Pramāṇa · Search · About · API

Naradapurana 1.84

Nāradapurāṇa 1.84

Language
Sanskrit

Contents

1.84.1

sanatkumāra uvāca
kalikalpāntare brahman brahmaṇo 'vyaktajanmanaḥ /
lokapadme tapasthasya sṛṣṭyarthaṃ saṃbabhūvatuḥ //

1.84.2

viṣṇukarṇamalodbhūtāvasurau madhukaiṭabhau /
tau jātamātrau payasi lokapralayalakṣaṇe //

1.84.3

jānumātre sthitau dṛṣṭvā brahmaṇaṃ kamalasthitam /
pravṛttāvattumālakṣya tuṣṭāva jagadaṃbikām //

1.84.4

tato devī jagatkartrī śaivī śaktiranuttamā /
nārāyaṇākṣisaṃsthānā nidrā prītā babhūva ha //

1.84.5

tasyā mantrādikaṃ sarvaṃ kathayiṣyāmi tacchṛṇu /
sāruṇā krodhanī śāntiścandrālaṅkṛtaśekharā //

1.84.6

ekākṣarībīja mantraṛṣiḥ śaktirudāhṛtā /
gāyatrī ca bhavecchando devatā bhuvaneśvarī //

1.84.7

ṣaḍdirghayuktabījena kuryādaṅgāni ṣaṭ kramāt /
saṃhārasṛṣṭimārgeṇa mātṛkānyastavigrahaḥ //

1.84.8

mantranyāsaṃ tataḥ kuryāddevatābhāvasiddhaye /
hṛllekhāṃ mūrdhni vadane gaganāṃ hṛdayāṃbuje //

1.84.9

raktāṃ karālikāṃ guhye mahocchuṣmāṃ padadvaye /
ūrddhvaprāgdakṣiṇodīcyapaścimeṣūttare 'pi ca //

1.84.10

sadyādihrasvabījādyānvastavyā bhūtasaprabhāḥ /
aṅgāni vinyasetpaścājjātiyuktāni ṣaṭ kramāt //

1.84.11

brahmāṇaṃ vinyasedbhāle gāyatryā saha saṃyutam /
sāvitryā sahitaṃ viṣṇuṃ kapole dakṣiṇe nyaset //

1.84.12

vāgīśvaryā samāyuktaṃ vāmagaṇḍe maheśvaram /
śriyā dhanapatiṃ nyasya vāmakarṇāgrake punaḥ //

1.84.13

ratyā smaraṃ mukhe nyasya puṇyāgaṇapatiṃ nyaset /
savyakarṇopari nidhākarṇagaṇḍāntarālayoḥ //

1.84.14

nyastavyaṃ vadane mūlaṃ bhūpaścaitrāṃstato nyaset /
kaṇṭhamūle stanadvandve vāmāṃse hṛdayāṃbuje //

1.84.15

savyāṃse pārśvayugale nābhideśe ca deśikaḥ /
bhālāṃśca pārśvajaṭhare pārśvāṃsāparake hṛdi //

1.84.16

brahmāṇyādyāstanau nyasya vidhinā proktalakṣaṇāḥ /
mūlena vyāpakaṃ dehe nyasya devīṃ vicintayet //

1.84.17

udyaddivākaranibhāṃ tuṅgorojāṃ trilocanām / /
smarāsyāmindumukuṭāṃ varapāśāṅkuśābhayām //

1.84.18

radalakṣaṃ japenmantraṃ trimadhvaktairhunettataḥ /
aṣṭadravyairdaśāṃśena brahmavṛkṣasamidvaraiḥ //

1.84.19

drākṣākharjūravātādaśarkarānālikerakam /
tandulājyatilaṃ vipra dravyāṣṭakamudāhṛtam //

1.84.20

dadyādardhyaṃ dineśāya tatra saṃcintya pārvatīm /
padmamaṣṭadalaṃ bāhye vṛttaṃ ṣoḍaśabhirddalaiḥ //

1.84.21

vilikhetkaṇiṅkrāmadhyeṣaḍkoṇamatisundaram /
tataḥ saṃpūjayetpīṭhaṃ navaśaktisamanvitam //

1.84.22

jayākhyā vijayā paścādajitāhvāparājitā /
nityā vilāsinī gogdhītyaghorā maṅgalā nava //

1.84.23

bījāḍhyamāsanaṃ dattvā mūrtiṃ tenaiva kalpayet /
tasyāṃ saṃpūjayeddevīmāvāhyāvaraṇaiḥ kramāt //

1.84.24

madheyapāgyāmyasaumyeṣu pūjayedaṅgadevatāḥ /
ṣaṭkoṇeṣu yajenmantrī paścānmithunadevatāḥ //

1.84.25

indrakoṇaṃ lasaddaṇḍakuṇḍikākṣaguṇābhayām /
gāyatrīṃ pūjayenmatrī brahmāṇamapi tādṛśam //

1.84.26

rakṣaḥ koṇe śaṅkhacakragadāpaṅkajadhāriṇīm /
sāvitrīṃ pītavasanāṃ yajedviṇuṃ ca tādṛśam //

1.84.27

vāyukoṇe paraśvakṣamālā bhayavarānvitām /
yajetsarasvatīmacchāṃ rudraṃ tādṛśalakṣaṇam //

1.84.28

vahnikoṇe yajedratnakuṃbhaṃ maṇikaraṇḍakam /
karābhyāṃ bibhratīṃ pītāṃ tundilaṃ dhanadāyakam //

1.84.29

āliṅgya savyahastena vāme tāṃbūladhāriṇīm /
dhanadāṅkasamārūḍhāṃ mahālakṣmīṃ prapūjayet //

1.84.30

paścime madanaṃ bāṇapāśāṅkuśaśarāsanām /
dhārayantaṃ japāraktaṃ pūjayedraktabhūṣaṇam //

1.84.31

savyena patimāśliṣya vāmenotpaladhāriṇīm /
pāṇinā ramaṇāṅkasthāṃ ratiṃ samyaksamarcayet //

1.84.32

aiśānye pūjayetsamyak vighnarājaṃ priyānvitam /
sṛṇipāśadharaṃ kāntaṃ varāṅgāsṛkkalāṅgulim //

1.84.33

mādhvīpūrṇakapālāḍhyaṃ vighnarājaṃ digaṃbaram /
puṣkare vigaladratnasphuraccaṣakadhāriṇam //

1.84.34

siṃdūrasadṛśākārāmuddāmamadavibhramām /
dhṛtaraktotpalāmanyapāṇinā tu dhvajaspṛśām //

1.84.35

āśliṣṭakāntāmaruṇāṃ puṣṭimarceddigaṃbarām /
karṇikāyāṃ nidhī pūjyau ṣaṭkoṇasyātha pārśvayoḥ //

1.84.36

aṅgāni kesareṣvetāḥ paścātpatreṣu pūjayet /
anaṅgakusumā paścāddvitīyānaṅgamekhalā //

1.84.37

anaṅgagamanā tadvadanaṅgamadanāturā /
bhuvanapālā gaganavegā ṣaṣṭhī caiva tataḥ param //

1.84.38

śaśilekhā gaganalekhā cetyaṣṭau yatra śaktayaḥ /
khaḍgakheṭakadhāriṇyaḥ śyāmāḥ pūjyāśca mātaraḥ //

1.84.39

padmādbahiḥ samabhyarcyāḥ śaktayaḥ paricārikāḥ /
prathamānaṅgadvayāsyādanaṅgamadanā tataḥ //

1.84.40

madanāturā bhavanavegā tato bhuvanapālikā /
syātsarvaśiśirānaṅgavedanānaṅgamekhalā //

1.84.41

caṣakaṃ tālavṛntaṃ ca tāṃbūlaṃ chatramujjvalam /
cāmare cāṃśukaṃ puṣpaṃ bibhrāṇāḥ karapaṅkajaiḥ //

1.84.42

sarvābharaṇasaṃdīptān lokapālānbahiryajet /
vajrādīnyapi tadbāhye devīmitthaṃ prapūjayet //

1.84.43

mantrī trimadhuropetairhutvāśvatthasamidvaraiḥ /
brāhmaṇānvaśayecchīghraṃ pārthivānpadmahomataḥ //

1.84.44

palāśapuṣpaistatpatnīṃ mantriṇaḥ kusudairapi /
pañcaviṃśatidhā japtairjalaiḥ snānaṃ dine dine //

1.84.45

ātmānamabhiṣiñcedyaḥ sarvasaubhāgyavānbhavet /
pañcaviṃśatidhā japtaṃ jalaṃ prātaḥ pibennaraḥ //

1.84.46

avāpya mahatīṃ prajñāṃ kavīnāmagraṇīrbhavet /
karpūrāgarusaṃyuktakuṅkumaṃ sādhu sādhitam //

1.84.47

gṛhītvā tilakaṃ kuryādrājavaśyamanuttamam /
śālipiṣṭamayīṃ kṛtvā puttalīṃ madhurānvitām //

1.84.48

japtāṃ pratiṣṭhitaprāṇāṃ bhakṣayedravivāsare /
vaśaṃ nayati rājānaṃ nārīṃ vā narameva ca //

1.84.49

kaṇṭhamātrodake sthitvā vīkṣya toyodgataṃ ravim /
trisahasraṃ japenmantraṃ kanyāmiṣṭāṃ labhettataḥ //

1.84.50

annaṃ tanmantritaṃ mantrī bhuñjīta śrīprasiddhaye /
likhitāṃ bhasmanā māyāṃ sasādhyāṃ phalakādiṣu //

1.84.51

tatkālaṃ darśayedyantraṃ sukhaṃ sūyeta garbhiṇī /
bhuvaneśīyamākhyātā sahasrabhujasaṃbhavā //

1.84.52

bhuktimuktipradā nṝṇāṃ smartṛāṇāṃ dvijasattama /
tataḥ kalpāntare vipra kadācinmahiṣāsuraḥ //

1.84.53

babhūva lokapālāṃstu jitvā bhuṅkte jagattrayam /
tatastpīḍitā devā vaikuṇṭhaṃ śaraṇaṃ yayuḥ //

1.84.54

tato devī mahālakṣmīścakrādyāṅgotthatejasā /
śrīrbabhūvamuniśreṣṭha mūrtā vyāptajagattrayā //

1.84.55

svayaṃ sā mahiṣādīṃstu nihatya jagadīśvarī /
aravindavanaṃ prāptā bhajatāmiṣṭadāyinī //

1.84.56

tasyāḥ samarcanaṃ vakṣye saṃkṣepeṇa śṛṇu dvija /
mṛtyukrodhena guruṇā bindubhūṣitamastakā //

1.84.57

bījamantraḥ śriyaḥ prokto bhajatāmiṣṭadāyakaḥ /
ṛṣirbhṛgurnivṛcchando devatā śrīḥ samīritā //

1.84.58

ṣaḍdīrghayuktabījena kuryādaṅgāni ṣaṭ kramāt /
tato dhyāyejjagadvedyāṃ śriyaṃ saṃpattidāyinīm //

1.84.59

kāñcanābhāṃ gajaiḥ śvetaiścaturbhiḥ svakaroddhṛtaiḥ /
hiraṇmayāmṛtaghaṭaiḥ sicyamānāṃ sarojagām //

1.84.60

varābhayābjasragdhastāṃ kṣaumavastrāṃ kirīṭinīm /
siddhalakṣaṃ japenmantraṃ tatsahasraṃ hunettathā //

1.84.61

sugandhakusumairiṣṭvā kamalairmadhuraplutaiḥ /
mahālakṣmyudite pīṭhe mūrtiṃ mūlena kalpayet //

1.84.62

yajetpūrvavadaṅgāni digdaleṣvarcayettataḥ /
vāsudevaṃ saṃkarṣaṇaṃ pradyumnamaniruddhakam //

1.84.63

himapītatamālendranīlābhānpītavāsasaḥ /
śaṅkhacakragadāpadmadhāriṇastāṃścaturbhujān //

1.84.64

vidiganteṣu patreṣu damakādīnyajedgajān /
damakaṃ puṇḍarīkaṃ ca guggulaṃ ca kuraṇṭakam //

1.84.65

yajecchaṅkhanidhiṃ devyā dakṣiṇe pramadānvitam /
muktāmāṇikyasaṃkāśau kiñcitsmitamukhāṃbujau //

1.84.66

anyonyāliṅganaparau śaṅkhapaṅkajadhāriṇau /
vigaladratnavarṣābhyāṃ śaṅkhabhyā mūrdhni lāñchitau //

1.84.67

tundilaṃ kaṃbukanidhiṃ vasudhārāṃ ghanastanīm /
vāmataḥ paṅkajanidhiṃ priyayā sahitaṃ yajet //

1.84.68

siṃdūrābhau bhujaśliṣṭau raktapadmotpalānvitau /
niḥsaradratnavarṣābhyāṃ padmābhyāṃ mūrdhni lāñchitau //

1.84.69

tundilaṃ paṅkajanidhiṃ tattvāṃ vasumatīmapi /
dalāgreṣu yajedetābalākyādyāḥ samantataḥ //

1.84.70

balākī vimalā caiva kamalā vanamālikā /
vibhīṣikā mālikā ca śāṅkarī vasumālikā //

1.84.71

paṅkajadvayadhāriṇyo muktāhārasamaprabhāḥ /
lokeśānpūjayedante vajrādyāstrāṇi tadbahiḥ //

1.84.72

itthaṃ yo bhajate devīṃ vidhinā sādhakottamaḥ /
dhanadhānyasamṛddhaḥ syācchriyamāpnotyaninditām //

1.84.73

vakṣaḥpramāṇasalile sthitvā mantramimaṃ japet /
trilakṣamarkagaṃ dhyāyansa bhavetkamalālayaḥ //

1.84.74

viṣṇugehasthabilvasya mūle lakṣatrayaṃ japet /
sādhako yaḥ sa labhate vāñchitaṃ dhanasaṃcayam //

1.84.75

aśokavahnāvājyāktaistaṇḍulairvaśayejjagat /
homenakhādire vahnau taṇḍulermadhurokṣitaiḥ //

1.84.76

rājā vaśyo bhavecchīghraṃ mahālakṣmīśca varddhate /
bilvacchāyāmadhivasanbilvamiśrahaviṣyabhuk //

1.84.77

saṃvatsaratrayaṃ hutvā tatphalairathavāṃbujaiḥ /
sādhakendro mahālakṣmīṃ cakṣuṣā paśyati dhruvam //

1.84.78

atha kalpāntare brahmandevarājyaviluṃpakau /
jātau śubhaniśuṃbhau dvāvasurau lokakaṇṭakau //

1.84.79

tato bhraṣṭādhikāraistu śakrādyaiḥ saṃstutā mune /
mahāsarasvatī devī tadā cāvatatāra ha //

1.84.80

himālaye mahāpuṇye śailoddeśe 'tiśobhane /
tataḥ śumbhādikānhatvā daivataiḥ paripūjitā //

1.84.81

varaṃ dattvāviśaddevī mānasaṃ nāma vai saraḥ /
tasyā mantraṃ pravakṣyāmi śṛṇuṣvāvahito munane //

1.84.82

jñānāmṛtā śaśadharā krāntabhālopaśobhitā /
vāgbījaṃ tena cāṅgāni kalpayetsādhakottamaḥ //

1.84.83

ṛṣiḥ sadāśivaścāsya chando 'nuṣṭubudāhṛtam /
devatā vāksamākhyātā bhajatāmiṣṭadāyinī //

1.84.84

śvetāṃbarāṃ visaśvetāṃ vīṇāpustakadhāriṇīm /
divyairābharaṇairyuktāṃ dhyāyeddevīṃ nirantarām //

1.84.85

mahāsarasvatīpīṭhe mūrtiṃ mūlena kalpayet /
devīṃ saṃpūjayettasyāmaṅgādyāvaraṇaiḥ saha //

1.84.86

ādāvaṅgāvṛtiḥ paścādaṃbikādyāḥsamīritāḥ /
dvitīyā mātṛbhiḥ proktā tṛtīyādyaṣṭaśaktibhiḥ //

1.84.87

caturthī pañcamī proktā dvātriṃśacchaktibhaghiḥ punaḥ /
catuḥṣaṣṭyā smṛtā ṣaṣṭhī śaktibhirlokanāyakaiḥ //

1.84.88

saptamī punareteṣāmastraiḥ syādaṣṭamāvṛtiḥ /
evaṃ pūjyā jagaddhātrī śrīmatī vāgbhavābhidhā //

1.84.89

sthāneṣu pūrvamukteṣu yajedaṅgāni sādhakaḥ /
ambikā vāgbhavā durgā śrīśaktiścoktalakṣaṇā //

1.84.90

brahmādyāśca tataḥ pūjyāḥ karālī vikarālyumā /
sarasvatī śrīrdurgā ca lakṣmīścaiva dhṛtiḥ smṛtiḥ //

1.84.91

śraddhā medhā ratiḥ kāntirāryā ṣoḍaśa śaktayaḥ /
khaḍgakheṭakadhāriṇyaḥ śyāmāḥ pūjyāḥ svalaṅkṛtāḥ //

1.84.92

viṣaghnī puṣṭayaḥ prajñā sinīvālī kuhūḥ punaḥ /
rudravīryā prabhā nandā poṣaṇā vṛddhidā śubhā //

1.84.93

kālarātrirmahārātrirbhadrakālī kapārdinī /
vikṛtirdaṇḍimuṇḍinyau seṃdukhaṇḍā śikhaṇḍinī //

1.84.94

niśumbhamathanī caṇḍamuṇḍavināśinī /
indrāṇī caiva rudrāṇī śaṅkarārddhaśarīriṇī //

1.84.95

nārī nārāyaṇī caiva triśūlinyapi pālinī /
ambikā hradinī caiva dvātriṃśacchaktayaḥ sitāḥ //

1.84.96

cakrahastāḥ piśācāsyāḥ saṃpūjyāścārubhūṣaṇāḥ /
piṅgalākṣī viśālākṣī samṛddhirbuddhireva ca //

1.84.97

śraddhā svāhā svadhā bhikṣā māyā saṃjñā vasuṃdharā /
trilokadhātrī gāyatrī sāvitrī tridaśeśvarī //

1.84.98

sarūpā bahurūpā ca skandamātā śrutapriyā /
vimalā kamalā paścādaruṇī punarāruṇī //

1.84.99

prakṛtirvikṛtiḥ sṛṣṭiḥ sthitiḥ saṃhṛtireva ca /
sandhyā mātā satī haṃsī mardikā vajrikā parā //

1.84.100

devamātā bhagavatī devakī kamalāsanā /
trimukhī saptavadanā surāsuravimarddinī //

1.84.101

laṃboṣṭhī corddvakeśī ca bahuśiśnā vṛkodarī /
ratharekhāhvayā paścācchaśirekhā tathāparā //

1.84.102

gaganavegā pavanavegā vegā ca tadanantaram /
tato bhuvanapālākhyā tataḥ syānmadanāturā //

1.84.103

anaṅgānaṅgavadanā tathaivānaṅgamekhalā /
anaṅgakusumā viśvarūpā surabhayaṅkarī //

1.84.104

akṣobhyā saptavāhinyā vajrārūpā śucivratāḥ /
varadākhyātha vāgīśī catuḥṣaṣṭiḥsamīritāḥ //

1.84.105

cāpabāṇadharāḥ sarvā jvālājihvā mahāprabhāḥ /
daṃṣṭriṇyaścorddhvakeśyastā yuddhopakrāntamānasāḥ //

1.84.106

sarvābharaṇasaṃdīptā pūjanīyāḥ prayatnataḥ /
lokeśāḥ pūrvavatpūjyāstadvadvajrādikānyapi //

1.84.107

japetṣoḍaśalakṣaṃ ca taddaśāṃśaṃ hunetsudhīḥ /
ājyena khādire vahnau tataḥ siddho bhavenmanuḥ //

1.84.108

kamalairayutaṃ hutvā rājānaṃ vaśamānayet /
utpalairjuhvato nūnaṃ mahālakṣmīḥ prajāyate //

1.84.109

palāśakusumairhutvā vatsareṇa kaṃvirbhavet /
rājīlavaṇahomena vanitāṃ vaśamānayet //

1.84.110

bhūmau bhogāṃstu bhuktvānte viṣṇulokamavāpnuyāt /
vāṇībījajapāśakto nātra kāryā vicāraṇā //

1.84.110.p1

iti śrībṛhannāradīcayapuraṇe pūrvabhāge bṛhadupākhyāne tṛtīyapāde devīmantranirūpaṇaṃ nāma caturaśītitamo 'dhyāyaḥ

Linked texts (16)