[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.29 # Naradapurana 2.29: athaikonatriśo'dhyāyaḥ Nāradapurāṇa 2.29 - **Language:** Sanskrit ## Contents - [2.29.72](https://indike.org/pramana/in.purana.narada.2.29.72) — 1 part ### athaikonatriśo'dhyāyaḥ ### [2.29.1](https://indike.org/pramana/in.purana.narada.2.29.1) kāṣṭhīlovāca evaṃ sā rākṣasī subhru hastinīrūpadhāriṇī / tribhirmuhūrtaiḥ saṃprāptā kāśīṃ viśveśamandiram // ### [2.29.2](https://indike.org/pramana/in.purana.narada.2.29.2) uvāca tāṃ purīṃ prāpya bhartāramasitekṣaṇā / iyaṃ pāpataroḥ kānta kuṭhārā parikīrtitā // ### [2.29.3](https://indike.org/pramana/in.purana.narada.2.29.3) ṣaḍūrmikāñcanasyaiṣā kānta proktā durodarī / karmabījopaśamanī sarveṣāṃ gatidāyikā // ### [2.29.4](https://indike.org/pramana/in.purana.narada.2.29.4) ādyaṃ hi vaiṣṇavaṃ sthānaṃ purāṇāḥ saṃpracakṣate / nāvaiṣṇave sthale muktiḥ sarvasya tu kadācana // ### [2.29.5](https://indike.org/pramana/in.purana.narada.2.29.5) mādhavasya purī ceyaṃ pūrvamāsīddvijottama / muktidā sarvajantūnāṃ sarvapāpapraṇāśinī // ### [2.29.6](https://indike.org/pramana/in.purana.narada.2.29.6) ekadā śaṅkaro devo draṣṭuṃ prāgātpitāmaham / sarvalokaikakartāraṃ bhrājamānaṃ svatejasā // ### [2.29.7](https://indike.org/pramana/in.purana.narada.2.29.7) gatvā tatra mahādevo brahmāṇaṃ jagatāṃ gurum / namaskṛtya sthito hyagre vedapāṭhaṃ niśāmayan // ### [2.29.8](https://indike.org/pramana/in.purana.narada.2.29.8) caturbhiradbhutaivaktraiścaturo nigamānmudā / udgirantaṃ jagannāthaṃ dṛṣṭvā prīto 'bhavattadā // ### [2.29.9](https://indike.org/pramana/in.purana.narada.2.29.9) atha tatpañcamaṃ vaktraṃ brahmaṇo bhūtanāyakaḥ / pragalbhaṃ tamupālakṣya kṣaṇājjātaḥ samatsaraḥ // ### [2.29.10](https://indike.org/pramana/in.purana.narada.2.29.10) sa krodhajanmā viprendra tasya prāgalbhyamakṣaman / cakarta tannakhāgreṇa khasthaṃ vaktraṃ trilocanaḥ // ### [2.29.11](https://indike.org/pramana/in.purana.narada.2.29.11) tacchinnaṃ brahmaṇaḥ śīrṣaṃ saṃlagnaṃ karapallave / vāme nirdhūtamāniśaṃ na nivṛttaṃ dvijottama // ### [2.29.12](https://indike.org/pramana/in.purana.narada.2.29.12) brahmā tu duḥkhito bhūtvā tasthau sthāṇuṃ vyalokayan / rudro 'pi lajjito bhūtvā nirjjagāma tvarānvitaḥ // ### [2.29.13](https://indike.org/pramana/in.purana.narada.2.29.13) bahudhā yatamāno 'pi tacchiraḥ kṣeptumāturaḥ / na śaśāka parityaktuṃ tadadbhutamabhūnmahat // ### [2.29.14](https://indike.org/pramana/in.purana.narada.2.29.14) cintayā vyākulo bhūtvā sasmāra garuḍadhvajam / tena saṃsmṛtamātrastu śīghramāvirabhūcca saḥ // ### [2.29.15](https://indike.org/pramana/in.purana.narada.2.29.15) taṃ dṛṣṭvā devadeveśaṃ viṣṇuṃ sarvagataṃ dvija / nanāma śirasā namro niṣprabho vṛṣabhadhvajaḥ // ### [2.29.16](https://indike.org/pramana/in.purana.narada.2.29.16) taṃ tathāturamālakṣya bhītaṃ brahmadruhaṃ hariḥ / samāśvāsyā bravīdvākyaṃ tattoṣaparikārakam // ### [2.29.17](https://indike.org/pramana/in.purana.narada.2.29.17) śaṃbho tvayā kṛtaṃ pāpaṃ yaccinnaṃ brahmaṇaḥ śiraḥ / tatphalaṃ bhuṅkṣva sarṃvajña kiyatkālaṃ kṛtaṃ svayam // ### [2.29.18](https://indike.org/pramana/in.purana.narada.2.29.18) avaśyameva bhoktavyaṃ kṛtaṃ karma śubhāśubham / nābhuktaṃ kṣīyate karma hyapi janmaśataiḥ priya // ### [2.29.19](https://indike.org/pramana/in.purana.narada.2.29.19) kiṃ karomi kva gacchāmi tvāṃ dṛṣṭvā duḥkhitaṃ haram / prāṇā vikalatāṃ yānti mama tvadduḥkhadarśanāt // ### [2.29.20](https://indike.org/pramana/in.purana.narada.2.29.20) yāni kāni ca pāpāni mahānti mahatāṃ gate / na tāni brahmahatyāyāḥ samānīti matirmama // ### [2.29.21](https://indike.org/pramana/in.purana.narada.2.29.21) yastvaṃ sarvasya lokasya gururdharmopadeśakaḥ / brahmahatyābhibhūtastu kṣaṇaṃ sthātuṃ na ca kṣamaḥ // ### [2.29.22](https://indike.org/pramana/in.purana.narada.2.29.22) eṣā ghoratarā hatyā mīnagandhyā jarāturā / lelihānā sureśāna grahītuṃ tvānudhāvati // ### [2.29.23](https://indike.org/pramana/in.purana.narada.2.29.23) tasmānnaikatra bhavatā stheyaṃ dvādaśabatsaram / aṭanīyaṃ hitārthāya pāpanāśābhikāmyayā // ### [2.29.24](https://indike.org/pramana/in.purana.narada.2.29.24) aṭitvā dvādaśābdāni tīrtheṣu sakaleṣu ca / prakṣālayankaraṃ vāmaṃ bhikṣāṃ gṛhṇankapālake // ### [2.29.25](https://indike.org/pramana/in.purana.narada.2.29.25) śuddhiṃ yāsyasi deveśa pāpādasmātsudāruṇāt / ityukto viṣṇunā vipra sthāṇuḥ sarvagato 'bhavat // ### [2.29.26](https://indike.org/pramana/in.purana.narada.2.29.26) kapālamocanārthaṃ hi pāṇiṃ prakṣālayan jale / varṣatrayaṃ bhramitvā tu prāpto badarikāśramam // ### [2.29.27](https://indike.org/pramana/in.purana.narada.2.29.27) bhikṣārthaṃ devadevasya dharmaputrasya mānada / dvārastho dehi bhikṣāṃ me viṣṇo ityavadanmuhuḥ // ### [2.29.28](https://indike.org/pramana/in.purana.narada.2.29.28) tato nārāyaṇo devo dṛṣṭvā dvāri sthitaṃ haram / gṛhāṇa bhikṣāmityuktvā pradadau dakṣiṇaṃ karam // ### [2.29.29](https://indike.org/pramana/in.purana.narada.2.29.29) tato haro hariṃ dṛṣṭvā bhikṣāṃ dātuṃ samudyatam / prāharaddakṣiṇaṃ pāṇiṃ triśūlena dvijottama // ### [2.29.30](https://indike.org/pramana/in.purana.narada.2.29.30) tattriśūlakṣatāddhārāstisro lokabhayaṅkarāḥ / prasthadvādaśahastāśca nirgatāścitravarṇikāḥ // ### [2.29.31](https://indike.org/pramana/in.purana.narada.2.29.31) ekā kṣatajadhārā tu kapāle nyapatattadā / dvitīyā tanmukhe prāptā payasyātha tṛtīyakā // ### [2.29.32](https://indike.org/pramana/in.purana.narada.2.29.32) jaladhārā śivaṃ prāptā harasya heturagrataḥ / tā dhārāstrīṇi varṣāṇi saṃsevya vidhivaddharaḥ // ### [2.29.33](https://indike.org/pramana/in.purana.narada.2.29.33) kiñcitprīto yayau kṣetraṃ kuroḥ puṇyakaraṃ dvija / tatra gatvā haraḥ sthāṇurbhūtastatra papāta ca // ### [2.29.34](https://indike.org/pramana/in.purana.narada.2.29.34) brahmahrade trivarṣāṇi magro brahmahradāṃbuni / varṣatraye gate tatra kṣatārddhāṅgo viniḥsṛtaḥ // ### [2.29.35](https://indike.org/pramana/in.purana.narada.2.29.35) ciraṃ tuṣṭāva deveśaṃ viṣṇuṃ sarvaguhāśayam / tatastuṣṭo jagannātho varaṃ tasmai dadau tu saḥ // ### [2.29.36](https://indike.org/pramana/in.purana.narada.2.29.36) gaccha kāśīmito bhrāntvā tīrthāni bahuśo hara / tato hariṃ namaskṛtya parītya bahudhā tathā // ### [2.29.37](https://indike.org/pramana/in.purana.narada.2.29.37) kramāttīrthāṭanaṃ kurvannavimuktapurīṃ gataḥ / avimuktasya sīmāyāṃ prāviśadvīkṣtaya dhūrjaṭiḥ // ### [2.29.38](https://indike.org/pramana/in.purana.narada.2.29.38) nāpaśyattāmanuprāptāṃ brahmahatyāṃ bahiḥ sthitām / tato 'sau vaiṣṇavaṃ jñātvā kṣetraṃ duritanāśanam / tuṣṭāva prayato bhūtvā mādhavaṃ vandyamīśvaram // ### [2.29.39](https://indike.org/pramana/in.purana.narada.2.29.39) jaya jaya jagadīśa nātha viṣṇo jagadānandanidhāna vedavedya / madhumathana nṛsiṃha pītavāso garuḍādhiṣṭhita mādhavādideva // ### [2.29.40](https://indike.org/pramana/in.purana.narada.2.29.40) vrajaramaṇa rameśa rādhikeśa tridaśeśākhilakāmapūra kṛṣṇa / suravarakaruṇārṇavārtināśinnalinākṣādhipate vibho pareśa // ### [2.29.41](https://indike.org/pramana/in.purana.narada.2.29.41) yaduku latilakābdhivāsa śaure kudharoddhāravidhānadakṣa dhanvin / kalikaluṣaharāṅghripadmayugma gṛṇadātmaprada kūrma kaśyapottha // ### [2.29.42](https://indike.org/pramana/in.purana.narada.2.29.42) kukupativanapāvakākhilejyāsrapakālāsitavastra buddha kalkin / bhavabhayahara bhaktavaśya gopa praṇattoddhāraka puṇyakīrtinām // ### [2.29.43](https://indike.org/pramana/in.purana.narada.2.29.43) dharaṇibharaharāsurāripūjya prakṛtīśeśa jagannivāsa rāma / guṇagaṇavilasaccarācareśa triguṇātīta sanātanāgrapūjya / nijajanaparirakṣitāntakāre kamalāṅghre kamanīya padmanābha / kamalakara kuśeśayā dhivāsa priyakāmonmathana tryadhīśavandya // ### [2.29.44](https://indike.org/pramana/in.purana.narada.2.29.44) aghahara raghunātha yādaveśa priyabhūdeva parātparāmarejya / haladhara duritāpaha praṇamya triguṇavyāpta jagattrikāladakṣa // ### [2.29.45](https://indike.org/pramana/in.purana.narada.2.29.45) danujakulavināśanaikakarmannanaghārūḍhaphaṇīśa kaṃsakāla / raviśaśinayana pragalbhaceṣṭa pradhutadhvānta navāṃbudābha meśa // ### [2.29.46](https://indike.org/pramana/in.purana.narada.2.29.46) makha makhadhara mātṛbaddhadāmannavanītapriya ballavīgaṇeśa / aghabakavṛṣakeśipūtanānta triśirovālidaśāsyabhedakārin // ### [2.29.47](https://indike.org/pramana/in.purana.narada.2.29.47) narakamuravināśa bāṇadoḥ kṛttripurārījya sudāmamitra sevya / bhavataraṇivahitrapādapadma prakaṭaiśvarya purāṇa pūrṇabāho // ### [2.29.48](https://indike.org/pramana/in.purana.narada.2.29.48) bahujanisukṛtāpya maṅgalārha śrutivedya śrutidhāma śāntaśuddha / tava varada vareṇyamaṅghriyugmaṃ śaraṇaṃ prāptamaghārditaṃ prapāhi // ### [2.29.49](https://indike.org/pramana/in.purana.narada.2.29.49) nahi mama gatidaṃ purāṇapuṃso 'nyaditi prārthanayā prasīda'medya // ### [2.29.50](https://indike.org/pramana/in.purana.narada.2.29.50) iti stuto jagannātho bhaktyā devena śaṃbhunā / āvirbabhūva sahasā mādhavo bhaktavatsalaḥ // ### [2.29.51](https://indike.org/pramana/in.purana.narada.2.29.51) taṃ dṛṣṭvā daṇḍavadbhūmau nipapāta haro harim / punarutthāya viprendra nanāma vidhṛtāñjaliḥ // ### [2.29.52](https://indike.org/pramana/in.purana.narada.2.29.52) tamuvāca hṛṣīkeśaḥ praṇataṃ bhūtanāyakam / varaṃ vṛṇu pradāsye 'haṃ saṃtuṣṭaḥ stotratastava // ### [2.29.53](https://indike.org/pramana/in.purana.narada.2.29.53) tacchrutvā bhagavadvākyaṃ bhūteśo brahyahatyayā / pīḍitātmā jagādedaṃ bhuktimuktipradaṃ harim // ### [2.29.54](https://indike.org/pramana/in.purana.narada.2.29.54) icchāmi vasituṃ kṣetre tava cakragadādhara / tvatkṣetrasīmābāhyasthā brahmahatyā yadīkṣyate // ### [2.29.55](https://indike.org/pramana/in.purana.narada.2.29.55) kṣetradānena kāruṇyaṃ kuru me garuḍadhvaja / mama nirgamane brahmahatyā māṃ punareṣyati // ### [2.29.56](https://indike.org/pramana/in.purana.narada.2.29.56) tvatkṣetre saṃsthito 'haṃ tu pūjāṃ prāpsye jagattraye / ityuktvā hyabhavattūṣṇīṃ devadevaṃ vṛṣadhvajaḥ // ### [2.29.57](https://indike.org/pramana/in.purana.narada.2.29.57) tatheti pratipede ca kṣīrasāgarajāpriyaḥ / tataḥ prabhṛti viprendra śaivaṃ kṣetraṃ nigadyate // ### [2.29.58](https://indike.org/pramana/in.purana.narada.2.29.58) kṣetraṃ tu keśavasyedaṃ purāṇaṃ kavayo viduḥ / kṛpayā saṃparītasya mādhavasya dvijottama // ### [2.29.59](https://indike.org/pramana/in.purana.narada.2.29.59) netrābhyāṃ nirgataṃ vāri tena bindusaro 'bhavat / mādhavasyājñayā tatra sasnau devo vṛṣadhvajaḥ // ### [2.29.60](https://indike.org/pramana/in.purana.narada.2.29.60) snātamātre hare tattu kapālaṃ pāṇito 'patat / kapālamocanaṃ nāma tattīrthaṃ khyātimāgatam // ### [2.29.61](https://indike.org/pramana/in.purana.narada.2.29.61) bindumādhavanāmāsau datvā svaṃ dhāma śūline / bhaktibhāvena śaṃbhustu nibaddhastatra saṃsthitaḥ // ### [2.29.62](https://indike.org/pramana/in.purana.narada.2.29.62) yaṃ tu brahmādayo devāḥ svaḥsthāḥ paśyati sarvadā / sūryāyutasamaprakhya digaṃbaraniṣevitam // ### [2.29.63](https://indike.org/pramana/in.purana.narada.2.29.63) vighnāni śūlinā kānta kṛtānyasya niṣevaṇe / yairvighnairabhibhūtāstu stutvā viṣṇuṃ śivārcakāḥ // ### [2.29.64](https://indike.org/pramana/in.purana.narada.2.29.64) sarve lokāḥ sthitā hyatra śivaḥ kāśīti cintakāḥ / śivasya cintanādvipra śaivāḥ sarve nirākulāḥ // ### [2.29.65](https://indike.org/pramana/in.purana.narada.2.29.65) prayānti śivalokaṃ vaijarāmṛtyuvivarjitam / bahupuṇyayutāḥ saṃto nivasaṃttayatra nīrujaḥ // ### [2.29.66](https://indike.org/pramana/in.purana.narada.2.29.66) yajñaśiṣṭāśinaḥ kāśīkānta ṛddhisamanvitāḥ / nātra snānaṃ praśaṃsaṃti na japaṃ na surārcanam // ### [2.29.67](https://indike.org/pramana/in.purana.narada.2.29.67) nāpi dānaṃ dvijaśreṣṭha muktvaikaṃ dehapātanam / mṛtyuṃ prātyuṃ naraḥ kāmaṃ kṛtakṛtyo bhaveddhruvan // ### [2.29.68](https://indike.org/pramana/in.purana.narada.2.29.68) seyamāsāditā viprara purī prāsādasaṃkulā / bhoginīmapi mokṣāya kiṃ punarvratadhāriṇām // ### [2.29.69](https://indike.org/pramana/in.purana.narada.2.29.69) nikṣipyatāmiyaṃ bālā kāśīśasyeha mandire / viyojitā tu yā pūrvaṃ tena duṣṭena rakṣasā // ### [2.29.70](https://indike.org/pramana/in.purana.narada.2.29.70) ātmanaḥ suratārthāya kumārī niyamānvitā / eṣa prabhāvo 'pi hitaḥ kṣetrasyāsya dvijotma // ### [2.29.71](https://indike.org/pramana/in.purana.narada.2.29.71) vinaśyantīha karmāṇi śubhānyapyaśubhāni ca / bhūtavyabhaviṣyāṇi jñānājñānakṛtāni ca // ### [2.29.72](https://indike.org/pramana/in.purana.narada.2.29.72) eṣā purī karmavināśanāya kṛṣṇena pūrvaṃ hi vinirmitābhūt / yasyāṃ mṛtā duḥkhamanantamugraṃ bhuñjanti martyā yamayātanāṃ no // ### [2.29.72.p1](https://indike.org/pramana/in.purana.narada.2.29.72.p1) iti śrībṛhannāradīyapurāṇottarabhāge mohinīcarite kāṣṭhīlopākhyāne rākṣasīcarite kāśīvarṇanaṃ nāma ekonatriṃśo 'dhyāyaḥ --- Source: [https://indike.org/pramana/in.purana.narada.2.29](https://indike.org/pramana/in.purana.narada.2.29) · Pramāṇa