Naradapurana 1.96
Nāradapurāṇa 1.96
- Language
- Sanskrit
Contents
- 1.96.24 — 1 part
1.96.1
brahmovāca
marīce śṛṇu vakṣyāmi vedavyāsena yatkṛtam /
śrīmadbhāgavataṃ nāma purāṇaṃ brahmasaṃmitam //
1.96.2
tadaṣṭādaśasāhasraṃ kīrtitaṃ pāpanāśanam /
surapādaparūpo 'yaṃ skandhairdvādaśabhiryutaḥ //
1.96.3
bhagavāneva viprendra viśvarūpīsamīritaḥ /
tatra tu prathamaskandhe sūtarṣīṇāṃ samāgame //
1.96.4
vyāsasya caritaṃ puṇyaṃ pāṇḍavānāṃ tathaiva ca /
parīkṣitamupākhyānamitīdaṃ samudāhṛtam //
1.96.5
parīkṣicchukasaṃvāde sṛṣṭidvayanirūpaṇam /
brahmanāradasaṃvāde devatācaritāmṛtam //
1.96.6
purāṇalakṣaṇaṃ caiva sṛṣṭikāraṇasaṃbhavaḥ /
dvitīyo 'yaṃ samuditaḥ skandho vyāsena dhīmatā //
1.96.7
caritaṃ vidurasyātha maitreyeṇāsya saṃgamaḥ /
sṛṣṭiprakaraṇaṃ paścādbahmaṇaḥ paramātmanaḥ //
1.96.8
kāpilaṃ sāṃkhyamapyatra tṛtīyo 'yamudāhṛtaḥ /
satyāścaritamādau tu dhruvasya caritaṃ tataḥ //
1.96.9
pṛthoḥ puṇyasamākhyānaṃ tataḥ prācīnabarhiṣam /
ityeṣa turyo gadito visarge skandha uttamaḥ //
1.96.10
priyavratasya caritaṃ tadvaṃśyānāṃ ca puṇyadam /
brahmāṇḍāntargatānāṃ ca lokānāṃ varṇanaṃ tataḥ //
1.96.11
narakasthitirityeṣa saṃsthāne pañcamo mataḥ /
ajāmilasya caritaṃ dakṣasṛṣṭinirūpaṇam //
1.96.12
vṛtrākhyānaṃ tataḥ paścānmarutāṃ janma puṇyadam /
ṣaṣṭho 'yamuditaḥ skandhovyāsena paripoṣaṇe //
1.96.13
prahlādacaritaṃ puṇyaṃ varṇāśramanirūpaṇam /
saptamo gadito vatsa vāsanākarmakīrtane //
1.96.14
gajendramokṣaṇākhyānaṃ manvantaranirūpaṇe /
samudramathanaṃ caiva balivaibhavabandhanam //
1.96.15
matsyāktāracaritamaṣṭamo 'yaṃ prakīrtitaḥ /
sūryavaṃśasamākhyānaṃ somavaṃśanirūpaṇam //
1.96.16
vaṃśyānucarite prokto navamo 'yaṃ mahāmate /
kṛṣṇasya bālacaritaṃ kaumāraṃ ca vrajasthitiḥ //
1.96.17
kaiśoraṃ mathurāsthānaṃ yauvanaṃ dvārakāsthitiḥ /
bhūbhāraharaṇaṃ cātra nirodhe daśamaḥ smṛtaḥ //
1.96.18
nāradena tu saṃvādo vasudevasya kīrtitaḥ /
yadośca dattātreyeṇa śrīkṛṣṇonoddhavasya ca //
1.96.19
yādavānāṃ mithontaśca muktāvekādaśaḥ smṛtaḥ /
bhaviṣyakalinirddeśo mokṣo rājñaḥ parīkṣitaḥ //
1.96.20
vedaśākhāpraṇayanaṃ mārkaṇḍeyatapaḥkriyā /
saurī vibhūtiruditā sātvatī ca tataḥ param //
1.96.21
purāṇasaṃkhyākathanamāśraye dvādaśo hyayam /
ityevaṃ kathitaṃ vatsa śrīmadbhāgavataṃ tava //
1.96.22
vaktuḥ śrotuścopadeṣṭuranumoditureva ca /
sāhāyyakarturgaditaṃ bhaktibhuktivimuktidam //
1.96.23
prauṣṭhapadyāṃ pūrṇimāyāṃ hemasiṃhasamanvitam /
deyaṃ bhāgavatāyedaṃ dvijāyaprītipūrvakam //
1.96.24
saṃpūjya vastrahemādyairbhagavadbhaktimicchatā /
yo 'pyanukramaṇīmetāṃ śrāvayecchṛṇuyāttathā /
sa purāṇaśravaṇajaṃ prāpnoti phalamuttamam //
1.96.24.p1
iti śrībṛhannāradīyapurāṇe pūrvabhāge bṛhadupākhyāne caturthapāde śrīmadbhāgavatānukramaṇīnirūpaṇaṃ nāma ṣaṇṇavatitamo 'dhyāyaḥ
Linked texts (1)
- Devībhāgavatapurāṇa — Sanskrit