[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.28 # Naradapurana 2.28: athāṣṭāviṃśo'dhyāyaḥ Nāradapurāṇa 2.28 - **Language:** Sanskrit ## Contents - [2.28.89](https://indike.org/pramana/in.purana.narada.2.28.89) — 1 part ### athāṣṭāviṃśo'dhyāyaḥ ### [2.28.1](https://indike.org/pramana/in.purana.narada.2.28.1) kāṣṭhīlovāca rākṣasaṃ dhāvamānaṃ tu kālāntakayamopamam / dṛṣṭvā sā rākṣasī prāha bhartāraṃ mama śaṅkitā // ### [2.28.2](https://indike.org/pramana/in.purana.narada.2.28.2) prakṣipasvānalaprakhyāṃ śaktiṃ hemavibhūṣitām / mamāyaṃ pañcatāṃ yātu digaṃbararipupriya // ### [2.28.3](https://indike.org/pramana/in.purana.narada.2.28.3) tasyā vākyānmama patiḥ pauruṣe tu vyavasthitaḥ / mumoca vipulāṃ śaktiṃ rakṣovakṣasthala prati // ### [2.28.4](https://indike.org/pramana/in.purana.narada.2.28.4) jvalantī jvalanaprakhyā dyotayantī diśo daśa / divyāṃśutīkṣṇa vaktrātā kiṅkiṇīśatanāditā // ### [2.28.5](https://indike.org/pramana/in.purana.narada.2.28.5) raktacandanaliptāṅgī raktavastropaśobhitā / hṛdi tasya nipatyāsau śaktirviprakaracyutā // ### [2.28.6](https://indike.org/pramana/in.purana.narada.2.28.6) kṛtvā bhasmāvaśeṣaṃ tu rākṣasaṃ gaganaṃ yayau / pātayitvā svabhartāraṃ viprahastena rākṣasī // ### [2.28.7](https://indike.org/pramana/in.purana.narada.2.28.7) kṛtakṛtyamivātmānaṃ mene hṛṣṭatanūruhā / athovāca dvijaṃ hṛṣṭā rākṣasī śubhalocanam // ### [2.28.8](https://indike.org/pramana/in.purana.narada.2.28.8) ehi kānta guhāṃ ramyāṃ praviśa tvaṃ yadṛcchayā / bhuṅkṣva bhogānmayā sārddhaṃ ye divyā ye ca mānuṣāḥ // ### [2.28.9](https://indike.org/pramana/in.purana.narada.2.28.9) tatheti prāṇanātho me prāhahṛṣṭavapustadā / tataḥ sādāya me kāntaṃ svāṃ praviṣṭā guhāṃ mudā // ### [2.28.10](https://indike.org/pramana/in.purana.narada.2.28.10) asaṃvīkṣyaiva tadbhasma bhartṛdehasamudbhavam / kucābhyāmunnatābhyāṃ sā madbhartāramapīḍayat // ### [2.28.11](https://indike.org/pramana/in.purana.narada.2.28.11) darśayāmāsa tāṃ tanvīṃ kumārīṃ śayane sthitām / iyaṃ tenāsitāpāṅgī bimboṣṭhī kāñcanaprabhā // ### [2.28.12](https://indike.org/pramana/in.purana.narada.2.28.12) bhāryārthe samupānītā vārāṇasyā dvijottama / yasyāḥ sīmāṃ na laṅghanti pātakāni hyaśeṣataḥ // ### [2.28.13](https://indike.org/pramana/in.purana.narada.2.28.13) śaktikṣetraṃ ca tāṃ prāhuḥ puṇyaṃ pāpakṣayaṅkaram / yā gṛhaṃ tripurāreśca pañcagavyūtisaṃsthitā // ### [2.28.14](https://indike.org/pramana/in.purana.narada.2.28.14) yasyāṃ mṛtāḥ punarmartyā garbhavāsaṃ viśanti na / sa tvamasyā gṛhaṃ pitryaṃ punarnaya sulocanām // ### [2.28.15](https://indike.org/pramana/in.purana.narada.2.28.15) imāni tava ratnāni śayanānyāsanāni ca / mayā saha samastāni vikrīṇīhi nijecchayā // ### [2.28.16](https://indike.org/pramana/in.purana.narada.2.28.16) tvadarthe rākṣaso ghoro mayā brahmanniṣūditaḥ / mugdhayā tava rūpeṇa preṣito yamasādanam // ### [2.28.17](https://indike.org/pramana/in.purana.narada.2.28.17) tasmānmamopiri vibho kṛtvā viśvāsamātmanā / bhajasva māṃ viśālākṣa bhaktāṃ vai kāmarūpiṇīm // ### [2.28.18](https://indike.org/pramana/in.purana.narada.2.28.18) etacchrutvā tu vacanaṃ bhartā me cārulocane / rākṣasyāḥ kāmataptāyāḥ kumāryāḥ sannidhau śubhe // ### [2.28.19](https://indike.org/pramana/in.purana.narada.2.28.19) uvāca rākṣasīṃ tāṃ tu saśaṅko madhuraṃ vacaḥ / subhage nītiśāstreṣu viśvastavyā na yoṣitaḥ // ### [2.28.20](https://indike.org/pramana/in.purana.narada.2.28.20) kaumāraṃ yā patiṃ hanti sā kathaṃ māṃ na hiṃsati / matto rūpādhikaṃ matvā paraṃ puruṣalaṃpaṭā // ### [2.28.21](https://indike.org/pramana/in.purana.narada.2.28.21) so 'haṃ viśvāsabhāvena viśvastaste varānane // ### [2.28.22](https://indike.org/pramana/in.purana.narada.2.28.22) adya vātha paredyurvā pakṣe māse 'tha vatsare / vyāpādaya yathecchaṃ vā tvāṃ prapanno 'smi bhāmini // ### [2.28.23](https://indike.org/pramana/in.purana.narada.2.28.23) evameva tvayā kāryaṃ nādya copakṛtaṃ tava / ātmā te sarvathā deyaḥ pratīkārasya hetave // ### [2.28.24](https://indike.org/pramana/in.purana.narada.2.28.24) madarthe nihato bhartā tvayā niḥśaṅkayā yataḥ / tato 'haṃ nottaraṃ vacmi paraṃ kiñcitsulocane // ### [2.28.25](https://indike.org/pramana/in.purana.narada.2.28.25) tacchrutvā vacanaṃ tasya madbhartuḥ sābravīdidam / viśvastahiṃsanaṃ brahman brahmahatyā samaṃ bhavet // ### [2.28.26](https://indike.org/pramana/in.purana.narada.2.28.26) yadyevaṃ rākṣasīṃ krūrāṃ manyase patighātinīm / patiṃ tathāpi garheyaṃ viśvastaṃ ghātaye katham // ### [2.28.27](https://indike.org/pramana/in.purana.narada.2.28.27) sūkṣmā hi dharmasya gatirna jñāyeta kathañcana / kenāpi kutraciddevadaityarākṣasakādinā / kecinmanuṣyāḥ paṭavo dharmasūkṣmatvacintane // ### [2.28.28](https://indike.org/pramana/in.purana.narada.2.28.28) ye 'nityena śarīreṇa naiṣkarmyaṃ sādhayantyuta / śrūyate ca purāṇeṣu kiñcidatra nigadyate // ### [2.28.29](https://indike.org/pramana/in.purana.narada.2.28.29) dharmasyaivānukūlyena viṣṇunā prabhaviṣṇunā / daśāvatāragrahaṇe duḥkhaṃ prāptamanekadhā // ### [2.28.30](https://indike.org/pramana/in.purana.narada.2.28.30) kva sītārthaṃ śrīnivāso rāmo lakṣmaṇasaṃyutaḥ / vilāpaṃ kurute nāgapāśabandhādikarmasu // ### [2.28.31](https://indike.org/pramana/in.purana.narada.2.28.31) kva devadevo vasudevasūnurvijñānarūpo nikhalaprapañcī / hā kaṣṭamityasradṛgādiceṣṭaḥ pārthograsanādikabhṛtyakṛtyaḥ // ### [2.28.32](https://indike.org/pramana/in.purana.narada.2.28.32) īśasya kṛtyaṃ dvija durvibhāvyaṃ dharmānukūlyena samāsthitasya / vyāsaḥ svayaṃ vedavibhāgakarttā pārāśaristattvadṛgijyamūrtiḥ / kanyātvavidhvasakavīryajanmā kānīnasaṃjño 'nujadāragāmī // ### [2.28.33](https://indike.org/pramana/in.purana.narada.2.28.33) parivettā ca didhiṣūḥ śantanuḥ svaḥsaritpattiḥ / didhiṣū tanayaḥ sākṣādvasuḥ strīvādamṛtyubhāk // ### [2.28.34](https://indike.org/pramana/in.purana.narada.2.28.34) ye golakasutāḥ kuṇḍāḥ pāṇḍavāḥ samayonigāḥ / teṣāṃ saṃkīrtanaṃ puṇyaṃ pavitraṃ pāpanāśanam // ### [2.28.35](https://indike.org/pramana/in.purana.narada.2.28.35) yaṃ dhyāyanti smarantyaddhā yogamūrtiḥ sanātanaḥ // ### [2.28.36](https://indike.org/pramana/in.purana.narada.2.28.36) viṣṇurveśyāsamāsaktaḥ prahlādādyupadeśakṛt / śrīnṛsiṃho 'suradhvaṃsī devadevādhidaivatam // ### [2.28.37](https://indike.org/pramana/in.purana.narada.2.28.37) saṃsāravāsanādhvaṃsī devadevādhidaivatam / saṃsāravāsanādhvaṃsī svarṇākṣabhavanasthitiḥ // ### [2.28.38](https://indike.org/pramana/in.purana.narada.2.28.38) jāmadagnyaḥ svayaṃ siddhastapasā dagdhakilbiṣaḥ / īśvaraḥ kṣatrasaṃhārabhrūṇahatyādikarmakṛt // ### [2.28.39](https://indike.org/pramana/in.purana.narada.2.28.39) svayamevarṣabho yogī lokaśikṣāparo dvijaḥ / lokaglānikaro jātaḥ kurvandharmānurodhataḥ // ### [2.28.40](https://indike.org/pramana/in.purana.narada.2.28.40) nārado nārado bhūyo bhūyo bhūyo 'pi nāradaḥ / nārāyaṇaparo nāro naro narahito 'maraḥ // ### [2.28.41](https://indike.org/pramana/in.purana.narada.2.28.41) gautamo gautamo vipra gopaceṣṭāparāyaṇaḥ / vedabāhyārthasaṃyuktaśāstrī vedopakāra kṛt // ### [2.28.42](https://indike.org/pramana/in.purana.narada.2.28.42) vasuṣṭhaścorvaśījāto 'gastyo 'pi svayamīśvarau / yena lokopakārārthaṃ vāsiṣṭhaṃ śāstramuttamam // ### [2.28.43](https://indike.org/pramana/in.purana.narada.2.28.43) kṛtaṃ yasminpurāṇāni vedāḥ sāmyatvamāgatāḥ / yaḥ svayaṃ rāmacandrasya guruḥ sarveśvarasya ca // ### [2.28.44](https://indike.org/pramana/in.purana.narada.2.28.44) sa kathaṃ gādhijāśaptastiryagyonimupāgamat / yo damitvā vibhurvindhyaṃ vātāpiṃ sāgaraṃ sthitaḥ // ### [2.28.45](https://indike.org/pramana/in.purana.narada.2.28.45) sa kathaṃ mṛtakādātā duṣkaraṃ samupāsate / yo vidhiḥ karmasākṣyādivandyo mānyaḥ pitāmahaḥ // ### [2.28.46](https://indike.org/pramana/in.purana.narada.2.28.46) mohinīmohito dehamutsasarja kathaṃ sa ca / yaḥ śivaḥ śivadaḥ sākṣātprakṛtīśaḥ parātparaḥ // ### [2.28.47](https://indike.org/pramana/in.purana.narada.2.28.47) sa kathaṃ devapatnīgaḥ śmaśānāśubhaceṣṭitaḥ / tasmāddvija sadācāro niṣevyo vidhinā vidhiḥ // ### [2.28.48](https://indike.org/pramana/in.purana.narada.2.28.48) tamahaṃbhāvanāyukto no heyādyo vidāṃ varaḥ / sa śāntimāpnuyādagryāṃ dhamyāmubhayasaṃsthitām // ### [2.28.49](https://indike.org/pramana/in.purana.narada.2.28.49) āpavargyaḥ smṛto dharmo dhanaṃ dharmaikasādhanam / tanmayā sādhito dharmaḥ sarvottamadhanātmanā // ### [2.28.50](https://indike.org/pramana/in.purana.narada.2.28.50) śṛṇu viprātra dharmasya gatiṃ sūkṣmāṃ vadāmyaham / yadā samāgato bhartā mama kanyāṃ samāharan // ### [2.28.51](https://indike.org/pramana/in.purana.narada.2.28.51) tvāṃ paśyan nijakarmasthaṃ ko 'pi doṣo na tasya vai / mayā pṛṣṭaḥ kathaṃ nāma kanyeyaṃ samupāhṛtā // ### [2.28.52](https://indike.org/pramana/in.purana.narada.2.28.52) tadā tena mṛṣā vākyamuktaṃ madbhakṣaṇārthakam / tanniśamyāha māṃ baddhā svayaṃ cāsthāni darśanāt // ### [2.28.53](https://indike.org/pramana/in.purana.narada.2.28.53) ye vadanti ca dāṃpatye bhāryā mokṣavirodhinī / na te tattvadṛśo jñeyā na sā bhāryā virodhinī // ### [2.28.54](https://indike.org/pramana/in.purana.narada.2.28.54) bhāryā samuddharetpāpātpatantaṃ niraye patim / sā bhāryānyā karmavallīrūpā saṃsāradāyīnī // ### [2.28.55](https://indike.org/pramana/in.purana.narada.2.28.55) pāpaṃ kimatra tanmattaḥ samyakchṛṇu svayaṃ vara / alīkaṃ naiva vaktavyaṃ prāṇaiḥ kaṇṭhagatairapi // ### [2.28.56](https://indike.org/pramana/in.purana.narada.2.28.56) satyamevācaretsatye sākṣāddharme vyavasthitaḥ / satye samāsthito brahmā satye santaḥ samāsthitāḥ // ### [2.28.57](https://indike.org/pramana/in.purana.narada.2.28.57) satye samāsthitaṃ viśvaṃ sarvadā sacarācaram / satyaṃ brūyāditi vaco vedānteṣu pragīyate // ### [2.28.58](https://indike.org/pramana/in.purana.narada.2.28.58) satyaṃ brahmasvarūpaṃ hi tatsatyamabhidhīmahi / satyaṃ tu sarvadā vipra maṅgalaṃ maṅgalapradam // ### [2.28.59](https://indike.org/pramana/in.purana.narada.2.28.59) asatyamātmakṣayadaṃ sadyaḥ pratyayakārakam / strīṣu satyaṃ na vaktavyaṃ tatrāpi śṛṇu kāraṇam // ### [2.28.60](https://indike.org/pramana/in.purana.narada.2.28.60) nidhiṃ striyai na kathayedityādau doṣavāraṇam / uktaṃ taddharmajanakaṃ dharmasūkṣmatvadarśakam // ### [2.28.61](https://indike.org/pramana/in.purana.narada.2.28.61) kuśā dvijā jalaṃ vahnirvedā bhūkāladiksurāḥ / sākṣye yatra vivāheṣu dāṃpatyaṃ tadudīritam // ### [2.28.62](https://indike.org/pramana/in.purana.narada.2.28.62) samaṅgīkaraṇaṃ karma vivāhe tu vidhīyate / strīpuṃsordvijasaṃskāre nirdiṣṭaṃ guruśiṣyayoḥ // ### [2.28.63](https://indike.org/pramana/in.purana.narada.2.28.63) tasmātparasparaṃ jñeyo guruśiṣyau vadhūvarau / nānayoraṇumātro 'pi bhedo bodhyo vijānatā // ### [2.28.64](https://indike.org/pramana/in.purana.narada.2.28.64) tattatkarmānurūpatvātprādhānyastrīniyojyayoḥ / kvacidvyatyayadoṣaśceddaivamevātra kāraṇam // ### [2.28.65](https://indike.org/pramana/in.purana.narada.2.28.65) daivādhīnaṃ jagatsarvaṃ sadevāsuramānuṣam / daivaṃ tatpūrvajanmāni saṃcitāḥ karmavāsanāḥ // ### [2.28.66](https://indike.org/pramana/in.purana.narada.2.28.66) prāptaṃ niṣevannanyonyaṃ vartate kāmakārakam / śubhaṃ vāpyaśubhaṃ vipra taṃ tu śāntaṃ vidurbudhāḥ // ### [2.28.67](https://indike.org/pramana/in.purana.narada.2.28.67) śāntaḥ satyasamācāro janturlokapratārakaḥ / evamādi viditvā tu nāyaṃ bhartā nipātitaḥ // ### [2.28.68](https://indike.org/pramana/in.purana.narada.2.28.68) kanyātvadhvaṃsakātpāpātpūto madupakārataḥ / gatiṃ prayātaḥ kṛtināṃ tvaddhastavinipātitaḥ // ### [2.28.69](https://indike.org/pramana/in.purana.narada.2.28.69) mayā tūpakṛtaṃ patye jānantyā dharmasūkṣyatām / tvatprāṇarakṣaṇe dharmo mamābhūddvijasattama // ### [2.28.70](https://indike.org/pramana/in.purana.narada.2.28.70) tena dharmeṇa kiṃ prāptamiti samyaṅnibodha me / rākṣasīṃ yonimāpannā rākṣasasya priyā hyaham // ### [2.28.71](https://indike.org/pramana/in.purana.narada.2.28.71) kāmarūpā brāhmaṇī tu saṃjātā dharmakāraṇāt / dharmakāmadughā dhenuḥ saṃtoṣo nandanaṃ vanam // ### [2.28.72](https://indike.org/pramana/in.purana.narada.2.28.72) vidyā mokṣakarī proktā tṛṣṇā vaitaraṇī nadī / vaitaraṇyāṃ patanbhartā mayoddhṛta ihābhavat // ### [2.28.73](https://indike.org/pramana/in.purana.narada.2.28.73) asyāścopakṛtaṃ vipra varṇottamaniveśanāt / iyaṃ tvasaṃginī bhāryā bhaviṣyati piturgṛhe // ### [2.28.74](https://indike.org/pramana/in.purana.narada.2.28.74) ahaṃ tavāsyāśca sadā rakṣikā dharmabodhinī / matsaṃgamātpūrvameva yā bhāryā vipra te 'bhavat // ### [2.28.75](https://indike.org/pramana/in.purana.narada.2.28.75) iyaṃ tvatsaṃginī bhāryā bhaviṣyati varānanā / sāpi tiryaggatiṃ prāpya mucyate madanugrahāt // ### [2.28.76](https://indike.org/pramana/in.purana.narada.2.28.76) ahaṃ purā bhave 'bhūvaṃ ramaṇī lokasundarī / kandalīti ca vikhyātā tanayaurvamunerdvija // ### [2.28.77](https://indike.org/pramana/in.purana.narada.2.28.77) tapaḥ prabhāvātsaṃjātā yamalā mithunandharā / puruṣo me sahabhavo damito dharmakāraṇāt // ### [2.28.78](https://indike.org/pramana/in.purana.narada.2.28.78) tenaivaurveṇa śiṣṭāhaṃ dattā durvāsase bhavam / taṃ patiṃ prāpya viprendra prākkarmavaśāgā hyaham // ### [2.28.79](https://indike.org/pramana/in.purana.narada.2.28.79) kalahābhiratā patyā śaptā bhasmatvamāgatā / kiñcitpāpāvaśeṣeṇa rākṣasīṃ yonimāgatā // ### [2.28.80](https://indike.org/pramana/in.purana.narada.2.28.80) tatra yonau mayā labdho bhartāyaṃ rākṣasādhipaḥ / gobhilo nāma tejasvī sa tvayā vinipātitaḥ // ### [2.28.81](https://indike.org/pramana/in.purana.narada.2.28.81) śopo 'sya pūrvavayasibabhūva dvijasattama / kasyāścidrājakanyāyāḥ striyā'rabdhā mṛtistava // ### [2.28.82](https://indike.org/pramana/in.purana.narada.2.28.82) ahaṃ tu rākṣasībhāvarahitā pūrvakarmaṇaḥ / śubhasya balamāpannā jātā tava sahāyinī // ### [2.28.83](https://indike.org/pramana/in.purana.narada.2.28.83) duḥkhitāhaṃ kṛtā bhartrā kumāryāharaṇātpurā / bhāryātha pāpinā brahmaṃstena vyāpādito mayā // ### [2.28.84](https://indike.org/pramana/in.purana.narada.2.28.84) viśvasto hi yatastvaṃ vai mama sarveṇa cetasā / tatastvāṃ gopayiṣyāmi sarvabhāvena kāmuka // ### [2.28.85](https://indike.org/pramana/in.purana.narada.2.28.85) eṣa te śapathaḥ satyaḥ pañcabhūtopasākṣikaḥ / kṛtsnasya puruṣasyeha sannidhau vyāhṛto mayā // ### [2.28.86](https://indike.org/pramana/in.purana.narada.2.28.86) na karoṣi dvijaśreṣṭha saṃvidaṃ hyanyathā kvacit / madvākye bhavatā stheyaṃ sarvakṛtyeṣu mānada // ### [2.28.87](https://indike.org/pramana/in.purana.narada.2.28.87) etacchrutvā tu vacanaṃ rākṣasyā paribhāṣitam / pratipede vacaḥ sarvaṃ yatkṛtaṃ hi tayā tadā // ### [2.28.88](https://indike.org/pramana/in.purana.narada.2.28.88) tataḥ sā rākṣasī sarvaṃ saṃpragṛhya guhādhanam / kareṇurūpiṇī bhūtvā pṛṣṭhe kṛtvā patiṃ mama // ### [2.28.89](https://indike.org/pramana/in.purana.narada.2.28.89) tayā saha viśālākṣyā ratnāvalyā mudānvitā / yayāvākāśamārgeṇa kāśīmabhi mulocane // ### [2.28.89.p1](https://indike.org/pramana/in.purana.narada.2.28.89.p1) iti śrībṛhannāradīyapurāṇottarabhāge mohinīcarite kāṣṭhīlopākhyānaṃ nāmāṣṭāviṃśo 'dhyāyaḥ ## Linked texts (2) - [Brahmavaivartapurāṇa](https://indike.org/pramana/in.purana.brahmavaivarta.4.32.9_128) — Vyāsa, Sanskrit - [Rukmāṅgadacaritra](https://indike.org/pramana/in.purana.upakhyana.vamsa-rsi.rukmangadacaritra.103.57.1) — Sanskrit --- Source: [https://indike.org/pramana/in.purana.narada.2.28](https://indike.org/pramana/in.purana.narada.2.28) · Pramāṇa