Pramāṇa · Search · About · API

Naradapurana 1.87

Nāradapurāṇa 1.87

Language
Sanskrit

Contents

1.87.1

sanatkumāra uvāca
avatāratrayaṃ lakṣmyāḥ kathita te dvijottama /
durgāyāścābhidhāsyāmi sarvalokopakārakān //

1.87.2

praṇavaḥ śrīḥ śivāyugmaṃ vāṇīvairocanīpadam /
vajrādyaṃ kṣudhitā sūkṣmā mṛtā svāgnīndusaṃyutā //

1.87.3

pratiṣṭhāpya śivā phaṭ ca svāhānto 'tyaṣṭivarṇavān /
bhairavo 'sya muniḥ samrāṭ chando mantrasya devatā //

1.87.4

chinnamastā ramā bījaṃ svāhā śaktirudīritā /
āṃ khaḍgāya hṛdākhyātamīṃ khaḍgāya śiraḥ smṛtam //

1.87.5

oṃ vajrāya śikhā proktā aiṃ pāśāya tanucchadam /
aumaṅkuśāya netraṃ syādvisargo vasurakṣayuk //

1.87.6

māyāyugmaṃ cāstramaṅgaṃ manavaḥ praṇavādikāḥ /
svāhāntāścaivamaṅgāni kṛtvā dhyāyedthāṃbikām //

1.87.7

bhānumaṇḍalasaṃsthānāṃ pravikīrṇālakaṃ śiraḥ /
chinnaṃ svakaṃ sphaāramukhaṃ svaraktaṃ prapibadgalat //

1.87.8

uparisthāṃ ratāsaktaratimanmathayornije /
ḍākinīvarṇinīsakhyau dṛṣṭvā modabharākulām //

1.87.9

dhyātvaivaṃ prajapellakṣacatuṣkaṃ taddaśāṃśataḥ /
pālāśairvilvajairvāpi juhuyātkusumaiḥ phalaiḥ //

1.87.10

ādhāraśaktimārabhya paratattvāntapūjite /
pīṭhe jayākhyā vijayā jitā cāpi parājitā //

1.87.11

nityā vilāsinī ṣaṣṭhī dogdhya ghorā ca maṅgalā /
dikṣu madhye ca saṃpūjyā nava pīṭhasya śaktayaḥ //

1.87.12

sarvabuddhiprade varṇanīye sarvabhṛguḥ sadṛk /
siddhiprade ḍākinīye tāro vajraḥ sabhautikaḥ //

1.87.13

khaḍgīśo rocanīyente bhagaṃ dhehi namontakaḥ /
tārādipīṭhamantro 'yaṃ vedarāmākṣaro mataḥ //

1.87.14

samarpyāsanametena tatra saṃpūjayecchivām /
trikoṇamadhyaṣaṭkoṇapadmabhūpuramadhyataḥ //

1.87.15

bāhyāvaraṇamārabhya pūjayetpratilomataḥ /
bhūpure bāhyabhāgeṣu vajrādīni prapūjayet //

1.87.16

tadantaḥ surarājādīnpūjayeddharitāṃ patīn /
bhūpurasya caturdvārṣu dvārapālānyajedatha //

1.87.17

karālavikarālākhyāvatikālastṛtīyakaḥ /
mahākālaścaturthaḥ syādatha padmeṣṭaśaktayaḥ //

1.87.18

ekaliṅgā yoginī ca ḍākinī bhairavī tathā /
mahābhairavakendrākṣī tvasitāṅgī tu saptamī //

1.87.19

saṃhāriṇyaṣṭamī ceti ṣaṭkoṇeṣvaṅgamūrtayaḥ /
trikoṇagā chinnamastā pārśvayostu sakhīdvayam //

1.87.20

ḍākinīvarṇanīsaṃjñaṃ tārāvāgbhyāṃ prapūjayet /
evaṃ pūjādibhiḥ siddhe mantre mantrī manorathān //

1.87.21

prāpnuyānnikhilānsadyo durlabhāṃstatprasādataḥ /
śrīpuṣpairlabhate lakṣmīṃ tatphailaśca samīhitam //

1.87.22

vāksiddhiṃ mālatīpuṣpaiścaṃpakairhavanātsukham /
ghṛtāktaṃ chāgamāṃsaṃ yo juhuyātpratyahaṃ śatam //

1.87.23

māsamekaṃ tu vaśagāstasya syuḥ sarvapārthivāḥ /
karavīrasumaiḥ śvatairlakṣasaṃkhyairjuhoti yaḥ //

1.87.24

rogajālaṃ parābhūya sukhī jīvecchataṃ samāḥ /
raktau statsaṃkhyayā hutvā vaśayenmantriṇo nṛpān //

1.87.25

phalairhutvāmuyāllakṣmīmuduṃbarapalāśajaiḥ /
gomāyumāṃsaistāmeva kavitāṃ pāyasāṃdhasā //

1.87.26

bandhūkakusumairbhāgyaṃ karmikāraiḥ samīhitam /
tilataṇḍulahomena vaśayennikhilāñjanān //

1.87.27

nārīrajobhirākṛṣṭairmṛgamāṃsaiḥ samīhitam /
staṃbhanaṃ māhiṣairmāṃsaiḥ paṅkajaiḥ saghṛtairapi //

1.87.28

citāgnau parabhṛtpakṣairjurhuyādarimṛtyave /
unmattakāṣṭhadīpte 'gnau tatphalaṃ vāyasacchadaiḥ //

1.87.29

dyūte vane nṛpadvāre samare vairisaṃkaṭe /
vijayaṃ labhate mantrī dhyāyandevīṃ japanmanum //

1.87.30

bhuktyai muktyai sitāṃ dhyāyeduccāṭe nīlarociṣam /
raktāṃ vaśye mṛtau dhūmrāṃ staṃbhane kanakaprabhām //

1.87.31

niśi dadyādbaliṃ tasyai siddhaye madirādinā /
gopanīyaḥ prayogo 'ya procyate sarvasiddhidaḥ //

1.87.32

bhūtāhe kṛṣṇapakṣasya madhyarātre tamoghane /
snāttvā raktāmbaradharo raktamālyānulepanaḥ //

1.87.33

ānīya pūjayennārīṃ chinnamastāsvarūpiṇīm /
sundarīṃ yauvanākrāntāṃ narapañcakagāminīm //

1.87.34

susmitāṃ muktakabīrīṃ bhūṣādānapratoṣitām /
vivastrāṃ pūjayitvaināmayutaṃ prajapenmanum //

1.87.35

baliṃ dattvā niśāṃ nītvā saṃpreṣya dhanatoṣitām /
bhojayedvividhairannairbrāhmaṇānbhojanādinā //

1.87.36

anena vidhinā lakṣmīṃ putrānpautrāndhanaṃ yaśaḥ /
nārīmāyuḥ sukhaṃ dharmamiṣṭaṃ ca samavāpnuyāt //

1.87.37

tasyāṃ rātrau vrataṃ kāryaṃ vidyākāmena mantriṇā /
manoratheṣu cānyeṣu gacchettāṃ prajapanmanum //

1.87.38

uṣasyutthāya śayyāyāmupaviṣṭo japecchatam /
ṣaṇmāsābhyantaremantrī kavitvena jayetkavim //

1.87.39

śivena kīlitā ceyaṃ tadutkīlanamucyate /
māyāṃ tārapuṭāṃ mantrī japedaṣṭottaraṃ śatam //

1.87.40

mantrasyādau tathaivānte bhavetsiddhipradā tu sā /
uditā chinnamasteyaṃ kalau śīghramabhīṣṭadā //

1.87.41

avatārāntaraṃ devyā vacmi te munisattama /
jñānāmṛtāruṇā śvetākrodhinīndusamanvitā //

1.87.42

śāntistathāvidhā cāpi nīcasargānvitāstathā /
vāgbhavaṃ kāmarājākhyaṃ śaktibījāhvayaṃ tathā //

1.87.43

tribhirbījaiḥ pañcakūṭātmikā tripurabhairavī /
ṛṣiḥ syāddakṣiṇāmūrtiśchandaḥ paṅktirudīritā //

1.87.44

devatā deśikairuktā devī tripurabhairavī /
nābherācaraṇaṃ nyasya vāgbhavaṃ mantravitpunaḥ //

1.87.45

hṛdayānnābhiparyantaṃ kāmabījaṃ pravinyaset /
śiraso hṛtpradeśāntaṃ tārtīyaṃ vinyasettataḥ //

1.87.46

ādyaṃ dvitīyaṃ karayostārtīyamubhayaṃ nyaset /
mūlādhāre hṛdi nyasya bhūyo bījatrayaṃ kramāt //

1.87.47

navayonyātmakaṃ nyāsaṃ kuryādbījaistribhiḥ punaḥ /
bāloditaprakāreṇa mūrtinyāsamathācaret //

1.87.48

svasvabījādikaṃ pūrvaṃ mūrdhnīśānamanobhavam /
nyasedvaktre tatpuruṣaṃ makaradhvajamātmavit //

1.87.49

hṛdyaghorakumārādikandarppaṃ tadanantaram /
guhyadeśe pravinyasyedvāmadevādimanmatham //

1.87.50

sadyojātaṃ kāmadevaṃ pādayorvinyasettataḥ /
ūrddhvaṃprāgdakṣiṇodīcyapaścimeṣu mukheṣu tān //

1.87.51

pravinyasedya dhāpūrva bhṛgurvyomāgnisaṃsthitaḥ /
sadyādipañcahrasvādyā bījameṣāṃ prakīrtitam //

1.87.52

ṣaḍdīrghayuktenādyena bījenāṅgakriyā matā /
pañcabāṇāṃstato nyasyenmantrī trailokyamohanān //

1.87.53

drāmādyāṃ drāviṇīṃ mūrdhniṃ drāmādyāṃ kṣobhaṇī pade /
klīṃvaśīkaraṇīṃ vaktre guhye bḷṃ bījapūrvikām //

1.87.54

ākarṣaṇīṃ hṛdi punaḥ sarvāntabhṛgusaṃsthitām /
saṃmohanīṃ kramādevaṃ bāṇanyāso 'yamīritaḥ //

1.87.55

bhālabhrūmadhyavadane ghaṇṭikākaṇṭhahṛtsu ca /
nābhyadhiṣṭhānayoḥ pañca tārādyāḥ subhagādikāḥ //

1.87.56

mastakāvidhi nābheśca mantriṇā subhagā bhagā /
bhagasarpiṇyatha parā bhagamālinyanantaram //

1.87.57

anaṅgānaṅgakusumā bhūyaścānaṅgamekhalā /
anaṅgamadanā sarvā madavibhramamantharā //

1.87.58

pradhānadevatā varṇabhūṣaṇādyairalaṅkṛtāḥ /
akṣasrakpustakābhītivaradāḍhyakarāṃbujāḥ //

1.87.59

vākkāmablūṃ strīṃ sarānte tārāḥ pañca prakīrtitāḥ /
tataḥ kuryādbhūṣaṇākhyaṃ nyāsamuktadiśā mune //

1.87.60

evaṃ nyastaśarīro 'sau dhyāyettripurabhairavīm /
sahasrabhānusaṃkāśāmaruṇakṣaumavāsasīm //

1.87.61

śiromālāmasṛgliptastanīṃ japavaṭīṃ karaiḥ /
vidyāmabhītiṃ ca varaṃ dadhatīṃ trīkṣaṇānanām //

1.87.62

dīkṣāṃ prāpya japenmantraṃ tattvalakṣaṃ jitendriyaḥ /
puṣpairbhānusahasrāṇi juhuyādbahmavṛkṣajaiḥ //

1.87.63

trimadhvaktaiḥ prasūnairvā karavīrasamudbhavaiḥ /
padmaṃ vasudalopetaṃ navayonyaṣṭakarṇikam //

1.87.64

icchādiśaktibhiryuktaṃ bhairavyāḥ pīṭhamarcayet /
icchā jñānā kriyā paścātkāminī kāmadāyinī //

1.87.65

ratipriyā madānandā navamī syānmanonmanī /
varadābhayadhāriṇyaḥ saṃproktā nava śaktayaḥ //

1.87.66

vāgbhavaṃ lohito rāyai śrīkaṇṭho lohito 'nalaḥ /
dīrghavānyai parā paścādaparāyau hasau yutaḥ //

1.87.67

sadāśivamahāpretaṅeṃtaṃ padmāsanaṃ namaḥ /
anena manunā dadyādāsanaṃ śrīgurukramam //

1.87.68

prāṅmadhyayonyantarāle pūjayetkalpayettataḥ /
pañcabhiḥ praṇavairmūrtiṃ tasyāmāvāhya devatām //

1.87.69

pūjayedagamoktena vidhānena samāhitaḥ /
tārāvākchaktikamalā hasakhūphreṃ hasauḥ smṛtāḥ //

1.87.70

vāmakoṇe yajeddevyā ratimindusamaprabhām /
sṛṇipāśadharāṃ saumyāṃ madavibhramavihvalām //

1.87.71

prītiṃ takṣiṇakoṇasthāṃ taptakāñcanasannibhām /
aṅkuśaṃ praṇataṃ dobhyāṃ dhārayantīṃ samarcayet //

1.87.72

agre manobhavāṃ raktāṃ raktapuṣpādyalaṅkṛtām /
ikṣukārmukapuṣpeṣudhāriṇīṃ sasmitānanām //

1.87.73

aṅgānyabhyarcayetpaścādyathāpūrvaṃ vidhānavit /
dikṣvagre ca nijairmantraiḥ pūjayedbāṇadevatāḥ //

1.87.74

hastābjairdhṛtapuṣpeṣupraṇāmāmṛtasaprabhāḥ /
aṣṭayoniṣvaṣṭaśaktīḥ pūjayetsubhagādikāḥ //

1.87.75

mātaro bhairavāṅkasthā madavibhramavihvalāḥ /
aṣṭapatreṣu saṃpūjyā yathāvatkusumādibhiḥ //

1.87.76

lokapālāṃstato dikṣu teṣāmastrāṇi tadbahiḥ /
pūrvajanmakṛtaiḥ puṇyairjñātvaināṃ paradevatām //

1.87.77

yo bhajeduktamārgeṇa sa bhavetsaṃpadāṃ padam /
evaṃ siddhamanurmantrī sādhayediṣṭamātmanaḥ //

1.87.78

juhuyādaruṇāṃbhoñjairadoṣairmadhurāplutaiḥ /
lakṣasaṃkhyaṃ tadarddhaṃ vā pratyahaṃ bhojayeddvijān //

1.87.79

vanitā yuvatī ramyāḥ prīṇayeddevatādhiyā /
homānte dhanadhānyādyaistoṣayedgurumātmanaḥ //

1.87.80

evaṃ kṛte jagadvaśyo ramāyā bhavanaṃ bhavet /
raktotpalaistrimadhvaktairaruṇairvā hayārijaiḥ //

1.87.81

puṣpaiḥ payonnaiḥ saghṛtairhemādviśvaṃ vaśaṃ nayet /
vāksiddhaṃ labhate mantrī palāśakusumairhutaiḥ //

1.87.82

karpūrāgurusaṃyuktaṃ guggulaṃ juhuyātsudhīḥ /
jñānaṃ divyamavāpnoti tenaiva sa bhavetkaviḥ //

1.87.83

kṣīrāktairamṛtākhaṇḍairhemaḥ sarvāpamṛtyujit /
dūrvābhaghirāyuṣe homaḥ kṣīrāktābhirdinatrayam //

1.87.84

girikarṇībhavaiḥ puṣpairbrāhmaṇānvaśayeddhutaiḥ /
kahlāraiḥ pārthivānpuṣpaistadvadhūḥ karṇikārajaiḥ //

1.87.85

mallikākusumairhutvā rājaputrānvaśaṃ nayet /
koraṇṭakusumairvaiṃśyānvṛṣalānpāṭalodbhavaiḥ //

1.87.86

anulomāṃ vilomāntasthitasādhyāhvayānvitam /
mantramuccārya juhuyānmantrī madhuralolitaiḥ //

1.87.87

sarṣapairmadhusaṃmiśrairvaśayetpārthivān kṣaṇāt /
anenaiva vidhānena tatpatnīstatsutānapi //

1.87.88

jātibilvabhavaiḥ puṣpairmadhuratrayasaṃyutaiḥ /
naranārīnarapatīnhomena vaśayetkramāt //

1.87.89

mālatībakulodbhūtaiḥ puṣpaiścandanalolitaiḥ /
juhuyātkavitāṃ mantrī labhate vatsarāntare //

1.87.90

madhuratraghayasaṃyuktaiḥ phalairbilvasamudbhavaiḥ /
juhuyādvāśayellokaṃ śriyaṃ prāpnoti vāñchitām //

1.87.91

sājyamannaṃ prajuhuyādbhavedannasamṛddhimān /
kastūrīkuṅkumopetaṃ karpūraṃ juhuyādvaśī //

1.87.92

kandarpādadhikaṃ sadyaḥ saindaryamadhigacchati /
lājānprajuhuyānmantrī dadhikṣīramadhuplutān //

1.87.93

vijitya rogānakhilānsa jīveccharadāṃ śatam /
pādadvayaṃ malayajaṃ pādaṃ kuṅkumakesaram //

1.87.94

pādaṃ gorocanāntāni trīṇi piṣṭvāhimāṃbhasā /
vidadhyāttilakaṃ bhāle yānpaśyedyairvilokyate //

1.87.95

yānspṛśetspṛśyate yairvā vaśyāḥ syustasya te 'cirāt /
karpūrakapicorāṇi samabhāgāni kalpayet //

1.87.96

caturbhujā jaṭāmāṃsī tāvatī rocanā matā /
kuṅkumaṃ samabhāgaṃ syāddigbhātaṃ candanaṃ matam //

1.87.97

agururnavabhāgaṃ syāditibhāgakrameṇa ca /
himādbhiḥ kanyayā piṣṭametatsarvaṃ susādhitam //

1.87.98

ādāya tilakaṃ bhāle kuryyādbhūmipatīnnarān /
vanitāmadagarvāḍhyā madonmattānmatandajān //

1.87.99

siṃhavyāghrānmahāsarpānbhūtavetālarākṣasān /
darśanādeva vaśayettilakaṃ dhārayannaraḥ //

1.87.100

ityeṣā bhairavī proktā hyavatārāntaraṃ śṛṇu /
vāṅmāyā kamalā tāro namonte bhagavatyatha //

1.87.101

śrīmātaṅgeśvari vadetsarvajanamanohari /
sarvādisukharājyante sarvādisukharañjanī //

1.87.102

sarvarājavaśaṃ paścātkarisarvapadaṃ vadet /
strīpuruṣavaśaṃ sṛṣṭividyākrodhinikānvitā //

1.87.103

sarvaṃ duṣṭamṛgavaśaṃ karisarvapadaṃ tataḥ /
sarvasattvavaśaṅkarisarvalokaṃ tataḥ param //

1.87.104

amukaṃ me vaśaṃ paścādānayānalasundarī /
aṣṭāśītyakṣaro mantro munyādyā bhairavīgatāḥ //

1.87.105

nyāsānmantrī tanau kuryādvakṣyamāṇānyathākramam /
śirolalāṭabhrūmadhye tālukaṇṭhagalorasi //

1.87.106

anāhate bhujadvandve jaṭhare nābhimaṇḍale /
svādhiṣṭhāne guptadeśe pādayordakṣavāmayoḥ //

1.87.107

mūlādhāre gude nyasyetpadānyaṣṭādaśa kramāt /
guṇaikadvicatuḥ ṣaḍbhirvasuparvanavāṣṭabhiḥ //

1.87.108

nandapaṅktyaṣṭavedāgnicandrayugmaguṇā kṣibhiḥ /
yadukḷptiriyaṃ proktā mantravarṇairyathākramam //

1.87.109

ratyādyā mṛlahṛdayabhrumadhyeṣu vicakṣaṇaḥ /
vākśaktilakṣmībījādyā mātaṅgyantāḥ pravinyaset //

1.87.110

śirovadanahṛdguhyapādeṣu vidhinā nyaset /
hṛllekhāṃ gaganāṃ raktāṃ bhūyo mantrī karālikām //

1.87.111

mahocchuṣmāṃ svanāmādivarṇabījapuraḥ sarāḥ /
mātaṅgyantāḥ ṣaḍaṅgāni tataḥ kurvīta sādhakaḥ //

1.87.112

varṇaiścaturviṃśatibhirhṛttrayodaśabhiḥ śiraḥ /
śikhāṣṭādaśabhiḥ proktā varma tāvadbhirakṣaraiḥ //

1.87.113

syāttrayodaśabhirnetraṃ dvābhyāmastraṃ prakīrtitam /
bāṇanyāsaṃ tataḥ kuryādbhairavīproktavartmanā //

1.87.114

mātaṅgīpadayoścānyaṃ manmathānvadanāṃśayoḥ /
pārsvakaṭyornābhideśe kaṭipārśvāṃśake punaḥ //

1.87.115

bījatrayādikānmantrī manmathaṃ makaradhvajam /
madanaṃ puṣpadhanvānaṃ pañcamaṃ kusumāyudham //

1.87.116

ṣaṣṭhaṃ kandarpanāmānaṃ manobhavaratipriyau /
mātaṅgyantāstato nyasyetsthāneṣveteṣu mantravit //

1.87.117

kusumā mekhalā caiva madanā madanā turā /
madanavegā sambhavā ca bhuvanapālendurekhikā //

1.87.118

anaṅgapadapūrvāśca mātaṅgyantāḥ samīritāḥ /
vinyastavyāstato mūle 'dhiṣṭhāne maṇipūrake //

1.87.119

hṛtkaṇṭhāsye bhruvormadhye mastake cāpi matriṇā /
ādye lakṣmīsarasvatyau ratiḥ prītiśca kṛttikā //

1.87.120

śāntiḥ puṣṭiḥ punastuṣṭimārtagaṃpadaśekharā /
mūlamantraṃ pṛthaṅnyasyennijamūrddhani mantravit //

1.87.121

ādhāradeśe 'dhiṣṭhāne nābhau paścādanāhate /
kaṇṭhadeśe bhravormadhye bindau bhūyaḥ kalā padoḥ //

1.87.122

nirodhikāyāmarddhendunāde nādāntayoḥ punaḥ /
unnatāṃseṣu vaktre ca dhruvamaṇḍalake śive //

1.87.123

mātaṅgyantāḥ pravinyasye dvāmāṃ jyeṣṭhamataḥ param /
raudrīṃ praśāntāṃ śraddhākhyāṃ punarmāheśvarīmatha //

1.87.124

kriyāśaktiṃ sulakṣmīṃ ca sṛṣṭiṃ saṃjñāṃ ca mohinīm /
pramathāśvāsinīṃ vidyullatāṃ cicchaktimapyatha //

1.87.125

tataśca sundarīṃ nindāṃ nandabuddhimimāḥ kramāt /
śirobhālahṛdādhāreṣvetā bījatrayādhikāḥ //

1.87.126

mātaṅgyādyāḥ pravinyasyedyathāvaddeśikottamaḥ /
mātaṅgīṃ mahadādyāṃ tāṃ mahālakṣmīpadādikām //

1.87.127

siddhalakṣmīpadādyāṃ ca mūlamādhāramaṇḍalam /
nyasettenaiva kurvīta vyāpakaṃ deśikottamaḥ //

1.87.128

evaṃ nyastaśarīro 'sau cintayenmantradevatām /
śyāmāṃ śukoktiṃ śṛṇvantīṃ nyastaikāṅghriśiroruhām //

1.87.129

śaśikhaṇḍadharāṃ vīṇāṃ vādayantīṃ madhūnmadām /
raktāṃśukāṃ ca kahlāramālāśobhitacūlikām //

1.87.130

śaṅkhapatrāṃ tu mātaṅgīṃ citrakodbhāsimastakām /
ayutaṃ prajapenmantraṃ taddaśāṃśaṃ madhūkajaiḥ //

1.87.131

puṣpaistrimadhuropetairjuhuyānmantrasiddhaye /
trikoṇakarṇikaṃ padmamaṣṭapatraṃ prakalpayet //

1.87.132

aṣṭapatrāvṛtaṃ bāhye vṛtaṃ ṣoḍaśabhirdalaiḥ /
caturasrīkṛtaṃ bāhye kāntyā dṛṣṭimanoharam //

1.87.133

etasminpūjayetpīṭhe navaśaktīḥ kramādimāḥ /
vibhūtipūrvāḥ pūrvoktā mātaṅgīpadapaścimāḥ //

1.87.134

sarvānte śaktikamalāsanāya nama ityatha /
vāksatyalakṣmī bījādya uktaḥ pīṭhārcane manuḥ //

1.87.135

mūlena mūrtiṃ saṃkalpya tasyāmāvāhya devatām /
arcayedvidhinānena vakṣyamāṇena mantravit //

1.87.136

ratyādyāstriṣu koṇeṣu pūjayetpūrvavatsudhīḥ /
hṛhṛllekhāḥ pañcapūjyā madhye dikṣu ca mantriṇā //

1.87.137

pāśāṅkuśābhayābhīṣṭadhāriṇyo bhūtasaprabhāḥ /
aṅgāni pūjayetpaścādyathāpūrvaṃ vidhānavit //

1.87.138

bāṇānabhyarcayeddikṣu pañcamaṃ purato yajet /
dalamadhye 'tha saṃpūjyā anaṅgakusumādikāḥ //

1.87.139

pāśāṅkuśābhayābhīṣṭadhāriṇyo 'ruṇavigrahāḥ /
patrāgreṣu punaḥ pūjyā lakṣmyādyā vallakīkarāḥ //

1.87.140

bahiraṣṭadaleṣvarcyā manmathādyā madoddhatāḥ /
aparāṅgā niṣaṅgādyāḥ puṣpāstreṣudhanurddharāḥ //

1.87.141

patrasthā mātaraḥ pūjyā brāhmādyāḥ proktalakṣaṇāḥ /
tadagreṣvarcayedvidvānasitāṅgādibhairavān //

1.87.142

punaḥ ṣoḍaśa patreṣu pūjyāḥ ṣoḍaśa śaktayaḥ /
vāmādyāḥ kalavīṇābhirgāyantyaḥ śyāmavigrahāḥ //

1.87.143

caturasre caturdikṣu catasraḥ pūjayetpunaḥ /
mātaṅgyādyāmadonmattā vīṇollasitapāṇayaḥ //

1.87.144

āgneyakoṇe vighneśaṃ durgāṃ naiśācareḥ yajet /
vāyavye baṭukān paścādīśāne kṣetrapaṃ yajet //

1.87.145

lokapālā bahiḥ pūjyā vajrādyairāyudhaiḥ saha /
mantre 'sminsaṃdhite mantrī sādhayediṣṭamātmanaḥ //

1.87.146

mallikājātipunnāgairhemādbhāgyālayo bhavet /
phalaurbilyasamudbhūtaistatpatrairvā hutādbhavet //

1.87.147

rājaputrasya rājyāptiḥ paṅkajaiḥ śriyamāpnuyāt /
utpalairvaśayedviśvaṃ kṣārairmadhvāśritaiḥ striyam //

1.87.148

vañjulasya samidbhomo vṛṣṭiṃ vitanute 'cirāt /
kṣīrāktairamṛtākhaṇḍairhemānnāśayati jvaram //

1.87.149

dūrvābhirāyurāpnoti tandulairdhanavānbhavet /
kadaṃbairvaśyamāpnoti sarvaṃ trimadhuraplutam //

1.87.150

nandyāvartabhavaiḥ puṣpairhemo vāksiddhidāyakaḥ /
niṃbaprasūnairjuhuyādīpsitaśrīsamṛddhaye //

1.87.151

palāśakusumairhemāttejasvī jāyate naraḥ /
candanāgurukastūrī candrakuṅkumarocanāḥ //

1.87.152

vaśyāya ca priyatvāya hutāśca tilakīkṛtāḥ /
nirguṇḍīmūlahomena nigaḍānmucyate naraḥ //

1.87.153

niṃbatailānvitairloṇairhemaḥ śatruvināśanaḥ /
haridrācūrṇasaṃmiśrairlavaṇaiḥ staṃbhayejjagat //

1.87.154

mātaṅgīsiddhavidyaiṣā proktā te dvijasattama /
avatārāntaraṃ bhūyo varṇayāmi niśāmaya //

1.87.155

dīpakāprīticandrāḍhyā dvidhā cedrañjitāpunaḥ /
vativahnipriyāmantro dhūmāvatyā gajākṣaraḥ //

1.87.156

pippalādo muniśchando nivṛddhūmāvatīśvarī /
bījena ṣaḍdīrghajātiyuktena parikalpayet //

1.87.157

tato dhūmāvatīṃ dhyāyecchatrunigrahakāriṇīm /
vivarṇāṃ cañcalāṃ duṣṭāṃ dīrghāṃ ca malināṃbarām //

1.87.158

vimuktakuntalāṃ sūkṣmāṃ vidhavāṃ viraladvijām /
kaṅkadhvajarathārūḍhāṃ pralaṃbitapayodharam //

1.87.159

sūryahastāṃ nirukṣāṅkadhṛtahastāṃbarānvitām /
pravṛddhalomāṃ tu bhṛśaṃ kuṭilākuṭilekṣaṇām //

1.87.160

kṣutpipāsārditāṃ nityaṃ bhayadāṃ kalahapriyām /
evaṃvidhāṃ tu saṃcintya namaḥ svāhā phaḍantakam //

1.87.161

bījaṃ sādhyopari nyasya tasminsthāpya śavaṃ japet /
avaṣṭabhya śavaṃ śatrunāmnātha prajapenmanum //

1.87.162

soṣṇīṣakañcuko vidvānkṛṣṇe bhūte divāniśam /
upavāsī śmaśāne vā vipine śūnyamandire //

1.87.163

mantrasya siddhyai yatavāgdhyāyandevīṃ nirantaram /
sahasrādūrddhūtaḥ śatrurjvareṇa parigṛhyate //

1.87.164

pañcagavyena śāntiḥ syājjvarasya payasāpi vā /
mantrādyā kṣaramālikhya śatrūnāma tataḥ param //

1.87.165

dvitīyaṃ manuvarṇaṃ ca śatrunāmaivamālikhet /
sarvaṃ manudiksahasrajapācchavamṛtirbhavet //

1.87.166

dagdhvā kaṅkaṃ śyaśānāgnau tadbhasmādāya mantravit /
virodhināmnāṣṭaśataṃ japtamuccāṭanaṃ ripoḥ //

1.87.167

śmaśānabhasmanā kṛtvā śavaṃ tasyopari nyaset /
virodhināmasaṃruddhaṃ kṛṣṇe pakṣe samuccaret //

1.87.168

mahiṣīkṣīradhūpaṃ ca dadyācchatruvipatkaram /
evaṃ saṃkṣepataḥ proktaṃ avatāracatuṣṭayam //

1.87.169

durgāyā jagadaṃbāyāḥ kiṃ punaḥ praṣṭumicchasi //

1.87.169.p1

iti śrībṛhannāradīyapurāṇe pūrvabhāge bṛhadupākhyāne tṛtīyapāde durgāmantracatuṣṭayavarṇanaṃ nāma saptāśītitamo 'dhyāyaḥ

Linked texts (13)