[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.25 # Naradapurana 2.25 Nāradapurāṇa 2.25 - **Language:** Sanskrit ## Contents - [2.25.82](https://indike.org/pramana/in.purana.narada.2.25.82) — 1 part ### [2.25.1](https://indike.org/pramana/in.purana.narada.2.25.1) vasiṣṭha uvāca tadvākyaṃ brāhmaṇāḥ śrutvā mohinyā samudīritam / tathyamityevamuktvā tu rājānaṃ vākyamabruvan // ### [2.25.2](https://indike.org/pramana/in.purana.narada.2.25.2) brāhmaṇā ūcuḥ yastvayā nṛpate puṇyaḥ kṛto 'yaṃ śapathaḥ kila / ekādaśyāṃ na bhoktavyaṃ pakṣayorubhayorapi // ### [2.25.3](https://indike.org/pramana/in.purana.narada.2.25.3) na kṛtaḥ śāstradṛṣṭyā tu svabuddhyaiva prakalpitaḥ / sāgrīnāṃ prāśanaṃ proktamubhayoḥ saṃdhyayoḥ kila // ### [2.25.4](https://indike.org/pramana/in.purana.narada.2.25.4) homocchiṣṭaprabhoktārastrayo varṇāḥ prakīrtitāḥ / viśeṣādbhūmipālānāṃ kathaṃ yuktamupoṣaṇam // ### [2.25.5](https://indike.org/pramana/in.purana.narada.2.25.5) sarvadodyataśastrāṇāṃ duṣṭasaṃyamināṃ vibho / śāstrato 'śāstrato vāpi yastvayā śapathaḥ kṛtaḥ // ### [2.25.6](https://indike.org/pramana/in.purana.narada.2.25.6) paripūrṇo bhavatyadya vākyena hi dvijanmanām / vratabhaṅgo na te 'stīha bhukṣvaṃ viprasamanvitaḥ // ### [2.25.7](https://indike.org/pramana/in.purana.narada.2.25.7) paritāpo na te kāryo vipravākyaṃ mahattaram / yo 'nyathā manyate vākyaṃ viprāṇāṃ nṛpasattama // ### [2.25.8](https://indike.org/pramana/in.purana.narada.2.25.8) sa yāti rākṣasīṃ yoniṃ janmāni daśa pañca ca / tacchrutvā vacanaṃ rodraṃ rājā kopasamanvitaḥ // ### [2.25.9](https://indike.org/pramana/in.purana.narada.2.25.9) uvāca sphuramāṇauṣṭastānviprānślakṣṇayā girā / sarveṣāmeva bhūtānāṃ bhavanto mārgadarśinaḥ // ### [2.25.10](https://indike.org/pramana/in.purana.narada.2.25.10) yatīnāṃ vidhavānāṃ ca śloko 'yaṃ paṭhyate dvijāḥ / vimārgagāmināṃ caitanmataṃ na sātvatāṃ kvacit // ### [2.25.11](https://indike.org/pramana/in.purana.narada.2.25.11) yadbhavadbhiḥ samuddiṣṭaṃ rājñāṃ nopoṣaṇaṃ smṛtam / tatra vākyāni śṛṇuta vaiṣṇavā cāralakṣaṇe // ### [2.25.12](https://indike.org/pramana/in.purana.narada.2.25.12) na śaṅkhena pibettoyaṃ na hanyātkūrmasūkarau / ekā daśyāṃ na bhoktavyaṃ pakṣayorubhayorapi // ### [2.25.13](https://indike.org/pramana/in.purana.narada.2.25.13) na pātavyaṃ hi madya tu na hantavyo dvijaḥ kvacit / krīḍennākṣaistu dharmajño nāśnīyāddharivāsare // ### [2.25.14](https://indike.org/pramana/in.purana.narada.2.25.14) abhakṣya bhakṣaṇaṃ pāpaṃ paradārābhimarśanam / ekādaśyāṃ bhojanaṃ ca patanasyaiva kāraṇam // ### [2.25.15](https://indike.org/pramana/in.purana.narada.2.25.15) akāryakaraṇaṃ kṛtvā kiṃ jīveccharadāṃ śatam / ko hi saṃceṣṭamānastu bhunakti harivāsare // ### [2.25.16](https://indike.org/pramana/in.purana.narada.2.25.16) catuṣpadebhyo 'pi janairnānnaṃ deyaṃ harerdine / uttarāśāsthitairviprairviṣṇudharmaparāyaṇaiḥ // ### [2.25.17](https://indike.org/pramana/in.purana.narada.2.25.17) so 'haṃ kathaṃ karomyadya abhakṣyasya tu bhakṣaṇam / nopakṣīṇaśarīro 'haṃ nāmayāvī dvijottamāḥ // ### [2.25.18](https://indike.org/pramana/in.purana.narada.2.25.18) sa kathaṃ hi vrataṃ tyakṣe vimārgasthadvijoktitaḥ / dharmabhūṣaṇasaṃjñena rakṣyamāṇe dharātale // ### [2.25.19](https://indike.org/pramana/in.purana.narada.2.25.19) na ca rakṣāvihīno 'haṃ śatruḥ ko 'pina me 'sti ca / evaṃ jñātvā dvijaśreṣṭhā vaiṣṇavavrataśālinaḥ // ### [2.25.20](https://indike.org/pramana/in.purana.narada.2.25.20) bhavadbhirnocitaṃ vaktuṃ pratikūlaṃ vratāpaham / asaṃparīkṣya ye dadyuḥ prāyaścittaṃ dvijātayaḥ // ### [2.25.21](https://indike.org/pramana/in.purana.narada.2.25.21) teṣāmeva hi tatpāpaṃ smṛtivaikalyasambhavam / devo vā dānavo vāpi gandharvo rākṣaso 'pi vā // ### [2.25.22](https://indike.org/pramana/in.purana.narada.2.25.22) siddho vā brāhmaṇo vāpi pitāsmākaṃ svayaṃ vadet / harirvāpi haro vāpi mohinījanako 'pi vā // ### [2.25.23](https://indike.org/pramana/in.purana.narada.2.25.23) dinakṛllokapālo vā no bhokṣye harivāsare / yo hi rukmāṅgado rājā vikhyāto bhūtale dvijāḥ // ### [2.25.24](https://indike.org/pramana/in.purana.narada.2.25.24) satyapratijñāṃ viphalāṃ na kadācitkaroti hi / dyupateḥ kṣīyate tejo himavānparivarttate // ### [2.25.25](https://indike.org/pramana/in.purana.narada.2.25.25) jaladhiḥ śoṣamāyāti pāvakaścoṣṇatāṃ tyajet / tathāpi na tyaje viprā vratamekādaśīdine // ### [2.25.26](https://indike.org/pramana/in.purana.narada.2.25.26) prasiddhireṣā bhuvanatraye 'pi āraṭyate me paṭahena viprāḥ / grāmeṣu deśeṣu pareṣu vāpi ye bhuñjate rukmavibhūṣaṇasya // ### [2.25.27](https://indike.org/pramana/in.purana.narada.2.25.27) daṇḍyāśca vadhyāśca saputrakāste na cāpi vāso viṣaye hi teṣām / harerdine sarvamakhapradhāne pāpāpahe dharmavivarddhane ca // ### [2.25.28](https://indike.org/pramana/in.purana.narada.2.25.28) mokṣaprade janmanikṛntanākhye tejo nidhau sarvajanaprarūḍhe / eṃvavidhe prodgata eva śabde yadyasmi bhoktā vṛjinasya karttā // ### [2.25.29](https://indike.org/pramana/in.purana.narada.2.25.29) amedhyaliptaḥ paṭaho bhavettadā saṃchādito nīlamayena vāsasā / utpādya kīrtiṃ svayameva jaturnikṛntati prāṇabhayācca pāpāt // ### [2.25.30](https://indike.org/pramana/in.purana.narada.2.25.30) yastasya vāso niraye yugānāṃ ṣaṣṭirbhavedvā krimidaṃśasaṃjñe / vṛthā hi sūtā mama sā janitrī bhavennirāśā dvijapitṛdevāḥ // ### [2.25.31](https://indike.org/pramana/in.purana.narada.2.25.31) vaivasvato harṣamupāśrayecca salekhako me vratabhaṅga eva / kiṃ tena jātena durātmanā hi dadāti harṣaṃ ripusuṃdarīṇām // ### [2.25.32](https://indike.org/pramana/in.purana.narada.2.25.32) kukarmaṇā pāparatiḥ kujātiḥ sarvasya nāśī tvaśucissa mūḍhaḥ / na manyate vedapurāṇaśāstrānante purīṃ yāti dineśasūnoḥ // ### [2.25.33](https://indike.org/pramana/in.purana.narada.2.25.33) kṛtvaiva vāntiṃ punaratti tāṃ yastadvatpratijñāvratabhaṅgakārī / vedā na śāstraṃ na ca tatpurāṇaṃ na cāpi santaḥ smṛtayo na ca syuḥ // ### [2.25.34](https://indike.org/pramana/in.purana.narada.2.25.34) ye mādhavasya priyakṛtyayogye vadanti śuddhe 'hni bhujikriyāṃ tu / śrāddhena tenāpi na cāsti tṛptiḥ pituśca cīrṇena harerdine tu // ### [2.25.35](https://indike.org/pramana/in.purana.narada.2.25.35) vratena yadviṣṇupadapradena sākaṃ kṣayāhena vadantu mūḍhāḥ // ### [2.25.36](https://indike.org/pramana/in.purana.narada.2.25.36) etacchrutvā tu tadvākyaṃ mohinī jvalitāntarā / kopasaṃraktanayanā bhartāraṃ paryabhāṣat // ### [2.25.37](https://indike.org/pramana/in.purana.narada.2.25.37) karoṣi cenna me vākyaṃ dharmabāhyo bhaviṣyasi / dharmabāhyo hi puruṣaḥ pāṃśunā tulyatāṃ vrajet // ### [2.25.38](https://indike.org/pramana/in.purana.narada.2.25.38) pāṃśunā pūryate gartaḥ sa gartakhanako bhavet / tvayā mamārpitaḥ pāṇirvarāya pṛthivīpate // ### [2.25.39](https://indike.org/pramana/in.purana.narada.2.25.39) tāmullaṅghya pratijñāṃ svāṃ pālayiṣyāsi no yadi / kṛtakṛtyā tadā yāsye prāpto dharmo mayā tava // ### [2.25.40](https://indike.org/pramana/in.purana.narada.2.25.40) na cāhaṃ te priyā bhāryā na ca tvaṃ me patirnṛpa / upadhānaṃ kariṣyāmi svakaṃ bāhuṃ na te yudhi // ### [2.25.41](https://indike.org/pramana/in.purana.narada.2.25.41) dhik tvāṃ dharmakṣayakaraṃ svavacolopakārakam / mleccheṣvapi na dṛśyeta tvādṛśo dharmalopakaḥ // ### [2.25.42](https://indike.org/pramana/in.purana.narada.2.25.42) satyāccalitamadyatvāṃ parityakṣye supāpinam / evamuktvā varārohā hyudatiṣṭhattvarānvitā // ### [2.25.43](https://indike.org/pramana/in.purana.narada.2.25.43) yathā satī haraṃ tyaktvā divyābharaṇabhūṣitā / prasthitā sā tadā tanvī bhūsuraiśca samanvitā // ### [2.25.44](https://indike.org/pramana/in.purana.narada.2.25.44) varaṃ madyasya saṃsparśo nāsya saṃgo nṛpasya vai / varaṃ nīlāṃbarasparśo nāsya dharmacyutasya hi // ### [2.25.45](https://indike.org/pramana/in.purana.narada.2.25.45) evaṃ hi mohinī ruṣṭā pralapantī tadā bhṛśam / gautamādisamāyuktā nirjagāma gṛhādbrahiḥ // ### [2.25.46](https://indike.org/pramana/in.purana.narada.2.25.46) hā tāta hā jagannātha sṛṣṭisthittyantakāraka / ityeva śabdaṃ krośantī brahmaṇomānasodbhavā // ### [2.25.47](https://indike.org/pramana/in.purana.narada.2.25.47) etasminneva kāle tu vājirājaṃ samāsthitaḥ / aṭitvā sakalāmurvīṃ saṃprāpto dharmabhūṣaṇaḥ // ### [2.25.48](https://indike.org/pramana/in.purana.narada.2.25.48) saṃmukho 'bhūjjananyāstu tvarāyukto vimatsaraḥ / karṇābhyāṃ tasya śabdo 'sau viśrutaḥ pitṛvatsalaḥ // ### [2.25.49](https://indike.org/pramana/in.purana.narada.2.25.49) mohinīvaktrasaṃbhūto vipravākyopabṛṃhitaḥ / dharmāṅgado dharmamūrtiḥ rukmāgadasutastadā // ### [2.25.50](https://indike.org/pramana/in.purana.narada.2.25.50) avaruhya hayāttūrṇaṃ yayau tātapadāntike / punarutthāya viprendrānnanāma vihitāñjaliḥ // ### [2.25.51](https://indike.org/pramana/in.purana.narada.2.25.51) tataḥ śīghragatiṃ dṛṣṭvā mohinīṃ ruṣṭamānasām / ālakṣya tarasā mātaḥ prāha rājan kṛtāñjaliḥ // ### [2.25.52](https://indike.org/pramana/in.purana.narada.2.25.52) kenāvamānitā devi kathaṃ ruṣṭā pituḥ priye / etairdvijendraiḥ sahitā kva tvaṃ saṃprasthitādhunā // ### [2.25.53](https://indike.org/pramana/in.purana.narada.2.25.53) dharmāṅgadavacaḥ śrutvā mohinī vākyamabravīt / pitā tavānṛtī putra karo yena vṛthā kṛtaḥ // ### [2.25.54](https://indike.org/pramana/in.purana.narada.2.25.54) yaḥ karttā sukṛtaṃ bhūri raktāśokākṛtiḥ sthitaḥ / dhvajāṅkuśāṅkitaḥ śrīmāndakṣiṇaḥ kanakāṅgadaḥ // ### [2.25.55](https://indike.org/pramana/in.purana.narada.2.25.55) rukmāṅgadena te pitrā na cāhaṃ vastumutsahe // ### [2.25.56](https://indike.org/pramana/in.purana.narada.2.25.56) dharmāṅgada uvāca yadvavīṣi vaco devi tatkarttāhaṃ na saṃśayaḥ / mā kopaṃ kuru mātastvaṃ nivarttatasva pituḥ priye // ### [2.25.57](https://indike.org/pramana/in.purana.narada.2.25.57) mohinyuvāca anena samayenāhaṃ tvatpitrā mandarācale / kṛtā bhāryā śivaḥ sākṣye sthito yatra surādhipaḥ // ### [2.25.58](https://indike.org/pramana/in.purana.narada.2.25.58) samayātsa cyutaḥ samyakpitā te rukmabhūpaṇaḥ / na prayacchati me deyaṃ tasya vṛddhiṃ vicintaye // ### [2.25.59](https://indike.org/pramana/in.purana.narada.2.25.59) na yāce kāñcanaṃ dhānyaṃ hastyaśvaṃ grāmavāsasī / yena tasya bhaveddhānirna yāce tannṛpātmaja // ### [2.25.60](https://indike.org/pramana/in.purana.narada.2.25.60) yenāsau prīṇayeddehaṃ svakīyaṃ dehināṃ vara / tanmayā prārthitaṃ putra sa mohānna prayacchati // ### [2.25.61](https://indike.org/pramana/in.purana.narada.2.25.61) tasyaiva copakārāya śarīrasya nṛpātmaja / yācitaḥ sukhahetostu mayā nṛpatisattamaḥ // ### [2.25.62](https://indike.org/pramana/in.purana.narada.2.25.62) sthitaḥ so 'dyānṛte ghore surāpānasame vibhuḥ // ### [2.25.63](https://indike.org/pramana/in.purana.narada.2.25.63) satyacyutaṃ niṣṭhuravākyabhāṣiṇaṃ vimuktadharmaṃ tvanṛtaṃ śaṭhaṃ ca / parityajeyaṃ janakaṃ tavādhamaṃ naiva sthitirme bhavitā hi tena // ### [2.25.64](https://indike.org/pramana/in.purana.narada.2.25.64) tacchrutvā mohinīvākyaṃ putro dharmāṅgado 'bravīt / mayi jīvati tāto me na bhavedanṛtī kvacit // ### [2.25.65](https://indike.org/pramana/in.purana.narada.2.25.65) nivartasva varārohe kariṣye 'haṃ tavepsitam / pitrā me nānṛtaṃ devi pūrvamuktaṃ kadācana // ### [2.25.66](https://indike.org/pramana/in.purana.narada.2.25.66) sa kathaṃ mayi jāte tu vadiṣyati mahīpatiḥ / yasya satye sthitā lokāḥ sadevāsuramānuṣāḥ // ### [2.25.67](https://indike.org/pramana/in.purana.narada.2.25.67) vaivasvatagṛhaṃ yena kṛtaṃ śūnyaṃ hi pāpibhiḥ / vijṛṃbhate yasya kīrtirvyāptaṃ brahmāṇḍamaṇḍalam // ### [2.25.68](https://indike.org/pramana/in.purana.narada.2.25.68) sa kathaṃ jāyate bhūpo mithyāvacanasaṃsthitaḥ / aśrutaṃ bhūpatervākyaṃ parokṣe śraddadhe katham // ### [2.25.69](https://indike.org/pramana/in.purana.narada.2.25.69) mamopari dayāṃ kṛtvā nivartasva śubhānane / etaddharmāṅgadenoktaṃ vākyamākarṇya mohinī // ### [2.25.70](https://indike.org/pramana/in.purana.narada.2.25.70) nyavartata mahīpālaputraskandhāvalaṃbinī / yatra rukmāṅgadaḥ śete mṛtakalpo raviprabhaḥ // ### [2.25.71](https://indike.org/pramana/in.purana.narada.2.25.71) tasminniveśayāmāsa śayane kāñcanānvite / dīparatnaiḥ suprakāśe vidrumaiścitrite vare // ### [2.25.72](https://indike.org/pramana/in.purana.narada.2.25.72) ākhaṇḍalāstramaṇibhiḥ kṛtapāde sukomale / dīrghavistārasaṃyukte hyanaupamye manohare // ### [2.25.73](https://indike.org/pramana/in.purana.narada.2.25.73) tataḥ kṛtāñjaliḥ prāhapitaraṃ ślakṣṇayā girā / tātaiṣā jananī me 'dya tvāṃ vadatyanṛtī tviti // ### [2.25.74](https://indike.org/pramana/in.purana.narada.2.25.74) kasmāttvamanṛtī bhūpa bhaviṣyasi mahītale / sakoṣaratnanicaye gajāśvarathasaṃyute // ### [2.25.75](https://indike.org/pramana/in.purana.narada.2.25.75) rājye praśāsyamāne tu saptodadhisamanvite / pradehi sakalaṃ hyasyai yattyā śrāvitaṃ vibho // ### [2.25.76](https://indike.org/pramana/in.purana.narada.2.25.76) mayi cāpadhare tāta ko vyalīkaṃ carettava / dehi śakrapadaṃ devyai jitaṃ viddhi purandaram // ### [2.25.77](https://indike.org/pramana/in.purana.narada.2.25.77) vairiñcyaṃ durllabhaṃ yacca yogigamyaṃ nirañjanam / taccāpyahaṃ pradāsyāmi tapasā toṣya padmajam // ### [2.25.78](https://indike.org/pramana/in.purana.narada.2.25.78) samīhate yajjananī madīyā rasātale vāpi dharātale vā / triviṣṭape vāpi pare pade vā dāsyāmi jitvā naradevadānavān // ### [2.25.79](https://indike.org/pramana/in.purana.narada.2.25.79) ahaṃ hi dāsastava bhūpa yasmādvikrīyatāṃ māmathavā tṛṇāya / haste hi pāpasya divāprakīrtervatsyāmi tatkarmakaraḥ subhuktaḥ // ### [2.25.80](https://indike.org/pramana/in.purana.narada.2.25.80) yadduṣkaraṃ bhūmipate trilokyāṃ nādeyamastīha tadiṣṭaṃbhāvāt / taccāpi rājendra dadasva devyai majjīvitaṃ majjananībhavaṃ vā // ### [2.25.81](https://indike.org/pramana/in.purana.narada.2.25.81) tenaiva sadyo nṛpanātha loke satkīrtiyukto bhava sarvadaiva / virājayitvā svaguṇairnṛpaughānkarairivātmaprabhavaiḥ khaśobhaiḥ // ### [2.25.82](https://indike.org/pramana/in.purana.narada.2.25.82) kīrtiprabhaṅge vṛjinaṃ bhaviṣyati prajāvadhe yanmanurāha satyam / saṃmārjayitvā vimalaṃ yaśaḥ svaṃ kathaṃ sukhī syāṃ nṛpate tataḥ kṣamaḥ // ### [2.25.82.p1](https://indike.org/pramana/in.purana.narada.2.25.82.p1) iti śrībṛhannāradīyapurāṇottarabhāge mohinīcarite pañcaviṃśo 'dhyāyaḥ ## Linked texts (1) - [Rukmāṅgadacaritra](https://indike.org/pramana/in.purana.upakhyana.vamsa-rsi.rukmangadacaritra.101.80.1) — Sanskrit --- Source: [https://indike.org/pramana/in.purana.narada.2.25](https://indike.org/pramana/in.purana.narada.2.25) · Pramāṇa