[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.11 # Naradapurana 2.11 Nāradapurāṇa 2.11 - **Language:** Sanskrit ## Contents - [2.11.47](https://indike.org/pramana/in.purana.narada.2.11.47) — 1 part ### [2.11.1](https://indike.org/pramana/in.purana.narada.2.11.1) vasiṣṭha uvāca tacchrutvā nṛpatervākyaṃ mahājñānī munīśvaraḥ / cintayitvā kṣaṇaṃ jñātvā kāraṇaṃ tamucāva ha // ### [2.11.2](https://indike.org/pramana/in.purana.narada.2.11.2) vāmadeva uvāca purā tvamavanīpāla śūdrajātisamudbhavaḥ / dārirdyeṇa parābhūto duṣṭayā bhāryayā tathā // ### [2.11.3](https://indike.org/pramana/in.purana.narada.2.11.3) parasevanayā caiva vetanena bhujikriyā / nivasanduḥkhasaṃtapto bahuvarṣāṇi pārthiva // ### [2.11.4](https://indike.org/pramana/in.purana.narada.2.11.4) kadāciddvijasaṃsargāttīrthayātrāṃ gato bhavān / tataḥ sarvāṇi tīrthāni parakramya mahīpate // ### [2.11.5](https://indike.org/pramana/in.purana.narada.2.11.5) dvijasevāparo jāto mathurāṃ puṇyarūpiṇīm / tatra snātaṃ tvayā viprasaṃgena yamunājale // ### [2.11.6](https://indike.org/pramana/in.purana.narada.2.11.6) viśrāntisaṃjñake tīrthe sarvatīrthottamottame / mandire ca varāhasya kathyamānāṃ kathāṃ nṛpa // ### [2.11.7](https://indike.org/pramana/in.purana.narada.2.11.7) purāṇoktāṃ ca śuśrāva aśūnyaśayanavratam / caturbhiḥ pāraṇairyasya niṣpattistu vidhīyate // ### [2.11.8](https://indike.org/pramana/in.purana.narada.2.11.8) yena cīrṇena deveśo jīmūtābhaḥ prasīdati / lakṣmībhartā jagannātho niḥśeṣāghaughanāśanaḥ // ### [2.11.9](https://indike.org/pramana/in.purana.narada.2.11.9) tatkṛtaṃ bhavatā rājanpunarabhyetya mandiram / aśūnyaśayanaṃ puṇyaṃ gṛhe vṛddhikaraṃ param // ### [2.11.10](https://indike.org/pramana/in.purana.narada.2.11.10) akṛtvedaṃ mahārāja vrataṃ pātakanāśanam / gārhasthyamanutiṣṭheta vandhyāvanniṣphalo bhavet / sukhamīdṛgvidhaṃ loke durlabhaṃ pratibhāti me // ### [2.11.11](https://indike.org/pramana/in.purana.narada.2.11.11) śrāvaṇasya tu māsasya dvitīyayāṃ mahīpate / grāhyametadvrataṃ puṇyaṃ janmamṛtyujarāpaham // ### [2.11.12](https://indike.org/pramana/in.purana.narada.2.11.12) lakṣmīyukto jagannāthaḥ pūjanīyo 'tra pārthiva / phalaiḥ puṣpaistathā dhūpaiścāruraktānulepanaiḥ / śayyādānairvastradānaistathā brāhmaṇabhojanaiḥ // ### [2.11.13](https://indike.org/pramana/in.purana.narada.2.11.13) tattvayā sarvametaddhikṛtaṃ rājansudustaram / tasyaiva karmaṇaḥ puṣṭiraśūnyasya mahīpate / imānevāgrataḥ puṇyāstvayoktānvistarācchṛṇu // ### [2.11.14](https://indike.org/pramana/in.purana.narada.2.11.14) nāprasanneṃ jagannāthe bhaveyuriti niścitam / pūrvajanmani deveśastvayāśūnyena pūjitaḥ // ### [2.11.15](https://indike.org/pramana/in.purana.narada.2.11.15) iha janmani rājendra dvādaśyārcayase harim / avaśyaṃ prāpyase rājan viṣṇoḥ sāyujyatāṃ dhruvam // ### [2.11.16](https://indike.org/pramana/in.purana.narada.2.11.16) eṣa praśno mayā rājanvyākhyātaste sumaṅgalaḥ / saṃpadāṃ prabhavopeto jñāterutkarṣaṇārthakaḥ // ### [2.11.17](https://indike.org/pramana/in.purana.narada.2.11.17) kimanyatte mahīpāla dadāmīha karomi ca / avaśyaṃ sarvayogyo 'si bhakto 'si tvaṃ janārdane // ### [2.11.18](https://indike.org/pramana/in.purana.narada.2.11.18) rājovāca utsuko 'haṃ dvijaśreṣṭha mandaraṃ parvataṃ prati / tatrāścaryāṇyanekāni draṣṭukāmastavājñayā // ### [2.11.19](https://indike.org/pramana/in.purana.narada.2.11.19) laghurbhūtvā guruṃ tyaktvā putropari dvijottama / rājyaśāsanajaṃ bhāraṃ durvahaṃ yacca bhūmipaiḥ // ### [2.11.20](https://indike.org/pramana/in.purana.narada.2.11.20) so 'haṃ svecchācaro yāto matkṛtyaṃ tanayaścaret / tacchatvā vacanaṃ rājño vāmadevo 'bravīdidam // ### [2.11.21](https://indike.org/pramana/in.purana.narada.2.11.21) etaddhi paramaṃ kṛtyaṃ putrasya nṛpapuṅgavaṃ / yatkleśātpitaraṃ premṇā vimocayati sarvadā // ### [2.11.22](https://indike.org/pramana/in.purana.narada.2.11.22) piturvacanakārī ca manovākkāyaśaktitaḥ / tasya bhāgīrathīsnānamahanyahani jāyate // ### [2.11.23](https://indike.org/pramana/in.purana.narada.2.11.23) nirasya pitṛvākyaṃ tu vrajetsnātuṃ surāpagām / no śuddhistasya putrasya itītthaṃ vaidikī śrutiḥ // ### [2.11.24](https://indike.org/pramana/in.purana.narada.2.11.24) sa tvaṃ gaccha yathākāmaṃ kṛtakṛtyo 'si bhūpate / hariprasādātte jāto vaṃśe putraḥ sa puṇyakṛt // ### [2.11.25](https://indike.org/pramana/in.purana.narada.2.11.25) evamukte tu muninā samāruhya turaṅgamam / yayau śīghragatiḥ śrīmānsadāgatiriva svayam // ### [2.11.26](https://indike.org/pramana/in.purana.narada.2.11.26) vīkṣyamāṇo girīnsarvānvanāni saritastathā / sarvāścaryāṇi rājendraḥ sarāṃsyupavanāni ca // ### [2.11.27](https://indike.org/pramana/in.purana.narada.2.11.27) so 'cireṇaiva kālena saṃprāpto mandarācalam / bhrāmayitvā giriṃ śvetaṃ gandhamādanameva ca // ### [2.11.28](https://indike.org/pramana/in.purana.narada.2.11.28) atītya ca mahāmeruṃ dṛṣṭvā caivottarānkurūn / śatasūryapratīkāśaṃ sarvataḥ kāñcanāvṛtam // ### [2.11.29](https://indike.org/pramana/in.purana.narada.2.11.29) saṃghṛṣṭaṃ haribāhubhyāṃ sravantaṃ kāñcanaṃ rasam / tadbhūbhāgaṃ nagākīrṇaṃ bahudhātuvibhūṣitam // ### [2.11.30](https://indike.org/pramana/in.purana.narada.2.11.30) bahunirjharasaṃyuktaṃ bahukandarabhūṣitam / nimnāgāyutasaṃpūrṇaṃ dhautaṃ gaṅgājalaiḥ śubhaiḥ // ### [2.11.31](https://indike.org/pramana/in.purana.narada.2.11.31) viśvastairyuvatīvṛndaiḥ kāntāśarmopasevibhiḥ / ghaṭapramāṇairnṛpate paripakvaiḥ sugandhibhiḥ // ### [2.11.32](https://indike.org/pramana/in.purana.narada.2.11.32) phalairyuvatisaṃbhūtaiḥ kucairiva vibhūṣitam / dvirephadhvanisaṃyuktaṃ kokilasvaranāditam // ### [2.11.33](https://indike.org/pramana/in.purana.narada.2.11.33) anekasattvavirutaiḥ samantānnāditaṃ girim / saṃpaśyamāno nṛpatirviveśa sa mahāgirim // ### [2.11.34](https://indike.org/pramana/in.purana.narada.2.11.34) āroḍhukāmastu kutūhalāttamanveṣayankena pathā praroham / sa vīkṣate yāvadasau samantāttāvatsamastaṃ drumapakṣisaṃgham // ### [2.11.35](https://indike.org/pramana/in.purana.narada.2.11.35) visarpamāṇaṃ dhvaninā gṛhītaṃ vimohinīvaktrasamudbhavena / upaplavantaṃ tarasā mahīpastenaiva sārddhaṃ sa jagāma tūrṇam // ### [2.11.36](https://indike.org/pramana/in.purana.narada.2.11.36) tasyāpi karṇe dhvanirāviveśa vimohinīvaktrasamudbhavo yaḥ / vimohito yena vimucya vāhaṃ trivikrameṇeva vilaṅghyamānam // ### [2.11.37](https://indike.org/pramana/in.purana.narada.2.11.37) mārgaṃ girermohinigītamugdhaṃ kṣaṇena rājā sahasā dadarśa / girau sthitāṃ taptasuvarṇabhāsaṃ kāmasya yaṣṭīmiva nirmitāṃ ca // ### [2.11.38](https://indike.org/pramana/in.purana.narada.2.11.38) śakrasya liṅgaṃ gagane prasaktaṃ saṃpūjayantīmiva lokasūtyai / kṣamāsvarūpāmiva vai rasāyā gireḥ sutāyā iva rūparāśim // ### [2.11.39](https://indike.org/pramana/in.purana.narada.2.11.39) siṃdhostu velāmiva rūpayuktāṃ tasyāstanuṃ vai ratimandirākhyām / vikarṣamāṇāṃ sahasā trinetraṃ liṅgāśrayaṃ devavinodanārtham // ### [2.11.40](https://indike.org/pramana/in.purana.narada.2.11.40) tatpuṇyakartturmanasābhilāṣāṃ vyavasthito mohinirūpadarśī / vimohito 'sau nipapāta rājā vimohinīkāmaśareṇa viddhaḥ // ### [2.11.41](https://indike.org/pramana/in.purana.narada.2.11.41) jvareṇa tīvreṇa gṛhītadehaḥ samīpamasyāḥ sa sasarpa śīghram / visarpiṇaṃ bhūmipatiṃ sunetrā vilokayāmāsa kaṭākṣadṛṣṭyā // ### [2.11.42](https://indike.org/pramana/in.purana.narada.2.11.42) vimucya vīṇāṃ virarāma gītātpāptaṃ ca kāryaṃ sahasaiva mene / vidhūnayantī mṛgapakṣisaghānsuvāsasā gaṇḍabhujau nivārya // ### [2.11.43](https://indike.org/pramana/in.purana.narada.2.11.43) śilīmukhān śvāsasugandhamugdhān jagāma devī nṛpateḥ samīpam / tyaktvā haraṃ pūjyatamaṃ suliṅgaṃ gagatvā tu pārśve tamudāraceṣṭā // ### [2.11.44](https://indike.org/pramana/in.purana.narada.2.11.44) vimohinī nīrarajapatranetrā uvāca vākyaṃ madhuraṃ manojñam / rukmāṅgadaṃ kāmaśarābhitaptamuttiṣṭha rājanvaśagā tavāham // ### [2.11.45](https://indike.org/pramana/in.purana.narada.2.11.45) kiṃ mūrcchayā dehamimaṃ kṣiṇoṣi yastvaṃ dharābhāramimaṃ mahāntam / tṛṇīkṛtaṃ bhūpa samudvahethā yanmāmakaṃ rūpamavekṣya hāri // ### [2.11.46](https://indike.org/pramana/in.purana.narada.2.11.46) kiṃ muhyase durbalagauriveha paṅke nimagnā bhava tvam / dhīro 'si viḍaṃbayethāḥ kimarthamātmānamudāraceṣṭam // ### [2.11.47](https://indike.org/pramana/in.purana.narada.2.11.47) yadyasti vāñchā tava bhūpatīśa mamānukūle surate 'tihṛdye / pradāya dānaṃ ca sudharmamuktaṃ bhuṅkṣva svadāsīmiva māṃ ratijñām // ### [2.11.47.p1](https://indike.org/pramana/in.purana.narada.2.11.47.p1) iti śrībṛhannāradīyapurāṇottarebhāge mohinīdarśanaṃ nāma ekādaśo 'dhyāyaḥ ## Linked texts (1) - [Rukmāṅgadacaritra](https://indike.org/pramana/in.purana.upakhyana.vamsa-rsi.rukmangadacaritra.89.66.1) — Sanskrit --- Source: [https://indike.org/pramana/in.purana.narada.2.11](https://indike.org/pramana/in.purana.narada.2.11) · Pramāṇa