[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.21 # Naradapurana 2.21: athaikaviṃśo'dhyāyaḥ Nāradapurāṇa 2.21 - **Language:** Sanskrit ## Contents - [2.21.38](https://indike.org/pramana/in.purana.narada.2.21.38) — 1 part ### athaikaviṃśo'dhyāyaḥ ### [2.21.1](https://indike.org/pramana/in.purana.narada.2.21.1) māndhātovāca putrasya vacanaṃ śrutvā kiṃ cakāra mahīpatiḥ / sā cāpi mohinī brahmanpriyā rājño vidheḥ sutā // ### [2.21.2](https://indike.org/pramana/in.purana.narada.2.21.2) āścaryarūpaṃ kathitamākhyānaṃ tu sudhopamam / viśeṣatastvayā puṇyaṃ sarvasaṃdehabhañjanam // ### [2.21.3](https://indike.org/pramana/in.purana.narada.2.21.3) vasiṣṭha uvāca tatputravacanaṃ śrutvā prahṛṣṭo nṛpapuṅgavaḥ / udatiṣṭhatpriyāyuktastāḥ śriyaścāvalokayat // ### [2.21.4](https://indike.org/pramana/in.purana.narada.2.21.4) kṣaṇaṃ harṣānvito bhūpa rājā viṣṇuparāyaṇaḥ / nāgakanyāstu tāḥ sarvā vāruṇīsahitā mudā // ### [2.21.5](https://indike.org/pramana/in.purana.narada.2.21.5) pradadau tanaye premṇā bhāryārthaṃ dharmabhūṣaṇe / śeṣaṃ dānavanārībhirbahuratnasamanvitam // ### [2.21.6](https://indike.org/pramana/in.purana.narada.2.21.6) mohinyai pradadau rājā kāmabāṇaprapīḍitaḥ / saṃvibhajya pitā vittaṃ dharmāṅgadasamāhṛtam // ### [2.21.7](https://indike.org/pramana/in.purana.narada.2.21.7) purohitamuvācedaṃ kāle cāhūya bhūpatiḥ / sarvāsāṃ matsuto brahmanpāṇīngṛhṇātu dharmataḥ // ### [2.21.8](https://indike.org/pramana/in.purana.narada.2.21.8) kumārīṇāṃ kumāro 'yaṃ madvākye saṃsthitaḥ sadā / vaivāhyalagne nakṣatre muhūrte sarvakāmade // ### [2.21.9](https://indike.org/pramana/in.purana.narada.2.21.9) vācayitvā dvijānsvasti gosvarṇāṃbaratoṣitān / vivāhaṃ kuru putrasya mama dharmāṅgadasya vai // ### [2.21.10](https://indike.org/pramana/in.purana.narada.2.21.10) yaḥ putrasya pitodvāhaṃ na karotīha mandadhīḥ / sasa majjennarake ghore hyapratiṣṭhe yugāyutam // ### [2.21.11](https://indike.org/pramana/in.purana.narada.2.21.11) tasmāccodvāhayetputraṃ pitā dharmasamanvitaḥ / ātmā saṃsthāpitastena yena saṃsthāpitaḥ sutaḥ // ### [2.21.12](https://indike.org/pramana/in.purana.narada.2.21.12) sarvakratuphalaṃ tasya putrodvāhe kṛte bhavet / putrasya guṇayuktasya nirguṇasyāpi bhūsura // ### [2.21.13](https://indike.org/pramana/in.purana.narada.2.21.13) pitrā kārayitavyo hi vivāho dharmamicchatā / yo na dāraiśca vittaiśca putrānsaṃyojayetpitā // ### [2.21.14](https://indike.org/pramana/in.purana.narada.2.21.14) na pumānsa tu vijñeya ihāmutra vigarhitaḥ / tasmādvṛttiyutāḥ kāryāḥ putrā dāraiḥ samanvitāḥ // ### [2.21.15](https://indike.org/pramana/in.purana.narada.2.21.15) yathā ramante te tuṣṭāḥ sukhaṃ putrāḥ sumānitāḥ / tacchrutvā vacanaṃ rājño dvijastasya purohitaḥ // ### [2.21.16](https://indike.org/pramana/in.purana.narada.2.21.16) dharmāṅgadavivāhārthamudyato harṣasaṃyutaḥ / sa yuvānicchamāno 'pi strīsaukhyaṃ lajjāyā sutaḥ // ### [2.21.17](https://indike.org/pramana/in.purana.narada.2.21.17) svīcakāra piturvākyāddārasaṃgrahaṇaṃ tadā / varuṇātmajayā sārddhaṃ nāgakanyā manoharāḥ // ### [2.21.18](https://indike.org/pramana/in.purana.narada.2.21.18) upayeme mahābāhū rūpeṇāpratimā bhuvi / udvāhayitvā sarvāstā vidhidṛṣṭena karmaṇā // ### [2.21.19](https://indike.org/pramana/in.purana.narada.2.21.19) vasugoratnadānāni viprebhyaḥ pradadau mudā / kṛtadāro vavande 'tha pādānmātuḥ piturmudā // ### [2.21.20](https://indike.org/pramana/in.purana.narada.2.21.20) tataḥ saṃdhyāvalīdevīmāha dharmāṅgadaḥ sutaḥ / piturvākyena me devi saṃjāto dārasaṃgrahaḥ // ### [2.21.21](https://indike.org/pramana/in.purana.narada.2.21.21) etanme nāsti manasi yatpitrodvāhito hyaham / avyayaṃ pitaraṃ vijñaṃ devi śuśrūṣaye hyaham // ### [2.21.22](https://indike.org/pramana/in.purana.narada.2.21.22) divyairbhogairna me kiñcitsvargeṇāpi prayojanam / kāryā me pitṛśuśrūṣā tava caiva divāniśam // ### [2.21.23](https://indike.org/pramana/in.purana.narada.2.21.23) saṃdhyāvalyuvāca ciraṃ jīva sukhaṃ putra bhuṅkṣva bhogānmano 'nugān / pituḥ prasādāddīrghoyurmano nandaya me suta // ### [2.21.24](https://indike.org/pramana/in.purana.narada.2.21.24) tvayā suputriṇī putra jātā guṇavatā kṣitau / sapatnīnāṃ ca sarvāsāṃ hṛdaye saṃsthitā hyaham // ### [2.21.25](https://indike.org/pramana/in.purana.narada.2.21.25) evamuktvā pariṣvajya mūrddhanyāghrāya cāsakṛt / vyasarjayattataḥ putraṃ rājyatantrāvalokane // ### [2.21.26](https://indike.org/pramana/in.purana.narada.2.21.26) visarjitastadā mātrā mātṝranyāḥ praṇamya ca / rājyatantraṃ tadakhilaṃ cakre pitṛvacaḥ sthitaḥ // ### [2.21.27](https://indike.org/pramana/in.purana.narada.2.21.27) duṣṭanigrahaṇaṃ cakre śiṣṭānāṃ paripālanam / aṭanaṃ sarvadeśeṣu vīkṣaṇaṃ sarvakarmaṇām // ### [2.21.28](https://indike.org/pramana/in.purana.narada.2.21.28) cakre sarvatra kāryāṇāṃ māsi māsi nirīkṣaṇam / hastyaśvapoṣaṇaṃ cakre cāracakrekṣaṇaṃ tathā // ### [2.21.29](https://indike.org/pramana/in.purana.narada.2.21.29) vādasaṃvīkṣaṇaṃ cakre tulāmānaṃ dine dene / gṛhe gṛhe narāṇāṃ ca cakre saṃrakṣaṇaṃ nṛpaḥ // ### [2.21.30](https://indike.org/pramana/in.purana.narada.2.21.30) stanandhayī kvacidbālaḥ stanahīno na roditi / śvaśrūrvadhvā na kutrāpi prarodityavamānitā // ### [2.21.31](https://indike.org/pramana/in.purana.narada.2.21.31) kvacitsamarthastanayaḥ pitaraṃ nahi yācate / na varṇasaṃkaro rājye keṣāñcidabhavatpunaḥ // ### [2.21.32](https://indike.org/pramana/in.purana.narada.2.21.32) na gūḍhavibhavo loko dharme vadati dūṣaṇam / na kañcukavihīnā tu bhavennārī sabhartṛkā // ### [2.21.33](https://indike.org/pramana/in.purana.narada.2.21.33) gṛhānniṣkramaṇaṃ strīṇāṃ māstu rājye madīyake / mā sakeśā hi vidhavā māstvakeśā mabhartṛkā // ### [2.21.34](https://indike.org/pramana/in.purana.narada.2.21.34) mā vratīha sadākrośī māraṇyā nagarāśrayāḥ / sāmānyavṛttyadātā me rājye 'vasatu nirghṛṇaḥ // ### [2.21.35](https://indike.org/pramana/in.purana.narada.2.21.35) gopālo nagarākāṅkṣī nirguṇastūpadeśakaḥ / ṛtvigvā śāstrahīnaśca mā me rājye vasediha // ### [2.21.36](https://indike.org/pramana/in.purana.narada.2.21.36) yo hi niṣpādayennīlīṃ nīlīraṅgātisecakaḥ / nirvāsyau tāvubhau pāpau yo vai madyaṃ karoti ca // ### [2.21.37](https://indike.org/pramana/in.purana.narada.2.21.37) vṛthā māṃsaṃ hi yo 'śnāti pṛṣṭhamāṃsapriyo hi yaḥ / tasya vāso na me rājye svakalatraṃ tyajecca yaḥ // ### [2.21.38](https://indike.org/pramana/in.purana.narada.2.21.38) viṣṇuṃ parityajya varaṃ surāṇāṃ saṃpūjayedyo 'nyatamaṃ hi devam / gacchetsagarbhāṃ yuvatīṃ prasūtāṃ daṇḍyaśca vadhyaśca sa cāsmadīyaiḥ // ### [2.21.38.p1](https://indike.org/pramana/in.purana.narada.2.21.38.p1) iti śrībṛhannāradīyapurāṇottarabhāge śikṣānirūpaṇaṃ nāmaikaviṃśo 'dhyāyaḥ ## Linked texts (1) - [Rukmāṅgadacaritra](https://indike.org/pramana/in.purana.upakhyana.vamsa-rsi.rukmangadacaritra.97.39) — Sanskrit --- Source: [https://indike.org/pramana/in.purana.narada.2.21](https://indike.org/pramana/in.purana.narada.2.21) · Pramāṇa