[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.2 # Naradapurana 2.2 Nāradapurāṇa 2.2 - **Language:** Sanskrit ## Contents - [2.2.46](https://indike.org/pramana/in.purana.narada.2.2.46) — 1 part ### [2.2.1](https://indike.org/pramana/in.purana.narada.2.2.1) vasiṣṭa uvāca imamevārthamuddiśya naimiṣāraṇyavāsinaḥ / papracchurmunayaḥ sūtaṃ vyāsaśiṣyaṃ mahāmatim // ### [2.2.2](https://indike.org/pramana/in.purana.narada.2.2.2) sa tu pṛṣṭo mahābhāga ekādaśyāḥ suvistaram / māhātmyaṃ kathayāmāsa upavāsavidhiṃ tathā // ### [2.2.3](https://indike.org/pramana/in.purana.narada.2.2.3) tadvākyaṃ sūtaputrasya śrutvā dvijavarottamāḥ / māhātmyaṃ cakriṇaścāpi sarvapāpaugha śāntidam // ### [2.2.4](https://indike.org/pramana/in.purana.narada.2.2.4) punaḥ papracchuramalaṃ sūtaṃ paurāṇikaṃ nṛpa / aṣṭādaśa purāṇāni bhavān jānāti mānada // ### [2.2.5](https://indike.org/pramana/in.purana.narada.2.2.5) kānīnasya prasādenaḥ mahābhāratamapyuta / tannāsti yanna vetsi tvaṃ purāṇeṣu smṛtiṣvapi // ### [2.2.6](https://indike.org/pramana/in.purana.narada.2.2.6) carite raghunāthasya śatakoṭipravistare / asmākaṃ saṃśayaḥ kaściddhṛdaye saṃpravartate // ### [2.2.7](https://indike.org/pramana/in.purana.narada.2.2.7) taṃ bhavānarhati cchettuṃ yāthārthyena suvistarāt / titheḥ prāntamupoṣyaṃ syādāhosvinmūlameva ca // ### [2.2.8](https://indike.org/pramana/in.purana.narada.2.2.8) daive paitrye samākhyāhi nāvedyaṃ vidyate tavala / sautiruvāca titheḥ prāntaṃ surāṇāṃ hi upoṣyaṃ prītivarddhanam // ### [2.2.9](https://indike.org/pramana/in.purana.narada.2.2.9) mūlaṃ titheḥ pitṝṇāṃ tu kālajñaiḥ priyamīritam / ataḥ prāntamupoṣyaṃ hi titherdaśaphalepsubhiḥ // ### [2.2.10](https://indike.org/pramana/in.purana.narada.2.2.10) mūlaṃ hi pitṛtṛptyarthaṃ vijñeyaṃ dharmakāṅkṣibhiḥ / pūrvaviddhā na kartavyā dvitīyā cāṣṭamī tathā // ### [2.2.11](https://indike.org/pramana/in.purana.narada.2.2.11) ṣaṣṭhī caikādaśī bhūpa dharmakāmārthalipsubhiḥ / pūrvaviddhā dvijaśreṣṭhāḥ kartavyā saptamī sadā // ### [2.2.12](https://indike.org/pramana/in.purana.narada.2.2.12) darśaśca paurṇamāsaśca pituḥ sāṃvatsaraṃ dinam / pūrvaviddhānimāṃstyaktvā narakaṃ pratipadyate // ### [2.2.13](https://indike.org/pramana/in.purana.narada.2.2.13) hāniṃ ca saṃtaterbhūpadaurbhāgyaṃ samavāpnuyāt / etacchrutaṃ mayā viprāḥ kṛṣṇadvaipāyanātpurā // ### [2.2.14](https://indike.org/pramana/in.purana.narada.2.2.14) ādityodayavelāyāṃ yāstokāpi tithirbhavet / pūrvaviddhā tu mantavyā prabhūtā nodayaṃ vinā // ### [2.2.15](https://indike.org/pramana/in.purana.narada.2.2.15) pāraṇe maraṇe nṝṇāṃ tithistātkālikī smṛtā / pitrye 'stamanavelāyāṃ sparśe pūrṇā nigadyate // ### [2.2.16](https://indike.org/pramana/in.purana.narada.2.2.16) na tatrodayinī grāhyā daivasyodayikī tithiḥ / pratyahaṃ śodhayetprājñastithiṃ daivajñacintakāt // ### [2.2.17](https://indike.org/pramana/in.purana.narada.2.2.17) tithipramāṇaṃ viprendrāḥ kṣapākaradivākarau / candrārkacāravijñānātkālaṃ kālavido viduḥ // ### [2.2.18](https://indike.org/pramana/in.purana.narada.2.2.18) pūrvāyāḥ saṃgadoṣeṇa na yogyāstāḥ prapūjane / varjayanti narāstajjñā yāmāṃśca caturo dvijāḥ // ### [2.2.19](https://indike.org/pramana/in.purana.narada.2.2.19) ata ūrddhvaṃ pravakṣyāmi snānapūjāvidhikramam / na divā śuddhimāpnoti tadā rātrau vidhīyate // ### [2.2.20](https://indike.org/pramana/in.purana.narada.2.2.20) dinakāryamaśeṣaṃ hi kartavyaṃ śarvarīmukhe / vidhireṣa mayā khyāto narāṇāmupavāsinām // ### [2.2.21](https://indike.org/pramana/in.purana.narada.2.2.21) alpāyāmatha viprendrā dvādaśyāmaruṇodaye / snānārcanakriyā kāryyā dānahomādisaṃyutā // ### [2.2.22](https://indike.org/pramana/in.purana.narada.2.2.22) trayodaśyāṃ pāraṇe pṛthivīphalam / śatayajñādhikaṃ vāpi naraḥ prāpnotyasaṃśayam // ### [2.2.23](https://indike.org/pramana/in.purana.narada.2.2.23) etasmātkāraṇādviprāḥ pratyūṣe snānamācaret / pitṛtarpaṇasaṃyuktaṃ na dṛṣṭvā dvādaśīdinam // ### [2.2.24](https://indike.org/pramana/in.purana.narada.2.2.24) mahāhānikarā hyeṣā dvādaśī laṅghitā nṛbhiḥ / karoti dharmaharaṇamasnāteva sarasvatī // ### [2.2.25](https://indike.org/pramana/in.purana.narada.2.2.25) kṣaye vāpyathavā vṛddhau saṃprāpte vā dinodaye / upoṣyā dvādaśī puṇyā pūrvaviddhāṃ vivarjayet // ### [2.2.26](https://indike.org/pramana/in.purana.narada.2.2.26) brāhmaṇa uvāca yadā ca prāpyate sūta dvādaśyāṃ pūrvasaṃbhavā / tadopavāso hi kathaṃ kartavyo mānavairvada // ### [2.2.27](https://indike.org/pramana/in.purana.narada.2.2.27) upavāsadinaṃ viddhaṃ yadā bhavati pūrvayā / dvitīye 'hni yadā na syātsvalpāpyekādaśī tithiḥ // ### [2.2.28](https://indike.org/pramana/in.purana.narada.2.2.28) tatropavāso vihitaḥ kathaṃ tadvada sūtaja / sautiruvāca yadā na prāpyate viprā dvādaśyāṃ pūrvasambhavam // ### [2.2.29](https://indike.org/pramana/in.purana.narada.2.2.29) ravicandrārkajāhaṃ tu tadopoṣyaṃ paraṃ dinam / bahvā gamavirodheṣu brāhmaṇeṣu vivādiṣu // ### [2.2.30](https://indike.org/pramana/in.purana.narada.2.2.30) upoṣyā dvādaśī puṇyā trayodaśyāṃ tu pāraṇam / ekādaśyāṃ tu viddhāyāṃ saṃprāpte śravaṇe tathā // ### [2.2.31](https://indike.org/pramana/in.purana.narada.2.2.31) upoṣyā dvādaśī puṇyā pakṣayorubhayorapi / eṣa vo nirṇayaḥ prokto mayā śāstravinirṇayāt // ### [2.2.32](https://indike.org/pramana/in.purana.narada.2.2.32) kimanyacchrotukāmā hi tadbhavanto bruvantu me / ṛṣaya ūcuḥ yugādīnāṃ vadavidhiṃ saute samyagyathātatham // ### [2.2.33](https://indike.org/pramana/in.purana.narada.2.2.33) ravisaṃkrātikādīnāṃ nāvedyaṃ vidyate tava / sautiruvāca dve śukle dve tathā kṛṣṇe yugādyāḥ kavayo viduḥ // ### [2.2.34](https://indike.org/pramana/in.purana.narada.2.2.34) śukle pūrvāhṇike grāhye kṛṣṇe grāhye 'parāhṇike / ayanaṃ dinabhāgāḍhyaṃ saṃkramaḥ ṣoḍaśaḥ palaḥ // ### [2.2.35](https://indike.org/pramana/in.purana.narada.2.2.35) pūrve tu dakṣiṇe bhāge vyatīte cottaro mataḥ / madhyakāle tu viṣuve tvakṣayā parikīrtitā // ### [2.2.36](https://indike.org/pramana/in.purana.narada.2.2.36) jñātvā viprāstithiṃ samyaksāṃvatsarasamīritām / kartavyo hyupavāsastu anyathā narakaṃ vrajet // ### [2.2.37](https://indike.org/pramana/in.purana.narada.2.2.37) pūrvaviddhāṃ prakurvāṇo naro dharmaṃ nikṛntati / saṃtatestu vināśāya saṃpadāṃ haraṇāya ca // ### [2.2.38](https://indike.org/pramana/in.purana.narada.2.2.38) palavedhe 'pi viprendrā daśamyā varjayecchivām / surāyā bindunā spṛṣṭa yathā gaṅgājalantyajet // ### [2.2.39](https://indike.org/pramana/in.purana.narada.2.2.39) śvahataṃ pañcagavyaṃ ca daśamyā dūṣitāṃ tyajet / ekādaśīṃ dvijaśreṣṭhāḥ pakṣayorubhayorapi // ### [2.2.40](https://indike.org/pramana/in.purana.narada.2.2.40) pūrvaviddhā purā dattā sā tithiryadumaulinā / dānavebhyo dvijaśreṣṭhāḥ prīṇanārthaṃ mahātmanām // ### [2.2.41](https://indike.org/pramana/in.purana.narada.2.2.41) akāle yaddhanaṃ dattamapātrebhyo dvijottamāḥ / saṃkrudvairapi yaddattaṃ yaddattaṃ cāpyasatkṛtam // ### [2.2.42](https://indike.org/pramana/in.purana.narada.2.2.42) pūrvaviddhatithau dattaṃ taddattamasureṣvatha / yaducchiṣṭena dattaṃ tu yaddattaṃ patiteṣvapi // ### [2.2.43](https://indike.org/pramana/in.purana.narada.2.2.43) strījeteṣu ca yaddattaṃ yaddattaṃ jalavarjitam / punaḥ kīrtanasaṃyuktaṃ taddattamasureṣu vai // ### [2.2.44](https://indike.org/pramana/in.purana.narada.2.2.44) tasmādviprā na kartvyā viddhāpyekādaśī tithiḥ / yathā hantipurā puṇyaṃ śrāddhaṃ ca vṛṣalīpatiḥ // ### [2.2.45](https://indike.org/pramana/in.purana.narada.2.2.45) dattaṃ japtaṃ hutaṃ snātaṃ tathā pūjā kṛtā hareḥ / tithau viddhe kṣayaṃ yāti tamaḥ sūryodaye yathā // ### [2.2.46](https://indike.org/pramana/in.purana.narada.2.2.46) jīrṇaṃ patiṃ yauvanagarvitā yathā tyajanti nāryo jhaṣaketunārditāḥ / tathā hi vedhaṃ vibudhāstyajanti tithyantaraṃ dharmavivṛddhaye sadā // ### [2.2.46.p1](https://indike.org/pramana/in.purana.narada.2.2.46.p1) śrībṛhannāradīyapuraṇottarabhāge tithivicāro nāma dvitīyo 'dhyāyaḥ --- Source: [https://indike.org/pramana/in.purana.narada.2.2](https://indike.org/pramana/in.purana.narada.2.2) · Pramāṇa