Pramāṇa · Search · About · API

Naradapurana 1.93

Nāradapurāṇa 1.93

Language
Sanskrit

Contents

1.93.1

brahmovāca
śṛṇu putra pravakṣyāmi purāṇaṃ padmasaṃjñakam /
mahatpuṇyapradaṃ nṝṇāṃ śṛṇvatāṃ paṭhatāṃ mudā //

1.93.2

yathā cañcendriyaḥ sarvaḥ śarīrīti nigadyate /
tathedaṃ pañcabhiḥ khaṇḍairuditaṃ pāpanāśanam //

1.93.3

pulastyena tu bhīṣmāya sṛṣṭyādikramato dvija /
nānākhyānetihāsādyairyatrokto dharmavistaraḥ //

1.93.4

puṣkarasya ca māhātmyaṃ vistareṇa prakīrtitam /
brahmayajñavidhānaṃ ca vedapāṭhādilakṣaṇam //

1.93.5

dānānāṃ kīrtanaṃ yatra vratānāṃ ca pṛthakpṛthak /
vivāhaḥ śailajāyāścatārakākhyānakaṃ mahat //

1.93.6

māhātmyaṃ ca gavādīnāṃ kīrtitaṃ sarvapuṇyadam /
kālakeyādidaityānāṃ vadho yatra pṛthakpṛthak //

1.93.7

grahāṇāmarcanaṃ dānaṃ yatra proktaṃ dvijottama /
tatsṛṣṭikhaṇḍamuddiṣṭaṃ vyāsena sumahātmanā //

1.93.8

pitṛmātrādipūjyatve śivaśarmakathā purā /
suvratasya kathā paścādvṛtrasya ca vadhastathā //

1.93.9

pṛthorvainasya cākhyānaṃ sunūthāyāḥ kathā tathā /
sukalākhyānakaṃ caiva dharmākhyānaṃ tataḥ param //

1.93.10

pitṛśuśrūṣaṇākhyānaṃ nahuṣasya kathā tataḥ /
yayāticaritaṃ caiva gurutīrthanirūpaṇam //

1.93.11

rājñā jaiminisaṃvādo bahvāścaryyakathāyutaḥ /
kathā hyaśokasuṃdaryāhuṇḍadaityavadhānvitā //

1.93.12

kāmodākhyānakaṃ tatra vihuṇḍavadhasaṃyutam /
kuñjalasya ca saṃvādaścyavanena mahātmanā //

1.93.13

siddhākhyānaṃ tataḥ proktaṃ khaṇḍasyāsya phalohanam /
sūtaśaunakasaṃvādaṃ bhūmikhaṇḍamidaṃ smṛtam //

1.93.14

brahmāṇḍotpattiruditā yatrarṣibhiśca sautinā /
sabhūmilokasaṃsthānaṃ tīrthākhyānaṃ tataḥ param //

1.93.15

narmadotpattikathanaṃ tattīrthānāṃ kathāḥ pṛthak /
kurukṣetrāditīrthānāṃ kathā puṇyā prakīrtitā //

1.93.16

kālindīpuṇyakathanaṃ kāśīmāhātmyavarṇanam /
gayāyāścaiva māhātmyaṃ prayāgasya ca puṇyakam //

1.93.17

varṇāśramānurodhena karmayoganirūpaṇam /
vyāsajaminisaṃvādaḥ puṇyakarmakathānvitaḥ //

1.93.18

samudramathanākhyānaṃ vratākhyānaṃ tataḥ param /
ūrjjapañcāhamāhāmyaṃ stotraṃ sarvāparādhanut //

1.93.19

etatsvargābhidhaṃ vipra sarvapātakanāśanam /
rāmāśvamedhaṃ prathamaṃ rāmarājyābhiṣecanam //

1.93.20

agastyādyāgamaścaiva paulastyānvayakīrttanam /
aśvamedhopadeśaśca hayacaryā tataḥ param //

1.93.21

nānārājakathāḥ puṇyā jagannāthānuvarṇanam /
vṛndāvanasya māhātmyaṃ sarvapāpapraṇāśanam //

1.93.22

nityalīlānukathanaṃ yatra kṛṣṇāvatāriṇaḥ /
mādhavasnānamāhātmyaṃ snānadānārcane phalam //

1.93.23

dharāvarāhasaṃvādo yamabrahmaṇayoḥ kathā /
saṃvādo rājadūtānāṃ kṛṣṇastotranirūpaṇam //

1.93.24

śivaśaṃbhusamāyogī dadhīcākhyānakaṃ tataḥ /
bhasmamāhātmyamatulaṃ śivamāhātmyamuttamam //

1.93.25

devarātasutākhyānaṃ purāṇajñapraśaṃsanam /
gautamākhyānakaṃ caiva śivagītā tataḥ smṛtā //

1.93.26

kalpāntare rānakathā bhāradvājāśramasthitā /
pātālakhaṇḍametaddhi śṛṇvatāṃ paṭhatāṃ sadā //

1.93.27

sarvapāpapraśamanaṃ sarvābhīṣṭaphalapradam /
parvatākhyānakaṃ pūrvaṃ gaurthai proktaṃ śivena vai //

1.93.28

jālandharakathā paścācchrīśailādyanukīrtanam /
sagarasya kathā puṇyā tataḥ paramudīritam //

1.93.29

gaṅgāprayāgakāśīnāṃ gayāyāścādhipuṇyakam /
annādi dānamāhātmyaṃ tanmahādvādaśīvratam //

1.93.30

caturviṃśaikādaśīnāṃ māhātmyaṃ pṛthagīritam /
viṣṇudharmasamākhyānaṃ viṣṇunāmasahasrakam //

1.93.31

kārtikavratamāhātmyaṃ māghasnānaphalaṃ tataḥ /
jambṛdvīpasya tīrthānāṃ māhātmyaṃ pāpanāśanam //

1.93.32

sābhramatyāśca māhātmyaṃ nṛsiṃhotpattivarṇanam /
devaśarmādikākhyānaṃ gītāmāhātmyavarṇanam //

1.93.33

bhaktyākhyānaṃ ca māhātmyaṃ śrīmadbhāgavatasya ha /
indraprasthasya māhātmyaṃ bahutīrthakathānvitam //

1.93.34

mantraratnābhidhānaṃ ca tripādbhūtyanuvarṇanam /
avatārakathāḥ puṇyā matsyādīnāmataḥ param //

1.93.35

rāmanāmaśataṃ divyaṃ tanmāhātmyaṃ ca vāḍava /
parīkṣaṇaṃ ca bhṛguṇā śrīviṣṇorvaibhavasya ca //

1.93.36

ityetaduttaraṃ khaṇḍaṃ pañcamaṃ sarvapuṇyadam /
pañcakhaṇḍayutaṃ pādmaṃ yaḥ śṛṇoti narottamaḥ //

1.93.37

sa labhedvaiṣṇavaṃ dhāma bhuktvā bhogānihepsitān /
etadvai pañcapañcāśatsahasraṃ padmasaṃjñakam //

1.93.38

purāṇaṃ lekhayitvā vai jyeṣṭhyāṃ svarṇābjasaṃyutam /
yaḥ pradadyātsusatkṛtya purāṇajñāya mānada //

1.93.39

sa yāti vaiṣṇavaṃ dhāma sarvadevanamaskṛtaḥ /
padmānukramaṇīmetāṃ yaḥ paṭhecchṛṇuyāttathā //

1.93.40

so 'pi padmapurāṇasya labhecchravaṇajaṃ phalam //

1.93.40.p1

iti śrībṛhannāradīyapurāṇe pūrvabhāge bṛhadupākhyāne caturthapāde padmapurāṇānukramaṇikāvarṇanaṃ nāma trinavatitamo 'dhyāyaḥ