Pramāṇa · Search · About · API

Naradapurana 1.73

Nāradapurāṇa 1.73

Language
Sanskrit

Contents

1.73.1

sanatkumāra uvāca
atha rāmasya manavo vakṣyante siddhidāyākāḥ /
yeṣāmārādhanānmartyāstaranti bhavasāgaram //

1.73.2

sarveṣu mantravaryeṣu śreṣṭhaṃ vaiṣṇavamucyate /
gāṇapatyeṣu saureṣu śāktaśaiveṣvabhīṣṭadam //

1.73.3

vaiṣṇaveṣvapi mantreṣu rāmamantrāḥ phalādhikāḥ /
gāṇapatyādimantrebhyaḥ koṭikoṭiguṇādhikāḥ //

1.73.4

viṣṇuśayyāsthito vahnirindubhūṣitamastakaḥ /
rāmāya hṛdayānto 'yaṃ mahāghaudhavināśanaḥ //

1.73.5

sarveṣu rāmamantraṣu hyatiśreṣṭhaḥ ṣaḍakṣaraḥ /
brahmahatyāsahasrāṇi jñātājñātakṛtāni ca //

1.73.6

svarṇasteya surāpānagurutalpāyutāni ca /
koṭikoṭisahasrāṇi hyupapāpāni yāni vai //

1.73.7

mantrasyoñcāraṇātsadyo layaṃ yānti na saṃśayaḥ /
brahmā muniḥ syādgāyatrī chando rāmaśca devatā //

1.73.8

ādyaṃ bījaṃ ca hṛcchaktirviniyogo 'khilāptaye /
ṣaḍdīrghabhājā bījena ṣaḍaṅgāni samācaret //

1.73.9

brahmarandhre bhruvormadhye hṛnnābhyorguhyapādayoḥ /
mantravarṇānkramānnyasya keśavādīnpravinyaset //

1.73.10

pīṭhanyāsādikaṃ kṛtvā dhyāyeddhṛdi raghūttamam /
kālāṃbhodharakāntaṃ ca vīrā sanasamāsthitam //

1.73.11

jñānamudrāṃ dakṣahaste dadhataṃ jānunītaram /
saroruhakarāṃ sītāṃ vidyudābhāṃ ca pārśvagām //

1.73.12

paśyantīṃ rāmavakrābjaṃ vividhākalpabhūṣitām /
dhyātvaivaṃ prajapedvarṇalakṣaṃ mantrī daśāṃśataḥ //

1.73.13

kamalairjuhuyādvahnau brāhmaṇānbhojayettataḥ /
pūjayedvaiṣṇave pīṭhe vimalādisamanvite //

1.73.14

mūrtiṃ mūlena saṃkalpya tasyāmāvāhya sādhakaḥ /
sītāṃ vāme samāsīnāṃ tanmantreṇa prapūjayet //

1.73.15

ramāsītāpadaṃ ṅeṃtaṃ dviṭhānto jānakīmanuḥ /
agreḥ śārṅgaṃ ca sampūjya śarānpārśvadvayer'cayet //

1.73.16

keśareṣu ṣaḍaṅgāni patreṣvetānsamarcayet /
hanumantaṃ ca sugrīvaṃ bharataṃ sabibhīṣaṇam //

1.73.17

lakṣmaṇāṅgadaśatrughnān jāṃbavantaṃ kramātpunaḥ /
vācayantaṃ hanūmantagrato dhṛtapustakam //

1.73.18

yajedbharataśatrughnau pārśvayordhṛtacāmarau /
dhṛtātapatraṃ hastābhyāṃ lakṣmaṇaṃ pṛṣṭator'cayet //

1.73.19

tato 'ṣṭapatre sṛṣṭiṃ ca japantaṃ vijayaṃ tathā /
surāṣṭraṃ rāṣṭrapālaṃ ca akopaṃ dharmapālakam //

1.73.20

sumantaṃ ceti sampūjya loke śānāyudhairyutān /
evaṃ rāmaṃ samārādhya jīvanmuktaḥ prajāyate //

1.73.21

candanāktaiḥ prajuhuyājjātīpuṣpaiḥ samāhitaḥ /
rājavaśyāya kamalairdhanadhānyādisiddhaye //

1.73.22

lakṣmīkāmaḥ prajuhuyātprasūnairvilvasaṃbhavaiḥ /
ājyāktairnīlakamalairvaśayedakhilaṃ jagat //

1.73.23

ghṛtāktaśatavarvībhirdīrghāyuśca nirāmayaḥ /
raktotpalānāṃ homena dhanaṃ prāpnoti vāñchitam //

1.73.24

pālāśakusumairhutvā medhāvī jāyate naraḥ /
tajjaptāṃbhaḥ pibetprātarvatsarātkavirāḍ bhavet //

1.73.25

tanmantritānnaṃ bhuñjītamahārogapraśāntaye /
rogoktauṣadhahomena tadrogānmucyate kṣaṇām //

1.73.26

nadītīre ca goṣṭhe vā japellakṣaṃ payobrataḥ /
pāyasenājyayuktena hutvā vidyānidhirbhavet //

1.73.27

parikṣīṇādhipatyo yaḥ śākāhāro jalāntare /
japellakṣaṃ ca juhuyādvilvapuṣpairdaśāṃśataḥ //

1.73.28

tadaiva punarāpnoti svādhipatyaṃ na saṃśayaḥ /
upoṣya gaṅgātīrānte sthitvā lakṣaṃ japennaraḥ //

1.73.29

daśāṃśaṃ kamalairhutvā vilvotthairvā prasūnakaiḥ /
madhuratrayasaṃyuktairādajyaśriyamavāpnuyāt //

1.73.30

mārgamāse jale sthitvā kandamūlaphalāśanaḥ /
lakṣaṃ japtvā daśāṃśena pāyasairjuhuyādvasau //

1.73.31

śrīrāmacandrasadṛśaḥ putraḥ pautro 'pi jāyate /
anye 'pi bahavaḥ saṃti prayogāmantrarājake //

1.73.32

kintu prayogakartṛāṇāṃ paraloko na vidyate /
ṣaṭkoṇaṃ vasupatraṃ ca tadbāhyārkadalaṃ likhet //

1.73.33

ṣaṭkoṇeṣu ṣaḍarṇāni mantrasya vilikhed budhaḥ /
aṣṭapatre tathāṣṭārṇāṃllikhetpraṇavagarbhitān //

1.73.34

kāmabījaṃ ravidale madhye mantrāvṛtābhidhām /
sudarśanāvṛtaṃ bāhye dikṣu yugmāvṛtaṃ tathā //

1.73.35

vajrollasadbhūmigehaṃ kandarpāṅkuśapāśakaiḥ /
bhūmyā ca vilasatkoṇaṃ yantrarājamidaṃ smṛtam //

1.73.36

bhūrje 'ṣṭagandhaiḥ saṃlikhya pūjayeduktavartmanā /
ṣaṭkoṇeṣu dalārkābjānyāveṣṭavṛttayugmataḥ //

1.73.37

keśareṣvaṣṭapatrasya svaradvandvaṃ likhed budhaḥ /
bahistu mātṛkāṃ caiva mantraṃ prāṇanidhayanama //

1.73.38

yantrametacchubhe ghasre kaṇṭhe vā dakṣiṇe bhuje /
mūrdhni vā dhārayenmantrī sarvapāpaiḥ pramucyate //

1.73.39

sudine śubhanakṣatre sudeśe śalyavarjite /
vaśyākarṣaṇavidveṣadrāvaṇoccāṭanādikam //

1.73.40

puṣyadvayaṃ tathādityārdrāmaghāsu yathākramam /
dūrvotthā lekhanī vaśye tathākṛṣṭau karañjajā //

1.73.41

narāsthijā māraṇe tu staṃbhane rājavṛkṣajā /
śāntipuṣṭaṣṭyāyuṣāṃ siddhayai sarvāpacchamanāya ca //

1.73.42

vibhramotpādane caiva śilāyāṃ vilikhed budhaḥ /
kharacarmaṇi vidveṣe dhvaje tūñcāṭanāya ca //

1.73.43

śatrūṇāṃ jvarasantāpaśokamāraṇakarmaṇi /
pītavasraṃ likhitvā tu sādhayetsādhakottamaḥ //

1.73.44

vaśyākṛṣṭau cāṣṭagandhaiḥ sampūjya ca yathāvidhi /
citāṅgārādinā caiva tāḍanoccāṭanādikam //

1.73.45

viṣārkakṣīrayogena māraṇaṃ bhavati dhruvam /
likhitvaivaṃ yantrarājaṃ gandhapuṣpādibhiryajet //

1.73.46

trilohaveṣṭitaṃ kṛtvā dhārayetsādhakottamaḥ /
bījaṃ rāmāya ṭhadvandvaṃ mantro 'yaṃ rasavarṇakaḥ //

1.73.47

mahāsudarśanamanuḥ kathyate siddhidāyakaḥ /
sudarśanamahāśabdāccakrarājeśvareti ca //

1.73.48

duṣṭāntakaduṣṭabhayānakaduṣṭabhayaṅkaram /
chindhidvayaṃ bhindhiyugmaṃ vidārayayugaṃ tataḥ //

1.73.49

paramantrān grasadvandvaṃ bhakṣayadvitayaṃ tataḥ /
trāsayadvitayaṃ varmāstrāgnijāyāntimo manuḥ //

1.73.50

aṣṭaṣaṣṭyakṣaraḥ prokto yantrasaṃveṣṭane tvayam /
tāro hṛdbhagavān ṅeṃto ṅeṃto hi raghunandanaḥ //

1.73.51

rakṣoghnaviśadāyānte madhurādiprasanna ca /
varadānāyāmitānte nutejasepadamīrayet //

1.73.52

bālāyānte tu rāmāya viṣṇave hṛdayāntimaḥ /
saptacatvāriṃśadarṇo mālāmantro 'yamīritaḥ //

1.73.53

viśvāmitro muniścāsya gāyatrī chanda īritam /
śrīrāmo devatā bījaṃ dhruvaḥ śaktiśca ṭhadvayam //

1.73.54

ṣaḍdīrghasvarayugmāyābījenāṅgāni kalpayet /
dhyānapūjādikaṃ sarvamasya pūrvavadācaret //

1.73.55

ayamārādhito mantraḥ sarvānkāmānprayacchati /
svakāmasatyavāglakṣmītārāḍhyaḥ pañcavarṇakaḥ //

1.73.56

ṣaḍakṣaraḥ ṣaḍvidhaḥ syāñcaturvargaphalapradaḥ /
brahmā saṃmohanaḥ śaktirdakṣiṇāmūrtisaṃjñakaḥ //

1.73.57

agastyaḥ śrīśivaḥ proktāste teṣāṃ munayaḥ kramāt /
athavā kāmabījāderviśvāmitro muniḥ smṛtaḥ //

1.73.58

chandaḥ proktaṃ ca gāyatrī śrīrāmo devatā punaḥ /
bījaśaktirādhamāntyaṃ mantrārṇaiḥ syātṣaḍaṅgakam //

1.73.59

bījaiḥ ṣaḍdīrghayuktairvā mantrārṇānpūrvavannyaset /
dhyāyetkalpatarormūle suvarṇamayamaṇḍape //

1.73.60

puṣpakākhyavimānāntaḥ siṃhāsanaparicchade /
padme vasudaledevamindranīlasamaprabham //

1.73.61

vīrāsanasamāsīnaṃ jñānamudropaśobhitam /
vāmorunyastataddhastasītālakṣmaṇasevitam //

1.73.62

ratnākalpaṃ vibhundhyātvā varṇalakṣaṃ japenmanum /
yadvā smārādimantrāṇāṃ jayābhaṃ ca hariṃ smaret //

1.73.63

yejanaṃ kāmyakarmāṇi sarvaṃ kuryātṣaḍarṇavat /
rāmaśca candrabha drānto ṅenamonto dhruvādikaḥ //

1.73.64

mantrāvaṣṭākṣarau hyetau tārāntyau cennavākṣarau /
eteṣāṃ yajanaṃ sarvaṃ kuryānmantrī ṣaḍarṇavat //

1.73.65

jānakīvallabho ṅeṃto dviṭhāntaḥ kavacādikaḥ /
daśārṇo 'yaṃ mahāmantro viśiṣṭo 'sya muniḥ svarāṭ //

1.73.66

chandaśca devatā sītā patirbījaṃ tathādimam /
svāhā śaktiśca kāmena kuryādaṅgāni ṣaṭ kramāt //

1.73.67

śirolalāṭabhrūmadhyatālukaṇṭheṣu hṛdyapi /
nābhyaṅghrijānupādeṣu daśārṇānvinyasenmanoḥ //

1.73.68

ayodhyānagare ratnacitrasauvarṇamaṇḍape /
mandārapuṣpairābaddhavitāne toraṇānvite //

1.73.69

siṃhāsanasamāsīna puṣpakopari rāghavam /
rakṣobhirharibhirdevaiḥ suvimānagataiḥ śubhaiḥ //

1.73.70

saṃstūyamānaṃ munibhiḥ prahvaiśca parisevitam /
sītālaṅkṛtavāmāṅgaṃ lakṣmaṇenopaśobhitam //

1.73.71

śyāmaṃ prasannavadanaṃ sarvābharaṇabhūṣitam /
evaṃ dhyātvā japenmantrī varṇalakṣaṃ samāhitaḥ //

1.73.72

daśāṃśaḥ kamalairhemo yajanaṃ ca ṣaḍarṇavat /
rāmo ṅeṃnto dhanuṣpāṇirṅaitoṃ'te vahnisuṃdarī //

1.73.73

daśākṣaro 'yaṃ mantro 'sya munirbrahmā virāṭ punaḥ /
chandastu devatā prokto rāmo rākṣasamardanaḥ //

1.73.74

ādyaṃ bījaṃ dviṭhaḥ śaktibīñjenāṅgāni kalpayet /
varṇanyāsaṃ tathā dhyānaṃ puraścaryārcanādikaman //

1.73.75

daśākṣaroktavatkuryāccāpabāṇadharaṃ smaret /
tāro namo bhagavate rāmānte candrabhadrakau //

1.73.76

ṅeṃtāvarkākṣarau mantrau ṛṣidhyānādi pūrvavat /
śrīpūrvaṃ jayapūrvaṃ ca taddvidhā rāmanāma ca //

1.73.77

trayodaśākṣaro mantro munirbrahmā virāṭ smṛtam /
chandastu devatā prokto rāmaḥ pāpaughanāśanaḥṛ //

1.73.78

ṣaḍaṅgāni prakurvīta dvirāvṛttyā padatrayaiḥ /
dhyānārcanādikaṃ sava hyasya kuryāddaśārṇavat //

1.73.79

tāro namo bhagavate rāmāyānte mahāpadam /
puruṣāya hṛdanto 'yaṃ manuraṣṭādaśākṣaraḥ //

1.73.80

viśvāmitro muniśchado dhṛtī rāmo 'sya devatā /
tāro bījaṃ namaḥ śaktiścandrākṣyabdhyagniṣaḍbhujaiḥ //

1.73.81

varṇaimantrotthitaiḥ kuryātṣaḍaṅgāni samāhitaḥ /
niḥśāṇabherīpaṭahaśaṅkhaturyādiniḥsvanaiḥ //

1.73.82

pravṛttanṛtye parito jayamaṅgalabhāṣite /
candanāgarukastūrīkarpūrādisuvāsite //

1.73.83

nānākusumasaurabhyavāhigandhavahānvite /
devagandharvanārībhirgāyantībhiralakṛte //

1.73.84

siṃhāsane samāsīnaṃ puṣpakopari rāghavam /
saumitrisītāsahitaṃ jaṭāmukuṭaśobhitam //

1.73.85

cāpabāṇadharaṃ śyāmaṃ sasugrīvavibhīṣaṇam /
hatvā rāvaṇamāyāntaṃ kṛtatrailokyarakṣaṇam //

1.73.86

evaṃ dhyātvā japedvarṇaṃ lakṣaṃ matrī daśāṃśataḥ /
ghṛtāktaiḥ pāyasairhutvā yajanaṃ pūrvavañcaret //

1.73.87

praṇavo hṛdayaṃ sītāpataye tadanantaram /
rāmāya hanayugmānte varmāstrāgnipriyāntimaḥ //

1.73.88

ekonaviṃśadvarṇo 'yaṃ mantraḥ sarvārthasādhakaḥ /
viśvāmitro muniścāsyānuṣṭupchanda udāhṛtam //

1.73.89

devatā rāmabhadro jaṃ bījaṃ śaktirnama iti /
mantrotthitaiḥ kramādvarṇaistato dhyāyeñca pūrvavat //

1.73.90

pūjanaṃ kāmyakarmādi sarvamasya ṣaḍarṇavat /
tāraḥ svabījaṃ kamalā rāmabhadreti saṃpaṭhet //

1.73.91

maheṣvāsapadānte tu raghuvīra nṛpottama /
daśāsyāntakaśabdānte māṃ rakṣa dehi saṃpaṭhet //

1.73.92

paramānte me śriyaṃ syānmantro bāṇaguṇākṣaraḥ /
bījairviyukto dvātriṃśadarṇo 'yaṃ phaladāyakaḥ //

1.73.93

viśvāmitro muniścāsyānuṣṭupchanda udāhṛtam /
devatā rāmabhadro 'tra bījaṃ svaṃ śaktirindirā //

1.73.94

bījatrayādyaiḥ kurvīta padaiḥ sarveṇa mantravit /
pañcāṅgāni ca vinyasya mantravarṇānkramānnyaset //

1.73.95

mūrdhni bhāle dṛśoḥ śrotre gaṇḍayugme sanāsike /
āsye doḥsaṃdhiyugale stanahṛnnābhiṣu kramāt //

1.73.96

kaṭau meḍhre pāyupādasaṃdhiṣvarṇānnyasenmanoḥ /
dhyānārcanādikaṃ cāsya pūrvavatsamupācaret //

1.73.97

lakṣatrayaṃ puraścaryāṃ pāyasairhavanaṃ matam /
dhyātvā rāmaṃ pītavarṇaṃ japellakṣaṃ samāhitaḥ //

1.73.98

daśāṃśaṃ kamalairhutvā dhanairdhanapatirbhavet /
tāro māyā ramādvandvaṃ dāśarathāya hṛñca vai //

1.73.99

ekādaśākṣaro mantro munyādyarcāsya pūrvavat /
trailokyānte tu nāthāya hṛdanto vasuvarṇavān //

1.73.100

asyāpi pūrvavatsarvaṃ nyāsadhyānārcanādikam /
āñjaneyapadānte tu gurave hṛdayāntimaḥ //

1.73.101

mantro navākṣaro 'syāpi yajanaṃ pūrvavanmatam /
ṅetaṃ rāmapada paścāddhṛdayaṃ pañcavaṇavat //

1.73.102

munidhyānārcanaṃ cāsya proktaṃ sarvaṃ ṣaḍarṇavat /
rāmānte candrabhadrau ca ṅeṃtau pāvakavallabhā //

1.73.103

mantro dvau ca samākhyātau munyādyarcādi pūrvavat /
vahniḥ śeṣānvitaścaiva candrabhūṣitamastakaḥ //

1.73.104

ekākṣaro raghupatermantraḥ kalpadrumo 'paraḥ /
brahmā muniḥ syādgāyatrī chando rāmo 'sya devatā //

1.73.105

ṣaḍdīrghāḍhyena mantreṇa ṣaḍaṅgāni samācaret /
sarayūtīramandāravedikāpaṅkajāsane //

1.73.106

śyāmaṃ vīrāsanāsīnaṃ jñānamudropaśobhitam /
vāmorunyastaṃ taddhastaṃ sītālakṣmaṇasaṃyutam //

1.73.107

avekṣaṇāṇamātmānaṃ manmathāmitatejasam /
śuddhasphaṭikasaṃkāśaṃ kevalaṃ mokṣakāṅkṣayā //

1.73.108

cintayetparamātmānamṛtulakṣaṃ japenmanum /
sarvvaṃ ṣaḍarṇavañcāsya homanityārcanādikam //

1.73.109

vahniḥ śeṣāsano bhāntaḥ kevalo dvyakṣaro manuḥ /
ekākṣarokta vatsarvaṃ munidhyānārcanādikam //

1.73.110

tāramānāramānaṅgacāstrabījairdvivarṇakaḥ /
tryakṣaro mantrarājaḥ syātṣaḍvidhaḥ sakaleṣṭadaḥ //

1.73.111

vdyakṣaraścandrabhadrānto dvividhaścaturakṣaraḥ /
ekārṇoktavadeteṣāṃ munidhyānārcanādikam //

1.73.112

tāro rāmaścaturthyanto varmāstraṃ vahnivallabhā /
aṣṭārṇo 'yaṃ mahāmantro munyādyarcā ṣaḍarṇavat //

1.73.113

tāro mayā hṛdante syādrāmāya praṇavāntimaḥ /
śivomārāmamantro 'yamaṣṭārṇaḥ sarvasiddhidaḥ //

1.73.114

ṛṣiḥ sadāśivaḥ prokto gāyatrī chanda īritam /
śivomārāmacandro 'tra devatā parikīrtitaḥ //

1.73.115

ṣaḍvīryayāmāya yātu dhruvapañcārṇayuktayā /
ṣaḍaṅgāni vidhāyātha dhyāyeddhṛdi surārcitam //

1.73.116

rāmaṃ trinetraṃ somārddhadhāriṇaṃ śūlinaṃ varam /
bhasmoddhūlitasarvāṅgaṃ kaparddinamupāsmahe //

1.73.117

rāmābhirāmaṃ saindaryasīmāṃ somāvataṃsinīm /
pāśāṅkuśadhanurbāṇadharāṃ dhyāyetrilocanām //

1.73.118

evaṃ dhyātvā japedvarṇalakṣaṃ trimadhurānvitaiḥ /
bilpapatraiḥ phalaiḥ puṣpaistilairvā paṅkajairhunet //

1.73.119

svayamāyānti nidhayaḥ siddhayaśca surepsitāḥ /
tāro māyā ca bharatāgrajarāmamanobhavaḥ //

1.73.120

vahnijāyādvādaśārṇo mantraḥ kalpadrumo 'paraḥ /
aṅgirāśca muniśchando gāyatrī devatā punaḥ //

1.73.121

śrīrāmo bhuvanābījaṃ svāhāśaktiḥ samīritaḥ /
candraikamunibhūnetrairmantrārṇairaṅgakalpanam //

1.73.122

dhyānapūjādikaṃ cāśca sarvaṃ kuryātṣaḍarṇavat /
praṇavo hṛdayaṃ sītāpate rāmaśca ṅeṃtimaḥ //

1.73.123

hanadvayānte varmāstraṃ mantraḥ ṣoḍaśavarṇavān /
agastyo 'sya muniśchando bṛhatī devatā punaḥ //

1.73.124

śrīrāmo 'haṃ tathā bījaṃ rāṃ śaktiḥ samudīritā /
rāmābdhivahnivedākṣivarṇaiḥ pañcāṅgakalpanā //

1.73.125

dhyānapūjādikaṃ sarvamasya kuryātṣaḍarṇavat /
tāro hṛñcaiva brahmaṇyasevyāya padamīrayet //

1.73.126

rāmāyākuṇṭhaśabdāntaṃ tejase ca samīrayet /
uttamaślokadhuryāya svaṃ bhṛguḥ kāmikānvitaḥ //

1.73.127

daṇḍārpitāṃ priye mantro rāmarāmākṣaro mataḥ /
ṛṣiḥ śukrastathānuṣṭupchando rāmo 'sya devatā //

1.73.128

pādaiḥ sarveṇa pañcāṅgaṃ kuryāccheṣaṃ ṣaḍarṇavat /
lakṣaṃ japo daśāṃśena juhuyātpāyasaiḥ sudhīḥ //

1.73.129

siddhamantrasya bhuktiḥ syānmuktiḥ pātakanāśanam /
ādau dāśarathāyānte vidmahe padamuccaret //

1.73.130

tataḥ sītāvallabhāya dhīmahīti samuccaret /
tanno rāmaḥ proco varṇo dayāditi ca saṃvadet //

1.73.131

eṣoktārā magāyatrī sarvābhīṣṭaphalapradā /
padmāsītāpadaṃ ṅetaṃ ṭhadvayāntaḥ ṣaḍakṣaraḥ //

1.73.132

vālmīkiśca muniśchando gāyatrī devatā punaḥ /
sītā bhagavatī proktā śrīṃ bījaṃ vahnisundarī //

1.73.133

śaktiḥ ṣaḍdīrghayuktena bījenāṅgāni kalpayet /
tato dhyāyanmahādevīṃ sītāṃ trailokyapūjitām //

1.73.134

taptahāṭakavarṇābhāṃ padmayugmaṃ karadvaye /
sadratnabhūṣaṇasphūrjaddivyadehāṃ śubhātmikām //

1.73.135

nānāvastrāṃ śaśimukhīṃ padmākṣīṃ muditāntarām /
paśyantīṃ rāghavaṃ puṇyaṃ śayyārdhyāṃ ṣaḍguṇeśvarīm //

1.73.136

evaṃ dhyātvā japedvarṇalakṣaṃ mantrī daśāṃśataḥ /
juhuyātkamalaiḥ phullaiḥ pīṭhe pūrvodite yajet //

1.73.137

mūrtiṃ saṃkalpya mūlena tasyāmāvāhya jānakīm /
saṃpūjya dakṣiṇe rāmamabhyarcyāgre 'nilātmajam //

1.73.138

pṛṣaṭe lakṣmaṇamabhyarcya ṣaṭkoṇeṣvaṅgapūjanam /
patreṣu mantrimukhyaṃśca bāhye lokeśvarānpunaḥ //

1.73.139

vajrādyānapi saṃpūjya sarvasiddhīśvaro bhavet /
jātīpuṣpaiścandanāktai rājavaśyāya homayet //

1.73.140

kamalairdhanadhānyāptirnīlābjairvaśayan jagat /
bilvapatraiḥ śriyaḥ prāptyai dūrvābhīrorāśāntaye //

1.73.141

kiṃ bahūktuna saubhāgyaṃ putrānpautrānparaṃ sukham /
dhanaṃ dhānyaṃ ca mokṣaṃ ca sītārādhanato labhet //

1.73.142

śakraṛ seṃdurlakṣmaṇāya hṛdayaṃ saptavarṇavān /
agastyo 'sya muniśchando gāyatrī devatā punaḥ //

1.73.143

lakṣmaṇākhyo mahāvīraścāḍhyaṃ hṛdvījaśaktike /
ṣaḍdīrghāḍhyena bījena ṣaḍaṅgāni samācaret //

1.73.144

dvibhujaṃ svarṇarucuratanuṃ padmanibhekṣaṇam /
dhanurbāṇakaraṃ rāmasevāsaṃsaktamānasam //

1.73.145

dhyātvaivaṃ prajapedvarṇalakṣaṃ mantrī daśāṃśataḥ //ṭha
madhvāktaiḥ pāyasairhutvā rāmapīṭhe prapūjayeta //

1.73.146

rāmavadyajanaṃ cāsya sarvasiddhiprado hyayam /
sākalyaṃ rāmapūjāyā yadīcchenniyataṃ naraḥ //

1.73.147

tena yatnena karttavyaṃ lakṣmaṇārcanamādarāt /
śrīrāmacandrabhedāstu bahavaḥ saṃti siddhidāḥ //

1.73.148

tatsādhakaiḥ sadā kāryaṃ lakṣmaṇārādhanaṃ śubham /
aṣṭottarasahasraṃ vā śataṃ vā susamāhitaiḥ //

1.73.149

lakṣmaṇasya manurjapyo mumukṣubhiratandritaiḥ /
ajaptvā lakṣmaṇamanuṃ rāmamantrān japanti ye //

1.73.150

na teṣāṃ jāyate siddhirhānireva pade pade /
yo japellakṣmaṇamanuṃ nityamekāntamāsthitaḥ //

1.73.151

mucyate sarvapāpebhyaḥ sarvānkāmānavāpnuyāt /
jayapradhāno mantro 'yaṃ rājyaprāptyaikasādhanam //

1.73.152

naṣṭarājyāptaye mantraṃ japellakṣaṃ samāhitaḥ /
so 'cirānnaṣṭarājyaṃ svaṃ prāpnotyeva na saṃśayaḥ //

1.73.153

dhyāyanrāmamayodhyāyāmabhiṣikta mananyadhīḥ /
pañcāyutaṃ manuṃ japtvā naṣṭarājyamavāpnuyāt //

1.73.154

nāgapāśavinirmuktaṃ dhyātvā lakṣmaṇamādarāt /
ayutaṃ prajapenmantraṃ nigaḍānmucyate dhruvam //

1.73.155

vātātmajenānītābhiroṣadhībhirgatavyatham /
dhyātvā lakṣaṃ japanmantramalpamṛtyuṃ jayeddhuvam //

1.73.156

ghātayantaṃ meghanādaṃ dhyātvā lakṣaṃ japenmanum /
durjayaṃ vāpi vegena jayedripukulaṃ mahat //

1.73.157

dhyātvā śūrpaṇakhānāsāchedanodyuktamānasam /
sahasraṃ prajapenmantraṃ puruhūtādikān jayet //

1.73.158

rāmapādābjasevārthaṃ kṛtodyogamatho smaran /
prajapallaṅkṣamekānte mahārogātpramucyate //

1.73.159

trimāsaṃ vijitāhāro nityaṃ saptasahasrakam /
aṣṭottaraśataiḥ puṣpairniśchedraiḥ śātapatrakaiḥ //

1.73.160

pūjayitvā vidhānena pāyasaṃ ca saśarkaram /
nivedya prajapenmantraṃ kuṣṭarogātpranucyate //

1.73.161

vijane vijitāhāraḥ ṣaṇmāsaṃ vidhināmunā /
kṣayarogātpramucyeta satyaṃ satyaṃ na saṃśayaḥ //

1.73.162

abhimantrya jalaṃ prātarmantreṇa triḥ samāhitaḥ /
trisaṃdhyaṃ vā pibennityaṃ mucyate sarvarogataḥ //

1.73.163

dāridrayaṃ ca parābhūtaṃ jāyate dhanadopamaḥ /
viṣādidoṣasaṃsparśo na bhavettu kadācana //

1.73.164

manunā mantritaistoyaiḥ pratyehaṃ kṣālayenmukham /
mukhanetrādisaṃbhūtāñjayeddvrogāṃśca dāruṇān //

1.73.165

pītvābhimantritaṃ tvaṃbhaḥ kukṣirogān jayeddhruvam /
lakṣmaṇapratimāṃ kṛtvā dadyādbhaktyā vidhānataḥ //

1.73.166

sa sarvebhyo 'tha rogebhyo mucyate nātra saṃśayaḥ /
kanyārthī vimalāpāṇigrahaṇāsaktamānasaḥ //

1.73.167

dhyāyan lakṣaṃ japenmantrī abjairhutvā daśāṃśataḥ /
īpsitāṃ labhate kanyāṃ śīgrameva na saṃśayaḥ //

1.73.168

dīkṣitaṃ juṃbhaṇāstrāṇāṃ mantreṣu niyatavratam /
dhyātvā ca vidhivannityaṃ japenmāsatrayaṃ manum //

1.73.169

pūjāpuraḥsaraṃ saptasahasraṃ vijitendriyaḥ /
sarvāsāmapi vidyānāṃ tattvajño jāyate naraḥ //

1.73.170

viśvāmitrakratuvare kṛtādbhutaparākramam /
dhyāyaṃllakṣaṃ japenmantraṃ mucyate mahato bhayāt //

1.73.171

kṛtanityakriyaḥ śuddhastrikālaṃ prajapenmanum /
sarvapāpavinirmukto yāti viṣṇoḥ paraṃ padam //

1.73.172

dīkṣito vidhivanmantrī guṇairvigatakalmaṣaḥ /
svācāraniyato dānto gṛhastho vijitendriyaḥ //

1.73.173

aihikānanapekṣyaiva niṣkāmo yor'cayedvibhum /
sa sarvānpuṇyapāpaudhāndagdhvā nirmalamānasaḥ //

1.73.174

punarāvṛttirahitaḥ śāśvataṃ padamaśvataṃ padamaśnute /
sakāmo vāñchitān labdhvā bhuktvā bhogān manogatān //

1.73.175

jātiramaraściraṃ bhūtvā yāti viṣṇoḥ paraṃ padam /
nidrācandrānvitā paścādbharatāya hṛdantimaḥ //

1.73.176

saptākṣaro manuścāsya munyādyarcādi pūrvavat /
bakaḥ seṃduśca śatrudhnaparaṃ ṅetaṃ hṛdantimaḥ //

1.73.177

saptākṣaro 'yaṃ śatrudhnamantraḥ sarveṣṭasiddhidaḥ //

1.73.177.p1

iti śrībṛhannāradīyapurāṇe pūrvabhāge buhadupākhyāne sanatkumāravibhāge tṛtīyapāde rāmādyupāsanāvarṇanaṃ nāma trisaptatitamo 'dhyāyaḥ

Linked texts (17)