā taddaśāṃśaṃ putrajīvaphalairhunet /
tatkāṣṭairedhite vahnau śreṣṭhaṃ putramavāpnuyāt //

1.72.26

sasādhyatāraṃ vilasatkarṇikaṃ ca suvarṇakaiḥ /
vilasatkesaraṃ mantrākṣaradvandvāṣṭapatrakam //

1.72.27

śeṣayugmārṇāntyapatraṃ dvādaśākṣaraveṣṭitam /
tadbahirmātṛkāvarṇairyantraṃ sampatpradaṃ nṛṇām //

1.72.28

raktaṃ trivikramaṃ dhyātvā prasūnai raktavarṇakaiḥ /
juhuyādayutaṃ mantrī sarvatra vijayī bhavet //

1.72.29

dhyāyeñcandrāsanagataṃ padmānāmayutaṃ hunet /
labhedakaṇṭakaṃ rājyaṃ sarvalakṣaṇasaṃyutam //

1.72.30

hutvā lavaṅgairmadhvāktairapāmārgadalaistu vā /
ayutaṃ sādhyanāmāḍhyaṃ sa vaśyo jāyate dhruvam //

1.72.31

aṣṭottaraśataṃ hutvā hyapāmārgadalaiḥ śubhaiḥ /
tāvajjaptvā ca saptāhānmahārogātpramucyate //

1.72.32

uhiratpadamābhāṣya praṇavohīya śabdataḥ /
sarvavārgīśvaretyante pravadedīśvaretyatha //

1.72.33

sarvavedamayācintyapadānte sarvamīrayet /
bodhayadvitavānto 'yaṃ mantrastārādirīritaḥ //

1.72.34

ṛṣirbrahmāsya nirdiṣṭaśchando 'nuṣṭubudāhṛtam /
devatā syāddhayagrīvo vāgaiśvaryaprado vibhuḥ //

1.72.35

tāreṇa pādairmantrasya pañcāṅgāni prakalpayet /
tuṣārādrisamacchāyaṃ tulasīdāmabhūṣitam //

1.72.36

turaṅgavadanaṃ vande tuṅgasārasvataḥ padam /
dhyātvaivaṃ prajapenmantramayutaṃ taddaśāṃśataḥ //

1.72.37

madhvaktaiḥ pāyasairhutvā vimalādisamanvite /
pūjayedveṣṇave pīṭhe mūrtiṃ saṃkalpya mūlataḥ //

1.72.38

karṇikāyāṃ caturdikṣu yajetpūrvāditaḥ kramāt /
sanandanaṃ ca sanakaṃ śriyaṃ ca pṛthivīṃ tathā //

1.72.39

tadvahirdikṣu vedāśca ṣaṭkoṇeṣu tator'cayet /
niruktaṃ jyotiṣaṃ paścādyajedvyākaraṇaṃ tataḥ //

1.72.40

kalpaṃ śikṣāṃ ca chandāṃsi vedāṅgāni tvimāni vai /
tato 'ṣṭadalamūle tu mātaro 'ṣṭau samarcayet //

1.72.41

vakratuṇḍādikānaṣṭo dalamadhye prapūjayet /
dalāgreṣyarcayetpaścātsādhakaścāṣṭabhairavān //

1.72.42

asitāṅgaṃ ruruṃ caiva bhīṣaṇaṃ raktakanetrakam /
baṭukaṃ kāladamanaṃ danturaṃ vikaṭaṃ tathā //

1.72.43

tadbahiḥ ṣoḍaśadaleṣvavatārānharerdaśa /
śaṅkhaṃ cakraṃ gadāṃ padmaṃ nandakaṃ śārṅgameva ca //

1.72.44

tadbahirbhūgṛhe śakramukhāndaśa digīśvarān /
vajrādyāṃstadbahiśceṣṭvādvāreṣu ca tataḥ kramāt //

1.72.45

mahāgaṇapatiṃ durgāṃ kṣetreśaṃ baṭukaṃ tathā /
samastaprakaṭādyāśca yoginyastadbahirbhavet //

1.72.46

tadbahiḥ sapta nadyaśca tadbāhye tu grahānnava /
tadbāhye parvatānaṣṭau nakṣatrāṇi ca tadbahiḥ //

1.72.47

evaṃ pañcadaśāvṛttyā saṃpūjya turagānanam /
vāgīśvarasamo vāci dhanairdhanapatirbhavet //

1.72.48

evaṃ siddhe manau mantrī prayogānkartumarhati /
aṣṭottarasahasraṃ tu śuddhaṃ vāryabhimantritam //

1.72.49

bījena māsamātraṃ yaḥ pibeddhīmān jitandriyaḥ /
janmamūko 'pi sa naro vāksiddhiṃ labhate dhruvam //

1.72.50

viyadbhugusthamardhīrābindumadbījamīritam /
candrasūryoparāge tu pātre rukmamaye kṣipet //

1.72.51

dugdhaṃ vacāṃ tato mantrī kaṇṭhamātrodake sthitaḥ /
sparśādvimokṣaparyantaṃ prajapenmantramādarāt //

1.72.52

pibettatsarvamacirāttasya sārasvataṃ bhavet /
jyotiṣmatīlatābījaṃ dineṣvekaikavarddhitam //

1.72.53

aṣṭottaraśataṃ yāvadbhakṣayedabhimantritam /
sarasvatyavatāro 'sau satyaṃ syādbhuvi mānavaḥ //

1.72.54

kirṃ bahūktena viprendra manorasya prasādataḥ /
sarvavedāgamādīnāṃ vyākhyātā jñānavān bhavet //

1.72.54.p1

iti śrībṛhannāradīyapurāṇe pūrvabhāge bṛhadupākhyāne sanatkumāravibhāge tṛtīyapāde hayagrīvopāsanānirūpaṇaṃ nāma dvisaptatitamo 'dhyāyaḥ

Linked texts (2)