[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 1.80 # Naradapurana 1.80 Nāradapurāṇa 1.80 - **Language:** Sanskrit ## Contents - [1.80.297](https://indike.org/pramana/in.purana.narada.1.80.297) — 1 part ### [1.80.1](https://indike.org/pramana/in.purana.narada.1.80.1) sūta uvāca śrutvā tu nārado viprāḥ kumāravacanaṃ muniḥ / yatpapraccha punastacca yuṣmabhyaṃ pravadāmyaham // ### [1.80.2](https://indike.org/pramana/in.purana.narada.1.80.2) kārtavīryasya kavacaṃ tathā hanumato 'pi ca / caritaṃ ca mahatpuṇyaṃ śrutvā bhūyo 'bravīdvacaḥ // ### [1.80.3](https://indike.org/pramana/in.purana.narada.1.80.3) nārada uvāca sādhu sādhu muniśreṣṭha tvayātikaruṇātmanā / śrāvitaṃ caritaṃ puṇyaṃ śivasya ca hanūmataḥ // ### [1.80.4](https://indike.org/pramana/in.purana.narada.1.80.4) tantrasyāṃsya kramaprāptaṃ kathanīyaṃ ca yattvayā / tatprabrūhi mahābhāga kiṃ pṛṣṭvānyadvidāṃvara // ### [1.80.5](https://indike.org/pramana/in.purana.narada.1.80.5) sanatkumāra uvāca atha vakṣye kṛṣṇamantrānbhuktimuktiphalapradān / brahmādyā yānsamārādhya sṛṣṭyādikaraṇe kṣamāḥ // ### [1.80.6](https://indike.org/pramana/in.purana.narada.1.80.6) kāmaḥ kṛṣṇapadaṃ ṅataṃ govindaṃ ca tathāvidham / gopījanapadaṃ paścādvallabhāyāgnisuṃdarī // ### [1.80.7](https://indike.org/pramana/in.purana.narada.1.80.7) aṣṭādaśārṇo mantro 'yaṃ durgādhiṣṭhātṛdaivataḥ / nārado 'sya muniśchando gāyatrī devatā punaḥ // ### [1.80.8](https://indike.org/pramana/in.purana.narada.1.80.8) śrīkṛṣṇaḥ paramātmā ca kāmo bījaṃ prakīrtitam / svāhā śaktirniyogastu caturvargaprasiddhaye // ### [1.80.9](https://indike.org/pramana/in.purana.narada.1.80.9) ṛṣiṃ śirasi vaktre tu chandaśca hṛdi devatām / guhye bījaṃ padoḥ śaktiṃ nyasetsādhakasattamaḥ // ### [1.80.10](https://indike.org/pramana/in.purana.narada.1.80.10) yugevadābdhi nigamairdvābhyāṃ varṇairmanūdbhavaiḥ / pañcāṅgāni pravinyasya tattvanyāsaṃ samācaret // ### [1.80.11](https://indike.org/pramana/in.purana.narada.1.80.11) hṛdantimādikāntārṇamaparādyāni cātmane / matyantāni ca tatvāni jīvādyāni nyasetkramāt // ### [1.80.12](https://indike.org/pramana/in.purana.narada.1.80.12) jīvaṃ prāṇaṃ matimahṝṅkāraṃ manastathaiva ca / śabdaṃ sparśaṃ rūparasau gandhaṃ śrotraṃ tvacaṃ tathā // ### [1.80.13](https://indike.org/pramana/in.purana.narada.1.80.13) netraṃ ca rasanāṅghrāṇaṃ vācaṃ pāṇiṃ padendriyam / pāyuṃ śiśnamathākāśaṃ vāyuṃ vahniṃ jalaṃ mahīm // ### [1.80.14](https://indike.org/pramana/in.purana.narada.1.80.14) jīvaṃ prāṇaṃ ca sarvāge matyāditritayaṃ hṛdi / mūrddhāsyahṛdguhya pādeṣvatha śabdādikānnyaset // ### [1.80.15](https://indike.org/pramana/in.purana.narada.1.80.15) karṇādisvasvasthāneṣu śrotrādīnīndriyāṇi ca / tathā vāgādīndriyāṇi svasvasthānaṣu vinyaset // ### [1.80.16](https://indike.org/pramana/in.purana.narada.1.80.16) mūddhasyahṛdguhyapādeṣvākāśādīnnyasettataḥ / hṛtpuṇḍarīkamarkenduhnibiṃbānyanukramāt // ### [1.80.17](https://indike.org/pramana/in.purana.narada.1.80.17) dviṣaṭhyaṣṭadaśakalāvyāptāni ca tathā mataḥ / bhūtāṣṭāṃ gākṣipadagairvarṇaiḥ pragvinnyaseddhṛdi // ### [1.80.18](https://indike.org/pramana/in.purana.narada.1.80.18) athākāśādisthaleṣu vāsudevādikāṃstataḥ / vāsudevaḥ saṃkarṣaṇaḥ pradyumnaścāniruddhakaḥ // ### [1.80.19](https://indike.org/pramana/in.purana.narada.1.80.19) nārāyaṇaśca kramaśaḥ parameṣṭhyādibhiryutāḥ / parameṣṭhipumāñcchau caviśvanivṛttisarvakāḥ // ### [1.80.20](https://indike.org/pramana/in.purana.narada.1.80.20) śvetānilāgnyaṃbubhūmivarṇaiḥ prāgvatpravinyaset / svabījādyaṃ kopatatvaṃ nṛsiṃhaṃ vyāpakena ca // ### [1.80.21](https://indike.org/pramana/in.purana.narada.1.80.21) prāgvadvinyasya sarvāge tattvanyāso 'yamīritaḥ / makārādyā ādyavarṇāḥ sarve syuścandrabhūṣitāḥ // ### [1.80.22](https://indike.org/pramana/in.purana.narada.1.80.22) vāsudevādikā jñeyā ṅeṃtāḥ sādhakasattamaiḥ / prāṇāyāmaṃ tataḥ kṛtvā pūrakumbhakarecakaiḥ // ### [1.80.23](https://indike.org/pramana/in.purana.narada.1.80.23) caturbhiḥ ṣaḍbhardvābhyāṃ ca mūlamantreṇa mantravit / kecidāhurihācāryāḥ prāṇāyāmottaraṃ punaḥ // ### [1.80.24](https://indike.org/pramana/in.purana.narada.1.80.24) pīṭhanyāsaṃ vidhāyātha nyāsānanyānsamācaret / daśatattvādi vinyasya vakṣyamāṇavidhānataḥ // ### [1.80.25](https://indike.org/pramana/in.purana.narada.1.80.25) mūrtipañjaranāmānaṃ pūrvoktaṃ vinyasedbudhaḥ / sarvāṅge vyāpakaṃ kṛtvā kirīṭamanunā sudhīḥ // ### [1.80.26](https://indike.org/pramana/in.purana.narada.1.80.26) tatastārapuṭaṃ mantraṃ vyāpayya karayostriśaḥ / pañcāṅgulīṣu karayoḥ pañcāṅgaṃ vinyasettataḥ // ### [1.80.27](https://indike.org/pramana/in.purana.narada.1.80.27) triśo mūlena mūrddhādipādāntaṃ vyāpakaṃ nyaset / sakṛdvyāpayya tāreṇa mantranyāsaṃ tataścaret // ### [1.80.28](https://indike.org/pramana/in.purana.narada.1.80.28) śirolalāṭe bhrūmadhye karṇayoścakṣuṣostathā / ghrāṇayorvadane kaṇṭhe hṛdi nābhau tathā punaḥ // ### [1.80.29](https://indike.org/pramana/in.purana.narada.1.80.29) kaṭyāṃ liṅge jānunośca pādayorvinyasetkramāt / hṛdantānmantravarṇāṃśca tato mūrdhni dhruvaṃ nyaset // ### [1.80.30](https://indike.org/pramana/in.purana.narada.1.80.30) punarnayanayorāsye hṛdi guhye ca pādayoḥ / vinyaseddhṛdayāntāni manoḥ pañcapadāni ca // ### [1.80.31](https://indike.org/pramana/in.purana.narada.1.80.31) bhūyo munyādikaṃ nyasya pañcāṅgaṃ pūrvavannyaset / atha vakṣye mahāguhyaṃ sarvanyāsottamottamam // ### [1.80.32](https://indike.org/pramana/in.purana.narada.1.80.32) yasya vijñānamātreṇa jīvanmukto bhavennaraḥ / aṇimādyaṣṭasiddhīnāmīśvaraḥ syānna saṃśayaḥ // ### [1.80.33](https://indike.org/pramana/in.purana.narada.1.80.33) yasyārādhanato mantrī kṛṣṇasaṃnidhyatāṃ vrajet / tārādyābhirvyāhṛtibhiḥ saṃpuṭaṃ vinyasenmanum // ### [1.80.34](https://indike.org/pramana/in.purana.narada.1.80.34) mantreṇa puṭitāṃścāpi praṇavādyāṃstato nyaset / gāyatryā puṭutaṃ mantraṃ vinyasenmātṛkāsthale // ### [1.80.35](https://indike.org/pramana/in.purana.narada.1.80.35) mantreṇa puṭitāṃ tāṃ ca gāyatrīṃ vinyasetkramāt / mātṛkāpuṭitaṃ mūlaṃ vinyasetsādhakottamaḥ // ### [1.80.36](https://indike.org/pramana/in.purana.narada.1.80.36) mūlena puṭitāṃ caiva mātṛkāṃ vinyasetkramāt / tṛcaṃ na mātṛkāvarṇānpūrvaṃ tattatsthale sudhīḥ // ### [1.80.37](https://indike.org/pramana/in.purana.narada.1.80.37) vinyasennyāsaṣaṭkaṃ ca ṣoḍhā nyāso 'yamīritaḥ / anena nyāsavaryeṇa sākṣātkṛṣṇasamo bhavet // ### [1.80.38](https://indike.org/pramana/in.purana.narada.1.80.38) nyāsena puṭitaṃ dṛṣṭvā siddhagandharvakinnarāḥ / devā api namantyenaṃ kiṃpunarmānavā bhuvi // ### [1.80.39](https://indike.org/pramana/in.purana.narada.1.80.39) sudarśanasya mantreṇa kuryāddigbandhanaṃ tataḥ / devaṃ dhyāyansvahṛdaye sarvābhīṣṭapradāyakam // ### [1.80.40](https://indike.org/pramana/in.purana.narada.1.80.40) utphullakusumavrātanamraśākhairvaradrumaiḥ / sasmeyamañjarīvṛndavallarīveṣṭitaiḥ śubhaiḥ // ### [1.80.41](https://indike.org/pramana/in.purana.narada.1.80.41) galatparāgadhūlibhiḥ surabhīkṛtadiṅmukhaḥ / smarecchiśiritaṃ vṛndāvanaṃ mantrīsamāhitaḥ // ### [1.80.42](https://indike.org/pramana/in.purana.narada.1.80.42) unmīlannavakañjālivigalanmadhusaṃcayaiḥ / lubdhāntaḥ karaṇairguñjaddvirephapaṭalaiḥ śubham // ### [1.80.43](https://indike.org/pramana/in.purana.narada.1.80.43) marālaparabhṛtkīrakapotanikarairmuhuḥ / mukharīkṛtamānṛtyanmāyūrakulamañjulam // ### [1.80.44](https://indike.org/pramana/in.purana.narada.1.80.44) kālindyā lolakallolavipruṣairmandavāhibhiḥ / unnidrāṃburuhavrātarajobhirdhūsaraiḥ śivaiḥ // ### [1.80.45](https://indike.org/pramana/in.purana.narada.1.80.45) pradīpita smarairgoṣṭhasuṃdarīmṛduvāsasām / vilolanaparaiḥ saṃsevitaṃ vā tairnirantaram // ### [1.80.46](https://indike.org/pramana/in.purana.narada.1.80.46) smarettadante gīrvāṇabhūruhaṃ sumanoharam / tadadhaḥ svarṇavedyāṃ ca ratnapīṭhamanuttamam // ### [1.80.47](https://indike.org/pramana/in.purana.narada.1.80.47) ratnakuṭṭimapīṭhe 'sminnaruṇaṃ kamalaṃ smaret / aṣṭapatraṃ ca tanmadhye mukundaṃ saṃsmaretsthitam // ### [1.80.48](https://indike.org/pramana/in.purana.narada.1.80.48) phullendīvarakāntaṃ ca kekibarhāvataṃsakam / pītāṃśukaṃ candramukhaṃ sarasīruhanetrakam // ### [1.80.49](https://indike.org/pramana/in.purana.narada.1.80.49) kaustubhodbhāsitāṅgaṃ ca śrīvatsāṃkaṃ subhūṣitam / vrajastrīnetrakamalābhyarcitaṃ gogaṇāvṛtam // ### [1.80.50](https://indike.org/pramana/in.purana.narada.1.80.50) gopavṛndayutaṃ vaṃśīṃ vādayantaṃ smaretsudhīḥ / evaṃ dhyātvā japedādāvayutadvitayaṃ budhaḥ // ### [1.80.51](https://indike.org/pramana/in.purana.narada.1.80.51) juhuyādaruṇāṃbhojaistaddaśāṃśaṃ samāhitaḥ / japetpaścānmantrasiddhyai bhūtalakṣaṃ samāhitaḥ // ### [1.80.52](https://indike.org/pramana/in.purana.narada.1.80.52) aruṇaiḥ kamalaihutvā sarvasiddhīśvaro bhavet / pūrvokte vaiṣṇave pīṭhe mūrtiṃ saṃkalpya mūlataḥ // ### [1.80.53](https://indike.org/pramana/in.purana.narada.1.80.53) tasyāmāvāhya cābhyarcedgopījanamanoharam / mukhe veṇuṃ samabhyarcya vanamālāṃ ca kaustubham // ### [1.80.54](https://indike.org/pramana/in.purana.narada.1.80.54) śrīvatsaṃ ca hṛdi prārcya tataḥ puṣpāñjaliṃ kṣipet / tataḥ śvetāṃ ca tulasīṃ śuklacandanapaṅkilām // ### [1.80.55](https://indike.org/pramana/in.purana.narada.1.80.55) raktāṃ ca tulasīṃ raktañcadanāktāṃ krasātsudhīḥ / arpayeddakṣiṇe jadvayamaśvāriyugmakam // ### [1.80.56](https://indike.org/pramana/in.purana.narada.1.80.56) hayamāradvayenaiva hṛdi mūrdhni tathā punaḥ / padmadvayaṃ ca vidhivattataḥ śīrṣe samarpayet // ### [1.80.57](https://indike.org/pramana/in.purana.narada.1.80.57) tulasīdvayamaṃbhojadvayamaśvāriyugmakam / tataḥ sarvāṇi puṣpāṇi sarvāṅgeṣu samarpayet // ### [1.80.58](https://indike.org/pramana/in.purana.narada.1.80.58) dakṣiṇe vāsudevākhyaṃ svacchaṃ caitanyamavyayam / vāme ca rukmiṇīṃ tadūnnityāṃ raktāṃ rajoguṇām // ### [1.80.59](https://indike.org/pramana/in.purana.narada.1.80.59) evaṃ saṃpūjya gopālaṃ kuryādāvaraṇārcanam / yajeddāmasudāmau ca vasudāmaṃ ca kiṅkiṇīm // ### [1.80.60](https://indike.org/pramana/in.purana.narada.1.80.60) pūrvādyāśāsu dāmādyā ṅeṃnamontadhruvādikāḥ / agninairṛtivāyvīśakoṇeṣu hṛdayādikān // ### [1.80.61](https://indike.org/pramana/in.purana.narada.1.80.61) dikṣvastrāṇi samabhyarcya patreṣu mahiṣīryajet / rukmiṇī satyabhāmā ca nāgnajityabhidhā punaḥ // ### [1.80.62](https://indike.org/pramana/in.purana.narada.1.80.62) suvindā mitravindā ca lakṣmaṇā carkṣajā tataḥ / suśīlā ca lasadramyacitritāṃbarabhūṣaṇā // ### [1.80.63](https://indike.org/pramana/in.purana.narada.1.80.63) tato yajeddalāgreṣu vasudevañca devakīm / nandagopaṃ yaśodāṃ ca balabhadraṃ subhadrikām // ### [1.80.64](https://indike.org/pramana/in.purana.narada.1.80.64) gopānūgopīśca govindavilīnamatilocanān / jñānamudrābhayakarau pitarau pītapāṇḍurau // ### [1.80.65](https://indike.org/pramana/in.purana.narada.1.80.65) divyamālyāṃbarālepabhūṣaṇe mātarau punaḥ / dhārayantyau caruṃ caiva pāyasīṃ pūrṇapātrikām // ### [1.80.66](https://indike.org/pramana/in.purana.narada.1.80.66) aruṇaśyāmale hāramaṇikuṃ ḍalamaṇḍite / balaḥ śaṅkhendudhavalo muśalaṃ lāṅgalaṃ dadhat // ### [1.80.67](https://indike.org/pramana/in.purana.narada.1.80.67) hālālolo nīlavāsā halavānekakuṇḍalaḥ / kalā yā śyāmalā bhadrā subhadrā bhadrabhūṣaṇā // ### [1.80.68](https://indike.org/pramana/in.purana.narada.1.80.68) varābhayayutā pītavasanā rūḍhayauvanā / veṇuvīṇāhemayaṣṭiśaṅkhaśṛṅgādipāṇayaḥ // ### [1.80.69](https://indike.org/pramana/in.purana.narada.1.80.69) gopā gopyaśca vividhaprābhṛtānnakarāṃbujāḥ / mandāradīṃśca tadbāhye pūjayetkalpapādapān // ### [1.80.70](https://indike.org/pramana/in.purana.narada.1.80.70) mandāraśca tathā saṃtānako vai pārijātakaḥ / kalpadrumastataḥ paścāddhvaricandanasaṃjñakaḥ // ### [1.80.71](https://indike.org/pramana/in.purana.narada.1.80.71) madhye dikṣu samabhyarcya bahiḥ śakrādikānyajet / tadastrāṇi ca saṃpūjya yajetkṛṣṇāṣṭakena ca // ### [1.80.72](https://indike.org/pramana/in.purana.narada.1.80.72) kṛṣṇaṃ ca vāsudevaṃ ca devakīnandanaṃ tathā / nārāyaṇaṃ yaduśreṣṭhaṃ vārṣṇeyaṃ dharmapālakam // ### [1.80.73](https://indike.org/pramana/in.purana.narada.1.80.73) asurākrāntabhūbhārahāriṇaṃ pūjayettataḥ / ebhirāvaraṇaiḥ pūjā kartavyāsukhairiṇaḥ // ### [1.80.74](https://indike.org/pramana/in.purana.narada.1.80.74) saṃsārasāgarotthīrtyai sarvakāmāptaye budhaḥ / evaṃ pūjādibhiḥ siddhā bhavadvaiśravaṇo yamaḥ // ### [1.80.75](https://indike.org/pramana/in.purana.narada.1.80.75) trikālapūjanaṃ cāsya vakṣye sarvārthasiddhidam / śrīmadudyānasaṃvītihemabhūratnamaṇḍape // ### [1.80.76](https://indike.org/pramana/in.purana.narada.1.80.76) lasatkalpadrumādhastharatnābjapīṭhasaṃsthitam / sutrāmaratnasaṃkāśaṃ guḍasnigdhālakaṃ śiśum // ### [1.80.77](https://indike.org/pramana/in.purana.narada.1.80.77) calatkanakakuṇḍalollasitacārugaṇḍasthalaṃ sughoṇadharamadbhutasmitamukhāṃvutaṃ sundaram / sphuradvimalaratnayukkanakasūtranaddha dadhatsuvarṇaparimaṇḍitaṃ subhagapaiṇḍarīkaṃ nakham // ### [1.80.78](https://indike.org/pramana/in.purana.narada.1.80.78) samuddhūsarorasthale dhenudhūlyā supuṣṭāṅgamaṣṭāpadākalpadīptam / kaṭīlasthale cārujaṅghāntayugmaṃ pinaddhaṃ kvaṇatkiṅkiṇījāladāmnā // ### [1.80.79](https://indike.org/pramana/in.purana.narada.1.80.79) hasantaṃ hasadvandhujīvaprasūnaprabhāpāṇipādāṃbujodārakāntyā / dadhānaṃ karo dakṣiṇe pāyasānna suhaiyaṅgavīnaṃ tathā vāmahaste // ### [1.80.80](https://indike.org/pramana/in.purana.narada.1.80.80) lasadgopagopīgavāṃ vṛndamadhye sthitaṃ vāsavādyaiḥ surairarcitāndhrim / mahābhārabhūtāmarārātiyūthāṃstataḥ pūtanādīnnihṝntuṃ pravṛttam // ### [1.80.81](https://indike.org/pramana/in.purana.narada.1.80.81) evaṃ dhyātvārccayeddevaṃ pūrvavatsthiramānasaḥ / dadhnā guḍena naivedyaṃ datvā daśaśataṃ japet // ### [1.80.82](https://indike.org/pramana/in.purana.narada.1.80.82) madhyandine yajedevaṃ viśiṣyarūpadhāriṇam / nāradādyairmunigaṇaiḥ suravṛndaiśca pūjitam // ### [1.80.83](https://indike.org/pramana/in.purana.narada.1.80.83) lasadgopagopīgavāṃ vṛndamadhyastitaṃ sāṃdrameghaprabhaṃsuṃndarāṅgam / śikhaṇḍicchadāpīḍamabjāyatākṣaṃ lasañcillikaṃ pūrṇacadrānanaṃ ca // ### [1.80.84](https://indike.org/pramana/in.purana.narada.1.80.84) calatkuṇḍalollāsigaṇḍasthalaśrībharaṃ sundaraṃ mandahāsaṃ sunāsam / sukārtasvarābhāṃbaraṃ divyabhūṣaṃ kvaṇatkiṅkiṇījālamattānulepam // ### [1.80.85](https://indike.org/pramana/in.purana.narada.1.80.85) veṇuṃ dhamantaṃ svakare dadhānaṃ savye daraṃ yaṣṭimudāraveṣam / dakṣe tathaivepsitadānadakṣaṃ dhyātvārcayennandajamindirāptyai // ### [1.80.86](https://indike.org/pramana/in.purana.narada.1.80.86) evaṃ dhyātvārcayetkṛṣṇaṃ pūrvavadvaiṣṇavottamaḥ / apūpapāyasānnādyairnaivaidyaṃ parikalpayet // ### [1.80.87](https://indike.org/pramana/in.purana.narada.1.80.87) hutvā cāṣṭattaraśataṃ payo 'naiḥ sarpiṣāplutaiḥ / svasvadikṣu baliṃ dadyāddiśedācamanaṃ tataḥ // ### [1.80.88](https://indike.org/pramana/in.purana.narada.1.80.88) aṣṭttarasahasraṃ ca prajapenmantramuttamam / ahno madhye yajedevaṃ yaḥ kṛṣṇaṃ vaiṣṇavottamaḥ // ### [1.80.89](https://indike.org/pramana/in.purana.narada.1.80.89) devāḥ sarve namasyanti lokānāṃ vallabho naraḥ / medhāyuḥśrīkāntiyuktaḥ putraiḥ pautraiśca varddhate // ### [1.80.90](https://indike.org/pramana/in.purana.narada.1.80.90) tṛtīyakālapūjāyāmasti kālavikalpanā / sāyāhne niśi vetyatra vadantyeke vipaścitaḥ // ### [1.80.91](https://indike.org/pramana/in.purana.narada.1.80.91) daśākṣareṇa cedrātrau sāyāhne 'ṣṭādaśārṇataḥ / ubhayīmubhayenaiva kuryādityapare jaguḥ // ### [1.80.92](https://indike.org/pramana/in.purana.narada.1.80.92) sāyāhne dvāravatyāṃ tu citrodyānopaśobhite / aṣṭasāhasrasaṃkhyātairbhavanairupamaṇḍite // ### [1.80.93](https://indike.org/pramana/in.purana.narada.1.80.93) haṃsasārasasaṃkīrṇakamalotpalaśālibhiḥ / sarobhirnīlāṃbhobhiḥ parīte bhavanottame // ### [1.80.94](https://indike.org/pramana/in.purana.narada.1.80.94) udyatpradyotanodyotadyutau śrīmaṇimaṇḍale / hemāṃbhojāsanāsīnaṃ kṛṣṇaṃ trailokyamohanam // ### [1.80.95](https://indike.org/pramana/in.purana.narada.1.80.95) munivṛndaiḥ parivṛtamātmatattvavinirṇaye / tebhyo munibhyaḥ svaṃ dhāma diśantaṃ paramakṣaram // ### [1.80.96](https://indike.org/pramana/in.purana.narada.1.80.96) unnidredīvaraśyāmaṃ padmapatrāyatekṣaṇam / snigdhaṃ kuntalasaṃbhinnakirīṭavanamālinam // ### [1.80.97](https://indike.org/pramana/in.purana.narada.1.80.97) cāruprasannavadanaṃ sphuranmakarakuṇḍalam / śrīvatsavakṣasaṃ bhrājatkaustubhaṃ sumanoharam // ### [1.80.98](https://indike.org/pramana/in.purana.narada.1.80.98) kāśmīrakapiśoraskaṃ pītakauśeyavāsasam / hārakeyūrakaṭakakaṭisūtrairalaṅkṛtam // ### [1.80.99](https://indike.org/pramana/in.purana.narada.1.80.99) hṛtaviśvaṃbharābhūribhāraṃ muditamānasam / śaṅkhacakragadāpadmarājadbhujacatuṣṭayam // ### [1.80.100](https://indike.org/pramana/in.purana.narada.1.80.100) evaṃ dhyātvārcayenmantrī syādaṅgaiḥ prathamāvṛttiḥ / dvitīyā mahiṣībhistu tṛtīyāyāṃ samarcayet // ### [1.80.101](https://indike.org/pramana/in.purana.narada.1.80.101) nāradaṃ parvataṃ jiṣṇuṃ niśaṭhoddhavadārukān / viṣvaksenaṃ ca śaineyaṃ dikṣvagre vinatāsutam // ### [1.80.102](https://indike.org/pramana/in.purana.narada.1.80.102) lokapālaiśca vajrādyaiḥ pūjayedvaiṣṇavottamaḥ / evaṃ saṃpūjya vidhivatpāyasaṃ vinivedayet // ### [1.80.103](https://indike.org/pramana/in.purana.narada.1.80.103) tarpayitvā khaṇḍamiśradugdhabuddhyā jalairiha / japedaṣṭaśataṃ mantrī bhāvayanpuruṣottamam // ### [1.80.104](https://indike.org/pramana/in.purana.narada.1.80.104) pūjāsu homaṃ sarvāsu kuryānmadhyandine 'thavā / āsanādarghyaparyantaṃ kṛtvā stutvā nametsudhīḥ // ### [1.80.105](https://indike.org/pramana/in.purana.narada.1.80.105) samarthātmānamudvāsya svīyahṛtsarasīruhe / vinyasya tanmayo bhūtvā punarātmānamarcayet // ### [1.80.106](https://indike.org/pramana/in.purana.narada.1.80.106) sāyāhne vāsudevaṃ yo nityamevaṃ samarcayet / sarvānkāmānavāpyānte sa yāti paramāṃ gatim // ### [1.80.107](https://indike.org/pramana/in.purana.narada.1.80.107) rātrau cenmadanākrāntacetasaṃ nandanandanam / yajedrāsapariśrāntaṃ gopīmaṇḍalamadhyagam // ### [1.80.108](https://indike.org/pramana/in.purana.narada.1.80.108) vikasatkundakahlāramallikākusumodgataiḥ / rajobhirdhūsarairmandamārutaiḥ śiśirīkṛte // ### [1.80.109](https://indike.org/pramana/in.purana.narada.1.80.109) unmīlannavakairavālivigalanmādhvīkalabdhāntaraṃ bhrāmyanmattamilindagītalalite sanmallikojjṛmbhite / pīyūṣāṃśukarairviśālitaharitprānte smaroddīpane kālindīpulināṅgaṇe smitamukhaṃ veṇuṃ raṇantaṃ muhuḥ // ### [1.80.110](https://indike.org/pramana/in.purana.narada.1.80.110) antastoyalasannavāṃbudaghaṭāsaṃghaṭṭakāratviṣaṃ cañcañcillikamaṃbujāyatadṛśaṃ bimbādharaṃ sundaram / māyūracchadabaddhamaulivilasaddhaṃmillamālaṃ calaṃ dīpyatkuṇḍalaratnaraśmivilasadgaṇḍadvayodbāsitam // ### [1.80.111](https://indike.org/pramana/in.purana.narada.1.80.111) kāñcīnūpurahārakaṅkaṇalasatkeyūrabhūṣānvitaṃ gopīnāṃ dvitayāṃ tare sulalitaṃ vanyaprasūnasrajam / anyonyaṃ vinibaddhagopadayitādorvallivītaṃ lasadrāsakrīḍanalolupaṃ manasijākrāntaṃ mukundaṃ bhavet // ### [1.80.112](https://indike.org/pramana/in.purana.narada.1.80.112) vividhaśrutibhinnamanojñatarasvarasaptakamūrchanatānagaṇaiḥ / bhramamāṇamamūbhirudāramaṇisphuṭamaṇḍanasiṃjitacārutanum // ### [1.80.113](https://indike.org/pramana/in.purana.narada.1.80.113) itaretarabaddhakarapramadāgaṇakalpitarāsavihāravidhau / maṇiśaṅkugamapyamunā vapuṣā bahudhā vihitasvakadivyatanum // ### [1.80.114](https://indike.org/pramana/in.purana.narada.1.80.114) evaṃ dhyātvārcayenmantrī syādaṅgaiḥ prathamāvṛtiḥ / śrīkāmaḥ sasvarādyāni kalābjairvaiṣṇavottamaḥ // ### [1.80.115](https://indike.org/pramana/in.purana.narada.1.80.115) yajetkeśavakīrtyādimithunāni ca ṣoḍaśa / indrādyānapi vajrādīnpūjayettadanantaram // ### [1.80.116](https://indike.org/pramana/in.purana.narada.1.80.116) pṛnthu suvṛttaṃ masṛṇaṃ vitastimātronnataṃ kau vinikhanya śaṅkum / ākramya padbhyāmitaretaraistu hastairbhramo 'yaṃ khalu rāsagoṣṭhī // ### [1.80.117](https://indike.org/pramana/in.purana.narada.1.80.117) sapūjyaivaṃ ca payasā sasito palasarpiṣā / naivedyamarcayitvā tu caṣakairnṛpasaṃkhyakaiḥ // ### [1.80.118](https://indike.org/pramana/in.purana.narada.1.80.118) satataṃ pāpapte (?) mantrī mithuneṣvarpayetkramāt / vidhāya pūrvavaccheṣaṃ sahasraṃ prajapenmanum // ### [1.80.119](https://indike.org/pramana/in.purana.narada.1.80.119) stutvā natvā ca saṃprārthya pūjāśeṣaṃ samāpayet / evaṃ yaḥ pūjayetkṛṣṇaṃ sa sasmṛddheḥ padaṃ bhavet // ### [1.80.120](https://indike.org/pramana/in.purana.narada.1.80.120) aṇimādyaṣṭasiddhīnāmīśvaraḥ syānna saṃśayaḥ / bhuktveha vividhānbhogānante viṣṇupadaṃ vrajet // ### [1.80.121](https://indike.org/pramana/in.purana.narada.1.80.121) evaṃ pūjādibhiḥ siddhe manaukāmyāni sādhayet / aṣṭāviṃśativāraṃ vā trikālaṃ pūjayetsudhīḥ // ### [1.80.122](https://indike.org/pramana/in.purana.narada.1.80.122) svakālavihitān bhūyaḥ parivārāṃśca tarpayet / prātarddadhnā guḍāktena madhyāhne payasā punaḥ // ### [1.80.123](https://indike.org/pramana/in.purana.narada.1.80.123) navanītayutenātha sāyāhne tarpayetpunaḥ / sasitopalamiśreṇa payasā vaiṣṇavottamaḥ // ### [1.80.124](https://indike.org/pramana/in.purana.narada.1.80.124) tarpayāmipadaṃ yojyaṃ mantrānte sveṣu nāmasu / dvitīyānteṣu tu punaḥ pūjāśeṣaṃ samāpayet // ### [1.80.125](https://indike.org/pramana/in.purana.narada.1.80.125) abhyukṣyatatprasādādbhirātmānaṃ prapabedapaḥ / tattṛtpastamathodvāsya tanmayaḥ prajapenmanum // ### [1.80.126](https://indike.org/pramana/in.purana.narada.1.80.126) atha dravyāṇi kāmyeṣu procyante tarpaṇeṣu ca / tāni proktavidhānānāmāśrityānyatamaṃ bhajet // ### [1.80.127](https://indike.org/pramana/in.purana.narada.1.80.127) pāyasaṃ dādhikaṃ cājyaṃ gauḍānnaṃ kṛsaraṃ payaḥ / dadhīni kadalī mocā ciñcā rajasvalā tathā // ### [1.80.128](https://indike.org/pramana/in.purana.narada.1.80.128) apūpā modakā lājāḥ pṛthukā navanītakam / dravyaṣoḍaśakaṃ hyetatkathitaṃ padmajādibhiḥ // ### [1.80.129](https://indike.org/pramana/in.purana.narada.1.80.129) lājānte pṛthukaṃ prākca samarpya ca sitopalam / catuḥsaptativāraṃ yaḥ prātarevaṃ pratarpayet // ### [1.80.130](https://indike.org/pramana/in.purana.narada.1.80.130) dhyātvā kṛṣṇapadaṃ matrī maṇḍalādiṣṭamāpnuyāt / dhāroṣṇapakkapayasā navanītaṃ dadhīni ca // ### [1.80.131](https://indike.org/pramana/in.purana.narada.1.80.131) daugdhāmrāmājyaṃ matsyaṇḍī kṣaudraṃ kīlālameva ca / pūjayennavabhirdravyaiḥ pratyekaṃ ravisaṃkhyayā // ### [1.80.132](https://indike.org/pramana/in.purana.narada.1.80.132) evamaṣṭotaraśataṃsaṃkhyākaṃ tarpaṇaṃ punaḥ / yaḥ kuryādvaiṣṇavaśreṣṭhaḥ pūrvoktaṃ phalamāpnuyāt // ### [1.80.133](https://indike.org/pramana/in.purana.narada.1.80.133) kiṃ bahūktena sarveṣṭadāyakaṃ tarpaṇaṃ tvidam / sasitopaladhāroṣṇadugdhabuddhyā jalena vai // ### [1.80.134](https://indike.org/pramana/in.purana.narada.1.80.134) kṛṣṇaṃ prataparyan grāmaṃ vrajanprāpnoti sādhakaḥ / dhanavastrāṇi bhojyaṃ ca parivāragaṇaiḥ saha // ### [1.80.135](https://indike.org/pramana/in.purana.narada.1.80.135) yāvatsaṃtarpayenmantrī tāvatsaṃkhyaṃ japenmanum / tarpaṇenaiva kāryāṇi sādhayedakhilānyapi // ### [1.80.136](https://indike.org/pramana/in.purana.narada.1.80.136) kāmyahomamatho vakṣye sādhakānāṃ hitāya ca / śrīpuṣpairjuhuyānmantrī śriyamicchannininditām // ### [1.80.137](https://indike.org/pramana/in.purana.narada.1.80.137) sājyenānnena juhuyātghṛtānnasya samṛddhaye / vanyapuṣpairdvijān jātīpuṣpaiśca pṛthivīpatīn // ### [1.80.138](https://indike.org/pramana/in.purana.narada.1.80.138) asitaiḥ kusumairvaiśyān śūdrānnīlotpalaistathā / vaśayellavaṇaiḥ sarvānaṃbujairyuvatījanam // ### [1.80.139](https://indike.org/pramana/in.purana.narada.1.80.139) gośālāsu kṛto homaḥ pāyasena sasarpiṣā / gavāṃ śāntiṃ karotyāśu gopālo gokuleśvaraḥ // ### [1.80.140](https://indike.org/pramana/in.purana.narada.1.80.140) śikṣāveṣadharaṃ kṛṣṇaṃ kiṅkiṇījālaśobhitam / dhyātvā pratarpayenmantrī dugdhabuddhyā śubhairjalaiḥ // ### [1.80.141](https://indike.org/pramana/in.purana.narada.1.80.141) dhanaṃ dhānyaṃ sutānkīrtiṃ prītastasmai dadāti saḥ / brahmavṛkṣasamidbhirvā kuśairvā tilatandulaiḥ // ### [1.80.142](https://indike.org/pramana/in.purana.narada.1.80.142) juhuyādayutaṃ mantrī trimadhvāktairhutāśane / vaśaye dbrāhmaṇāṃścātha rājavṛkṣasamudbhavaiḥ // ### [1.80.143](https://indike.org/pramana/in.purana.narada.1.80.143) prasūnaiḥ kṣatriyānvaiśyānkuraṇḍakusumaistathā / pāṭalotthaiśca kusumairvaśayedantimānsudhīḥ // ### [1.80.144](https://indike.org/pramana/in.purana.narada.1.80.144) śvetapadmai raktapapdaiścaṃpakaiḥ pāṭalaiḥ kramāt / hutvāyutaṃ trimadhvāktairvaśayettadvarāṅganāḥ // ### [1.80.145](https://indike.org/pramana/in.purana.narada.1.80.145) nityaṃ hayārikusumaurniśīthe trimadhuplutaiḥ / varastrīrvaśayetprājñaḥ samyagdhṛtvā dināṣṭakam // ### [1.80.146](https://indike.org/pramana/in.purana.narada.1.80.146) ayutatritayaṃ rātrau siddhārthaistrimadhuplutaiḥ / pratyahaṃ juhvato māsātsureśo 'pi vaśībhavet // ### [1.80.147](https://indike.org/pramana/in.purana.narada.1.80.147) āhṛtya ballavīvastrāṇyārūḍhaṃ nīpabhūruhe / smaretkṛṣṇaṃ japedrātrau sahasraṃ khendūhātsudhīḥ // ### [1.80.148](https://indike.org/pramana/in.purana.narada.1.80.148) haṭhādākarṣayecchīghramurvaśīmapi sādhakaḥ / bahunā kimihoktena mantro 'yaṃ sarvavaśyakṛt // ### [1.80.149](https://indike.org/pramana/in.purana.narada.1.80.149) rahasyaṃ paramaṃ cātha vakṣye mokṣapradaṃ nṛṇām / dhyāyetsvahṛtsarasije devakīnandanaṃ vibhum // ### [1.80.150](https://indike.org/pramana/in.purana.narada.1.80.150) śrīmatkundendugauraṃ sarasijanayanaṃ śaṅkhacakre gadābje bibhrāṇaṃ hastapadmairnavanalinalasanmālayādīpyamānam / vande vedyaṃ munīndraiḥ kaṇikamunilasaddivyabhūṣābhirāmaṃ divyāṅgālepabhāsaṃ sakalabhayaharaṃ pītavastraṃ nurārim // ### [1.80.151](https://indike.org/pramana/in.purana.narada.1.80.151) evaṃ dhyātvā pumāṃsaṃ sphuṭahṛdayasarojāsanāsīnamādyaṃ sāṃdrāṃbhodācchabiṃbādbhutakanakanibhaṃ saṃjapedarkalakṣam / manvorekaṃ dvitārāntaritamathaḥ hunedarkasāhasramidhmaiḥ kṣīridrūttharyathoktaiḥ samadhughṛtasitenāthavā pāyasena // ### [1.80.152](https://indike.org/pramana/in.purana.narada.1.80.152) evaṃ lokeśvarārādhyaṃ kṛṣṇaṃ svahṛdayāṃbuje / dhyāyannanudinaṃ mantrī trisahasraṃ japenmanum // ### [1.80.153](https://indike.org/pramana/in.purana.narada.1.80.153) sāyāhnoktena vidhinā saṃpūjya havanaṃ punaḥ / kṛtvā pūrvoktavidhinā mantrī tadgatamānasaḥ // ### [1.80.154](https://indike.org/pramana/in.purana.narada.1.80.154) evaṃ yo bhajate nityaṃ vidvān gopālanandanam / samuttīrya bhavāṃbhodhiṃ sa yāti paramaṃ padam // ### [1.80.155](https://indike.org/pramana/in.purana.narada.1.80.155) madhye keṇeṣu bāhyeṣvanalapurapuṭasyālikhetkarṇikāyāṃ kandarpaṃ sādhyayuktaṃ vivaragataṣaḍarṇadviṣaḥ keśareṣu / śaktiḥ śrīpūrvikāṇidvinavalipimanorakṣarāṇicchadānāṃ madhye varṇāndaśānto daśalipimanuvaryasya vaikaikaśo 'bjam // ### [1.80.156](https://indike.org/pramana/in.purana.narada.1.80.156) bhūsadmanābhivṛtamasragamanmathena gorocanāvilikhitaṃ tapanīyasūcyā / paṭṭe hiraṇyaracite gulikīkṛtaṃ tadgopālayantramakhilārthadametaduktam // ### [1.80.157](https://indike.org/pramana/in.purana.narada.1.80.157) saṃyātasiktamabhijaptamimaṃ mahadbhirdhāryaṃ jagattrayavaśīkaraṇaikadakṣam / rakṣāyaśaḥ sutamahīdhanadhānyalakṣmīsaubhāgyalipsubhirajasramanarghyavīryam // ### [1.80.158](https://indike.org/pramana/in.purana.narada.1.80.158) smarastrivikramākrāntaścākrīṣṭyāya hṛdityasau / ṣaḍakṣaro 'yaṃ saṃproktaḥ sarvasiddhikaro manuḥ // ### [1.80.159](https://indike.org/pramana/in.purana.narada.1.80.159) kroḍaḥ śāntīnduvahnyāḍhyo māyā bīja prakīrtatam / govindavahnicandrāḍhyo manuḥ śrībījamīritam // ### [1.80.160](https://indike.org/pramana/in.purana.narada.1.80.160) ābhyāmaṣṭādaśaklipaḥ syādviṃśatyakṣaro manuḥ / śālagrāme maṇau yantre maṇḍale pratimāsu vā // ### [1.80.161](https://indike.org/pramana/in.purana.narada.1.80.161) nityaṃ pūjā hareḥ kāryā na tu kevalabhūtale / evaṃ yo bhajante kṛṣṇaṃ sa yāti paramāṃ gatim // ### [1.80.162](https://indike.org/pramana/in.purana.narada.1.80.162) viṃśārṇasya munirbrahmā gāyatrī chanda īritam / kṛṣṇaśca devatā kāmo bījaṃ śaktirdviṭho budhaiḥ // ### [1.80.163](https://indike.org/pramana/in.purana.narada.1.80.163) rāmāgnivedavedābdhernetrārṇairaṅgakalpanam / mūlena vyāpakaṃ kṛtvā manunā puṭitānatha // ### [1.80.164](https://indike.org/pramana/in.purana.narada.1.80.164) mātṛkārṇānnyasettattatsthāneṣu susamāhitaḥ / daśatattvāni vinyasya mūlena vyāpakaṃ caret // ### [1.80.165](https://indike.org/pramana/in.purana.narada.1.80.165) mantranyāsaṃ tataḥ kuryāddevatābhāvasiddhaye / śīrṣe lalāṭe bhrūmadhye netrayoḥ karṇayostathā // ### [1.80.166](https://indike.org/pramana/in.purana.narada.1.80.166) nasorvakre ca cibuke kaṇṭhe dormūlake hṛdi / udare nābhideśe ca liṅge mūlasaroruhe // ### [1.80.167](https://indike.org/pramana/in.purana.narada.1.80.167) kaṭyāṃ jānvorjaṅghayośca gulphayoḥ pādayoḥ kramāt / nyaseddhṛdantānmantrāṇāṃ sṛṣṭinyāso 'yamīritaḥ // ### [1.80.168](https://indike.org/pramana/in.purana.narada.1.80.168) hṛdaye codare nābhau liṅge mūlasaroruhe / kaṭyāṃ jānvorjaṅghayośca gulphayoḥ pādayostathā // ### [1.80.169](https://indike.org/pramana/in.purana.narada.1.80.169) mūrdhni kapole bhrūmadhye netrayoḥ karṇayornasoḥ / vadane cibuke kaṇṭhe dormūle vinyasetkramāt // ### [1.80.170](https://indike.org/pramana/in.purana.narada.1.80.170) namotānmantravarṇāṃśca sthitinyāso 'yamīritaḥ / pādayorgulphayoścaiva jaṅghayorjānunostathā // ### [1.80.171](https://indike.org/pramana/in.purana.narada.1.80.171) kaṭyāṃ mūle dhvaje nābhau jaṭhare hṛdaye punaḥ / dormūle kaṇṭhadeśe ca cibuke vadane nasoḥ // ### [1.80.172](https://indike.org/pramana/in.purana.narada.1.80.172) karṇayornetrayoścaiva bhrūmadhye niṭile tathā / mūrdhni nyasenmantravarṇānsaṃhārākhyo 'yamīritaḥ // ### [1.80.173](https://indike.org/pramana/in.purana.narada.1.80.173) punaḥ sṛṣṭisthitinyāsau vidhāya vaiṣṇavottamaḥ / mūrtipañjaranāmānaṃ vinyasetpūrvavattataḥ // ### [1.80.174](https://indike.org/pramana/in.purana.narada.1.80.174) punaḥ ṣaḍaṅgaṃ kṛtvātha dhyāyetkṛṣṇaṃ hṛdaṃbuje / dvāravatyāṃ sahasrārkabhāsvarairbhavanottamaiḥ // ### [1.80.175](https://indike.org/pramana/in.purana.narada.1.80.175) analpaiḥ kalpavṛkṣaiśca parīte maṇimaṇḍape / jvaladratna mayastaṃbhadvāratoraṇakuḍyake // ### [1.80.176](https://indike.org/pramana/in.purana.narada.1.80.176) phullapraphullasañcitravitānālaṃbimauktike / padmarāgasthalīrājadratnasaṃghaiśca madhyataḥ // ### [1.80.177](https://indike.org/pramana/in.purana.narada.1.80.177) anāratagaladratnadhārāḍhyasvastastaroradhaḥ / ratnapradīpāvalibhiḥ pradīpitadigantare // ### [1.80.178](https://indike.org/pramana/in.purana.narada.1.80.178) udyadādityasaṃkāśamaṇisiṃhāsanāṃbuje / samāsīno 'cyuto dhyeyo drutahāṭakasannibhaḥ // ### [1.80.179](https://indike.org/pramana/in.purana.narada.1.80.179) samānoditacandrārkataḍitkoṭisamadyutiḥ / sarvāṅgasuṃdaraḥ saumyaḥ sarvābharaṇabhūṣitaḥ // ### [1.80.180](https://indike.org/pramana/in.purana.narada.1.80.180) pītavāsāḥ śaṅkhacakragadāṃbhojalasatkaraḥ / anāhatocchaladratnadhāraughakalaśaṃ spṛśan // ### [1.80.181](https://indike.org/pramana/in.purana.narada.1.80.181) vāmapādāṃbujāgreṇa muṣṇatā pallavacchavim / rukmiṇīsatyabhāme 'sya mūrdhni ratnaughadhārayā // ### [1.80.182](https://indike.org/pramana/in.purana.narada.1.80.182) siṃcantyau dakṣavāmasthe svadosthakalaśotthayā / nāgnajitī sunandā ca diśantyau kalaśau tayoḥ // ### [1.80.183](https://indike.org/pramana/in.purana.narada.1.80.183) tābhyāṃ ca dakṣavāmasthamitravindāsulakṣmaṇe / ratnanadyāḥ samuddhṛtya ratnapūrṇauṃ ghaṭau tayoḥ // ### [1.80.184](https://indike.org/pramana/in.purana.narada.1.80.184) jāṃbavatī suśīlā ca diśantyau dakṣavāmake / bahiḥ ṣoḍaśa sāhasrasaṃkhyākāḥ paritaḥ priyāḥ // ### [1.80.185](https://indike.org/pramana/in.purana.narada.1.80.185) dhyeyāḥ kanakaratnaughadhārāyukkalaśojvalāḥ / tadbahiścāṣṭanidhāyaḥ pūrayanto dhanairdharām // ### [1.80.186](https://indike.org/pramana/in.purana.narada.1.80.186) tadbahirvṛṣṇayaḥ sarve purovacca svarādayaḥ / evaṃ dhyātvā japellakṣapañcakaṃ taddaśāṃśataḥ // ### [1.80.187](https://indike.org/pramana/in.purana.narada.1.80.187) aruṇaiḥ kamalairhutvā pīṭhe pūrvodite yajet / vilipya gandhapaṅkena likhedaṣṭadalāṃbujam // ### [1.80.188](https://indike.org/pramana/in.purana.narada.1.80.188) karṇikāyāṃ ca ṣaṭkoṇaṃ sasādhyaṃ tatra manmatham / śiṣṭaistu saptadaśabhirakṣarairveṣṭayetsvaram // ### [1.80.189](https://indike.org/pramana/in.purana.narada.1.80.189) prāgrakṣo 'nilakoṇeṣu śriyaṃ śiṣṭeṣu saṃvidam / ṣaṭsu saṃdhiṣu ṣaṭkarṇe kesareṣu triśastriśaḥ // ### [1.80.190](https://indike.org/pramana/in.purana.narada.1.80.190) vilikhetsmaragāyatrīṃ mālāmantraṃ dalāṣṭake / ṣaṭūṣaḥ saṃlikhya tadbāhye veṣṭayenmātṛkākṣaraiḥ // ### [1.80.191](https://indike.org/pramana/in.purana.narada.1.80.191) bhūbiṃbaṃ ca likhedbāhye śrīmāyādigvidikṣvapi / bhūgrahaṃ caturasraṃ syādaṣṭavajravibhūṣitam // ### [1.80.192](https://indike.org/pramana/in.purana.narada.1.80.192) etadyantraṃ hāṭakādipaṭṭeṣvālikhya pūrvavat / saṃskṛtaṃ dhārayedyo vai sor'cyate tridaśairapi // ### [1.80.193](https://indike.org/pramana/in.purana.narada.1.80.193) syādgāyatrī vāmadevapuṣpabāṇau tu ṅeṃtimau / vidmahedhīmahiyutau tanno 'naṅgaḥ pracodayāt // ### [1.80.194](https://indike.org/pramana/in.purana.narada.1.80.194) japyā japādau gopālamanūnāṃ janarañjanī / hṛdayaṃ kāmadevāya ṅeṃtaṃ sarvajanapriyam // ### [1.80.195](https://indike.org/pramana/in.purana.narada.1.80.195) uktvā sarvajanānte tu saṃmohanapadaṃ tathā / jvala jvala prajvaleti procya sarvajanasya ca // ### [1.80.196](https://indike.org/pramana/in.purana.narada.1.80.196) hṛdayaṃ mama ca brūyādvaśaṅkuruyugaṃ śiraḥ / prokto madanamantro 'ṣṭacatvāriṃśadbhirakṣaraiḥ // ### [1.80.197](https://indike.org/pramana/in.purana.narada.1.80.197) japādau smarabījādyo jagattrayavaśīkaraḥ / pīṭha prāgvatsamabhyarcya mūrti saṃkalpya mūlataḥ // ### [1.80.198](https://indike.org/pramana/in.purana.narada.1.80.198) tatrāvāhyācyutaṃ bhaktyā sakalīkṛtya pūjayet / āsanādivibhūṣāntaṃ punarnyāsakramādyajet // ### [1.80.199](https://indike.org/pramana/in.purana.narada.1.80.199) sṛṣṭiṃ sthitiṃ ṣaḍaṅgaṃ ca kirīṭaṃ kuṇḍaladvayam / śaṅkhaṃ cakraṃ gadāṃ padmaṃ mālāṃ śrīvatsakaustubhau // ### [1.80.200](https://indike.org/pramana/in.purana.narada.1.80.200) gandhapuṣpaiḥ samabhyarcya mūlena vaiṣṇavottamaḥ / ṣaṭkoṇeṣu ṣaḍaṅgāni digdaleṣu kramādyajet // _First 200 of 299 passages. [Read on](https://indike.org/pramana/in.purana.narada.1.80)_ ## Linked texts (15) - [Kramadīpikā](https://indike.org/pramana/in.sampradaya.vaisnava.tantra.gopala.tantra.kramadipika.4.36) — Keśava Kāśmīrin Bhaṭṭa, Sanskrit - [Prāṇatoṣiṇī](https://indike.org/pramana/in.sampradaya.general.sakta.nibandha.gaudiyanibandha.pranatosini.6.2.14) — Rāmatoṣaṇa Śarman 1796, Sanskrit - [Bṛhattantrasāra](https://indike.org/pramana/in.sampradaya.general.sakta.nibandha.gaudiyanibandha.brhattantrasara.4.164) — Rāmānanda, Sanskrit - [Gautamatantra](https://indike.org/pramana/in.sampradaya.vaisnava.tantra.tantra.gautamatantra.334) — Sanskrit - [Kulavṛtti](https://indike.org/pramana/in.sampradaya.general.sakta.kulavrtti.2.845) — Sanskrit - [Āgamakalpalatā](https://indike.org/pramana/in.sampradaya.general.agamakalpalata.219) — Sanskrit - [Nāradopapurāṇa](https://indike.org/pramana/in.purana.upa.vaisnava.naradopapurana.82.1) — Sanskrit - [Bṛhannāradapañcarātra](https://indike.org/pramana/in.sampradaya.vaisnava.pancaratra.samhita.brahmaratra.brhannaradapancaratra.30.33) — Sanskrit - [Kramadīpikā or Gopālamantra](https://indike.org/pramana/in.sampradaya.vaisnava.tantra.gopala.tantra.kramadipikaorgopalamantra.4.35) — Keśava Kāśmīrin, Sanskrit - [Gautamīyatantra (ed. Bhagiratha Jha)](https://indike.org/pramana/in.sampradaya.vaisnava.tantra.tantra.gautamiya*jha.10.84) — Sanskrit - [Ekaliṅgamāhātmya](https://indike.org/pramana/in.purana.sthala.gujarat-malava.ekalingamahatmya.23.127) — Kānhavyāsa, Sanskrit - [Varṣakriyākaumudī](https://indike.org/pramana/in.niti.dharma.kala.varsakrtya.varsakriyakaumudi.2.p56) — Govindānanda Kavikaṅkaṇa 1510, Sanskrit - [Gūḍhārthadīpikā](https://indike.org/pramana/in.niti.dharma.nibandha.nirnaya.nirnayanibandha.gudharthadipika.2.p245) — Vāmadeva, Sanskrit - [Varṣakṛtyakaumudī](https://indike.org/pramana/in.niti.dharma.nibandha.gauda.sulapani-srinatha.varsakrtyakaumudi.3.p109.1) — Govindānandācārya, Sanskrit - [Kriyākaumudī (Govindānanda)](https://indike.org/pramana/in.niti.dharma.nibandha.krtya.kriyakaumudi.2.p166) — Govindānanda 1500, Sanskrit --- Source: [https://indike.org/pramana/in.purana.narada.1.80](https://indike.org/pramana/in.purana.narada.1.80) · Pramāṇa