[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.24 # Naradapurana 2.24: athacaturviṃśo'dhyāyaḥ Nāradapurāṇa 2.24 - **Language:** Sanskrit ## Contents - [2.24.52](https://indike.org/pramana/in.purana.narada.2.24.52) — 1 part ### athacaturviṃśo'dhyāyaḥ ### [2.24.1](https://indike.org/pramana/in.purana.narada.2.24.1) rājovāca yattvayā vyāhṛtaṃ vākyaṃ mamedaṃ gautameritam / mandare parvataśreṣṭhe harivāsarabhojanam // ### [2.24.2](https://indike.org/pramana/in.purana.narada.2.24.2) amatena purāṇānāṃ vyāhṛtaṃ yaddvijanmanā / kṣudraśāstropadeśena lolupena varānane // ### [2.24.3](https://indike.org/pramana/in.purana.narada.2.24.3) purāṇe nirṇayo hyeṣa vidvadbhiḥ samudāhṛtaḥ / na śaṅkhena pibettoyaṃ na hanyātkūrmasūkarau // ### [2.24.4](https://indike.org/pramana/in.purana.narada.2.24.4) ekādaśyāṃ na bhoktavyaṃ pakṣayorubhayorapi / agamyāgamane devi abhakṣyasya ca bhakṣaṇe // ### [2.24.5](https://indike.org/pramana/in.purana.narada.2.24.5) akāryakaraṇe jantorgosahasravadhaḥ smṛtaḥ / jānannapi kathaṃ devi bhokṣye 'haṃ harivāsare // ### [2.24.6](https://indike.org/pramana/in.purana.narada.2.24.6) puroḍāśo 'pi vāmoru saṃprāpte harivāsare / abhakṣyeṇa samaḥ proktaḥ kiṃ punaścāttanakriyā // ### [2.24.7](https://indike.org/pramana/in.purana.narada.2.24.7) anukūlaṃ nṛṇāṃ proktaṃ kṣīṇānāṃ varavarṇini / mūlaṃ phalaṃ payastoyamupabhojyaṃ munīśvaraiḥ // ### [2.24.8](https://indike.org/pramana/in.purana.narada.2.24.8) natvatra bhojanaṃ kaiścidekādaśyāṃ pradarśitam / jvariṇāṃ laṅghanaṃ śastaṃ dhārmikāṇāmupoṣaṇam // ### [2.24.9](https://indike.org/pramana/in.purana.narada.2.24.9) śubhaṃ gatipradaṃ proktaṃ saṃprāpte harivāsare / jvaramadhye kṛtaṃ pathyaṃ nidhanāya prakalpate // ### [2.24.10](https://indike.org/pramana/in.purana.narada.2.24.10) vaiṣṇave tu dine bhuktaṃ narakāyaiva kevalam / māgrahaṃ kuru vāmoru vratabhaṅgo bhavenmama // ### [2.24.11](https://indike.org/pramana/in.purana.narada.2.24.11) yadanyadvocate tubhyaṃ tatkartāsmi na saṃśayaḥ / mohinyuvāca na cānyadrocate rājanvinā vai bhojanaṃ tava // ### [2.24.12](https://indike.org/pramana/in.purana.narada.2.24.12) jīvitasyāpi dānena na me kiñcitprayodajanam / na ca vedeṣu dṛṣṭo 'yamupavāso harerdine // ### [2.24.13](https://indike.org/pramana/in.purana.narada.2.24.13) agnimanto na viprā hi manyante samupoṣaṇam / vedabāhya kathaṃ dharmaṃ bhavāṃścaritumicchati // ### [2.24.14](https://indike.org/pramana/in.purana.narada.2.24.14) vaco niśamya mohinyā rājā vedavidāṃ varaḥ / uvāca mānase kruddhaḥ prahasanniva bhūpate // ### [2.24.15](https://indike.org/pramana/in.purana.narada.2.24.15) śṛṇu mohini madvākyaṃ vedo 'yaṃ bahudhā sthitaḥ / yajñakarmakriyā vedaḥ smṛtirvedo gṛhāśrame // ### [2.24.16](https://indike.org/pramana/in.purana.narada.2.24.16) smṛtirvedaḥ kriyāvedaḥ purāṇeṣu pratiṣṭhitaḥ / purāṇapuṃruṣājjātaṃ yathedaṃ jagadadbhutam // ### [2.24.17](https://indike.org/pramana/in.purana.narada.2.24.17) tathedaṃ vāṅmayaṃ jātaṃ purāṇebhyo na saṃśayaḥ / vedārthādadhikaṃ manye purāṇārthaṃ varānane // ### [2.24.18](https://indike.org/pramana/in.purana.narada.2.24.18) vedāḥ pratiṣṭhitāḥ sarve purāṇeṣveva sarvadā / bibhetyalpaśrutādvedo māmayaṃ prahariṣyati // ### [2.24.19](https://indike.org/pramana/in.purana.narada.2.24.19) na vede grahasaṃcāro na śuddhiḥ kālabodhinī / tithivṛddhikṣayo vāpi parvagrahavinirṇayaḥ // ### [2.24.20](https://indike.org/pramana/in.purana.narada.2.24.20) iti hāsapurāṇaistu niścayo 'yaṃ kṛtaḥ purā / yanna dṛṣṭaṃ hi vedeṣu tatsarvaṃ lakṣyate smṛtau // ### [2.24.21](https://indike.org/pramana/in.purana.narada.2.24.21) ubhayoryanna dṛṣṭaṃ hi tatpurāṇaiḥ pragīyate / prāyaścittaṃ tu hatyāyāmāturasyauṣadhaṃ priye // ### [2.24.22](https://indike.org/pramana/in.purana.narada.2.24.22) na cāpi pāpaśuddhiḥ syādātmanaśca parasya vā / yadvedairgīyate subhru upāṅgairyatpragīyate // ### [2.24.23](https://indike.org/pramana/in.purana.narada.2.24.23) purāṇaiḥ smṛtibhiścaiva veda eva nigadyate / raṭantīha purāṇāni bhūyo bhūyo varānane // ### [2.24.24](https://indike.org/pramana/in.purana.narada.2.24.24) na bhoktavyaṃ na bhoktavyaṃ saṃprāpte harivāsare / purāṇamanyathā matvā tiryagyonimavāpnuyāt // ### [2.24.25](https://indike.org/pramana/in.purana.narada.2.24.25) saṃsrāto 'pi sudānto 'pi na gatiṃ prāpnuyāditi / pitaraṃ ko na vandeta mātaraṃ ko na pūjayet // ### [2.24.26](https://indike.org/pramana/in.purana.narada.2.24.26) ko na gacchetsaricchreṣṭhāṃ ko bhuṅkte harivāsare / ko hi dūṣayate vedaṃ brāhmaṇaṃ ko nipātayet // ### [2.24.27](https://indike.org/pramana/in.purana.narada.2.24.27) ko gacchetparadārān hi ko bhuṅkte harivāsare // ### [2.24.28](https://indike.org/pramana/in.purana.narada.2.24.28) nahīdṛśaṃ pāpamihāsti jantorvimūḍhacittasya dine hareḥ priye / yadbhojanenātmanipātakāriṇā yamasya ravāteṣu ciraṃ sulocane // ### [2.24.29](https://indike.org/pramana/in.purana.narada.2.24.29) mohinyuvāca śīghramānaya viprāṃstvaṃ ghūrṇike vedapāragān / yeṣāṃ vākyena yukto 'yaṃ rājā kuryāddhi bhojanam // ### [2.24.30](https://indike.org/pramana/in.purana.narada.2.24.30) sā tadvākyamupākarṇya brāhmaṇānvedaśālinaḥ / gautamādīnsamāhūya mohinīpārśvamānayata // ### [2.24.31](https://indike.org/pramana/in.purana.narada.2.24.31) tānviprānāgatāndṛṣṭvā vedavedāṅgapāragān / mohinī sahitā rājñā vavande kāryatatparā // ### [2.24.32](https://indike.org/pramana/in.purana.narada.2.24.32) upaviṣṭāstu te sarve śātakaiṃbhamayeṣu ca / āsaneṣu mahīpāla jvaladagnisamaprabhāḥ // ### [2.24.33](https://indike.org/pramana/in.purana.narada.2.24.33) teṣāṃ madhye vayovṛddho gautamo vākyamabravīt / vayaṃ samāgatā devi nānāśāstraviśāradāḥ // ### [2.24.34](https://indike.org/pramana/in.purana.narada.2.24.34) sarvasaṃdehahartāro yadarthaṃ te samāhutāḥ / tacchatvā vacanaṃ teṣāṃ mohinī brahmaṇaḥ sutā // ### [2.24.35](https://indike.org/pramana/in.purana.narada.2.24.35) sarvāsādhyakṛtaṃ kartuṃ pravṛttāṃstānuvāca ha / mohinyuvāca saṃdehastu jaḍau hyeṣa svalpo vā svamatiryathā // ### [2.24.36](https://indike.org/pramana/in.purana.narada.2.24.36) so 'yaṃ vadati rājā vai nāhaṃ bhokṣye harerdine / annādhāramidaṃ sarvaṃ jagatsthāvarajaṅgamam // ### [2.24.37](https://indike.org/pramana/in.purana.narada.2.24.37) mṛtā hyapi tathānnena prīyante pitaro divi / karkandhumātraṃ prahutaṃ puroḍāśaṃ hi devatāḥ // ### [2.24.38](https://indike.org/pramana/in.purana.narada.2.24.38) kāmayanti dvijaśreṣṭhāstato 'nnaṃ hyamṛtaṃ param / pipīlikāpi kṣudhitā mukhenādāya taṇḍulam // ### [2.24.39](https://indike.org/pramana/in.purana.narada.2.24.39) bilaṃ vrajati duḥkhena kasyānnaṃ nahi rocate / ayaṃ khādati nānnādyaṃ saṃprāpte harivāsare // ### [2.24.40](https://indike.org/pramana/in.purana.narada.2.24.40) nijadharmaṃ parityajya paradharme vyavasthitaḥ / vidhāvānāṃ yatīnāṃ ca yujyate vratasevanam // ### [2.24.41](https://indike.org/pramana/in.purana.narada.2.24.41) paradharmarato yaḥ syātsvadharmavimukho naraḥ / soṃ'dhe tamasi majjeta yāvadindrāścaturddaśa // ### [2.24.42](https://indike.org/pramana/in.purana.narada.2.24.42) upavāsādikaraṇaṃ bhūbhujāṃ noditaṃ kvacit / prajāsaṃrakṣaṇaṃ tyaktvā caturvargaphalapradam // ### [2.24.43](https://indike.org/pramana/in.purana.narada.2.24.43) nārīṇāṃ bhartṛśūśrūṣā putrāṇāṃ pitṛsevanam / śūdrāṇāṃ dvijasevā ca lokarakṣā mahībhṛtām // ### [2.24.44](https://indike.org/pramana/in.purana.narada.2.24.44) svakaṃ karma parityajya yo 'nyatra kurute śramam / ajñānādvā pramādācca patitaḥ sa na saṃśayaḥ // ### [2.24.45](https://indike.org/pramana/in.purana.narada.2.24.45) so 'yamadya mahīpālo yatidharmme vyavasthitaḥ / subuddhyācāraśīlaśca vedoktaṃ tyajati dvijāḥ // ### [2.24.46](https://indike.org/pramana/in.purana.narada.2.24.46) svecchācārā tu yā nārī yo 'vinītaḥ suto dvijāḥ / ekāntaśīlo nṛpatirbhṛtyaḥ karmavivarjitaḥ // ### [2.24.47](https://indike.org/pramana/in.purana.narada.2.24.47) sarve te narakaṃ yānti hyapratiṣṭhaśca yo dvijāḥ / ayaṃ hi niyamopeto haripūjanatatparaḥ // ### [2.24.48](https://indike.org/pramana/in.purana.narada.2.24.48) ākrande varttamāne tu na yadyeṣa pradhāvati / vyapohya haripūjāṃ vai brahmahatyāṃ tu vindati // ### [2.24.49](https://indike.org/pramana/in.purana.narada.2.24.49) kṣīṇadehe haridine kathaṃ saṃyamayiṣyati / annātprabhavati prāṇaḥ prāṇāddehaviceṣṭanam // ### [2.24.50](https://indike.org/pramana/in.purana.narada.2.24.50) ceṣṭayā ripunāśaśca taddhīnaḥ paribhūyate / evaṃ jñātvā mayā rājā bodhyamāno na buddhyati // ### [2.24.51](https://indike.org/pramana/in.purana.narada.2.24.51) etadeva vrataṃ rājño yatprajāpālanaṃ caret / na vrataṃ kiñcidastyanyannṛpasya dvijasattamāḥ // ### [2.24.52](https://indike.org/pramana/in.purana.narada.2.24.52) kiṃ deva kāryeṇa narādhipasya kṛtvā hi manyuṃ viṣayasthitānām / taddevakāryaṃ sa ca yajñahomo yadraktapāto na bhavet svarāṣṭre // ### [2.24.52.p1](https://indike.org/pramana/in.purana.narada.2.24.52.p1) iti śrībṛhannāradīyapurāṇottarabhāge mohinīpraśno nāma caturviṃśo 'dhyāyaḥ ## Linked texts (1) - [Rukmāṅgadacaritra](https://indike.org/pramana/in.purana.upakhyana.vamsa-rsi.rukmangadacaritra.101.50.1) — Sanskrit ## Discussed in (2) - [Studies in the Purāṇic Records on Hindu Rites and Customs](https://indike.org/pramana/ins.religion.hazra-1940.c14.s13.12) — Hazra 1940, English - [History of Dharmaśāstra (Ancient and Mediaeval Religious and Civil Law in India)](https://indike.org/pramana/ins.polity.kane-1930.v6.c81.2318) — Kane 1930, English --- Source: [https://indike.org/pramana/in.purana.narada.2.24](https://indike.org/pramana/in.purana.narada.2.24) · Pramāṇa