Naradapurana 1.97
Nāradapurāṇa 1.97
- Language
- Sanskrit
Contents
- 1.97.21 — 1 part
1.97.1
śrībrahmovāca
śṛṇu vipra pravakṣyāmi purāṇaṃ nāradīyakam /
pañcaviṃśatisāhasraṃ bṛhatkalpakathāśrayam //
1.97.2
sūtaśaunakasaṃvādaḥ sṛṣṭisaṃkṣepavarṇanam /
nānādharmakathāḥ puṇyāḥ pravṛtte samudāhṛtāḥ //
1.97.3
prāgbhāge prathame pāde sanakena mahātmanā /
dvitīye mokṣadharmākhye mokṣopāyanirūpaṇam //
1.97.4
vedāṅgānāṃ ca kathanaṃ śukotpattiśca vistarāt /
sanandanena gaditā nāradāya mahātmane //
1.97.5
mahātantre samuddiṣṭaṃ paśupāśavimokṣaṇam /
mantrāṇāṃ śodhanaṃ dīkṣāmantroddhāraśca pūjanam //
1.97.6
prayogāḥ kavacaṃ nāmasahasraṃ stotrameva ca /
gaṇeśasūryaviṣṇūnāṃ śivaśaktyoranukramāt //
1.97.7
sanatkumāramuninā nāradāya tṛtīyake /
purāṇalakṣaṇaṃ caiva pramāṇaṃ dānameva ca //
1.97.8
pṛthakpṛthak samuddiṣṭaṃ dānakālapuraḥsaram /
caitrādisarvamāseṣu tithīnāñcapṛthakpṛthak //
1.97.9
proktaṃ pratipadādīnāṃ vrataṃ sarvāghanāśanam /
sanātanena muninā nāradāya caturthake //
1.97.10
pūrvabhāgo 'yamudito bṛhadākhyānasaṃjñitaḥ /
asyottare vibhāge tu praśna ekādaśīvrate //
1.97.11
vasiṣṭhenātha saṃvādo māndhātuḥ parikīrtitaḥ /
rukmāṅgadakathā puṇyāmohinyutpattikarma ca //
1.97.12
vasuśāpaśca mohinyai paścāduddharaṇakriyā /
gaṅgākathā puṇyatamā gayāyātrānukīrtanam //
1.97.13
kāśyā māhātmyamatulaṃ puruṣottamavarṇanam /
yātrāvidhānaṃ kṣetrasya bahvākhyānasamanvitam //
1.97.14
prayāgasyātha māhātmyaṃ kurukṣetrasya tatparam /
haridvārasya cākhyānaṃ kāmodākhyānakaṃ tathā //
1.97.15
badarītīrthamāhātmyaṃ kāmākṣāyāstathaiva ca /
prabhāsasya ca māhātmyaṃ puṣkarākhyānakaṃ tataḥ //
1.97.16
gautamākhyānakaṃ paścādvedapādastavastataḥ /
gokarṇakṣetramāhātmyaṃ lakṣmaṇākhyānakaṃ tathā //
1.97.17
setumāhātmyakathanaṃ narmadātīrthavarṇanam /
avantyāścaiva māhātmyaṃ madhurāyāstataḥ param //
1.97.18
bṛndāvanasya mahimā paśorbrahmāntike gatiḥ /
mohinīcaritaṃ paścādevaṃ paścādevaṃ vai nāradīyakam //
1.97.19
yaḥ śṛṇoti naro bhaktyāśrāvayedvā samāhitaḥ /
sa yāti brahmaṇo dhāma nātra kāryā vicāraṇā //
1.97.20
yastvetadiṣupūrṇāyāṃ dhenūnāṃ saptakānvitam /
pradadyāddijarṃyāya saṃlabhenmokṣameva ca //
1.97.21
yaścānukramaṇīmetāṃ nāradīyasya varṇayet /
śṛṇuyadvaikacittena so 'pi svargagatiṃ labhet //
1.97.21.p1
iti śrībṛhannāradīyapurāṇe pūrvabhāge bṛhadupākhyāne caturthapāde nāradīyapurāṇānukramaṇīkathanaṃ nāma saptanavatitamo 'dhyāyaḥ
Linked texts (3)
- Mudgalapurāṇa — Sanskrit
- Garuḍapurāṇa — Vyāsa, Sanskrit
- Skanda Purāṇa (Kumāra Kavi) — Kumāra Kavi, Sanskrit