Naradapurana 1.85
Nāradapurāṇa 1.85
- Language
- Sanskrit
Contents
- 1.85.144 — 1 part
1.85.1
sanatkumāra uvāca
vāgdevatā vatāro 'nyaḥ kāliketi prakīrtitā /
tasyā mantraṃ pravakṣyāmi bhuktimuktipradaṃ nṛṇām //
1.85.2
sṛṣṭikriyānvitā śāntirbidvāḍhyā ca tridhā punaḥ /
aruṇākṣyādīpikā ca binduyuktā dvidhā tataḥ //
1.85.3
māyādvayaṃ tataḥ paścāddakṣiṇe kālike padam /
punaśca saptabījāni svāhānto 'yaṃ manūttamaḥ //
1.85.4
bhairavo 'sya ṛṣiśchanda uṣṇikkālī tu devatā /
bījaṃ māyādīrghavartma śaktiruktā munīśvara //
1.85.5
ṣaḍdīrdhāḍhye bījena vidyāyā aṅgamīritam /
mātṛkārṇāndaśa daśa hṛdaye bhujayoḥ padoḥ //
1.85.6
vinyasya vyāpakaṃ kuryānmūlamantreṇa sādhakaḥ /
śiraḥ kṛpāṇamabhayaṃ varaṃ hastaiśca bibhratīm //
1.85.7
muṇḍasraṅmastakāṃ muktakeśāṃ pitṛvanastitām /
sarvālaṅkṛtavarṇāṃ ca śyāmāṅgīṃ kālikāṃ smaret //
1.85.8
evaṃ dhyātvā japellakṣaṃ juhuyādayutaṃ tataḥ /
prasūnaiḥ karavīrotthaiḥ pūjāyantramathocyate //
1.85.9
vilikhya pūrvaṃ ṣaṭkoṇaṃ trikoṇatritayaṃ tataḥ /
padmamaṣṭadalaṃ bāhye bhūpuraṃ tatra pūjayet //
1.85.10
jayā ca vijayā cāpi ajitā cāparājitā /
nityā vilāsinī vāpi dogdhyaghorā ca maṅgalā //
1.85.11
pīṭhasya śaktayo māyātmane hṛtpīṭhamantrakaḥ /
śivarūpaśavaśthāṃ ca śivābhirdikṣu veṣṭitām //
1.85.12
mahākālaratāsaktāṃ dhyātvāṅgānyarcayetpurā /
kālīṃ kapālinīṃ kullāṃ kurukullāṃ virodhinīm //
1.85.13
vipracittāṃ ca ṣaṭkoṇe navakoṇe tator'cayet /
ugrāmuṣṇaprabhāṃ dīptāṃ nīlādhānāṃ balākikām //
1.85.14
mātrāṃ mudrāṃ tathā mitrāṃ pūjyāḥ patreṣu mātaraḥ /
padmasyāsya suyatnena brāhmī nārāyaṇītyapi //
1.85.15
māheśvarī ca cāmuṇḍā kaumārī cāparājitā /
vārāhī nārasiṃhā ca punaretāstu bhūpure //
1.85.16
bhairavīṃ mahadādyāṃ tāṃ siṃhādyāṃ dhūmrapūrvikām /
bhīmonmattādikāṃ cāpi vaśīkaraṇabhairavīm //
1.85.17
mohanādyāṃ samārādhya śakrādīnyāyudhānyapi /
evamārādhitā kālī siddhā bhavati mantriṇām //
1.85.18
tataḥ prayogānkurvīta mahābhairavabhāṣitān /
ātmano vā parasyārthaṃ kṣiprasiddhipradāyakān //
1.85.19
strīṇāṃ prahāraṃ nindāṃ ca kauṭilyaṃ vāpriyaṃ vacaḥ /
ātmano hitamanvicchan kālībhakto vivarjayet //
1.85.20
sudṛśo madanāvāsaṃ paśyanyaḥ prajapenmanum /
ayutaṃ so 'cirādeva vākpateḥ samatāmiyāt //
1.85.21
digambaro muktakeśaḥ śmaśānastho 'dhiyāmini /
japedyo 'yutametasya bhaveyuḥ sarvasiddhayaḥ //
1.85.22
śavasya hṛdaye sthitvā nirvāsāḥ pretabhūmigaḥ /
arkapuṣpasahasreṇābhyaktena svīyaretasā //
1.85.23
devīṃ yaḥ pūjayedbhaktyā japannekaikaśo manum /
so 'careṇaiva kālena dharaṇīprabhutāṃ vrajet //
1.85.24
rajaḥ kīrṇaṃ bhagaṃ nāryā dhyāyanyo hyayutaṃ japet /
sakavitvena ramyeṇa janānmohayati dhruvam //
1.85.25
tripañcāre mahāpīṭhe śivasya hṛdi saṃsthitām /
mahākālena devena mārayuddhaṃ prakurvatīm //
1.85.26
tāṃ dhyāyansmeravadanāṃ vidadhatsurataṃ svayam /
japetsahasramapi yaḥ sa śaṅkarasamo bhavet //
1.85.27
asthilomatvacāyuktaṃ māṃsaṃ mārjārameṣayoḥ /
uṣṭrasya mahiṣasyāpi baliṃ yastu samarpayet //
1.85.28
bhūtāṣṭamyormadhyarātre vaśyāḥ syustasya jantavaḥ /
vidyālakṣmīyaśaḥputraiḥ sa ciraṃ sukhamedhate //
1.85.29
yo haviṣyāśanarato divā devīṃ smaran japet /
naktaṃ nidhuvanāsakto lakṣaṃ sa syāddharāpatiḥ //
1.85.30
raktāṃbhojairhunenmantrī dhanairjayati vittapam /
bilvapatrairbhavedrājyaṃ raktapuṣpairvaśīkṛtiḥ //
1.85.31
asṛjī mahiṣādīnāṃ kālikāṃ yastu tarpayet /
tasya syuracirādeva karasthāḥ sarvasiddhayaḥ //
1.85.32
yo lakṣaṃ prajapenmantraṃ śavamāruhya mantravit /
tasya siddho manuḥ sadyaḥ sarvepsitaphalapradaḥ //
1.85.33
tenāśvamedhapramukhairyāgauriṣṭaṃ sujanmanā /
dattaṃ dānaṃ tapastaptaṃ upāste yastu kālikām //
1.85.34
brahmā viṣṇuḥ śivo gaurī lakṣmīrgaṇapatī raviḥ /
pūjitāḥ sakalā devā yaḥ kālīṃ pūjayetsadā //
1.85.35
athāparaḥ sarasvatyā hyavatāro nigadyate /
yāṃ niṣevya narā loke kṛtārthāḥ syurna saṃśayaḥ //
1.85.36
āpyāyinī candrayuktā māyā ca vadanāntare /
sakāmikā krudhā śāntiścandrālaṅkṛtamastakā //
1.85.37
dīpikā sāsanā candrayugastraṃ manurīritaḥ /
munirakṣobhya uddiṣṭaśchandastu bṛhatī matam //
1.85.38
tārākhyā devatā bījaṃ dvitīyañca caturthakam /
śaktiḥ ṣaḍdīrghayuktena dvitīyenāṅgakalpanam //
1.85.39
ṣoḍhā nyāsaṃ tataḥ kuryāttārāyāḥ sarvasiddhim /
śrīkaṇṭhādīnnyasedrudrānmātṛkāvarṇapūrvakān //
1.85.40
mātṛkoktasthale māyā tṛtīyakrodhapūrvakān /
caturthīnamasāyuktānprathamo nyāsa īritaḥ //
1.85.41
śavapīṭhasamāsīnāṃ nīlakāntiṃ trilocanām /
arddhenduśekharāṃ nānābhūṣaṇāḍhyāṃ smarannyaset //
1.85.42
dvitīye tu grahanyāsaṃ kuryāttāṃ samanusmaran /
tribījasvarapūrvaṃ tu raktasūya hṛdi nyaset //
1.85.43
tathā pavargapūrvaṃ tu śuklaṃ lomaṃ bhruvodveye /
kavargapūrvaṃ raktābhaṃ maṅgalaṃ locanatrayam //
1.85.44
cavargādyaṃ budhaṃ śyāmaṃ nyasedvakṣaghasthale budhaḥ /
ḍhavargādyaṃ pītavarṇaṃ kaṭhṇakūpe bṛhaspatim //
1.85.45
tavargādyaṃ śvetavarṇaṃ ghaṭikāyāṃ tu bhārgavam /
nīlavarṇaṃ pavargādyaṃ nābhideśe śanaiścaram //
1.85.46
śavargādyaṃ dhūmravarṇaṃ dhyātvā rāhuṃ mukhe nyaset /
tribījapūrvakaścaivaṃ grahanyāsaḥ samīritaḥ //
1.85.47
tṛtīyaṃ lokapālānāṃ nyāsaṃ kuryātprayatnataḥ /
māyādibījatritayapūrvakaṃ sarvasiddhaye //
1.85.48
svamastake lalāṭādi dikṣvaṣṭasvadhaurddhvataḥ /
hrasvadīrghakādikāṣṭavargapūrvāndiśādhipān //
1.85.49
śivaśaktyabhidhe nyāsaṃ caturthe tu samācaret /
tribījapūrvakānnyasyetṣaṭśivāñchaktisaṃyutān //
1.85.50
ādhārādiṣu cakreṣu svacakravarṇapūrvakān /
brahmāṇaṃ ḍākinīyuktaṃ vādisāṃtārṇapūrvakam //
1.85.51
mūlādhāre vinyasecca caturddalasamanvitam /
śrīviṣṇuṃ rākiṇīyuktabādilāntārṇapūrvakam //
1.85.52
svādhiṣṭhanābhidhe cakre liṅgasthe ṣaḍdale nyaset /
rudraṃ tu ḍākinīyuktaṃ ḍādiphaāntārṇapūrvakam //
1.85.53
cakre daśadale nyasyennābhisthe maṇipūrake /
īśvaraṃ kādiṭhāntārṇapūrvakaṃ śākinīyutam //
1.85.54
vinyaseddvādaśadalehṛdayasthe tvanāhate /
sadāśivaṃ śākinīṃ ca ṣoḍaśasvarapūrvakam //
1.85.55
kaṇṭhasthe ṣoḍaśadale viśuddhākhye pravinyaset /
ājñācakre paraśivaṃ hākinīsaṃyutaṃ nyaset //
1.85.56
lakṣārṇapūvaṃ bhrūmadhyasaṃsthite 'timanohare /
tārādipañcamaṃ nyāsaṃ kuryātsarveṣṭasiddhaye //
1.85.57
aṣṭau vargānsvaradvandvapūrvakān bījasaṃyutān /
tārādyā nyāsapūrvāśca prayojyā aṣṭaśaktayaḥ //
1.85.58
tārāthogrā mahogrāpi vajrā kālī sarasvatī /
kāmeśvarī ca cāmuṇḍā ityaṣṭau tārikāḥ smṛtāḥ //
1.85.59
brahmarandhre lalāṭe ca bhrūmadhye kaṇṭhadeśataḥ /
hṛdi nābhau phale mūlādhāre cetāḥ kramānnyaset //
1.85.60
aṅganyāsaṃ tataḥ kuryātpīṭhākhyaṃ sarvasiddhidam /
ādhāre kāmarūpākhyaṃ bījaṃ hrasvārṇapūrvakam //
1.85.61
hṛdi jālandharaṃ bījaṃ dīrghapūrvaṃ pravinyaset /
lalāṭe pūrṇagiryākhyaṃ kavargādyaṃ nyasetsudhīḥ //
1.85.62
uḍḍīyānaṃ cavargādyaṃ keśasandhau pravinyaset /
kaṇṭhe tu mathurāpīṭhaṃ daśama yādikaṃ nyaset //
1.85.63
ṣoḍhā nyāsastu tārāyāḥ prokto 'bhīṣṭapradāyakaḥ /
hṛdi śrīmadekajaṭāṃ tāriṇīṃ śirasi nyaset //
1.85.64
vajrodake śikhāṃ pātu ugratārāṃ tu varmaṇi /
mahogrā vatsare netre piṅgāgraikajaṭāstrake //
1.85.65
ṣaḍradīrgayuktamāyāyā etānyaṣṭau ṣaḍaṅgake /
aṅguṣṭhādiṣvaṅgulīṣu pūrvaṃ vinyasya yatnataḥ //
1.85.66
tarjanīmadhyamābhyāṃ tu kṛtvā tālatrayaṃ tataḥ /
choṭikāmudrāyā kuryāddigbandhaṃ devatāṃ smaran //
1.85.67
vidyayā tārapuṭayā vyāpakaṃ saptadhā caret /
ugratārāṃ tato dhyāyetsadyo vāde 'tisiddhidām //
1.85.68
layābdhāvaṃbujanmasthāṃ nīlābhāṃ divyabhūṣaṇām /
kambuṃ khaḍgaṃ kapālaṃ ca nīlābjaṃ dadhatīṃ karaiḥ //
1.85.69
nāgaśreṣṭhālaṅkṛtāṅgīṃ raktanetratrayāṃ smaret /
japellakṣacatuṣkaṃ hi daśāṃśaṃ raktapadmakaiḥ //
1.85.70
hunetkṣīrājyasaṃmiśraiḥ śaṅkhaṃ saṃsthāpya saṃjapet /
nārīṃ paśyanspṛśangacchanmahāniśi baliṃ caret //
1.85.71
śmaśāne śūnyasadane devāgāre 'tha nirjane /
parvate vanamadhye vā śavamāruhya mantravit //
1.85.72
samare śatrunihataṃ yadvā ṣāṇyāsikaṃ śiśum /
vidyāṃ sādhayataḥ śīghraṃ sādhitaivaṃ prasiddhyati //
1.85.73
medhā prajñā prabhā vidyā dhīvṛttismṛtibuddhayaḥ /
viśveśvarīti saṃproktāḥ pīṭhasya nava śaktayaḥ //
1.85.74
bhṛgumanvindusaṃyuktaṃ meghavartma sarasvatī /
yogapīṭhātmane hārddaṃ pīṭhasya manurīritaḥ //
1.85.75
dattvānenāsanaṃ mūrtiṃ mūlamantreṇa kalpayet /
pūjayedvidhivaddevīṃ tadvidhānamathocyate //
1.85.76
tāro māyā bhagaṃ brahmā jaṭe sūryaḥ sadīrghakam /
yakṣādhipataye tandrīsopanītaṃ baliṃ tataḥ //
1.85.77
gṛhayugmaṃ śivā svāhā balimantro 'yamīritaḥ /
dadyānnityaṃ baliṃ tena madhyarātre catuṣpathe //
1.85.78
jaladānādikaṃ mantrairvidadhyāddaśabhistataḥ /
dhruvo vajrodake varma phaṭsaptārṇo jalagrahe //
1.85.79
tārādyā vahnijāyāntā māyā hi kṣālane matā /
tāro māyāḥ bhṛguḥ karṇoviśuddhaṃ dharmavarmataḥ //
1.85.80
sarvapāpāni śāmyante cheto netrayutaṃ jalam /
kalpāntanayanasvāhā mantra ācamane mataḥ //
1.85.81
dhruvo maṇidharītyante vajriṇyakṣiyutā mṛtiḥ /
kharividyāyugrijaśva sarvavānte bako 'bjavān //
1.85.82
kāriṇyante dīrghavarma astraṃ vahnipriyāntimaḥ /
trayoviṃśativarṇātmā śikhāyā bandhane manuḥ //
1.85.83
praṇavo rakṣayugalaṃ dīrghavarmāstraṭhadvayam /
navārṇenāmunā mantrī kuryādbhūmiviśodhanam //
1.85.84
nārānte sarvavighnānutsārayeti padaṃ tataḥ /
huṃ phaṭ svāhā guṇendvarṇo manurvighnanivāraṇam //
1.85.85
māyābījaṃ japāpuṣpanibhaṃ nābhau viciṃyet /
tadutthenāgninā dehaṃ dahetsāddhasvapāpmanā //
1.85.86
tārābījaṃ suvarṇābhaṃ cintayeddhṛdi mantravit /
pavanena tadutthena pāpabhasma kṣipedbhuvi //
1.85.87
turīyaṃ candrakundābhaṃ bījaṃ dhyātvālalāṭataḥ /
tadutthasudhayāde haṃ svayaṃ vai devatānibham //
1.85.88
anayā bhūtaśuddhyā tu devīsādṛśyamāpnuyāt /
tāro 'nanto bhaguḥ karṇo padmanābhayuto balī //
1.85.89
khe vajrarekhe krodhākhyaṃ bījaṃ pāvakallabhā /
amunā dvādaśārṇena racayenmaṇḍalaṃ śubham //
1.85.90
tāro yathāgatā nidrā sadṛkṣekabhṛgurviṣam /
sadīrghasmṛtirau sākṣau mahākālo bhagānvitaḥ //
1.85.91
krodho 'straṃ manuvarṇo 'yaṃ manuḥ puṣpādiśodhane /
tāraḥ pāśaḥ parā svāhā pañcārṇaścittaśodhane //
1.85.92
manavo daśa saṃproktā ardhyasthāpanamucyate /
seṃdubhyāṃ māsato māyā bhuvaṃ saṃsṛjya bhūgṛham //
1.85.93
vṛtaṃ trikoṇasaṃyuktaṃ kuryānmaṇḍalamantrataḥ /
yajettatrādhāraśaktiṃ vahnimaṇḍalamadhyagām /
vahnimaṇḍalamabhyarcya mahāśaṅkhaṃ nidhāpayet //
1.85.94
vāmakarṇenduyuktena phaḍantena vihāyasā /
prakṣālitaṃ bhṛgurdaṇḍī trimūrtīntuyutaṃ paṭhet //
1.85.95
tator'cayenmahāśaṅkhaṃ japanmantracatuṣṭayam /
dīrghatrayānvitā māyā kālī sṛṣṭiḥ sadīrghasaḥ //
1.85.96
pratimāsaṃyutaṃ māsaṃ yavanaṃ hṛdayaṃ tataḥ /
ekādhaśārṇaḥ prathamo mahāśaṅkhārcane manuḥ //
1.85.97
haṃso haribhujaṅgeśayukto dīrghantrayenduyuk /
tāriṇyante kapālāya namonto dvādaśākṣaraḥ //
1.85.98
svaṃ dīrghatrayamanvāḍhyameṣo vāmadaganvitaḥ /
lokapālāya hṛdayaṃ tṛtīyo 'yaṃ śivākṣaraḥ //
1.85.99
māyāstrībījamarddhaiduyutaṃ svaṃ svargakhādimaḥ /
pālāya sarvādhārāya sarvaḥ sarvodbhavastathā //
1.85.100
sarvaśuddhimayaśceti ṅeṃtāḥ sarvāsurāntikam /
rudhirā ratidīrghā ca vāyuḥ śubhrānilaḥ surā //
1.85.101
bhājanāya bhagī satyā vikapālāya hṛnmanuḥ /
turyo raseṣu varṇo 'yaṃ mahāśaṅkhaprapūjane //
1.85.102
navārkamaṇḍalaṃ ceṣṭvā salilaṃ mūlamantrataḥ /
prapūrayetsudhābuddhyā gandhapuṣpākṣatādibhiḥ //
1.85.103
mudrāṃ trikhaṇḍāṃ saṃdarśya pūjayeccandramaṇḍalam /
vāksatyapadmāgagane rephaānugrahabinduyuk //
1.85.104
mūlamantro vipaddhvaṃsamanusargasamanvitam /
aṣṭakṛtvo 'munā mantrī mantrayetprayato jalam //
1.85.105
māyayā madiśaṃ kṣiptvā khaṃ yoniṃ ca pradarśayet /
tatra vṛttāṣṭaṣaṭkoṇaṃ dhyātvā devīṃ vicintayet //
1.85.106
pūrvoktāṃ pūjayettvenāṃ mūlenātha pratarpayet /
tarjanūmadhyamānāmākaniṣṭhābhirmaheśvarīm //
1.85.107
sāṃguṣṭhāniścuturvāraṃ mahāśaṅkhasthite jale /
khaṃrephamanubindvāḍhyāṃ bhṛgumanvinduyuktayā //
1.85.108
dhruvādyena namontena tarpyādānandabhairavam /
tatastenārdhatoyena prokṣetpūjanasādhanam //
1.85.109
yomimudrāṃ pradarśyāpi praṇamedbhavatāriṇīm /
vidhānamarghe saṃproktaṃ sarvasiddhipradāyakam //
1.85.110
pūrvokte pūjayetpīṭhe padme ṣaṭkoṇakarṇike /
dharāgṛhāvṛte ramye devīṃ ramyopacārakaiḥ //
1.85.111
mahīgṛhe caturdikṣu gaṇeśādīnprapūjayet /
pāśāṅkuśau kapālaṃ ca triśūlaṃ dadhataṃ karaiḥ //
1.85.112
alaṅkāracayopetaṃ gaṇeśaṃ prāktamarcayet /
kapālaśūle hastābhyāṃ dadhataṃ sarpabhūṣaṇam //
1.85.113
svayūthaveṣṭitaṃ ramyaṃ baṭukaṃ dakṣiṇer'cayet /
asiśūlakapālāni ḍamaruṃ dadhataṃ karaiḥ //
1.85.114
kṛṣṇaṃ digaṃbaraṃ krūraṃ kṣetrapālaṃ ca paścime /
kapālaṃ ḍamaruṃ pāśaṃ liṅgaṃ śaṃbibhratīṃ karaiḥ //
1.85.115
adhyākanyā raktavastrā yoginīruttare yajet /
akṣobhyaṃ prayajenmūrdhni devyā mantraṛṣiṃ śubham //
1.85.116
akṣobhyaṃ vastrapuṣpaṃ ca pratīcchānavallabhā /
akṣobhyapūjane mantraḥ ṣaṭkogakam //
1.85.117
vairācanaṃ cāmitābhaṃ padmanābhibhidhaṃ tathā /
śaṅkhaṃ pāṇḍurasaṃjñaṃ ca digdaleṣu prapūjayet //
1.85.118
lābhakāṃ mānakāṃ caiva pāṇḍurāṃ tārakāṃ tathā /
vidiggatābjapatreṣu pūjayediṣṭasiddhaye //
1.85.119
bindunāmādivarṇādyāḥ saṃbuddhyantāstathābhidhāḥ /
vrajapuṣpaṃ pratīcchāgnipriyāntāḥ praṇavādikāḥ //
1.85.120
vairācanādi pūjāyāṃ manavaḥ parikīrtitāḥ /
bhūdharaśca caturdvārṣu padmāntakayamāntakau //
1.85.121
vidyāntakābhidhaḥ paścānnarāntaka imānyajet /
śakrādīṃścaiva vajrādīnprajapettadanantaram //
1.85.122
evaṃ saṃpūjayandevīṃ pāṇḍityaṃ dhanamadbhutam /
putrānpautrāñchubhāṃ kīrtiṃ labhate janavaśyatām //
1.85.123
tāro māyā śrīmadakajaṭe nīlasarasvatī /
mahopratāre devāsaḥ sanetro gadiyugmakam //
1.85.124
sarvadevapiśākarmo dīrghogrirmarusānmasa /
abhragumama jāḍyaṃ ca chedayadvitayaṃ ramā //
1.85.125
māyāstrāgnipriyānto 'yaṃ dvipañcāśallipirmanuḥ /
anena nityaṃ pūjati'nvahaṃ devyai baliṃ haret //
1.85.126
evaṃ siddhe manau mantrī prayogānvidadhāti ca /
jātamātrasya bālasya divasatritayādadhaḥ //
1.85.127
jihvāyāṃ vilikhenmantraṃ madhvājyābhyāṃ śalākayā /
suvarṇa kṛtayā yadvā mantrī dhavaladūrvayā //
1.85.128
gate 'ṣṭame 'bde bālo 'pi jāyate kaviradbutam /
tathāparairajeyo 'pi bhūpasaṃghairddhanārcitaḥ //
1.85.129
uparāge datānīva naradārusarojale /
nirmāya kīlakaṃ tena tailamadhvamṛtairlikhet //
1.85.130
sarojinīdale mantraṃ veṣṭayenmātṛkākṣaraiḥ /
nikhāya tadalaṃ kuṇḍe caturasre samekhale //
1.85.131
saṃsthāpya pāvakaṃ tatra juhuyānmanunāmunā /
sahasraṃ raktapadmānāṃ dhenudugdhajalāplutam //
1.85.132
homānte vivadhai ratnaiḥ palairapi baliṃ haret /
baliṃ mantreṇa vidhivadbalimantraḥ prakāśyate //
1.85.133
tāraḥ padme yuga tandrī viyaddīrghaṃ ca lohitaḥ /
atrirviṣabhagārūḍho vadatpadmāvatīpadam //
1.85.134
jhiṇṭīśāḍhyonilasvāhā ṣoḍaśārṇo balermanuḥ /
tato niśīthe ca baliṃ pūrvoktamanunā haret //
1.85.135
evaṃ kṛte paṇḍitānāṃ sa jayī kavirāḍ bhavet /
nivāso bhāratīlakṣmyorjanatārañjanakṣamaḥ //
1.85.136
śatābhijaptyā yo mantrī rocanāṃ mastāke dharet /
yaṃ yaṃ paśyati tasyāsau dāsavajjāyate kṣaṇāt //
1.85.137
śmaśānāṅgāramāśritya pūrvāyāṃ kujavāsare /
tena matreṇa saṃveṣṭya nibaddhaṃ raktatantubhiḥ //
1.85.138
śatābhijaptaṃ mūlena nikṣipedvairiveśmani /
uccāṭayati saptāhātsakuṇṭubānvirodhinaḥ //
1.85.139
kṣīrāḍhyayā niśāmantraṃ likhitvā pauruṣe 'sthani /
ravivāre niśīthinyāṃ sahasramabhimantrayet //
1.85.140
tatkṣiptaṃ śatrusadane maṇḍalādbhraṃśakaṃ bhavet /
kṣetre kṣiptaṃ sasyahānyojavahṛtturamālayet //
1.85.141
ṣaṭkoṇāntarlikhenmūlaṃ sādhyārṇaṃ keśare svaraiḥ /
bāhye 'ṣṭavargayukpatraṃ padmabhūmiparāvṛtam //
1.85.142
yantraṃ bhūrje jahurasairlikhetpūtāmbarāvṛtam /
paṭṭasūtreṇa sannaddhaṃ śiśukaṇṭhagataṃ dhruvam //
1.85.143
bhūtabhītiharaṃ vāmavāhau strīṇāṃ ca putradam /
nṛṇāṃ dakṣiṇabāhusthaṃ nirdhanānāṃ dhanapradam //
1.85.144
jñānadaṃ jñānamicchūnāṃ rājñāṃ tu vijayapradam //
1.85.144.p1
iti śrībṛhannāradīyapurāṇe pūrvabhāge bṛhadupākhyāne tṛtīyapāde yakṣiṇīmantrabhedanirūpaṇaṃ nāma pañcāśītitamo 'dhyāyaḥ
Linked texts (5)
- Tārābhaktisudhārṇava — Sanskrit
- Tantrasāra (Kṛṣṇānanda) — Kṛṣṇānanda Āgamavāgīśa 1550, Sanskrit
- Bṛhattantrasāra — Sanskrit
- Prapañcasāratantra — Śaṅkara, Sanskrit
- Pāñcarātrarakṣā (The Adyar library, 1942) — Sanskrit