Naradapurana 1.99
Nāradapurāṇa 1.99
- Language
- Sanskrit
Contents
- 1.99.25 — 1 part
1.99.1
śrībrahmovāca
athātaḥ saṃpravakṣyāmi tavāgneyapurāṇakam /
īśānakalpavṛttāntaṃ vasiṣṭhāyānalo 'bravīt //
1.99.2
tatpañcadaśasāhasraṃ nānā caritamadbhutam /
paṭhatāṃ śṛṇvatāṃ caiva sarvapāpaharaṃ nṛṇām //
1.99.3
praśnaḥ pūrvaṃ purāṇasya kathā sarvāvatārajā /
sṛṣṭiprakaraṇaṃ cātha viṣṇupūjādikaṃ tataḥ //
1.99.4
agnikāryaṃ tataḥ paścānmantramudrādilakṣaṇam /
sarvadīkṣāvidhānaṃ ca abhiṣekanirūpaṇam //
1.99.5
lakṣaṇaṃ maṇḍalādīnāṃ kuśāpāmārjanaṃ tataḥ /
pavitrāropaṇavidhirdevālayavidhistataḥ //
1.99.6
śālagrāmādipūjā ca mūrtilakṣma pṛthakpṛthak /
nyāsādīnāṃ vidhānaṃ ca pratiṣṭhāpūrtakaṃ tataḥ //
1.99.7
vināyakādipūjā ca nānādīkṣāvidhiḥ param /
pratiṣṭhā sarvadevānāṃ brahmaṇḍasya nirūpaṇam //
1.99.8
gaṅgāditīrthamāhātmyaṃ dvīpavarṣānuvarṇanam /
ūrddhvādholokaracanā jyotiścakranirūpaṇam //
1.99.9
jyotiṣaṃ ca tataḥ proktaṃ śāstraṃ yuddhajayārṇavam /
ṣaṭkarma ca tataḥ proktaṃ mantramantrauṣadhīgaṇaḥ //
1.99.10
kubjikādisamarcatvaṃ ṣoḍhā nyāsavidhistathā /
koṭihomavidhānaṃ ca manvantaranirūpaṇam //
1.99.11
brahmacaryādidharmāṃśca śrāddhakalpavidhistataḥ /
grahayajñastataḥ proktovaidikasmārtakarma ca //
1.99.12
prāyaścittānukathanaṃ tithīnāṃ ca vratādikam /
vāravratānukathanaṃ nakṣatravratakīrtanam //
1.99.13
māsikavratanirddeśo dīpadānavidhistathā /
navavyūhārcanaṃ proktaṃ narakāṇāṃ nirūpaṇam //
1.99.14
vratānāṃ cāpi dānānāṃ nirūpaṇamihoditam /
nāḍīcakrasamuddeśaḥ saṃdhyāvidhiranuttamaḥ //
1.99.15
gāyatryarthasya nirddeśo liṅgastotraṃ tataḥ param /
rājyābhiṣekamantroktirddharmakṛtyaṃ ca bhūbhujām //
1.99.16
svapnādhyāyastataḥ proktaḥ śakunādinirūpaṇam /
maṇḍalādikanirddeṃśo ratnadīkṣāvidhistataḥ //
1.99.17
rāmoktanītinirddeśo ratnānāṃ lakṣaṇaṃ tataḥ /
dhanurvidyā tataḥ proktā vyavahārapradarśanam //
1.99.18
devāsuravimardākhyā hyāyurvedanirūpaṇam /
gajādīnāṃ cikitsā ca teṣāṃ śāntistataḥ param //
1.99.19
gonarādicikitsā ca nānāpūjāstataḥ param /
śāntayaścāpi vividhāśchandaḥ śāstramataḥ param //
1.99.20
sāhityaṃ ca tataḥ paścādekārṇādisamāhvayāḥ /
siddhaśabdānuśiṣṭiścakośaḥ sargādivargakaḥ //
1.99.21
pralayānāṃ lakṣaṇaṃ ca śārīrakanirūpaṇam /
varṇanaṃ narakāṇāṃ ca yogāśtramataḥ param //
1.99.22
brahmajñānaṃ tataḥ paścātpurāṇaśravaṇe phalam /
etadāgneyakaṃ vipra purāṇaṃ parikīrtitam //
1.99.23
tallikhitvā tu yo dadyātsuvarṇakalamānvitam /
tiladhenu yutaṃ cāpi mārgaśīrṣyāṃ vidhānataḥ //
1.99.24
purāṇārthavide so 'tha svargaloke mahīyate /
eṣānukramaṇī proktā tavāgneyasya muktidā //
1.99.25
śṛṇvatāṃ paṭhatāṃ caiva nṛṇāṃ ceha paratra ca //
1.99.25.p1
iti śrībṛhannāradīyapurāṇe pūrvabhāge bṛhadupākhyāne caturthapāde 'gnipurāṇānukramaṇīnirūpaṇaṃ nāmaikonaśatatamo 'dhyāyaḥ
Linked texts (1)
- Matsyapurāṇa — Vyāsa, Sanskrit