[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 1.95 # Naradapurana 1.95 Nāradapurāṇa 1.95 - **Language:** Sanskrit ## Contents - [1.95.20](https://indike.org/pramana/in.purana.narada.1.95.20) — 1 part ### [1.95.1](https://indike.org/pramana/in.purana.narada.1.95.1) brahmovāca śṛṇu vipra pravakṣyāmi purāṇaṃ vāyavīyakam / yasmiñcchrute labhaddhāma rudrasya paramātmanaḥ // ### [1.95.2](https://indike.org/pramana/in.purana.narada.1.95.2) caturviṃśatisāhasraṃ tatpurāṇaṃ prakīrtitam / śvetakalpaprasaṃgena dharmānatrāha mārutaḥ // ### [1.95.3](https://indike.org/pramana/in.purana.narada.1.95.3) tadbāyavīyanuditaṃ bhāgadvayasamanvitam / sargādilakṣaṇaṃ yatra proktaṃ vipra savistaram // ### [1.95.4](https://indike.org/pramana/in.purana.narada.1.95.4) manvantareṣu vaṃśāśca rājñāṃ ye yatra kīrtitāḥ / gayāsurasya hananaṃ vistarādyatra kīrtitam // ### [1.95.5](https://indike.org/pramana/in.purana.narada.1.95.5) māsānāṃ caiva māhātmyaṃ māghasyoktaṃ phalādhikam / dānadharmā rājadharmā vistareṇoditā stathā // ### [1.95.6](https://indike.org/pramana/in.purana.narada.1.95.6) bhūpātālakakubvyomacāriṇāṃ yatra nirṇayaḥ / vratādīnāṃ ca pūrvo 'yaṃ vibhāgaḥ samudāhṛtaḥ // ### [1.95.7](https://indike.org/pramana/in.purana.narada.1.95.7) uttare tasya bhāgetu narmadātīrthavarṇanam / śivasya saṃhitoktā vai vistareṇa munīśvara // ### [1.95.8](https://indike.org/pramana/in.purana.narada.1.95.8) yo devaḥ sarvadevānāṃ durvijñeyaḥ sanātanaḥ / sa tu sarvātmanā yasyāstīre tiṣṭhati saṃtatam // ### [1.95.9](https://indike.org/pramana/in.purana.narada.1.95.9) idaṃ brahmā hārīridaṃ sākṣāccedaṃ paro haraḥ / idaṃ brahma nirākāraṃ kaivalyaṃ narmadājalam // ### [1.95.10](https://indike.org/pramana/in.purana.narada.1.95.10) dhruvaṃ lokahitārthāya śivena svaśarīrataḥ / śaktiḥ kāpi saridṛpā reveyamavatāritā // ### [1.95.11](https://indike.org/pramana/in.purana.narada.1.95.11) ye vasaṃtyuttare kūle rudrasyānucarā hi te / vasaṃti yāmyatīre ye lokaṃ te yānti vaiṣṇavam // ### [1.95.12](https://indike.org/pramana/in.purana.narada.1.95.12) oṅkāreśvaramārabhyayāvatpaścimasāgaraḥ / saṃgamāḥ pañca ca triṃśannadīnāṃ pāpanāśanī // ### [1.95.13](https://indike.org/pramana/in.purana.narada.1.95.13) daśaikamuttare tīre trayoviṃśatirdakṣiṇe / pañcatriṃśattamaḥ prokto revāsāgarasagamaḥ // ### [1.95.14](https://indike.org/pramana/in.purana.narada.1.95.14) saṃgamaiḥ sahitānyeva revātīradvaye 'pi ca / catuḥśatāni tīrthāni prasiddhāni ca saṃti hi // ### [1.95.15](https://indike.org/pramana/in.purana.narada.1.95.15) ṣaṣṭitīrthasahasrāṇi ṣaṣṭikoṭyo munīśvara / saṃti cānyāni revāyāstīrayugme pade pade // ### [1.95.16](https://indike.org/pramana/in.purana.narada.1.95.16) saṃhiteyaṃ mahāpuṇyā śivasya paramātmanaḥ / narmadācaritaṃ yatra vāyunā parikīrtitam // ### [1.95.17](https://indike.org/pramana/in.purana.narada.1.95.17) likhitvedaṃ purāṇaṃ tu guḍadhenusamanvitam / śrāvaṇyāṃ yo dadedbhaktyā brāhmaṇāya kuṭuṃbine // ### [1.95.18](https://indike.org/pramana/in.purana.narada.1.95.18) rudraloke vasetso 'pi yāvadindrāścaturddaśa / yaḥ śrāvayedvā śṛṇuyādvāyavīyamidaṃ naraḥ // ### [1.95.19](https://indike.org/pramana/in.purana.narada.1.95.19) niyamena haviṣyāśī sa rudro nātra saṃśayaḥ / yaścānukramaṇīmetāṃ śṛṇoti śrāvayettathā // ### [1.95.20](https://indike.org/pramana/in.purana.narada.1.95.20) so 'pi sarvapurāṇasya phalaṃ śravaṇajaṃ labhet // ### [1.95.20.p1](https://indike.org/pramana/in.purana.narada.1.95.20.p1) iti śrībṛhannāradīyapurāṇe pūrvabhāge bṛhadupākhyāne caturthapāde vāyupurāṇānukramaṇīnirūpaṇaṃ nāma pañcanavatitamo 'dhyāyaḥ ## Linked texts (1) - [Revākhaṇḍa (Vāyupurāṇa)](https://indike.org/pramana/in.purana.vayu.revakhanda.232.16) — Sanskrit --- Source: [https://indike.org/pramana/in.purana.narada.1.95](https://indike.org/pramana/in.purana.narada.1.95) · Pramāṇa