Pramāṇa · Search · About · API

Naradapurana 1.81

Nāradapurāṇa 1.81

Language
Sanskrit

Contents

1.81.1

śrīsanatkumāra uvāca /
atha kṛṣṇasya mantrāṇāṃ vakṣye bhedān munīśvara /
yānsamārādhya manujāḥ sādhayantīṣṭamātmanaḥ //

1.81.2

śaktiśrīmārapūrvaśca śrīśaktismarapūrvakaḥ /
māraśaktiramāpūrvo daśārṇā manavastrayaḥ //

1.81.3

muniḥ syānnā radacchando gāyatrī devatā punaḥ /
kṛṣṇo govindanāmātra sarvakāmaprado nṛṇām //

1.81.4

cakraiḥ pūrvavadaṅgāni trayāṇāmapi kalpayet /
tataḥ kirīṭamanunāvyāpakaṃ hi samācaret //

1.81.5

sudarśanasya manunā kuryāddigbandhanaṃ tathā /
viṃśatyarṇoktavatkuryādādye dhyānārcanādikam //

1.81.6

dvitīye tu daśārṇoktaṃ dhyānapūjādikaṃ caret /
tṛtīye tu hariṃ dhyāyetsamāhitamanāḥ sudhīḥ //

1.81.7

śakhacakradhanurbāṇapāśāṅkuśadharāruṇam /
dorbhyāṃ dhṛtaṃ dhamantaṃ ca veṇuṃ kṛṣṇadivākaram //

1.81.8

evaṃ dhyātvā japenmantrānpañcalakṣaṃ pṛthak sudhīḥ /
juhuyāttaddaśāṃśena pāyasena sasarpiṣā //

1.81.9

evaṃ siddhe manau mantrī kuryātkāmyāni pūrvavat /
śrīśaktikāmaḥ kṛṣṇāya govindāyāgnisundarī //

1.81.10

ratryarṇo brahmagāyatrīkṛṣṇā ṛṣyādayo 'sya tu /
bījairamābdhiyugmārṇaiḥ ṣaḍaṅgāni prakalpayet //

1.81.11

viṃśatyarṇoditajapadhyānahomārcanādikam /
kiṃ bahūktena mantro 'yaṃ sarvābhīṣṭaphalapradaḥ //

1.81.12

śrīśaktismarapūrvogajanmā śaktiramāntikaḥ /
daśākṣaraḥ sa evādau proktaḥ śaktiramāyutaḥ //

1.81.13

mantrau ṣoḍaśaravyārṇauṃ cakrairaṅgāni kalpayet /
varadābhayahastābhyāṃ śliṣyantaṃ svāṅgake priye //

1.81.14

padmotpalakare tābhyāṃ śliṣṭaṃ cakradarojvalam /
dhyātvaivaṃ prajapellakṣadaśakaṃ taddaśāṃśataḥ //

1.81.15

ājyairhutvā tataḥ siddhau bhavetāṃ mantranāyakau /
sarvakāmapradau sarvasaṃpatsaubhagāgyadau nṛṇām //

1.81.16

aṣṭādaśārṇaḥ kāmānto manuḥ sutadhanapradaḥ /
nārado 'sya muniśchando gāyatrī devatā manoḥ //

1.81.17

kṛṣṇaḥ kāmo bījamuktaṃ śaktirvahnipriyā matā /
ṣaḍvīryāḍhyena bījena ṣaḍaṅgāni samācaret //

1.81.18

pāṇau pāyasapakvaṃ ca dakṣe haiyaṅgavīnakam /
vāme dadhaddivyadigaṃbaro gopīsuto 'vatu //

1.81.19

dhyātvaivaṃ prajapenmantraṃ dvātriṃśallakṣamānataḥ /
daśāṃśaṃ juhuyādagnau sitāḍhyena payoṃ'dhasā //

1.81.20

pūrvoktavaiṣṇave pīṭhe yajedaṣṭādaśārṇavat /
padmasthaṃ kṛṣṇamabhyarcya tarpayettanmukhāṃbuje //

1.81.21

kṣīreṇa kadalīpakkairdadhnā haiyaṅgavena ca /
putrārthī tarpayedevaṃ vatsarāllabhate sutam //

1.81.22

yadyadicchati tatsarvaṃ tarpaṇādeva siddhyati /
vākkāmo ṅeyutaṃ kṛṣṇapadaṃ māyā tataḥ pagaram //

1.81.23

govindāya ramā paścāddaśārṇaṃ ca samuddharet /
manusvarayutau sargayuktau bhṛgutadūrddhūgau //

1.81.24

dvāviṃśatyakṣaro mantro vāgīśatvapradāyakaḥ /
ṛṣiḥ syānnāradaśchando gāyatrī devatā punaḥ //

1.81.25

vidyāpradaśca gopālaḥ kāmo bījaṃ prakīrtitam /
śaktistu vāgbhavaṃ vidyāprāptaye viniyojanā //

1.81.26

vāmorddhvahaste dadhataṃ vidyāpustakamuttamam /
akṣamālāṃ ca dakṣorddhvasphaāṭikīṃ mātṛkāmayīm //

1.81.27

śabdabrahma mayaṃ veṇumadhaḥ pāṇidvaye punaḥ /
gāyatrīgītavasanaṃ śyāmalaṃ komalacchavim //

1.81.28

barhāvataṃsaṃ sarvajñaṃ sevitaṃ munipuṅgavaiḥ /
dhyātvaivaṃ pramadāveśavilāsaṃ bhuvaneśvaram //

1.81.29

vedalakṣaṃ japenmantraṃ kiṃśukaistaddaśāṃśataḥ /
hutvā tu pūjayenmantrī viṃśatyarṇavidhānataḥ //

1.81.30

evaṃ yo bhajate mantraṃ bhavedvāgīśvarastu saḥ /
adṛṣṭānyapi śāstrāṇi tasya gaṅgātaraṅgavat //

1.81.31

tāraḥ kṛṣṇayugaṃ paścānmahākṛṣṇa itīrayet /
sarvajña tvaṃpraśaṃśabdānte sīdame 'gniśca māram //

1.81.32

ṇānti vidyeśa vidyāmāśu prayaccha tataśca me /
trayastriṃśadakṣaro 'yaṃ mahāvidyāpradomanuḥ //

1.81.33

nārado 'sya muniśchando 'nuṣṭum kṛṣṇo 'sya devatā /
pādaiḥ sarveṇa pañcāṅgaṃ kṛtvā dhyāyettato harim //

1.81.34

divyodyāne vivasvatpratimamaṇimaye maṇḍape yogapīṭhe madhye yaḥ sarvavedāntamayasurataroḥ saṃniviṣṭo mukundaḥ /
vedaiḥ kalpadrurūpaiḥ śikhariśatasamālaṃbikośaiścaturbhirnyāyaistarkaipurāṇaiḥ smṛtibhirabhivṛtastādṛśaiścāmarādyaiḥ //

1.81.35

dadyādbibhratkarāgrairapi daramuralīpuṣpabāṇekṣucāpānakṣaspṛkpūrṇakuṃbhau smaralalitavapurdivyabhūṣāṅgarāgaḥ /
vyākhyāṃ vāme vitanvan sphuṭarucirapado veṇunā viśvamātre śabdabrahmodbhavena śriyamaruṇarucirballavīvallabho naḥ //

1.81.36

evaṃ dhyātvā japellakṣaṃ daśāṃśaṃ pāyasairhunet /
aṣṭādaśārṇavatkuryādyajanaṃ cāsya mantravit //

1.81.37

tāro namo bhagavate nandaputrāya saṃvadet /
ānandavapuṣe dadyādṛśārṇaṃ tadanantaram //

1.81.38

aṣṭāviṃśativarṇo 'yaṃ mantraḥ sarveṣṭadāyakaḥ /
nandaputrapadaṃ ṅeṃtaṃ śyāmalāṅgapadaṃ tathā //

1.81.39

tathā bālavapuḥkṛṣṇaṃ govindaṃ ca tathā punaḥ /
daśārṇo 'to bhavenmantro dvātriṃśadakṣarānvitaḥ //

1.81.40

anayornāradaṛṣiśchandastūṣṇiganuṣṭubhau /
devatā nandaputrastu viniyogo 'khilāptaye //

1.81.41

cakraiḥ pañcāṅgamarcāsyādaṅgadikpālahetibhiḥ /
dakṣiṇe ratnacaṣakaṃ vāme sauvarṇanetrakam //

1.81.42

kare dadhānaṃ devībhyāṃ śliṣṭaṃ saṃcintayedvibhum /
lakṣaṃ japo daśāṃśena juhuyātpāyasena tu //

1.81.43

etābhyāṃ siddhamantrābhyāṃ mantrī kuryādyathepsitam /
praṇavaḥ kamalā māyā namo bhagavate tataḥ //

1.81.44

nandaputrāya tatpaścādbālānte vapuṣe padam /
ūnaviṃśativarṇo 'yaṃ munirbrahmā samīritaḥ //

1.81.45

chando 'nuṣṭup devatā ca kṛṣṇo bālavapuḥ svayam /
mantro 'yaṃ sarvasaṃpattisiddhaye sevyate budhaiḥ //

1.81.46

tāro hyadbhagavānaṅeṃto rukmiṇīvallabhāya ca /
vahnijāyāvadhiḥ prokto mantraḥ ṣoḍaśavarṇavān //

1.81.47

nārado 'sya muniśchando 'nuṣṭup ca devatā manoḥ /
rukmiṇīvallabhaścandradṛgvedāṅgākṣivarṇakaiḥ /
pañcāṅgāni prakurvīta tato dhyāyetsureśvaram //

1.81.48

tāpicchacchaviraṅkagāṃ priyatamāṃ svarṇaprabhāmaṃbujaprodyaddāmabhujāṃ svavāmabhujayāśliṣyansvacittāśayā /
śliṣyantīṃ svayamanyahastavilatsauvarṇavetraściraṃ pāyānnaḥ suviśuddhapītavasano nānāvibhūṣo hariḥ //

1.81.49

dhyātvaivaṃ prajapellakṣaṃ raktaiḥ padmairdaśāṃśataḥ //

1.81.50

trimadhvaktairhunetpīṭhe pūrvokte pūjayeddharim /
aṅgairnāradamukhyaiśca lokeśaiśca tadāyudhaiḥ //

1.81.51

evaṃ siddho manurdadyātsarvānkāmāṃśca mantriṇe /
līlādaṇḍapadābjo 'pi janasaṃsaktadoḥ padam //

1.81.52

daṇḍānte vā dharāvahniradhīśāḍhyo 'tha lohitaḥ /
meghaśyāmapadaṃ paścādbhagavān salilaṃsadṛk //

1.81.53

viṣṇo ityuktvā ṭhadvayaṃ syādekonatriṃśadarṇavān /
nārado 'sya muniśchando 'nuṣṭup ca devatā manoḥ //

1.81.54

līlādaṇḍahariḥ prokto manvabdhadhiyugavahnibhiḥ /
vedaiḥ pañcāṃ gakaṃ bhāgairmantravarṇotthitaiḥ kramāt //

1.81.55

saṃmohayaṃśca nijavāmakarasthalīlādaṇḍena gopayuvatīḥ parasuṃdarīśca /
diśyannijapriyasakhāṃsagandakṣahasto devaśriyaṃ nihatakaṃsa urukramo naḥ //

1.81.56

lakṣaṃ japo daśāṃśena juhuyāttilataṇḍulaiḥ /
trimadhvaktaistato 'bhyarcedaṅgaṃ dikpālahetibhiḥ //

1.81.57

līlādaṇḍa hariṃ yo vai bhajate nityamādarāt /
sa sarvaiḥ pūjyate lokaistasya gehe sthirā ramā //

1.81.58

sadyārūḍhā smṛtistoyaṃ keśavāḍhyadharāyugam /
bhayāgnivallabhāmantraḥ saptārṇaḥ sarvasiddhidaḥ //

1.81.59

ṛṣiḥ syānnāradaśchando uṣṇiggovallamasya tu /
devatāpūrvavaccakraiḥ pañcāṅgāni tu kalpayet //

1.81.60

dhyeyo hariḥ sakapilāgaṇamadhyasaṃsthastā āhvayandadhaddakṣiṇadosthaveṇum /
pāśaṃ sayaṣṭimaparatra payodanīlaḥ pītāmbarāhiripupicchakṛtāvataṃsaḥ //

1.81.61

saptalakṣaṃ japenmantraṃ daśāṃśaṃ juhuyāttataḥ /
godugdhaiḥ pūjayetpīṭhe syādaṅgaiḥ prathamāvṛtiḥ //

1.81.62

suvarṇapiṅgalāṃ gaurapiṅgalāṃ raktapiṅgalām /
guḍapiṅgāṃ babhruvarṇāṃ cottamāṃ kapilāṃ tathā //

1.81.63

catuṣkapiṅgalāṃ pītapiṅgalāṃ cottamāṃ śubhām /
gogaṇāṣṭakamabhyarcya lokeśānuyudhairyutān //

1.81.64

saṃpūjyaivaṃ manau siddhe kuryātkāmyāni mantravit /
aṣṭottarasahasraṃ yaḥ payobhirdinaśo hunet //

1.81.65

pakṣātsagogaṇo mukto daśārṇe cāpyayaṃ vidhiḥ /
tāro hṛdbhagavān ṅeṃtaḥ śrīgovindastathā bhavet //

1.81.66

dvādaśārṇo manuḥ prokto nārado 'sya munirmataḥ /
chandaḥ proktaṃ ca gāyatrī śrīgovindo 'sya devatā /
candrākṣiyugabhūtārṇaiḥ sarvaiḥ pañcāṅgakalpanam //

1.81.67

dhyāyetkalpadrumūlāśritamaṇivilasaddivyasiṃhāsanasthaṃ meghaśyāmaṃ piśaṅgāṃśukamatisubhagaṃ śaṅkharetre karābhyām //

1.81.68

bibhrāṇaṃ gosahasrairvṛtamamarapatiṃ prauḍhahastaikakuṃbhapraścotatsaudhadhārāsnapitamabhinavāṃbhojapatrābhanetram //

1.81.69

ravilakṣaṃ japenmantraṃ dugdhairhutvā daśāṃśataḥ /
yajecca pūrvavadgoṣṭhasthitaṃ vā pratimādiṣu //

1.81.70

pūrvokte vaiṣṇave pīṭhe mūrtiṃ saṃkalpya mūlataḥ /
tatrāvāhya yajetkṛṣṇaṃ gurupūjanapūrvakam //

1.81.71

rukmiṇīṃ satyabhāmāṃ ca pārśvayorindramagrataḥ /
pṛṣṭhataḥ surabhiṃ ceṣṭvā kesareṣvaṅgapūjanam //

1.81.72

kāliṃ dyādyā mahiṣyo 'ṣṭau vasupatreṣu saṃsthitāḥ /
pīṭhakoṇeṣu baddhvādikiṅkaṇīṃ ca tathā punaḥ //

1.81.73

dāmāni pṛṣṭhayorveṇuṃ puraḥ śrīvatsakaustubhau /
agrato vanamāsādirdikṣvaṣṭasu tathā sthitāḥ //

1.81.74

pāñcajanyaṃ gadā cakraṃ vasudevaśca devakī /
nandagopo yaśodā ca sagogopālagopikāḥ //

1.81.75

indrādyāśca sthitā bāhye vajrādyāśca tataḥ param /
kumudaḥ kumudākṣaśca puṇḍarīko 'tha vāmanaḥ //

1.81.76

śaṅkukarṇaḥ sarvanetraḥ sumukhaḥ supratiṣṭitaḥ /
viṣvaksenaśca saṃpūjyaḥ svātmā cārcyastataḥ param //

1.81.77

ekakālaṃ trikālaṃ vā yo govindaṃ yajennaraḥ /
sa cirāyurnirātaṅko dhanadhānyapatirbhavet //

1.81.78

smṛtiḥ sadyānvitā cakrī dakṣakarṇayutodharā /
nāthāya hṛdayānto 'yaṃ vasuvarṇo mahāmanuḥ //

1.81.79

munirbrahmāsya gāyatrī chandaḥ kṛṣṇo 'sya devatā /
varṇadvandvaiśca sarveṇa pañcāṅgānyasya kalpayet //

1.81.80

pañcavarṣamatilolamaṅgaṇe dhāvamānamaticañcalekṣaṇam /
kiṅkiṇīvalayahāranūpurai rañjitaṃ namata gopabālakam //

1.81.81

evaṃ dhyātvā japedaṣṭalakṣaṃ mantrī daśāṃśataḥ /
brahmavṛkṣasamidbhiśca juhuyātpāyasena vā //

1.81.82

prāgukte vaiṣṇave pīṭhe mūrtiṃ saṃkalpya mūlataḥ /
tatrāvāhyārcayetkṛṣṇaṃ mantrī vai sthiramānasaḥ //

1.81.83

kesareṣu caturdikṣu vidikṣvaṅgāni pūjayet /
vāsudevaṃ balaṃ dikṣu pradyumnamaniruddhakam //

1.81.84

vidikṣu rukmiṇīsatyabhāme vai lakṣyaṇarkṣaje /
lokeśānsāyudhānbāhye evaṃ siddho bhavenmanuḥ //

1.81.85

tāraḥ śrībhuvanākāmo ṅeṃtaṃ śrīkṛṣṇamīrayet /
śrīgovindaṃ tataḥ procya gopījanapadaṃ tataḥ //

1.81.86

vallabhāya tataḥ padmātrayaṃ tatvākṣaro manuḥ /
munyādikaṃ ca pūrvoktaṃ siddhagopālakaṃ smaret //

1.81.87

mādhavīmaṇḍapāsīnau garuḍenābhipālitau /
divyakrīḍāsu niratau rāmakṛṣṇau smaran japet //

1.81.88

pūjanaṃ pūrvavaccāsya kartavyaṃ vaiṣṇavottamaiḥ /
cakrī munisvaropetaḥ sargī caikākṣaro manuḥ //

1.81.89

kṛṣṇeti dvyakṣaraḥ proktaḥ kāmādiḥ syāttrivarṇakaḥ /
saiva ṅeṃto yugārṇaḥ syātkṛṣṇāya nama ityapi //

1.81.90

pañcākṣaraśca kṛṣṇāya kāmaruddhastathā paraḥ /
gopālāyāgnijāyānto rasavarṇaḥ prakīrtitaḥ //

1.81.91

kāmaḥ kṛṣṇapadaṃ ṅeṃtaṃ vahnijāyāntakaḥ paraḥ /
kṛṣṇagovindakau ṅeṃtau saptārṇaḥ sarvasiddhidaḥ //

1.81.92

śrīśaktikāmāḥ kṛṣṇāya kāmaḥ saptākṣaraḥ paraḥ /
kṛṣṇagovindakau ṅeṃtau hṛdanto 'nyo navākṣaraḥ //

1.81.93

ṅeṃtau ca kṛṣṇagovindau tathā kāmaḥ puṭaḥ paraḥ /
kāmaḥ śārṅgī dharāsaṃstho manvindvāḍhyaśca manmathaḥ //

1.81.94

śyāmalāṅgāya hṛdayaṃ daśārṇaḥ sarvasiddhidaḥ /
bālānte vapuṣe kṛṣṇāyāgnijāyāntimo 'paraḥ //

1.81.95

dviṭhānte bālavapuṣe kāmaḥ kṛṣṇāya saṃvadet /
tato dhyāyansvahṛdaye gopījanamanoharam //

1.81.96

śrīvṛndāvipinapratoliṣu namatsaṃphullavallītatiṣvantarjālavighaṭṭainaḥ surabhiṇā vātena saṃsevite /
kālindīpuline vihāriṇamatho rādhaikajīvātukaṃ vande nandakiśoraminduvadanaṃ snigdhāṃbudāḍaṃbaram //

1.81.97

pūrvāktavartmanā pūjā jñeyā hyeṣāṃ munīśvara /
devakīsutavarṇānte govindapadamuccaret //

1.81.98

vāsudevapadaṃ procya saṃbṛddhyantaṃ jagatpatiṃm /
dehi me tanayaṃ paścātkṛṣṇa tvāmahamīrayet //

1.81.99

śaraṇaṃ gata ityanto mantro dvātriṃśadakṣaraḥ /
nārado 'sya muniśchando gāyatrī cāpyanuṣṭubham /
devaḥ sutapradaḥ kṛṣṇaḥ pādaiḥ sarveṇa cāṅgakam //

1.81.100

vijayena yuto rathasthitaḥ prasamānīya samudramadhyataḥ /
pradadattanayān dvijanmane smaraṇīyo vasudevanandanaḥ //

1.81.101

lakṣaṃ japo 'yutaṃ homastalairmadhurasaṃplutaiḥ /
arcā pūrvodite pīṭhe aṅgalokeśvarāyudhaiḥ //

1.81.102

evaṃ siddhe manau mantrī vandhyāyāmapi putravān /
tāro māyā tataḥ sāṃtaseṃduṣvāntaśca sarvavān //

1.81.103

so 'haṃ vahnipriyānto 'yaṃ mantro vasvakṣaraḥ paraḥ /
pañcabrahmātmakasyāsya mantrasya muni sattamaḥ //

1.81.104

ṛṣirbrahmā ca paramā gāyatrīchanda īritam /
parañjyotiḥ paraṃ brahma devatā parikīrtitam //

1.81.105

praṇavo bījamākhyātaṃ svāhā śaktirudāhṛtā /
svāheti hṛdayaṃ proktaṃ so 'haṃ veti śiro matam //

1.81.106

haṃsaśceti śikhā proktā hṛllekhā kavacaṃ smṛtam /
praṇavo netramākhyātamastraṃ harihareti ca //

1.81.107

sa brahmā sa śivo vipra sa hariḥ saiva devarāṭ /
sa sarvarūpaḥ sarvākhyaḥ so 'kṣaraḥ paramaḥ svarāṭ //

1.81.108

evaṃ dhyātvā japedaṣṭalakṣahomo daśāṃśataḥ /
pūjāpraṇavapīṭhe 'sya sāṃgāvaraṇakairmatā //

1.81.109

evaṃ siddhe manau jñānaṃ sādhakendrasya nārada /
jāyate tattvamasyādivākyoktaṃ nirvikalpakam //

1.81.110

kāmo ṅeṃto hṛṣīkeśo hṛdayānto gajākṣaraḥ /
ṛṣirbrahmāsya gāyatrī chando gāyatramīritam //

1.81.111

devatā tu hṛṣīkeśo viniyogo 'khilāptaye /
kāmo bījaṃ tathāyeti śaktirasya hyudāhṛtā //

1.81.112

bījenaiva ṣaḍaṅgāni kṛtvā dhyānaṃ samācaret /
puruṣottamamantroktaṃ sarvaṃ vāsya prakīrtitam //

1.81.113

lakṣaṃ japo 'yutaṃ homo ghṛtenaiva prakīrtitaḥ /
tarpaṇaṃ sarvakāmāptyai proktaṃ saṃmohinīsumaiḥ //

1.81.114

śrībījaṃ śaktirāpeti bījenaiva ṣaḍaṅkastathā /
trailokyamohanaḥ śabdo namoṃ'to manurīritaḥ //

1.81.115

ṛṣirbrahmā ca gāyatrī chandaḥ śrīdharadevatā /
śrībījaṃ śaktirāpeti bījenaiva ṣaḍaṅgakam //

1.81.116

puruṣottamavaddhyānapūjādikamihoditaḥ /
lakṣaṃ japastathā homa ājyenaiva daśāṃśataḥ //

1.81.117

sugandhaśvetapuṣpaistu pūjāṃ homādikaṃ caret /
evaṃ kṛte tu viprendra sākṣātsyācchrīdharaḥ svayam //

1.81.118

acyutānantagovindapadaṃ ṅeṃtaṃ namontimam /
mantro 'sya śaunakaṛṣirvirāṭ chandaḥ prakīrtitam //

1.81.119

eṣāṃ parāśaravyāsanāradā ṛṣayaḥ smṛtāḥ /
virāṭ chandaḥ samākhyātaṃ parabrahmātmako hariḥ //

1.81.120

devatābījaśaktī tu pūrvokte sādhakairmate /
śaṅkhacakradharaṃ devaṃ caturbāhuṃ kirīṭinam //

1.81.121

sarvairapyāyudhairyuktaṃ garuḍopari saṃsthitam /
sanakādimunīndraistu sarvadevairupāsitam //

1.81.122

śrībhūmisahitaṃ devamudayādityasannibham /
prātarudyatsahasrāṃśumaṇḍalopamakuṇḍalam //

1.81.123

sarvalokasya rakṣārthamanantaṃ nityameva hi /
abhayaṃ varadaṃ devaṃ prayacchantaṃ mudānvitam //

1.81.124

evaṃ dhyātvār cayetpīṭhe vaiṣṇave susamāhitaḥ /
ādyāvaraṇasaṃgaiḥ syāccakraśaṅkhagadāsibhiḥ //

1.81.125

muśalāḍhyadhanuḥ pāśāṅkuśaiḥ proktaṃ dvitīyakam /
sanakādikaśākteyavyāsanāradaśaunakaiḥ //

1.81.126

tṛtīyaṃ lokapālaistu caturthaṃ parikīrtitam /
lakṣaṃ japo daśāṃśena ghṛtena havanaṃ smṛtam //

1.81.127

evaṃ siddhe manau mantrī prayogānapyupācaret /
śrīvṛkṣamūle deveśaṃ dhyāyanvairogiṇaṃ smaran //

1.81.128

spṛṣṭvā japtvāyutaṃ sādhyaṃ smṛtvā vā manasā dvija /
rogiṇāṃ roganirmuktiṃ kuryānmantrī tu maṇḍalāt //

1.81.129

kanyārthī juhuyāllājairbilvaiścāpi dhanāptaye /
vastrārthī gandhakusumairārogyāya tilairhunet //

1.81.130

ravivāre jale sthitvā nābhimātre japettu yaḥ /
aṣṭottarasahasraṃ vai sa jvaraṃ nāśayed dhruvam //

1.81.131

vivāhārthaṃ japenmāsaṃ śaśimaṇḍalamadhyagam /
dhyātvā kṛṣṇaṃ labhetkanyāṃ vāñchitāṃ cāpi nārada //

1.81.132

vasudevapadaṃ procya nigaḍacchedaśabdataḥ /
vāsudevāya varmāstre svāhānto manurīritaḥ //

1.81.133

nārado 'sya ṛṣiśchando gāyatrī kṛṣṇadevatā /
varma bījaṃ śiraḥ śaktiranyatsarvaṃ daśārṇavat //

1.81.134

bālaḥ pavanadīrghaiduyukto jhiṇṭīśayurjalam /
atrirvyāsāya hṛdayaṃ manuraṣṭākṣaro 'vatu //

1.81.135

brāhmānuṣṭup muniśchando devaḥ satyavatīsutaḥ /
ādyaṃ bījaṃ namaḥ śaktidīrghāḍhyo nādināṅgakam //

1.81.136

vyākhyāmudrikayā lasatkaratalaṃ sadyogapīṭhasthitaṃ vāme jānutale dadhānamaparaṃ hastaṃ suvidyānidhim /
vipravrātavṛtaṃ prasannamanasaṃ pāthoruhāṅgadyutiṃ pārāśaryyamatīva puṇyacaritaṃ vyāsaṃ smaretsiddhaye //

1.81.137

japedaṣṭasahasrāṇi pāyasairhemamācaret /
pūrvoktapīṭhe vyāsasya pūrvamaṅgāni pūjayet //

1.81.138

prācyādiṣu yajetpailaṃ vaiśaṃpāyanajaiminī /
sumaṃptuṃ koṇabhāgeṣu śrīśukaṃ romaharṣaṇam //

1.81.139

ugraśravasamanyāṃśca munīnseṃdrādikāyayudhān /
evaṃ siddhamanurmantrī kavitvaṃ śobhanāḥ prajāḥ //

1.81.140

vyākhyānaśaktiṃ kīrtiṃ ca labhate saṃpadāṃ cayam /
nṛsiṃho mādhavo dṛṣṭo lohito nigamādimaḥ //

1.81.141

kṛśānujāyā pañcārṇo manurviṣaharaḥ paraḥ /
anantapaṅktipakṣīndrā muniśchandaḥ surā matāḥ //

1.81.142

tāravahnipriye bījaśaktī mantrasya kīrtite /
jvalajvala mahāmantrī svāhā hṛdayamīritam //

1.81.143

garuḍeti padasyānte cūḍānanaśucipriyā /
śiromantro garuḍataḥ śikhe svāhā śikhā manuḥ //

1.81.144

garuḍeti padaṃ procya prabhañjayayugaṃ vadet /
prabhedayayugaṃ paścādvitrāsaya vimardaya //

1.81.145

pratyekaṃ dvistataḥ svāhā kavacasya manurmataḥ /
ugrarūpadharānte tu sarvaviṣahareti ca //

1.81.146

bhīṣayadvitayaṃ procya sarvaṃ dahadaheti ca /
bhasmīkuru tataḥ svāhā netramantro 'yamīritaḥ //

1.81.147

apratihatavarṇānte balāya prahateti ca /
śāsanānte tathā huṃ phaṭ svāhāstramanurīritaḥ //

1.81.148

pāde kaṭau hṛdi mukhe mūrdhniṃ varṇānpravinyaset //

1.81.149

taptasvarṇanibhaṃ phaṇīndranikaraiḥkḷptāṅga bhūṣaṃprabhuṃ startṛāṇāṃ śamayantamugramakhilaṃ nṝṇāṃ viṣaṃ tatkṣaṇāt /
cañcvagrapracaladbhujaṅgamabhayaṃ pāṇyorvaraṃ bibhrataṃ pakṣoccāritasāmagītamamalaṃ śrīpakṣirājaṃ bhaje //

1.81.150

pañcalakṣaṃ japenmantraṃ daśāṃśaṃ juhuyāttilaiḥ /
pūjayenmātṛkāpīṭhe garuḍaṃ vedavigraham //

1.81.151

caturthyantaḥ pakṣirājaḥ svāhā pīṭhamanuḥ smṛtaḥ /
dṛṣṭvāṅgaṃ karṇikāmadhye nāgānyantreṣu pūjayet //

1.81.152

tadbihirlokapālāṃśca vajrādyairvilasatkarān /
evaṃ siddhamanurmantrī nāśayedgaraladvayam /
dehānte labhate cāpiśrīviṣṇoḥ paramaṃ padam //

1.81.152.p1

iti śrībṛhannāradīyapurāṇe pūrvabhāge bṛhadupākhyāne tṛtīyapāde kṛṣṇādimantrabhedanirūpaṇaṃ nāmaikāśītitamo 'dhyāyaḥ

Linked texts (12)