Naradapurana 1.77
Nāradapurāṇa 1.77
- Language
- Sanskrit
Contents
- 1.77.137 — 1 part
1.77.1
nārada uvāca
sādhu sādhu mahāprājña sarva tantraviśārada /
tvayā mahyaṃ samākhyātaṃ vidhānaṃ tantragopitam //
1.77.2
adhunā tu mahābhāga kīrtavīryahanūmatoḥ /
kavace śrotumicchāmi tadvadasvakṛpānidhe //
1.77.3
sanatkumāra uvāca
śṛṇu viprendra vakṣyāmi kavacaṃ paramādbhutam /
kārtavīryasya yenāsau prasannaḥ kāryasiddhikṛt //
1.77.4
sahasrādityasaṃkāśe nānāratnasamujjvaṃle /
bhāsvaddhvajapatākāḍhye turagāyutabhūṣite //
1.77.5
mahāsaṃvartakāṃbhodhibhīmarāvavirāviṇi /
samuddhṛtamahāchattravitānitaviyatpathe //
1.77.6
mahārathavare dīptanānāyudhavirājite /
susthitaṃ vipulodāraṃ sahasrabhujamaṇḍitam //
1.77.7
vāmairuddaṇḍakodaṇḍāndadhānamaparaiḥ śarān /
kirīṭahāramukuṭakeyūravalayāṅgadaiḥ //
1.77.8
mudrikodarabandhādyairmāaiñjīnūpurakādibhiḥ /
bhūṣitaṃ vividhākalpairbhāsvaraiḥ sumahādhanaiḥ //
1.77.9
ābaddhakavacaṃ vīraṃ suprasannānanāṃbujam /
dhanurjyā siṃhanādena kaṃpayantaṃ jagattrayam //
1.77.10
sarvaśatrukṣayakaraṃ sarvavyādhivināśanam /
sarvasaṃpatpradātāraṃ vijayaśrīniṣevitam //
1.77.11
sarvasaubhāgyadaṃ bhadraṃ bhaktābhayavidhāyinam /
divyamālyānulepāḍhyaṃ sarvalakṣaṇasaṃyutam //
1.77.12
rathanāgāśvapādātavṛndamadhyagamīśvaram /
varadaṃ cakravartīnaṃ sarvalokaikapālakam //
1.77.13
samānoditasāhasradivākarasamadyutim /
mahāyogabhavaiśvaryakīrtyākrāntajagattrayam //
1.77.14
śrīmañṭataṃ hareraṃśādavatīrṇaṃ mahītale /
samyagātmādibhedena dhyātvā rakṣāmudīrayet //
1.77.15
asyāṅgamūrtayaḥ pañca pāntu māṃ sphaṭikojjvalāḥ /
agnīśāsuravāyavyakoṇeṣu hṛdayādikāḥ //
1.77.16
sarvatosrajvaladrūpā daracarmāsipāṇayaḥ /
avyāhatabalaiśvaryaśaktisāmarthyavigrahāḥ //
1.77.17
kṣemaṅkarīśaktiyutaścauravargavibhañjanaḥ /
prācīṃ diśaṃ rakṣatu me bāṇabāṇāsanāyudhaḥ //
1.77.18
śrīkarīśaktisahito mārībhayavināśakaḥ /
śaracāpadharaḥ śrīmān diśaṃ me pātu dakṣiṇām //
1.77.19
mahāvaśyakarīyuktaḥ sarvaśatruvināśakṛt /
maheṣucāpadhṛkpātu mama prācetasīṃ diśam //
1.77.20
yaśaḥkaryā samāyukto daityasaṃghavināśanaḥ /
parirakṣatu me samyagvidiśaṃ caitrabhānavīm //
1.77.21
vidyākarīsamāyuktaḥ sumahahuḥkhanāśanaḥ /
pātu me nairṛtīṃ cāpapāṇirvidiśamīśvaraḥ //
1.77.22
dhanakaryā samāyukto mahādurita nāśanaḥ /
iṣvāsaneṣudhṛkpātu vidiśaṃ mama vāyavīm //
1.77.23
āyuḥkaryā yutaḥ śrīmānmahābhayavināśanaḥ /
cāpeṣudhārī śaivīṃ me vidiśaṃ parirakṣatu //
1.77.24
vijayaśrīyutaḥ sākṣātsahasrāradharo vibhuḥ /
diśamūrddhvāmavatu me sarvaduṣṭabhayaṅkaraḥ //
1.77.25
śaṅkhabhṛtsumahāśaktisaṃyuto 'pyadharāṃ diśam /
parirakṣatu me duḥkhadhvāntasambhedabhāskaraḥ //
1.77.26
mahāyogasamāyuktaḥ sarvadikcakramaṇḍalaḥ /
mahāyogīśvaraḥ pātu sarvato mama padmabhṛt //
1.77.27
etāstu mūrtayo raktā raktamālyāṃśukāvṛtāḥ /
pradhānadevatārūpāḥ pṛthagrathavare sthitāḥ //
1.77.28
śaktayaḥ padmahastāścata nīlendīvarasannnibhāḥ /
śuklamālyānuvasanāḥ suliptatilakojjvalāḥ //
1.77.29
tatpārśadeśvarāḥ svasvavāhanāyudhabhūṣaṇāḥ /
svasvadikṣu sthitāḥ pāntu māmindrādyā mahābalāḥ //
1.77.30
etastasya samākhyātāḥ sarvāvaraṇadevatāḥ /
sarvato māṃ sadā pātuṃ sarvaśaktisamanvitāḥ //
1.77.31
hṛdaye codare nābhau jaṭhare guhyamaṇḍale /
tejorūpāḥ sthitāḥ pātuṃ vāñchāsukhanadrumāḥ //
1.77.32
diśaṃ cānye mahāvarṇā mantrarūpā mahojjvalāḥ /
vyāpakatvena pāntvasmānāpādatalamastakam //
1.77.33
kārtavīryaḥ śiraḥ pātu lalāṭaṃ haihayeśvaraḥ /
sumukho me mukhaṃ pātu karṇauṃ vyāptajagattrayaḥ //
1.77.34
sukumāro hanuṃ pātu bhrūyugaṃ me dhanurdharaḥ /
nayanaṃ puṃmaḍarīkākṣago nāsikāṃ me guṇākaraḥ //
1.77.35
adharoṣṭhau sadā pātu brahjñeyo dvijānkaviḥ /
sarvaśāstrakalādhārī jihvāṃ cibukamavyayaḥ //
1.77.36
dattātreyapriyaḥ kaṇṭhaṃ skandhau rājakuleśvaraḥ /
bhujau daśāsyadarpaghno hṛdayaṃ me mahābalaḥ //
1.77.37
kukṣiṃ rakṣatu me vidvān vakṣaḥ parapurañjayaḥ /
karau sarvārthadaḥ pātukarāgrāṇi jagatpriyaḥ //
1.77.38
revāṃbagulīlāsaṃhapto jaṭharaṃ parirakṣatu /
vīraśūrastu me nābhiṃ pārśvau me sarvaduṣṭahā //
1.77.39
sahasrabhujanṛtpṛṣṭaṃ saptadvīpādhipaḥ kaṭim /
ūrū māhiṣmatīnātho jānunī vallabho bhuvaḥ //
1.77.40
jaṅghe vīrādhipaḥ pātu pātu pādau manojavaḥ /
pātu sarvāyudhadharaḥ sarvāṅgaṃ sarvamarmasu //
1.77.41
sarvaduṣṭāntakaḥ pātu dhātvaṣṭakakalevaram /
prāṇādidaśajīveśānsarvaśiṣṭeṣṭado 'vatu //
1.77.42
vaśīkṛtendriyagrāmaḥ pātu sarvendriyāṇi me /
anuktamapi yatsthāna śarīrāntarbahiśca yat //
1.77.43
tatsarvaṃ pātu me sarvalokanātheśvareśvaraḥ /
vajrātsārataraṃ cedaṃ śarīraṃ kavacāvṛtam //
1.77.44
bādhāśatavinirmuktamastu me bhayavarjitam /
baddhedaṃ kavacaṃ divyamabhedyaṃ haihayeśituḥ //
1.77.45
vicarāmi divā rātrau nirbhayenāntarātmanā /
rājamārge mahādurge mārge caurā disaṃkule //
1.77.46
viṣame vipine ghore dāvāgnau girikandare /
saṃgrāme śastrasaṃghāte siṃhavyāghraniṣevite //
1.77.47
gahvare sarvasaṃkīrṇe saṃdhyākāle nṛpālaye /
vivāde vipulāvarte samudre ca nadītaṭe //
1.77.48
paripanthijanākīrṇe deśe dasyugaṇāvṛte /
sarvasvaharaṇe prāpte prāpte prāṇasya saṃkaṭe //
1.77.49
nānārogajvarāveśe piśācapretayātane /
mārīduḥsvapnapīḍāsu kliṣṭe viśvāsaghātake //
1.77.50
śārīre ca mahāduḥkhe mānase ca mahājvare /
ādhivyādhibhaye vighnajvālopadravake 'pi ca //
1.77.51
na bhavatu bhayaṃ kiñcitkavacenāvṛtasya me /
āṅgutukāmānakhilānasmadvasuviluṃpakān //
1.77.52
nivārayatu dordaṇḍasahasreṇa mahārathaḥ /
svakaroddhṛtasāhasrapāśabaddhānsudurjayān //
1.77.53
saṃruddhūgatisāmarthyānkarotu kṛtavīryajaḥ /
sṛṇisāhasranirbhinnānsahasraśarakhaṇḍitān //
1.77.54
rājacūḍāmaṇiḥ kṣipraṃ karotvasmadvirodhakān /
khaḍga sāhasradalitānsahasramuśalārditān //
1.77.55
caurādi duṣṭasattvaughānkarotu kamalekṣaṇaḥ /
svaśaṅkhanādasaṃtrastānsahasrārasahasrabhṛt //
1.77.56
avatāro hareḥ sākṣātpālayatvakhilaṃ mama /
kārtavīrya mahāvīrya sarvaduṣṭavināśana //
1.77.57
sarvatra sarvadā duṣṭacaurānnāśāya nāśaya /
kiṃ tvaṃ svapiṣi duṣṭaghna kiṃ tiṣṭasi cirāyāsi //
1.77.58
uttiṣṭha pāhi naḥ sarvabhayebhyaḥ svasutāniva /
ye caurā vasuhartāro vidviṣo ye ca hiṃsakāḥ //
1.77.59
sādhubhītikarā duṣṭāśchadmakā ye durāśayāḥ /
durhṛdo duṣṭabhū pālā duṣṭāmātyāśca pāpakāḥ //
1.77.60
ye ca kāryaviloptoro ye khalāḥ paripanthinaḥ /
sarvasvahāriṇāṃ ye ca pañca māyāvino 'pareḥ //
1.77.61
mahākleśakarā mlecchā dasyavo vṛṣalāśca ye /
ye 'gnidā garadātāro vañcakāḥ śastrapāṇayaḥ //
1.77.62
ye pāpā duṣṭakarmāṇo duḥkhadā duṣṭabuddhayaḥ /
vyājakāḥ kupathāsaktā ye ca nānābhayapradāḥ //
1.77.63
chidrānveṣaratā nityaṃ ye 'smānbādhitumudyatāḥ /
te sarve kārtavīryasya mahāśaṅkharavāhatāḥ //
1.77.64
sahasā vilayaṃ yāntu dūradiva vimohitāḥ /
ye dānavā mahādityā ye yakṣā ye ca rākṣasāḥ //
1.77.65
piśācā ye mahāsattvā ye bhūtabrahmarākṣasāḥ /
apasmāragrahā ye ca ye grahāḥ piśitāśanāḥ //
1.77.66
mahālohitabhoktāro vetālā ye ca guhyakāḥ /
gandharvāpsarasaḥ siddhā ye ca devādiyonayaḥ //
1.77.67
ḍākinyo druṇasāḥ pretāḥ kṣetrapālā vināyakāḥ /
mahāvyāghramahāmeghā mahāturāgarūpakāḥ //
1.77.68
mahāgajā mahāsiṃhā mahāmahiṣayonayaḥ /
ṛkṣavārāhaśunakavānarolūkamūrtayaḥ //
1.77.69
mahoṣṭrakharamārjārasarpagovṛṣamastakāḥ /
nānārūpā mahāsattvā nānākleśasahasradāḥ //
1.77.70
nānārogakarāḥ kṣudrā mahāvīryā mahābalāḥ /
vātikāḥ paittikā ghorā ślaiṣmikāḥ sānnipātikāḥ //
1.77.71
māheśvarā vaiṣṇavāśca vairiñcyāśca mahāgrahāḥ /
skāndā vaināyakāḥ krūrā ye ca pramathaguhyakāḥ //
1.77.72
mahāśatruhā raudrā mahāmārīmasūrikāḥ /
aikāhikā vdyāhikāśca tryāhikāśca mahājvarāḥ //
1.77.73
cāturthikāḥ pākṣikāśca māsyāḥ ṣāṇmāsikāśca ye /
sāṃvatsarā durnivāryā jvarāḥ paramadāruṇāḥ //
1.77.74
svāpnikā ye mahotpātā ye ca duḥsvāpnikā grahāḥ /
kūṣmāṇḍā jṛṃbhikā bhaumā droṇāḥ sānnidhyavañcakāḥ //
1.77.75
bhramikāḥ prāṇahartāro ye ca bālagrahādayaḥ /
manobudvīndriyaharāḥ sphoṭakāśca mahāgrahāḥ //
1.77.76
mahāśanā balibhujo mahākuṇapabhojanāḥ /
divācarā rātricarā ye ca saṃdhyāsu dāruṇāḥ //
1.77.77
pramattā vāpramattā vai ye māṃ bādhitumudyatāḥ /
te sarve kārttavīryasya dhanurmuktaśarāhatāḥ //
1.77.78
sahasradhā praṇaśyantu bhagnasattvabalodyamāḥ /
ye sarpā ye mahānāgā mahāgiribileśayāḥ //
1.77.79
kālavyālā mahādaṃṣṭrā mahājagarasaṃjñakāḥ /
anantaśūlikādyāśca daṃṣṭrāviṣamahābhayāḥ //
1.77.80
anekaśata śīrṣāśca khaṇḍapucchāśca dāruṇāḥ /
mahāviṣajalaukāśca vṛścikā ruktapucchakāḥ //
1.77.81
āśīviṣāḥ kālakūṭā mahāhālāhalāhvayāḥ /
jalasarpā jalavyālā jalagrāhāśca kacchapāḥ //
1.77.82
matsyakā viṣapucchāśca ye cānye jalavāsinaḥ /
jalajāḥ sthalajāścaiva kṛtrimāśca mahāviṣāḥ //
1.77.83
guptarūpā guptaviṣā mūṣikā gṛhagodhikāḥ /
nānāviṣāśca ye ghorā mahopaviṣasaṃjñakāḥ //
1.77.84
ye 'smānbādhitumicchanti śarīraprāṇanāśakāḥ /
te sarve kārtavīryasya khaṅkasāhasradāritāḥ //
1.77.85
dūrādeva vinaśyantu praṇaṣṭendriyasāhasāḥ /
manuṣyāḥ paśavo tvṛkṣavānarā vanagocarāḥ //
1.77.86
siṃhavyāghravarāhāśca mahiṣā ye mahāmṛgāḥ /
gajāsturaṅgā gavayā rāsabhāḥ śarabhā vṛkāḥ //
1.77.87
śunakā dvīpinaḥ śubhrā mārjārā bilalolupāḥ /
śṛgālāḥ śaśakāḥ śyenā gurutmanto vihṝṅgamāḥ //
1.77.88
bheruṇḍā vāyasā gūdhrā haṃsādyāḥ pakṣijātayaḥ /
udbhijjāścāṇḍajāścaiva svedajāśca jarāyujāḥ //
1.77.89
nānābhedakule jātā nānābhedāḥ pṛthagvidhāḥ /
ye 'smānbādhitumicchanti sedhyāsu ca divā niśi //
1.77.90
te sarve kārtavīryasya gadāsāhasradāritāḥ /
dūrādeva vinaśyantu vinaṣṭagatipauruṣāḥ //
1.77.91
ye cākṣemapradātāraḥ kūṭamāyāvinaśca ye /
māraṇotsādanonmūladveṣamohanakārakāḥ //
1.77.92
viśvāsa ghātakā duṣṭā ye ca svāmidruho narāḥ /
ye cātatāyino duṣṭā ye pāpā gopyahāriṇaḥ //
1.77.93
dāhopadyātagaralaśastrapātātiduḥkhadāḥ /
kṣetravittādiharaṇabandhanādibhayapradāḥ //
1.77.94
ītayo vividhākāro ye cānye duṣṭajātayaḥ /
pīḍākarā ye satataṃ chidramicchanti bādhitum //
1.77.95
te sarve kārtavīryasya cakrasāhasradāritāḥ /
dūrādeva kṣayaṃ yāntu vinaṣṭabalasāhasāḥ //
1.77.96
ye meghā ye mahāvarṣā ye vātā yāśca vidyutaḥ /
ye mahāśanayo dīptā ye nirghātāśca dāruṇāḥ //
1.77.97
ulkāpātāśca ye ghorā ye mahendrāyudhādayaḥ /
sūryendukujasaumyāśca gurukāvyaśanaiścarāḥ //
1.77.98
rāhuśca ketavo ghorā nakṣatrā rāśayastathā /
tithayaḥ saṃkramā māsā hāyanā yuganāyakāḥ //
1.77.99
manvantarādhipāḥ siddhā ṛṣayo yogasiddhayaḥ /
nidhayo ṛgyajuḥsāmātharvāṇaścaiva vahnayaḥ //
1.77.100
ṛtavo lokapālāśca pitaro devasaṃhatiḥ /
vidyāścaiva catuḥṣaṣṭibhedā yā bhuvanatraye //
1.77.101
ye tvatra kīrtitāḥ sarve caye cānye nānukīrtitāḥ /
te saṃtu naḥ sadā saumyāḥ sarvakālasukhāvahāḥ //
1.77.102
ājñayā kārtavīryasya yogīndrasyāmitadyuteḥ /
kārtavīryārjuno dhanvī rājendro haihayeśvaraḥ //
1.77.103
daśāsyadarpahā revālīlādṛptakaḥ sudurjayaḥ /
duḥkhahā cauradamano rājarājeśvaraḥ prabhuḥ //
1.77.104
sarvajñaḥ sarvadaḥ śrīmān sarvaśiṣṭeṣṭadaḥ kṛtī /
rājacūḍāmaṇiryogī saptadvīpādhināyakaḥ //
1.77.105
vijayī viśvajidvāgmī mahāgatiralolupaḥ /
yajvā viprapriyo vidvān brahmajñeyaḥ sanātanaḥ //
1.77.106
māhiṣmatīpatiryodhā mahākīrtirmahābhujaḥ /
sukumāro mahāvīro mārīghno madirekṣaṇaḥ //
1.77.107
śatrughnaḥ śāśvataḥ śūraḥ śaṅkhabhṛdyogivallabhaḥ /
mahābhāgavato dhīmānmahābhayavināśanaḥ //
1.77.108
asādhyī vigraho divyo bhāvo vyāptajagattrayaḥ /
jitendriyo jitārātiḥ svacchando 'nantavikramamaḥ //
1.77.109
cakrabhṛtparacakraghnaḥ saṃgrāmavidhipūjitaḥ /
sarvaśāstrakalādharī virajā lokavanditaḥ //
1.77.110
vīro vimalasattvāḍhyo mahābalaparākramaḥ /
vijayaśrīmahāmānyo jitārirmantranāyakaḥ //
1.77.111
khaḍgabhṛtkāmadaḥ kāntaḥ kālaghnaḥ kamalekṣaṇaḥ /
bhadravādapriyo vaidyo vibudho varado vaśī //
1.77.112
mahādhano nidhipatirmahāyogī gurupriyaḥ /
yogāḍhyaḥ sarvarogaghno rājitākhilabhūtalaḥ //
1.77.113
divyāstrabhṛdameyātmā sarvagoptā mahojjvalaḥ /
sarvāyudhadharo 'bhīṣṭapradaḥ parapurañjayaḥ //
1.77.114
yogasiddho mahākāyo mahāvṛndaśatādhipaḥ /
sarvajñānanidhiḥ sarvasiddhvidānakṛtodyamaḥ //
1.77.115
ityaṣṭaśatanāmottyā mūrtayo daśa dikpathi /
samyagdaśadiśo vyāpya pālayantu ca māṃ sadā //
1.77.116
svasthāḥ sarvendriyāḥ saṃtuṃ śāntirastu sadā mama /
śeṣādyā mūrtayo 'ṣṭau ca vikrameṇaiva bhāsvarāḥ //
1.77.117
agninirṛtivāyvīśakoṇagāḥ pāntu māṃ sadā /
mama saukhyamasaṃbādhamārogyamaparājayaḥ //
1.77.118
duḥkhahāniravighnaśca prajāvṛddhiḥ sukho dayaḥ /
vāñchāptiratikalyāṇamavaiṣamyamanāmayam //
1.77.119
anālasyamabhīṣṭaṃ syānmṛtyuhānirbalonnatiḥ /
bhayahāniryaśaḥ kāntirvidyā ṛddhirmahāśriyaḥ //
1.77.120
anaṣṭadravyatā caiva naṣṭasya punarāgamaḥ /
dīrghāyuṣyaṃ manoharṣaḥ saukumāryamabhīpsitam //
1.77.121
apradhṛṣyatamatvaṃ ca mahāsāmarthyameva ca /
saṃtu me kārtavīryyasya haihayendrasya kīrtanāt //
1.77.122
ya idaṃ kārtavīryyasya kavaca puṇyavarddhanam /
sarvapāpapraśamanaṃ sarvopadravanāśanam //
1.77.123
sarvaśāntikaraṃ guhyaṃ samastabhayanāśanam /
vijayārthapradaṃ nṝṇāṃ sarvasaṃpatpradaṃ śubham //
1.77.124
śṛṇuyādvā paṭhedvāpi sarvakāmānavāpnuyāt /
caurairhṛtaṃ yadā paśyetpaśvādidhanamātmanaḥ //
1.77.125
saptavāraṃ tadā japyenniśi paścimadiṅmukhaḥ /
saptarātreṇa labhate naṣṭadravyaṃ na saṃśayaḥ //
1.77.126
saptaviṃśatidhā japtvā prācīdigvadanaḥ pumān /
devāsuranibhaṃ cāpi paracakraṃ nivārayet //
1.77.127
vivāde kalaheghore pañcadhā yaḥ paṭhedidam /
vijayo jāyate tasya na kadācitparājayaḥ //
1.77.128
sarvarogaprapīḍāsu tredhā vā pañcadhā paṭhet /
sa rogamṛtyuvetālabhūtapretairna bādhyate //
1.77.129
samyagdvādaśādhā rātrau prajapedbandhamuktaye /
tridinānnigaḍādūddhvo mucyate nātra saṃśayaḥ //
1.77.130
anenaiva vidhānena sarvasādhanakarmaṇi /
asādhyamapi saptāhātsādhayenmantravittamaḥ //
1.77.131
yātrākāle paṭhitvedaṃ mārge gacchati yaḥ pumān /
na duṣṭacauravyāghrādyairbhayaṃ syātparipanthibhiḥ //
1.77.132
japannāsecanaṃ kurvañjalenāñjalinā tanau /
na cāsau viṣakṛtyādirogasphoṭaiḥ prabādhyate //
1.77.133
kārtavīryaḥ khaladveṣī kṛtavīryasuto balī /
sahasrabāhuḥ śatrughno raktavāsā dhanurdharaḥ //
1.77.134
raktagandhoraktamālyo rājā smarturabhīṣṭadaḥ /
dvādaśaitāni nāmāni kārtavīryasya yaḥ paṭhet //
1.77.135
saṃpadastasya jāyante janāstasya vaśe sadā /
yaḥ sevate sadā vipra śrīmañcakrāvatārakam //
1.77.136
tasya rakṣāṃ sadā kuryāñcakraṃ viṣṇormahātmanaḥ /
mayaitatkavacaṃ vipra dattātreyānmunīśvarāt //
1.77.137
śrutaṃ tubhyaṃ nigaditaṃ dhārayasvākhileṣṭadam //
1.77.137.p1
iti śrībṛhannāradīyapurāṇe pūrvabhāge bṛhadupākhyāne tṛtīyapāde kārtavīryakavacakathanaṃ nāma saptasaptatitomo 'dhyāyaḥ
Linked texts (4)
- Prāṇatoṣiṇī — Rāmatoṣaṇa Śarman 1796, Sanskrit
- Nāradopapurāṇa — Sanskrit
- Kārtavīryārjunakavaca — Śaṅkara, Sanskrit
- Gūḍhārthadīpikā — Vāmadeva, Sanskrit