[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.10 # Naradapurana 2.10: athadaśamo'dhyāyaḥ Nāradapurāṇa 2.10 - **Language:** Sanskrit ## Contents - [2.10.68](https://indike.org/pramana/in.purana.narada.2.10.68) — 1 part ### athadaśamo'dhyāyaḥ ### [2.10.1](https://indike.org/pramana/in.purana.narada.2.10.1) vasiṣṭha uvāca tataḥ prāha viśālākṣī bharturvākyaṃ niśamya sā / satyamuktaṃ tvayā rājanputrasaukhyātparaṃ sukham // ### [2.10.2](https://indike.org/pramana/in.purana.narada.2.10.2) na bhavediha rājendra munīnāṃ bhāṣitaṃ yathā / tulyaṃ bhavati loke 'smin viṣṇvākhyasya parasya hi // ### [2.10.3](https://indike.org/pramana/in.purana.narada.2.10.3) putre bhārastvayā nyastaḥ saptadvīpasamudbhavaḥ / mārgī hiṃsāṃ parityajya yajñairiṣṭvā janārdanam // ### [2.10.4](https://indike.org/pramana/in.purana.narada.2.10.4) bhogaspṛhāṃ parityajya sevasya suranimnagām / etannyāyyaṃ bhavati bho na nyāyyo mṛganigrahaḥ // ### [2.10.5](https://indike.org/pramana/in.purana.narada.2.10.5) hṛdaye nakhapāto hi vṛddhāyā bhūpate yathā / tathā viṣayasevā hi pitṝṇāṃ putriṇāṃ viduḥ // ### [2.10.6](https://indike.org/pramana/in.purana.narada.2.10.6) gṛhe vāpi hṛṣīkeśaṃ pūjayasva mahīpate / nirdeṣamṛgayūthānāṃ na yuktaṃ sūdanaṃ tava // ### [2.10.7](https://indike.org/pramana/in.purana.narada.2.10.7) ahiṃsā paramo dharmaḥ purāṇe parikīrtitaḥ / hiṃsayā vartamānasya vyartho dharmmobhavediti / kurvannapi vṛthā dharmānyo hiṃsāmanuvartate // ### [2.10.8](https://indike.org/pramana/in.purana.narada.2.10.8) parairupahatāṃ bhūpa nopabhuñjanti sādhavaḥ / ṣaḍvidhaṃ nṛpa te proktaṃ vidvadbhirjīvaghātanam // ### [2.10.9](https://indike.org/pramana/in.purana.narada.2.10.9) anumodayitā pūrvaṃ dvitīyo ghātakaḥ smṛtaḥ / viśvāsakastṛtīyo 'pi caturtho bhakṣakastathā / pañcamaḥ pācakaḥ proktaḥ ṣaṣṭho bhūpātra vigrahī / hiṃ sayā saṃyutaṃ dharmamadharmaṃ ca vidurbudhāḥ // ### [2.10.10](https://indike.org/pramana/in.purana.narada.2.10.10) na pāpaṃ kurute bhūpa putre bhāraṃ niveśya vai / dharmaṃ samāśrayamansamyaksaṃjātapalitaḥ pitā // ### [2.10.11](https://indike.org/pramana/in.purana.narada.2.10.11) parityajya imaṃ bhāvaṃ mṛgahiṃsāsamudbhavam / mṛgaśīlā hi rājāno vinaṣṭāḥ śataśo na-pa // ### [2.10.12](https://indike.org/pramana/in.purana.narada.2.10.12) tasmādduṣṭaṃ hi tanmanye yatra mṛgapātanam / dayā varā mṛge rījñāṃ dharmiṇāmapi dṛśyate // ### [2.10.13](https://indike.org/pramana/in.purana.narada.2.10.13) nivārito mayā hi tvaṃ hitabuddhyā punaḥ punaḥ / evaṃ bruvāṇāṃ tāṃ bhāryāṃ nṛpo vacanamabravīt // ### [2.10.14](https://indike.org/pramana/in.purana.narada.2.10.14) nahirhise mṛgāndevi mṛgavyājena kānane / paryyaṭiṣye dhanuṣpāṇiḥ kurvankaṇṭakaśodhanam // ### [2.10.15](https://indike.org/pramana/in.purana.narada.2.10.15) janamadhye suto me 'stu kānane 'haṃ varānane / śvāpadebhyaśca dasyubhyaḥ prajā rakṣyā mahībhṛtā // ### [2.10.16](https://indike.org/pramana/in.purana.narada.2.10.16) ātmanāvātha putreṇa gopanīyāḥ prajā śubhe / prajā arakṣannṛpatiḥ sadharmmo 'pi vrajatyadhaḥ // ### [2.10.17](https://indike.org/pramana/in.purana.narada.2.10.17) so 'haṃ rakṣaṇamuddiśyagamiṣyāmi vanaṃ priye / vimuktabhāvo 'hamiti meruśṛṅge raviryathā // ### [2.10.18](https://indike.org/pramana/in.purana.narada.2.10.18) evamuddiśya tāṃ rājā āruroha hayottamam / doṣāpatisamaprakhyaṃ nirdeṣaṃ kṣitibhūṣaṇam // ### [2.10.19](https://indike.org/pramana/in.purana.narada.2.10.19) devavāhasamaṃ rūpe prabhañjanasamaṃ jave / dharāmādṛtya bhūpālo datvā taṃ dakṣiṇaṃ karam // ### [2.10.20](https://indike.org/pramana/in.purana.narada.2.10.20) sahasrakoṭidātāraṃ kāminīkucapīḍanam / aśokapallavākāraṃ vajrāṅkuśavirohaṇam // ### [2.10.21](https://indike.org/pramana/in.purana.narada.2.10.21) saṃpratasthe mahīpālaścālayāno mahītalam / sādhayāno yayau deśānkānanaṃ sa nṛpottamaḥ // ### [2.10.22](https://indike.org/pramana/in.purana.narada.2.10.22) vājivegena nirddhūtā vāraṇāḥ syandanā hayāḥ / padātayo nipetuste mūrcchitāḥ kṣitimaṇḍale // ### [2.10.23](https://indike.org/pramana/in.purana.narada.2.10.23) sa rājā sahasā prāpto munīnāmāśramaṃ param / yojanānāṃ samuttīrya śatamaṣṭottaraṃ nṛpa // ### [2.10.24](https://indike.org/pramana/in.purana.narada.2.10.24) praviveśāśramaṃ ramyaṃ kadalīkhaṇḍamaṇḍitam / aśokabakulopetaṃ punnāgasaralāvṛtam // ### [2.10.25](https://indike.org/pramana/in.purana.narada.2.10.25) mātuliṅgaiḥ kapitthaiśca kharjūraiḥ panasādibhiḥ / nārikelaistathā tālaiḥ ketakaiḥ siṃduvārakaiḥ // ### [2.10.26](https://indike.org/pramana/in.purana.narada.2.10.26) candanaiḥ satamālaiśca sālaiḥ pippalacaṃpakaiḥ / kramukairdāḍimaiścaiva dhātrīvṛkṣaiḥ sahasraśaḥ // ### [2.10.27](https://indike.org/pramana/in.purana.narada.2.10.27) nimbavṛkṣaiśca bahuśastathāmrairlodhrapādapaiḥ / paripakvaphalairnamraiḥ khagārūḍhaiḥ samāvṛtam // ### [2.10.28](https://indike.org/pramana/in.purana.narada.2.10.28) hyadyena vāyunā yuktaṃ puṣpagandhāvṛtena hi / paśyamāno muniṃ rājā dadarśa hutabhukprabham // ### [2.10.29](https://indike.org/pramana/in.purana.narada.2.10.29) vāmadevaṃ dvijavaraṃ bahuśiṣyasamāvṛtam / avaruhya hayāddṛṣṭvā praṇanāma ca sādaram // ### [2.10.30](https://indike.org/pramana/in.purana.narada.2.10.30) tenāpi muninā rājā hyarghādyairabhipūjitaḥ / upaviśyāsane kauśe prāha saṃhṛṣṭayā girā // ### [2.10.31](https://indike.org/pramana/in.purana.narada.2.10.31) adya me pātakaṃ kṣīṇaṃ saṃprāptaṃ karmaṇaḥ phalam / dṛṣṭvā tava padāṃbhojaṃ samyagdhyānaparasya ca // ### [2.10.32](https://indike.org/pramana/in.purana.narada.2.10.32) tacchrutvā vacanaṃ tasya rukmāṅgadamahīpateḥ / saṃpṛṣṭvā kuśalaṃ prāha vāmadevo mudānvitaḥ // ### [2.10.33](https://indike.org/pramana/in.purana.narada.2.10.33) rājaṃstvayātipuṇyena viṣṇubhaktena vīkṣitaḥ / mamāśramo mahābhāga puṇyo jāto dharātale // ### [2.10.34](https://indike.org/pramana/in.purana.narada.2.10.34) kaste 'nyastulyatāmeti pārthivo dharaṇītale / yena vaivasvato māgro bhagno nirjitya vai yamam // ### [2.10.35](https://indike.org/pramana/in.purana.narada.2.10.35) prāpitaḥ sakalo loko vaikuṇṭhaṃ padamavyayam / upoṣayitvā nṛpatedvādaśīṃ pāpanāśinīm // ### [2.10.36](https://indike.org/pramana/in.purana.narada.2.10.36) caturbhiḥ śobhanopāyaiḥ prajāḥ sayamya bhūtale / svakarmasthā vikarmasthā nītā madhubhidaḥ padam // ### [2.10.37](https://indike.org/pramana/in.purana.narada.2.10.37) so 'smākaṃ draṣṭukāmānāṃ saṃprāpto darśanaṃ nṛpa / śvapaco 'pi mahīpāla viṣṇubhakto dvijādhikaḥ // ### [2.10.38](https://indike.org/pramana/in.purana.narada.2.10.38) viṣṇubhaktivihīnastu dvijo 'pi śvapacādhikaḥ / durlabhā bhūpa rājāno viṣṇubhaktā mahītale // ### [2.10.39](https://indike.org/pramana/in.purana.narada.2.10.39) nāvaiṣṇavo bhavedrājā kṣitilakṣmīprasādhakaḥ / yo na rājā raherbhakto deveṣvanyeṣu bhaktimān // ### [2.10.40](https://indike.org/pramana/in.purana.narada.2.10.40) yathā jāre patiṃ tyaktvā ratā strī sa tathā nṛpaḥ / evaṃ vyatikramastasya nṛpaterbhavati dhruvam // ### [2.10.41](https://indike.org/pramana/in.purana.narada.2.10.41) dharmasyārthasya kāmasya prajñāyāśca gaterapi / tattvayā nyāyavihitaṃ kṛtaṃ viṣṇoḥ prapūjanam // ### [2.10.42](https://indike.org/pramana/in.purana.narada.2.10.42) tena dhanyo 'si nṛpate vayaṃ dhanyāstavekṣaṇāt / ityevaṃ bhāṣamāṇaṃ tu vāmadevaṃ nṛpottamaḥ // ### [2.10.43](https://indike.org/pramana/in.purana.narada.2.10.43) uvācāvanato bhūtvā prakṛtyā vinayānvitaḥ / kṣāmaye tvā dvijaśreṣṭha nāhametādṛśo vibho // ### [2.10.44](https://indike.org/pramana/in.purana.narada.2.10.44) tvatpādapāṃsunā tulyo nāhaṃ vipra bhavāmi hi / na viprebhyo 'dhikā devā bhavantīha kadācana // ### [2.10.45](https://indike.org/pramana/in.purana.narada.2.10.45) parituṣṭairdvijairbhaktirjantorbhavati mādhave / dveṣyo bhavati tai ruṣṭaiḥ satyametanmayeritam // ### [2.10.46](https://indike.org/pramana/in.purana.narada.2.10.46) tamāha vāmadevastu brūhi kiṃ te dadāmyaham / nādeyaṃ vidyate rājangṛhāyātasya te 'dhunā // ### [2.10.47](https://indike.org/pramana/in.purana.narada.2.10.47) abhīṣṭaṃ hi mahīpāla yo dadāti mahītale / paṭahaṃ vāsare viṣṇoḥ prajābhojanavāraṇam // ### [2.10.48](https://indike.org/pramana/in.purana.narada.2.10.48) tamāha nṛpatirvipraṃ kṛtāñjalipuṭastadā / prāptameva mayā sarvaṃ tvadaṅghriyugalekṣaṇāt // ### [2.10.49](https://indike.org/pramana/in.purana.narada.2.10.49) mamaikaḥ saṃśayo brahman vartate bahukālataḥ / taṃ pṛcchāmi dvijāgryaṃ tvāṃ sarvasaṃdehabhañjanam // ### [2.10.50](https://indike.org/pramana/in.purana.narada.2.10.50) trailokyasundarī bhāryā mama kena sukarmaṇā / yā vilokayate dṛṣṭyā māṃ sadā manmathādhikam // ### [2.10.51](https://indike.org/pramana/in.purana.narada.2.10.51) yatra yatra padaṃ devī dadāti varavarṇinī / tatra tatra nidhānāni prakāśayati medinī // ### [2.10.52](https://indike.org/pramana/in.purana.narada.2.10.52) yasyāścāṅgaṃ jarāhīnaṃ valīpalitavarjitam / sadā bhāti muniśreṣṭha śāradenduprabhā yathā // ### [2.10.53](https://indike.org/pramana/in.purana.narada.2.10.53) vināgnināpi sā vipra sādhayatyeva ṣaḍrasam / annaṃ pacati yatsvalpaṃ tasminbhuñjanti koṭayaḥ // ### [2.10.54](https://indike.org/pramana/in.purana.narada.2.10.54) pitavratā dānaśīlā sarvabhūtasukhāvahā / nāvajñā kriyate brahman vākyenāpi prasūptayā // ### [2.10.55](https://indike.org/pramana/in.purana.narada.2.10.55) yasyāṃ jātastu tanayo mamājñāyāṃ sthitaḥ sadā / ahameva dharāpṛṣṭhe putrī dvijavarottama // ### [2.10.56](https://indike.org/pramana/in.purana.narada.2.10.56) yasya putraḥ piturbhakto hyadhiko guṇasaṃcayaiḥ / ekadvīpapatiścāhaṃ vidito dharaṇītale // ### [2.10.57](https://indike.org/pramana/in.purana.narada.2.10.57) putro mamādhiko jātaḥ saptadvīpaprapālakaḥ / madarthe yena viprendra samānītā nṛpātmajā // ### [2.10.58](https://indike.org/pramana/in.purana.narada.2.10.58) vidyullekheti vikhyātā raṇe jitvā mahībhujaḥ / atha tenādhipatinā rūpadraviṇaśālinā // ### [2.10.59](https://indike.org/pramana/in.purana.narada.2.10.59) ṣaṇmāsena raṇe jitvā kṛtvā sarvānnirāyudhān / yo gatvā pramadārājyaṃ jitvā tāḥ pramadā raṇe // ### [2.10.60](https://indike.org/pramana/in.purana.narada.2.10.60) ājahāra śubhāstāsāṃ madhyādaṣṭau varāṅganāḥ / pradadau mayi tāḥ sarvāḥ praṇamya ca punaḥ punaḥ // ### [2.10.61](https://indike.org/pramana/in.purana.narada.2.10.61) yāni vāsāṃsi divyāni yāni ratnāni bhūtale / tāni me pradadau putro jananyā tūpavarṇitaḥ // ### [2.10.62](https://indike.org/pramana/in.purana.narada.2.10.62) ekāhnā pṛthivīṃ sarvāmatītya bahuyojanām / punarāyāti śarvaryāṃ matpādābhyaṅgakāraṇāt // ### [2.10.63](https://indike.org/pramana/in.purana.narada.2.10.63) niśītheṃ'gāni saṃvāhya dvāri tiṣṭhati daṃśitaḥ / prabodhayanpreṣyajanānnidrayā saṃkulendriyān // ### [2.10.64](https://indike.org/pramana/in.purana.narada.2.10.64) tathāyaṃ me muniśreṣṭha deho rogavivarjitaḥ / aprameyaṃ mama sukhaṃ vaśagā hi priyā gṛhe // ### [2.10.65](https://indike.org/pramana/in.purana.narada.2.10.65) vājino vāraṇāścaiva dhanadhānyamanantakam / vartate hi janaḥ sarvo mamājñāpālakaḥ kṣitau // ### [2.10.66](https://indike.org/pramana/in.purana.narada.2.10.66) kena karmaprabhāveṇa mamedaṃ sāṃprataṃ sukham / iha janmakṛtaṃ vāpi parajanmakṛtaṃ tathā // ### [2.10.67](https://indike.org/pramana/in.purana.narada.2.10.67) mama puṇyaṃ vada brahman vicārya svamanīṣayā // ### [2.10.68](https://indike.org/pramana/in.purana.narada.2.10.68) dehe na rogo vaśagāpriyā ca gṛhe vibhūtirnṛharau ca bhaktiḥ / vidvatsu pūjā dvijadānaśaktirmanye 'hametatsukṛtaprasūtam // ### [2.10.68.p1](https://indike.org/pramana/in.purana.narada.2.10.68.p1) iti śrībṛhannāradīyapurāṇottarabhāge rukmāṅgada vāmadevasaṃvādo nāma daśamo 'dhyāyaḥ ## Linked texts (1) - [Rukmāṅgadacaritra](https://indike.org/pramana/in.purana.upakhyana.vamsa-rsi.rukmangadacaritra.88.62.1) — Sanskrit ## Discussed in (1) - [Studies in the Purāṇic Records on Hindu Rites and Customs](https://indike.org/pramana/ins.religion.hazra-1940.c14.s13.14) — Hazra 1940, English --- Source: [https://indike.org/pramana/in.purana.narada.2.10](https://indike.org/pramana/in.purana.narada.2.10) · Pramāṇa