Naradapurana 1.94
Nāradapurāṇa 1.94
- Language
- Sanskrit
Contents
- 1.94.24 — 1 part
1.94.1
śrībrahmovāca
śṛṇu vatsa pravakṣyāmi purāṇaṃ vaiṣṇavaṃ mahat /
trayoviṃśatisahasraṃ sarvapātakanāśanam //
1.94.2
yatrādibhāge nirviṣṭāḥ ṣaḍaṃśāḥ śaktijena ha /
maitreyāyādime tatra purāṇasyāvatārikām //
1.94.3
ādikāraṇasargaśca devādīnāṃ ca saṃbhavaḥ /
samudramathanākhyānaṃ dakṣādīnāṃ tato 'nvayaḥ //
1.94.4
dhruvasya caritaṃ caiva pṛthoścaritameva ca /
pracetasaṃ tathākhyānaṃ prahlādasya kathānakam //
1.94.5
pṛthagrājyādhikārākhyā prathamoṃ'śaitīritaḥ /
priyavratānvayākhyākhyānaṃ dvīpavarṣanirūpaṇam //
1.94.6
pātālanarakākhyānaṃ saptasvarganirūpaṇam /
sūryādivārakathanaṃ pṛthaglakṣaṇasaṃyutam //
1.94.7
caritaṃ bharatasyātha muktimārganidarśanam /
nidāghaṛbhusaṃvādo dvitīyoṃśa udāhṛtaḥ //
1.94.8
manvantarasamākhyānaṃ vedavyāsāvatārakam /
narakoddhārakaṃ karma gaditaṃ ca tataḥ param //
1.94.9
sagarasyaurvasaṃvāde sarvadharmanirūpaṇam /
śrāddhakalpaṃ tathoddiṣṭaṃ varṇāśramanibandhanam //
1.94.10
sadācāraśca kathito māyāmohakathā tataḥ /
tṛtīyoṃ'śo 'yamuditaḥ sarvapāpapraṇāśanaḥ //
1.94.11
sūryavaṃśakatha puṇyā somavaṃśānukīrtanam /
caturtheṃ'śemuniśreṣṭha nānārājakathānvitam //
1.94.12
kṛṣṇāvatārasaṃpraśno gokulīyā kathā tataḥ /
pūtanādivadho bālye kaumāre 'ghādihiṃsanam //
1.94.13
kaiśore kaṃsahananaṃ māthuraṃ caritaṃ tathā /
tatastu yauvane proktā līlā dvāravatībhavā //
1.94.14
sarvadaityavadho yatra vivāhāśca pṛthagvidhāḥ /
yatra sthitvājagannāthaḥ kṛṣṇo yogeśvareśvaraḥ //
1.94.15
bhūbhāraharaṇaṃ cakre pareṣāṃ hananādibhiḥ /
aṣṭāvakrīyamākhyānaṃ pañcamoṃ'śa itīritaḥ //
1.94.16
kalijaṃ caritaṃ proktaṃ cāturvidhyaṃ layasya ca /
brahmajñānasamuddeśaḥ khāṇḍikyasya nirūpitaḥ //
1.94.17
keśidhvajena cetyeṣa ṣaṣṭhāeṃ'śaḥ parikīrtitaḥ /
ataḥ paraṃ tu sūtena śaunakādibhirādarāt //
1.94.18
pṛṣṭena coditāḥ śaśvadviṣṇudharmottarāhvayāḥ /
nānādharmakathāḥ puṇyā vratāni niyamā yamāḥ //
1.94.19
dharmaśāstraṃ cārthaśāstraṃ vedāntaṃ jyotiṣaṃ tathā /
vaṃśākhyānaṃ prakaraṇāt stotrāṇi manavastathā //
1.94.20
nānāvidyāstathā proktāḥ sarvalokopakārikāḥ /
etadviṣṇupurāṇaṃ vai sarvaśāstrārthasaṃgraham //
1.94.21
vārāhakalpavṛttāntaṃ vyāsena kathitaṃ tviha /
yo naraḥ paṭhate bhaktyā yaḥ śṛṇoti ca sādaram //
1.94.22
tāvubhau viṣṇulokaṃ hi vrajetāṃ bhuktabhogakau /
tallikhitvā ca yo dadyādāṣāḍhyāṃ ghṛtadhenunā //
1.94.23
sahitaṃ viṇubhaktāya purāṇārthavidedvija /
sa yāti vaiṣṇavaṃ dhāma vimānenārkavarcasā //
1.94.24
yaśca viṣṇupurāṇasya samanukramaṇīṃ dvija /
kathayecchṛṇuyādvāpi sa purāṇaphalaṃ labhet //
1.94.24.p1
iti śrībṛhannāradīyapurāṇe pūrvabhāge bṛhadupākhyāne caturthapāde viṣṇupurāṇānukramaṇīnirūpaṇaṃ nāma caturnavatitamo 'dhyāyaḥ