[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 1.83 # Naradapurana 1.83 Nāradapurāṇa 1.83 - **Language:** Sanskrit ## Contents - [1.83.168](https://indike.org/pramana/in.purana.narada.1.83.168) — 1 part ### [1.83.1](https://indike.org/pramana/in.purana.narada.1.83.1) śrīśaunaka uvāca sādhu sūta mahābhāgaḥ jagaduddhārakārakam / mahātantravidhānaṃ naḥ kumāroktaṃ tvayoditam // ### [1.83.2](https://indike.org/pramana/in.purana.narada.1.83.2) alabhyametattantreṣu purāṇeṣvapi mānada / yadihoditamasmabhyaṃ tvayātikaruṇātmanā // ### [1.83.3](https://indike.org/pramana/in.purana.narada.1.83.3) nārado bhagavānsūta lokoddharaṇatatparaḥ / bhūyaḥ papraccha kiṃ sādho kumāraṃ viduṣāṃ varam // ### [1.83.4](https://indike.org/pramana/in.purana.narada.1.83.4) sūta uvāca śrutvā sa nārado viprāḥ yugmanāmasahasrakam / sanatkumāramapyāha praṇamya jñānināṃ varam // ### [1.83.5](https://indike.org/pramana/in.purana.narada.1.83.5) nārada uvāca brahmaṃstvayā samākhyātā vidhayastantracoditāḥ / tatrāpi kṛṣṇamantrāṇāṃ vaibhavaṃ hyuditaṃ mahat // ### [1.83.6](https://indike.org/pramana/in.purana.narada.1.83.6) yā tatra rādhikādevī sarvādyā samudāhṛtā / tasyā aṃśāvatārāṇāṃ caritaṃ mantrapūrvakam // ### [1.83.7](https://indike.org/pramana/in.purana.narada.1.83.7) tantroktaṃ vada sarvajña tvāmahaṃ śaraṇaṃ gataḥ / śaktestantrāṇyanekāni śivoktāni munīśvara // ### [1.83.8](https://indike.org/pramana/in.purana.narada.1.83.8) yāni tatsāramuddhṛtya sākalyenābhidhehi naḥ / tacchrutvā vacanaṃ tasya nāradasya mahātmanaḥ // ### [1.83.9](https://indike.org/pramana/in.purana.narada.1.83.9) sanatkumāraḥ provāca smṛtvā rādhāpadāṃbujam / sanatkumāra uvāca śṛṇu nārada vakṣyāmi rādhāṃśānāṃ samudbhavam // ### [1.83.10](https://indike.org/pramana/in.purana.narada.1.83.10) śaktīnāṃ paramāścaryaṃ mantrasādhanapūrvakam / yā tu rādhā mayā proktā kṛṣṇārddhāṅgasamudbhavā // ### [1.83.11](https://indike.org/pramana/in.purana.narada.1.83.11) golokavāsinī sā tu nityā kṛṣṇasahāyinī / tejomaṇḍalamadhyasthā dṛśyadṛśyasvarūpiṇī // ### [1.83.12](https://indike.org/pramana/in.purana.narada.1.83.12) kadācittu tayā sārddhaṃ sthitasya munisattama / kṛṣṇasya vāmabhāgāttu jāto nārāyaṇaḥ svayam // ### [1.83.13](https://indike.org/pramana/in.purana.narada.1.83.13) rādhikāyāśca vāmāṅgānmahālakṣmīrbabhūva ha / tataḥ kṛṣṇo mahālakṣmīṃ dattvā nārāyaṇāya ca // ### [1.83.14](https://indike.org/pramana/in.purana.narada.1.83.14) vaikuṇṭhe sthāpayāmāsa śaśvatpālanakarmaṇi / atha golokanāthasya gomnāṃ vivarato mune // ### [1.83.15](https://indike.org/pramana/in.purana.narada.1.83.15) jātuścāsaṃkhyagopālāstejasā vayasā samāḥ / prāṇatulyapriyāḥ sarve babhūvuḥ pārṣadā vibhoḥ // ### [1.83.16](https://indike.org/pramana/in.purana.narada.1.83.16) rādhāṅgalomakūpebhye babhūvurgopakanyakāḥ / rādhātulyāḥ sarvataśca rādhādāsyaḥ priyaṃvadāḥ // ### [1.83.17](https://indike.org/pramana/in.purana.narada.1.83.17) etasminnantare vipra sahasā kṛṣṇadehataḥ / āvirbabhūva sā durgā viṣṇumāyā sanātanī // ### [1.83.18](https://indike.org/pramana/in.purana.narada.1.83.18) devīnāṃ bījarūpāṃ ca mūlaprakṛtirīśvarī / paripūrṇatamā tejaḥ svarūpā triguṇātmikā // ### [1.83.19](https://indike.org/pramana/in.purana.narada.1.83.19) sahasrabhujasaṃyuktā nānāśastrā trilocanā / yā tu saṃsāravṛkṣasya bījarūpā sanātanī // ### [1.83.20](https://indike.org/pramana/in.purana.narada.1.83.20) ratnasiṃhāsanaṃ tasyai pradadau rādhikeśvaraḥ / etasminnantare tatra sastrīkastu caturmukhaḥ // ### [1.83.21](https://indike.org/pramana/in.purana.narada.1.83.21) jñānināṃ pravaraḥ śrīmān pumānoṅkāramuccaran / kamaṇḍaludharo jātastapasvī nābhito hareḥ // ### [1.83.22](https://indike.org/pramana/in.purana.narada.1.83.22) sa tu saṃstūya sarveśaṃ sāvitryā bhāryayā saha / niṣasādāsane ramye vibhostasyājñayā mune // ### [1.83.23](https://indike.org/pramana/in.purana.narada.1.83.23) atha kṛṣṇo mahābhāga dvidhārūpo babhūva ha / vāmārddhāṅgo mahādevo dakṣārddho gopikāpatiḥ // ### [1.83.24](https://indike.org/pramana/in.purana.narada.1.83.24) pañcavaktrastrinetro 'sau vāmārddhāgo munīśvaḥ / stutvā kṛṣṇaṃ samājñapto niṣasāda hareḥ puraḥ // ### [1.83.25](https://indike.org/pramana/in.purana.narada.1.83.25) atha kṛṣṇaścaturvaktraṃ prāha sṛṣṭiṃ kuru prabho / satyaloke sthito nityaṅgaccha māṃsmara sarvadā // ### [1.83.26](https://indike.org/pramana/in.purana.narada.1.83.26) evamuktastu hariṇā praṇamya jagadīśvaram / jagāma bhāryayā sākaṃ sa tu sṛṣṭiṃ karoti vai // ### [1.83.27](https://indike.org/pramana/in.purana.narada.1.83.27) pitāsmākaṃ muniśreṣṭha mānasīṃ kalpadaihikīm / tataḥ paścātpañcavaktraṃ kṛṣṇaṃ prāha mahāmate // ### [1.83.28](https://indike.org/pramana/in.purana.narada.1.83.28) durgāṃ gṛhāṇa viśveśa śivaloke tapaśvara / yāvatsṛṣṭistadante tu lokānsaṃhara sarvataḥ // ### [1.83.29](https://indike.org/pramana/in.purana.narada.1.83.29) so 'pi kṛṣṇaṃ namastṛtya śivalokaṃ jagāma ha / tataḥ kālāntare brahmankṛṣṇasya paramātmanaḥ // ### [1.83.30](https://indike.org/pramana/in.purana.narada.1.83.30) vaktrātsarasvatī jātā bīṇāpustakadhāriṇī / tāmādideśa bhaghagavān vaikuṇṭhaṃ gaccha mānade // ### [1.83.31](https://indike.org/pramana/in.purana.narada.1.83.31) lakṣmīsamīpe tiṣṭha tvaṃ caturbhujasamāśrayā / sāpi kṛṣṇaṃ namaskṛtya gatā nārāyaṇāntikam // ### [1.83.32](https://indike.org/pramana/in.purana.narada.1.83.32) evaṃ pañcavidhā jātā sā rādhā sṛṣṭikāraṇam / āsāṃ pūrṇasvarūpāṇāṃ mantradhyānārcanādikam // ### [1.83.33](https://indike.org/pramana/in.purana.narada.1.83.33) vadāmi śṛṇu vipredraṃ lokānāṃ siddhidāyakam / tāraḥ kriyāyuk pratiśṭhā prītyāḍhyā ca tataḥ param // ### [1.83.34](https://indike.org/pramana/in.purana.narada.1.83.34) jñānāmṛtā kṣudhāyuktā vahnijāyāntakato manuḥ / sutapāstu ṛṣiśchando gāyatrī devatā manoḥ // ### [1.83.35](https://indike.org/pramana/in.purana.narada.1.83.35) rādhikā praṇavo bījaṃ svāhā śaktirudāhṛtā / ṣaḍakṣaraiḥ ṣaḍaṅgāni kuryādvinduvibhūṣitaiḥ // ### [1.83.36](https://indike.org/pramana/in.purana.narada.1.83.36) tato dhyāyansvahṛdaye rādhikāṃ kṛṣṇabhāminīm / śvetacaṃpakavarṇābhāṃ koṭicandrasamaprabhām // ### [1.83.37](https://indike.org/pramana/in.purana.narada.1.83.37) śaratpārvaṇacandrāsyāṃ nīlendīvaralocanām / suśroṇīṃ sunitaṃbāṃ ca pakvabiṃbādharāṃbarām // ### [1.83.38](https://indike.org/pramana/in.purana.narada.1.83.38) muktākundābhadaśanāṃ vahniśuddhāṃśukānvitām / ratnakeyūravalayahārakuṇḍalaśobhitām // ### [1.83.39](https://indike.org/pramana/in.purana.narada.1.83.39) gopībhiḥ supriyābhiśca sevitāṃ śvetacāmaraiḥ / rāsamaṇḍalamadhyasthāṃ ratnasiṃhāsanasthitām // ### [1.83.40](https://indike.org/pramana/in.purana.narada.1.83.40) dhyātvā puṣpāñjaliṃ kṣiptvā pūjayedupacārakaiḥ / lakṣaṣaṭkaṃ japenmantraṃ taddaśāṃśaṃ hunettilaiḥ // ### [1.83.41](https://indike.org/pramana/in.purana.narada.1.83.41) ājyāktairmātṛkāpīṭhe pūjā cāvaraṇaiḥ saha / ṣaṭkoṇeṣu ṣaḍaṅgāni tadbāhye 'ṣṭadale yajet // ### [1.83.42](https://indike.org/pramana/in.purana.narada.1.83.42) mālāvatīṃ mādhavīṃ ca ratnamālāṃ suśīlikām / tataḥ śaśikalāṃ pārijātāṃ padmāvatīṃ tathā // ### [1.83.43](https://indike.org/pramana/in.purana.narada.1.83.43) suṃdarīṃ ca kramātprācyāṃ digvidikṣu tato bahiḥ / indrādyānsāyudhāniṣṭvā viniyogāṃstu sādhayet // ### [1.83.44](https://indike.org/pramana/in.purana.narada.1.83.44) rādhā kṛṣṇapriyā rāseśvarī gopīgaṇādhipā / nirguṇā kṛṣṇapūjyā ca mūlaprakṛtirīśvarī // ### [1.83.45](https://indike.org/pramana/in.purana.narada.1.83.45) sarveśvarī sarvapūjyā vairājajananī tathā / pūrvādyāśāsu rakṣantu pāntu māṃ sarvataḥ sadā // ### [1.83.46](https://indike.org/pramana/in.purana.narada.1.83.46) tvaṃ devi jagatāṃ mātā viṣṇumāyā sanātanī / kṛṣṇamāyādidevī ca kṛṣṇaprāṇādhike śubhe // ### [1.83.47](https://indike.org/pramana/in.purana.narada.1.83.47) kaṣṇabhaktiprade rādhe namaste maṅgalaprade / iti samprārthya sarveśīṃ stutvā hṛdi visarjayet // ### [1.83.48](https://indike.org/pramana/in.purana.narada.1.83.48) evaṃ yo bhajate rādhāṃ sarvādyāṃ sarvamaṅgalām / bhuktveha bhogānakhilānso 'nte golokamāpnuyāt // ### [1.83.49](https://indike.org/pramana/in.purana.narada.1.83.49) atha tubhyaṃ mahālakṣmyā vidhānaṃ vacmi nārada / yadārādhanato bhūyātsādhako bhuktimuktimān // ### [1.83.50](https://indike.org/pramana/in.purana.narada.1.83.50) lakṣmīmāyākāmavāṇīpūrvā kamalavāsinī / ṅeṃtā vahnipriyānto 'yaṃ mantrakalpadrumaḥ paraḥ // ### [1.83.51](https://indike.org/pramana/in.purana.narada.1.83.51) ṛṣirnārāyaṇaścāsya chando hi jagatī tathā / devatā tu mahālakṣmīrdvidvivarṇaiḥ ṣaḍaṅgakam // ### [1.83.52](https://indike.org/pramana/in.purana.narada.1.83.52) śvetacaṃpakavarṇābhāṃ ratnabhūṣaṇabhūṣitām / īṣaddhāsyaprasannāsyāṃ bhaktānugrahakātarām // ### [1.83.53](https://indike.org/pramana/in.purana.narada.1.83.53) bibhratīṃ ratnamālāṃ ca koṭicandrasamaprabhām / dhyātvā japedarkalakṣaṃ pāyasena daśāṃśataḥ // ### [1.83.54](https://indike.org/pramana/in.purana.narada.1.83.54) juhuyādedhite vahnau śrīdṛkāṣṭaiḥ samarcayet / navaśaktiyute pīṭhe hyaṅgai rāvaraṇaiḥ saha // ### [1.83.55](https://indike.org/pramana/in.purana.narada.1.83.55) vibhūtirunnatiḥ kāntiḥ sṛṣṭiḥ kīrtiśca sannatiḥ / vyāṣṭirutkṛṣṭirṛddhiśca saṃproktā nava śaktayaḥ // ### [1.83.56](https://indike.org/pramana/in.purana.narada.1.83.56) atrāvāhya ca mūlena mūrtiṃ saṃkalpya sādhakaḥ / ṣaṭ koṇeṣu ṣaḍaṅgāni dakṣiṇe tu gajānanam // ### [1.83.57](https://indike.org/pramana/in.purana.narada.1.83.57) vāme kusumadhanvānaṃ vasupatre tato yajet / umāṃ śrīṃ bhāratīṃ durgāṃ dharaṇīṃ vedamātaram // ### [1.83.58](https://indike.org/pramana/in.purana.narada.1.83.58) devīmuṣāṃ ca pūrvādau digvidikṣu krameṇa hi / jahnusūryasute pūjye pādaprakṣālanodyate // ### [1.83.59](https://indike.org/pramana/in.purana.narada.1.83.59) śaṅkhapadmanidhī pūjyau pārśvayorghṛtacāmarau / dhṛtātapatraṃ varuṇaṃ pūjayetpaścime tataḥ // ### [1.83.60](https://indike.org/pramana/in.purana.narada.1.83.60) saṃpūjya rāśīnparito yathāsthānaṃ navagrahān / caturdantairāvatādīn digvidikṣu tator'cayet // ### [1.83.61](https://indike.org/pramana/in.purana.narada.1.83.61) tadbahirlokapālāṃśca tadastrāṇi ca tadbahiḥ / dūrvābhirājyasiktābhirjuhuyādāyuṣe naraḥ // ### [1.83.62](https://indike.org/pramana/in.purana.narada.1.83.62) guḍūcīmājyasaṃsiktāṃ juhuyātsaptavāsaram / aṣaaṭottarasahasraṃ yaḥ sa jīveccharadāṃ śatam // ### [1.83.63](https://indike.org/pramana/in.purana.narada.1.83.63) hutvā tilānghṛtābhyaktāndīrghamāyuṣyamāpnuyāt / ārabhyārkadinaṃ mantrī daśāhaṃ ghṛtasaṃplutaḥ // ### [1.83.64](https://indike.org/pramana/in.purana.narada.1.83.64) juhuyādarkasamidhaḥ śarīrārogyasiddhaye / śālibhirjuhvato nityamaṣṭottarasahasrakam // ### [1.83.65](https://indike.org/pramana/in.purana.narada.1.83.65) acirādeva mahatī lakṣmī saṃjāyate dhruvam / uṣājā jīnālikerarajobhirgṛtamiśritaiḥ // ### [1.83.66](https://indike.org/pramana/in.purana.narada.1.83.66) hunedaṣṭottaraśataṃ pāyasāśī tu nityaśaḥ / maṇḍalājjāyate so 'pi kubera iva mānavaḥ // ### [1.83.67](https://indike.org/pramana/in.purana.narada.1.83.67) haviṣā guḍamiśreṇa homato hyannavānbhavet / japāpuṣpāṇi juhuyādaṣṭottarasahasrakam // ### [1.83.68](https://indike.org/pramana/in.purana.narada.1.83.68) tāṃbūlarasasaṃmiśraṃ tadbhasmatilakaṃ caret / caturṇāmapi varṇānāṃ mohanāya dvijottamaḥ // ### [1.83.69](https://indike.org/pramana/in.purana.narada.1.83.69) evaṃ yo bhajate lakṣmīṃ sādhakendro munīśvara / sampadastasya jāyante mahālakṣmīḥ prasīdati // ### [1.83.70](https://indike.org/pramana/in.purana.narada.1.83.70) dehānte vaiṣṇavaṃ dhāma labhate nātra saṃśayaḥ / yā tu durgā dvijaśreṣṭha śivalokaṃ gatā satī // ### [1.83.71](https://indike.org/pramana/in.purana.narada.1.83.71) sā śivājñāmanuprāpya divyalokaṃ vinirmame / devīloketi vikhyātaṃ sarvalokavilakṣaṇam // ### [1.83.72](https://indike.org/pramana/in.purana.narada.1.83.72) tatra sthitā jaganmātā taponiyamamāsthitā / vividhān svāvatārānhi trikāle kurute 'niśam // ### [1.83.73](https://indike.org/pramana/in.purana.narada.1.83.73) māyādhikā hlādinīyuk candrāḍhyā sargiṇī punaḥ / pratiṣṭhā smṛtisaṃyuktā kṣudhayā sahitā punaḥ // ### [1.83.74](https://indike.org/pramana/in.purana.narada.1.83.74) jñānāmṛtā vahnijāyāntastārādyo manurmataḥ / ṛṣiḥ syādvāmadevo 'sya chando gāyatramīritam // ### [1.83.75](https://indike.org/pramana/in.purana.narada.1.83.75) devatā jagatāmādirdurgā durgatināśinī / tārādyekaikavarṇena hṛdayāditrayaṃ matam // ### [1.83.76](https://indike.org/pramana/in.purana.narada.1.83.76) tribhirvarmekṣaṇa dvābhyāṃ sarvairastramudīritam / mahāmarakataprakhyāṃ sahasrabhujamaṇḍitām // ### [1.83.77](https://indike.org/pramana/in.purana.narada.1.83.77) nānāśastrāṇi dadhatīṃ trinetrāṃ śaśiśekharām / kaṅkaṇāṅgadahārāḍhyāṃ kvaṇannūpurakānvitām // ### [1.83.78](https://indike.org/pramana/in.purana.narada.1.83.78) kirīṭakuṇḍaladharāṃ durgāṃ devīṃ vicintayet // ### [1.83.79](https://indike.org/pramana/in.purana.narada.1.83.79) vasulakṣaṃ japenmantraṃ tilaiḥ samadhurairhuneta / payoṃ'dhasā vā sahasraṃ navapadmātmake yajet // ### [1.83.80](https://indike.org/pramana/in.purana.narada.1.83.80) prabhā māyā jayā sūkṣmā viśuddhānaṃ dinī punaḥ / suprabhā vijayā sarvasiddhidā pīṭhaśaktayaḥ // ### [1.83.81](https://indike.org/pramana/in.purana.narada.1.83.81) adbhirhrasvatrayaklībarahitaiḥ pūjaye dimāḥ / praṇavo vajranakhadaṃṣṭrāyudhāya mahāpadāt // ### [1.83.82](https://indike.org/pramana/in.purana.narada.1.83.82) siṃhāya varmāstraṃ hṛñca proktaḥ siṃhamanurmune / dadyādāsanametena mūrtiṃ mūlena kalpayet // ### [1.83.83](https://indike.org/pramana/in.purana.narada.1.83.83) aṅgāvṛrttiṃ purābhyārcya śaktīḥ patreṣu pūjayet / jayā ca vijayā kīrtiḥ prītiḥ paścātprabhā punaḥ // ### [1.83.84](https://indike.org/pramana/in.purana.narada.1.83.84) śraddhā medhā śrutiścaivasvanāmādyakṣarādikāḥ / patrāgreṣvarcayedaṣṭāvāyudhāni yathākramāt // ### [1.83.85](https://indike.org/pramana/in.purana.narada.1.83.85) śaṅkhacakragadākhaḍgapāśāṅkuśaśarāndhanuḥ / lokeśvarāṃstato bāhye teṣāmastrāṇyanantaram // ### [1.83.86](https://indike.org/pramana/in.purana.narada.1.83.86) itthaṃ japādibhirmantrī mantre siddhe vidhānavit / kuryātprayogānamunā yathā svasvamanīṣitān // ### [1.83.87](https://indike.org/pramana/in.purana.narada.1.83.87) pratiṣṭhāpya vidhānena kalaśānnavaśobhanān / ratnahemādisaṃyuktānghaṭeṣu navasu sthitān // ### [1.83.88](https://indike.org/pramana/in.purana.narada.1.83.88) madhyasthe pūjayeddevīmitareṣu jayādikāḥ / saṃpūjya gandhapuṣpādyairabhiṣiñcennarādhipam // ### [1.83.89](https://indike.org/pramana/in.purana.narada.1.83.89) rājā vijayate śatrūnyo 'dhiko vijayaśriyam / prāpnotrogo dīrghāyuḥ sarvavyādhivivarjitaḥ // ### [1.83.90](https://indike.org/pramana/in.purana.narada.1.83.90) vandhyābhiṣiktā vidhinālabhate tanayaṃ varam / mantreṇānena saṃjaptamājyaṃ kṣudragrahāpaham // ### [1.83.91](https://indike.org/pramana/in.purana.narada.1.83.91) garbhiṇīnāṃ viśeṣeṇa japtaṃ bhasmādikaṃ tathā / jṛṃbhaśvāse tu kṛṣṇasya praviṣṭerādhikāmukham // ### [1.83.92](https://indike.org/pramana/in.purana.narada.1.83.92) yā tu devī samudbhūtā vīṇāpustakadhāriṇī / tasyā vidhānaṃ viprendra śṛṇu lokopakārakam // ### [1.83.93](https://indike.org/pramana/in.purana.narada.1.83.93) praṇavo vāgbhavaṃ māyā śrīḥ kāmaḥ śaktirīritā / sarasvatī caturthyantā svāhānto dvādaśākṣaraḥ // ### [1.83.94](https://indike.org/pramana/in.purana.narada.1.83.94) manurnārāyaṇa ṛṣirvirāṭ chandaḥ samīritam / mahāsarasvatī cāsya devatā parikīrtitā // ### [1.83.95](https://indike.org/pramana/in.purana.narada.1.83.95) vāgbhavena ṣaḍaṅgāni kṛtvā varṇānnyased budhaḥ / brahmarandhre nyasettāraṃ lajjāṃ bhrūmadhyagāṃ nyaset // ### [1.83.96](https://indike.org/pramana/in.purana.narada.1.83.96) mukhanāsādikarṇeṣu gudeṣu śrīmukhārṇakān / tato vāgdevatāṃ dhyāyedvīṇāpustakadhāriṇīm // ### [1.83.97](https://indike.org/pramana/in.purana.narada.1.83.97) karpūrakundadhavalāṃ pūrṇacandrojjvalānanām / haṃsādhirūḍhāṃ bhālendudivyālaṅkāraśobhitām // ### [1.83.98](https://indike.org/pramana/in.purana.narada.1.83.98) japeddvādaśalakṣāṇi tatsahasraṃ sitāṃbujaiḥ / nāgacaṃpakapuṣpairvā juhuyātsādhakottamaḥ // ### [1.83.99](https://indike.org/pramana/in.purana.narada.1.83.99) mātṛkokte yajetpīṭhe vakṣyamāṇakrameṇa tām / varṇābjenāsanaṃ dadyānmūrtiṃ mūlena kalpayet // ### [1.83.100](https://indike.org/pramana/in.purana.narada.1.83.100) devyā dakṣiṇataḥ pūjyā saṃskṛtā vāṅmayī śubhā / prākṛtā vāmataḥ pūjyā vāṅmayīsarvasiddhidā // ### [1.83.101](https://indike.org/pramana/in.purana.narada.1.83.101) pūrvamaṅgāni ṣaṭkoṇe prajñādyāḥ prayajedbahiḥ / prajñā medhā śrutiḥ śaktiḥ smṛtirvāgīśvarī matiḥ // ### [1.83.102](https://indike.org/pramana/in.purana.narada.1.83.102) svastiśceti samākhyātā brahmādyāstadanantaram / lokeśānarcayedbhūyastadastrāṇi ca tadbahiḥ // ### [1.83.103](https://indike.org/pramana/in.purana.narada.1.83.103) evaṃ saṃpūjya vāgdevīṃ sākṣādvāgvallabho bhavet / brahmacaryarataḥ śuddhaḥ śuddhadantanakhā dikaḥ // ### [1.83.104](https://indike.org/pramana/in.purana.narada.1.83.104) saṃsmaran sarvavanitāḥ satataṃ devatādhiyā / kavitvaṃ labhate dhīmān māsairdvādaśabhirdhruvam // ### [1.83.105](https://indike.org/pramana/in.purana.narada.1.83.105) pītvā tanmantritaṃ toyaṃ sahasraṃ pratyahaṃ mune / mahākavirbhavenmantrī vatsareṇa na saṃśayaḥ // ### [1.83.106](https://indike.org/pramana/in.purana.narada.1.83.106) uromātrodake sthitvā dhyāyanmārtaṇḍamaṇḍale / sthitāṃ devīṃ pratidinaṃ trisahasraṃ japenmanum // ### [1.83.107](https://indike.org/pramana/in.purana.narada.1.83.107) labhate maṇḍalātsiddhiṃ vācāmapratimāṃ bhuvi / pālāśabilvakusumairjuhuyānmadhurokṣitaiḥ // ### [1.83.108](https://indike.org/pramana/in.purana.narada.1.83.108) samidbhirvā tadutthābhiryaśaḥ prāpnoti vākpateḥ / rājavṛkṣasamudbhūtaiḥ prasūnairmadhurāplutaiḥ // ### [1.83.109](https://indike.org/pramana/in.purana.narada.1.83.109) satsamidbhiśca juhuyātkavitvamatulaṃ labhet / atha pravakṣye viprendra sāvitrīṃ brahmaṇaḥ priyām // ### [1.83.110](https://indike.org/pramana/in.purana.narada.1.83.110) yāṃ samārādhya sasṛje brahmā lokāṃścarācarān / lakṣmī māyā kāmapūrvā sāvitrī ṅesamanvitā // ### [1.83.111](https://indike.org/pramana/in.purana.narada.1.83.111) svāhānto manurākhyātaḥ sāvitryā vasuvarṇavān / ṛṣirbrahmāsya gāyatrī chandaḥ proktaṃ ca devatā // ### [1.83.112](https://indike.org/pramana/in.purana.narada.1.83.112) sāvitrī sarvadevānāṃ sāvitrī parikīrtitā / hṛdantikairbrahma viṣṇurudreśvarasadāśivaiḥ // ### [1.83.113](https://indike.org/pramana/in.purana.narada.1.83.113) sarvātmanā ca ṅeyuktairaṅgānāṃ kalpanaṃ matam / taptakāñcanavarṇābhāṃ jvalantīṃ brahmatejasā // ### [1.83.114](https://indike.org/pramana/in.purana.narada.1.83.114) grīṣmamadhyāhnamārtaṇḍasahasrasamavigrahām / īṣaddhāsyaprasannāsyāṃ ratnabhūṣaṇabhūṣitām // ### [1.83.115](https://indike.org/pramana/in.purana.narada.1.83.115) bahniśuddhāṃśukādhānāṃ bhaktānugrahakātarām / sukhadāṃ muktidāṃ caiva sarvasaṃpatpradāṃ śivām // ### [1.83.116](https://indike.org/pramana/in.purana.narada.1.83.116) vedabījasvarūpāṃ ca dhyāyedvedaprasūṃ satīm / dhyātvaivaṃ maṇḍale vidvān trikoṇojjvalakarṇike // ### [1.83.117](https://indike.org/pramana/in.purana.narada.1.83.117) saure pīṭhe yajeddevīṃ dīptādinavaśaktibhiḥ / mūlamantreṇa kḷptāyāṃ mūrtauṃ devīṃ prapūjayet // ### [1.83.118](https://indike.org/pramana/in.purana.narada.1.83.118) koṇeṣu triṣu saṃpūjyā brāhṛyādyāḥ śaktayo bahiḥ / ādityādyāstataḥ pūjyā uṣādisahitāḥ kramāt // ### [1.83.119](https://indike.org/pramana/in.purana.narada.1.83.119) tatataḥ ṣaḍaṅgānyabhyarcya kesareṣu yathāvidhi / prahlādinīṃ prabhāṃ paścānnityāṃ viśvaṃbharāṃ punaḥ // ### [1.83.120](https://indike.org/pramana/in.purana.narada.1.83.120) vilāsinīprabhāvatyau jayāṃ śāntāṃ yajetpunaḥ / kāntiṃ durgāsarasvatyau vidyārūpāṃ tataḥ param // ### [1.83.121](https://indike.org/pramana/in.purana.narada.1.83.121) viśālasaṃjñitāmīśāṃ vyāpinīṃ vimalāṃ yajet / tamopahāriṇīṃ sūkṣmāṃ viśvayoniṃ jayāvahām // ### [1.83.122](https://indike.org/pramana/in.purana.narada.1.83.122) padnālayāṃ parāṃ śobhāṃ brahmarūpāṃ tator'cayet / brāhmyādyāḥ śāraṇā bāhye pūjayetproktalakṣaṇāḥ // ### [1.83.123](https://indike.org/pramana/in.purana.narada.1.83.123) tato 'bhyarcyed grahānbāhye śakrādyānayudhaiḥ saha / itthamāvaraṇairdevīḥ daśabhiḥ paripūjayet // ### [1.83.124](https://indike.org/pramana/in.purana.narada.1.83.124) aṣṭalakṣaṃ japenmantraṃ tatsahasraṃ hunettilaiḥ / sarvapāpuvinirmukto dīrghamāyuḥ sa vindati // ### [1.83.125](https://indike.org/pramana/in.purana.narada.1.83.125) aruṇābjaistrimadhvaktairjuhuyādayutaṃ tataḥ / mahālakṣmīrbhavettasya ṣaṇmāsānnātra saṃśayaḥ // ### [1.83.126](https://indike.org/pramana/in.purana.narada.1.83.126) brahmavṛkṣaprasūnaistu juhuyādbāhyatejase / bahunā kimihoktena yathāvatsādhitā satī // ### [1.83.127](https://indike.org/pramana/in.purana.narada.1.83.127) sādhakānāmiyaṃ vidyā bhavetkāmadudhā mune / atha te saṃpravakṣyāmi rahasyaṃ paramādbhutam // ### [1.83.128](https://indike.org/pramana/in.purana.narada.1.83.128) sāvitrīpañjaraṃ nāma sarvarakṣākaraṃ nṛṇām / vyomakeśārlakāsaktāṃ sukirīṭavirājitām // ### [1.83.129](https://indike.org/pramana/in.purana.narada.1.83.129) meghabhrukuṭilākrāntāṃ vidhiviṣṇuśivānanām / gurubhārgavakarṇāntāṃ somasūryāgnilocanām // ### [1.83.130](https://indike.org/pramana/in.purana.narada.1.83.130) iḍāpiṅgalikāsūkṣmāvāyunāsāpuṭānvitām / saṃdhyādvijoṣṭhapuṭitāṃ lasadvāgupajihvikām // ### [1.83.131](https://indike.org/pramana/in.purana.narada.1.83.131) saṃdhyāsūryamaṇigrīvāṃ marudbāhusamanvitān / parjanyadṛdayāsaktāṃ vasvākhyapratimaṇḍalām // ### [1.83.132](https://indike.org/pramana/in.purana.narada.1.83.132) ākāśodaravibhrāntāṃ nābhyavāntaravīthikām / prajāpatyākhyajaghanāṃ kaṭīndrāṇīsamāśritām // ### [1.83.133](https://indike.org/pramana/in.purana.narada.1.83.133) ūrvormalayamerubhyāṃ śobhamānāṃ saridvarām / sujānujahukuśikāṃ vaiśvadevākhyasaṃjñikām // ### [1.83.134](https://indike.org/pramana/in.purana.narada.1.83.134) pādāṅghrinakhalomākhyabhūnāgadrumalakṣitām / graharāśyarkṣayogādimūrtāvayavasaṃjñikām // ### [1.83.135](https://indike.org/pramana/in.purana.narada.1.83.135) tithimāsartupakṣākhyaiḥ saṃketanimiṣātmikām / māyākalpitavaicitryasaṃdhyākhyacchadanāvṛtām // ### [1.83.136](https://indike.org/pramana/in.purana.narada.1.83.136) jvalatkālānalaprakhyoṃ taḍitkīṭisamaprabhām / koṭisūryapratīkāśāṃ śaśikoṭisuśītalām // ### [1.83.137](https://indike.org/pramana/in.purana.narada.1.83.137) sudhāmaṇḍalamadhyasthāṃ sāṃdrānandāmṛtātmikām / vāgatītāṃ mano 'garmyā varadāṃ vedamātaram // ### [1.83.138](https://indike.org/pramana/in.purana.narada.1.83.138) carācaramayīṃ nityāṃ brahmākṣarasamanvitām / dhyātvā svātmāvibhedena sāvitrīpañjaraṃ nyaset // ### [1.83.139](https://indike.org/pramana/in.purana.narada.1.83.139) pañcarasya ṛṣiḥ so 'haṃ chaṃndo vikṛtirucyate / devatā ca paro haṃsaḥ parabrahmādidevatā // ### [1.83.140](https://indike.org/pramana/in.purana.narada.1.83.140) dharmārthakāmamokṣāptyai viniyoga udāhṛtaḥ / ṣaḍaṅgadevatāmantrairaṅganyāsaṃ samācaret // ### [1.83.141](https://indike.org/pramana/in.purana.narada.1.83.141) tridhāmūlena medhāvī vyāpakaṃ hi samācaret / pūrvoktāṃ devātāṃ dhyāyetsākārāṃ guṇasaṃyutām // ### [1.83.142](https://indike.org/pramana/in.purana.narada.1.83.142) tripadā harijā pūrvamukhī brahmāstrasaṃjñikā / caturviśatitattvāḍhyā pātu prācīṃ diśaṃ mama // ### [1.83.143](https://indike.org/pramana/in.purana.narada.1.83.143) catuṣpadā brahmadaṇḍā brahmāṇī dakṣiṇānanā / ṣaḍviṃśatattvasaṃyuktā pātu me dakṣiṇāṃ diśam // ### [1.83.144](https://indike.org/pramana/in.purana.narada.1.83.144) pratyaṅmukhī pañcapadī pañcāśattattvarūpiṇī / pātu pratīcīmaniśaṃ mama brahmaśirāeṅkitā // ### [1.83.145](https://indike.org/pramana/in.purana.narada.1.83.145) saumyāsyā brahmaturyāḍhyā sātharvāṅgirasātmikā / udīcīṃ ṣaṭpadā pātu ṣaṣṭitattvakalātmikā // ### [1.83.146](https://indike.org/pramana/in.purana.narada.1.83.146) pañcāśadvarṇaracitā navapādā śatākṣarī / vyomā saṃpātu me vorddhvaśiro vedāntasaṃsthitā // ### [1.83.147](https://indike.org/pramana/in.purana.narada.1.83.147) vidyunnibhā brahmasandhyā mṛgārūḍhā caturbhujā / cāpeṣucarmāsidharā pātu me pāvakīṃ diśam // ### [1.83.148](https://indike.org/pramana/in.purana.narada.1.83.148) brahmī kumārī gāyatrī raktāṅgī haṃsavāhinī / bibhratkamaṇḍaluṃ cākṣaṃ sruvasruvau pātu nairṛtim // ### [1.83.149](https://indike.org/pramana/in.purana.narada.1.83.149) śuklavarṇā ca sāvitrī yuvatī vṛṣavāhanā / kapālaśūlakākṣasragdhāriṇī pātu vāyavīm // ### [1.83.150](https://indike.org/pramana/in.purana.narada.1.83.150) śyāmā sarasvatī vṛddhā vaiṣṇavī garuḍāsanā / śaṅkhacakrābhayakarā pātu śaivīṃ diśaṃ mama // ### [1.83.151](https://indike.org/pramana/in.purana.narada.1.83.151) caturbhujā devamātā gaurāṅgī siṃhavāhanā / varābhayakhaḍgacarmabhujā pātvadharāṃ diśam // ### [1.83.152](https://indike.org/pramana/in.purana.narada.1.83.152) tattatpārśve sthitāḥ svasvavāhanāyudhabhūṣaṇāḥ / svasvadikṣusthitāḥ pātuṃ grahaśaktyaṅgasaṃyutāḥ // ### [1.83.153](https://indike.org/pramana/in.purana.narada.1.83.153) mantrādhidevatārūpā mudrādhiṣṭhātṛdevatāḥ / vyāpakatvena pāntvasmānāpādatalamastakam // ### [1.83.154](https://indike.org/pramana/in.purana.narada.1.83.154) idaṃ te kathitaṃ satyaṃ sāvitrīpañjaraṃ mayā / saṃdhyayoḥ pratyahaṃ bhaktyā japakāle viśeṣataḥ // ### [1.83.155](https://indike.org/pramana/in.purana.narada.1.83.155) paṭhanīyaṃ prayatnena bhuktiṃ muktiṃ samicchatā / bhūtidā bhuvanā vāṇī mahāvasumatī mahī // ### [1.83.156](https://indike.org/pramana/in.purana.narada.1.83.156) hiraṇyajananī nandā savisargā tapasvinī / yaśasvinī satī satyā vedaviccinmayī śubhā // ### [1.83.157](https://indike.org/pramana/in.purana.narada.1.83.157) viśvā turyā vareṇyā ca nisṛṇī yamunā bhuvā / modā devī variṣṭhā ca dhīśca śāntirmatī mahī // ### [1.83.158](https://indike.org/pramana/in.purana.narada.1.83.158) dhiṣaṇā yoginī yuktā nadī prajñāpracodanī / dayā ca yāminī padmā rohiṇī ramaṇī jayā // ### [1.83.159](https://indike.org/pramana/in.purana.narada.1.83.159) senāmukhī sāmamayī bagalā doṣavārjitā / māyā prajñā parā dogdhrī māninī poṣiṇī kriyā // ### [1.83.160](https://indike.org/pramana/in.purana.narada.1.83.160) jyotsnā tīrthamayī ramyā saumyāmṛtamayā tathā / brāhmī haimī bhujaṅgī ca vaśinī suṃdarī vanī // ### [1.83.161](https://indike.org/pramana/in.purana.narada.1.83.161) oṅkārahasinī sarvā sudhā sā ṣaḍguṇāvatī / māyā svadhā ramā tanvī ripughnī rakṣaṇaṇī satī // ### [1.83.162](https://indike.org/pramana/in.purana.narada.1.83.162) haimī tārā vidhugatirviṣaghnī ca varānanā / amarā tīrthadā dīkṣā durdharṣā rogahāriṇī // ### [1.83.163](https://indike.org/pramana/in.purana.narada.1.83.163) nānāpāpanṛśaṃsaghnī ṣaṭpadī vajriṇī raṇī / yoginī vamalā satyā abalā baladā jayā // ### [1.83.164](https://indike.org/pramana/in.purana.narada.1.83.164) gomatī jāhnavī rajāvī tapanī jātavedasā / acirā vṛṣṭidā jñeyā ṛtatantrā ṛtātmikā // ### [1.83.165](https://indike.org/pramana/in.purana.narada.1.83.165) sarvakāmadudhā saumyā bhavāhṝṅkāravarjitā / dvipadā yā catuṣpadā tripadā yā ca ṣaṭpadā // ### [1.83.166](https://indike.org/pramana/in.purana.narada.1.83.166) aṣṭāpadī navapadī sahasrākṣākṣarātmikā / aṣṭottaraśataṃ nāmnāṃ sāvitryā yaḥ paṭhennaraḥ // ### [1.83.167](https://indike.org/pramana/in.purana.narada.1.83.167) sa cirāyuḥ sukhī putrī vijayī vinayī bhavet / etatte kathitaṃ vipra pañcaprakṛtilakṣaṇam // ### [1.83.168](https://indike.org/pramana/in.purana.narada.1.83.168) mantrārādhanapūrvaṃ ca viśvakāmaprapūraṇam // ### [1.83.168.p1](https://indike.org/pramana/in.purana.narada.1.83.168.p1) iti śrībṛhannāradīya purāṇe pūrvabhāge bṛhadupākhyāne tṛtīyapāde pañcaprakṛtimantrādinirūpaṇaṃ nāma tryaśītitamo 'dhyāyaḥ ## Linked texts (7) - [Devībhāgavatapurāṇa](https://indike.org/pramana/in.purana.upa.sakta.devibhagavata.9.2.61) — Sanskrit - [Brahmavaivartapurāṇa](https://indike.org/pramana/in.purana.brahmavaivarta.2.2.128) — Vyāsa, Sanskrit - [Tantracintāmaṇi](https://indike.org/pramana/in.sampradaya.saiva.trika.krama.tantracintamani.28.221) — Sanskrit - [Kālikāpurāṇa](https://indike.org/pramana/in.purana.upa.sakta.kalika.3.6398) — Sanskrit - [Viśvasāratantra](https://indike.org/pramana/in.sampradaya.general.sakta.visvasaratantra.8.57) — Sanskrit - [Mantrakośa](https://indike.org/pramana/in.sampradaya.general.mantrakosa.mantrakosa.14.22) — Āśādityatripāṭhin, Sanskrit - [Rāmārcanacandrikā (Ānandavanayati) (ed1925)](https://indike.org/pramana/in.niti.dharma.pratistha.vaisnava.ramarcanacandrika-anandavanayati*ed1925.6.1.4) — Sanskrit --- Source: [https://indike.org/pramana/in.purana.narada.1.83](https://indike.org/pramana/in.purana.narada.1.83) · Pramāṇa