[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.31 # Naradapurana 2.31 Nāradapurāṇa 2.31 - **Language:** Sanskrit ## Contents - [2.31.59](https://indike.org/pramana/in.purana.narada.2.31.59) — 1 part ### [2.31.1](https://indike.org/pramana/in.purana.narada.2.31.1) vasiṣṭha uvāca tacchrutvā vacanaṃ tasyāḥ kāṣṭhīlāyāḥ śucismite / sandhyāvalī nāma bhṛśaṃ tāmuvāca ha sādaram // ### [2.31.2](https://indike.org/pramana/in.purana.narada.2.31.2) tvadvākyādvismayo jātaḥ kāṣṭhīle sāṃprataṃ mama / kathaṃ dṛṣṭā mayā tvaṃ ca yāsyantī kutsitāṃ gatim // ### [2.31.3](https://indike.org/pramana/in.purana.narada.2.31.3) karmaṇā kena te muktirbhavetkutsitayonitaḥ / tanme vada viśālāṅge tvāṃ dṛṣṭvā duḥkhitā hyaham // ### [2.31.4](https://indike.org/pramana/in.purana.narada.2.31.4) māṃsapiṇḍopamaṃ ślakṣṇaṃ navanītopamaṃ śubhe / śarīraṃ tava saṃvīkṣya tayā me jāyate hṛdi // ### [2.31.5](https://indike.org/pramana/in.purana.narada.2.31.5) kāṣṭhīlovāca pṛthivīṃ dāsyase subhru sakalāmapi matkṛte / tathāpi naiva mucyeyaṃ sadyaḥ kutsitayonitaḥ // ### [2.31.6](https://indike.org/pramana/in.purana.narada.2.31.6) yena puṇyena subhage mucyeyaṃ karmabandhanāt / tannirdiśāmi sumahadgatidaṃ tvaṃ niśāmaya // ### [2.31.7](https://indike.org/pramana/in.purana.narada.2.31.7) yaścāyaṃ māghamāsastu sarvamāsottamaḥ smṛtaḥ / yasmin krośanti pāpāni brahmahatyādikāni ca // ### [2.31.8](https://indike.org/pramana/in.purana.narada.2.31.8) durlabho māghamāso vai durllabhaṃ janma mānuṣam / durllabhaṃ coṣasi snānaṃ durlabhaṃ kṛṣṇasevanam // ### [2.31.9](https://indike.org/pramana/in.purana.narada.2.31.9) durlabho vāsaro viṣṇorvidhinā samupoṣitaḥ / devaistejaḥ parikṣiptaṃ māghamāse svakaṃ jale // ### [2.31.10](https://indike.org/pramana/in.purana.narada.2.31.10) tasmājjalaṃ māghamāse pāvanaṃ hi viśeṣataḥ / nedṛśī saṃgare śūrairgatiḥ prāpyeta saukhyadā // ### [2.31.11](https://indike.org/pramana/in.purana.narada.2.31.11) yādṛśī plavane prātaḥ prāpyate niyamasthitaiḥ / sarittaḍāgavāpīṣu snāne sattamamīritam // ### [2.31.12](https://indike.org/pramana/in.purana.narada.2.31.12) kūpabhāṇḍajalairmadhyaṃ jaghanyaṃ vahnitāpitaiḥ / na saukhyairlabhyate puṇyaṃ duḥkhairevāpyate tu tat // ### [2.31.13](https://indike.org/pramana/in.purana.narada.2.31.13) dharmmasevārthakaṃ snānaṃ nāṅganairmalyahetukam / homārthaṃ sevanaṃ vahnerna ca śītādihānaye // ### [2.31.14](https://indike.org/pramana/in.purana.narada.2.31.14) yāvannodayate sūryastāvatsnānaṃ vidhīyate / ācchādite ghanairvyomni hyudgamiṣyantamarthayet // ### [2.31.15](https://indike.org/pramana/in.purana.narada.2.31.15) abhāve saridādīnāṃ navakuṃbhasthitaṃ jalam / vāyunā tāḍitaṃ rātrau snāne gaṅgāsamaṃ viduḥ // ### [2.31.16](https://indike.org/pramana/in.purana.narada.2.31.16) māghasnāyī varārohe durgatiṃ naiva paśyati / tannāsti pātakaṃ yattu māghasnānaṃ na śodhayet // ### [2.31.17](https://indike.org/pramana/in.purana.narada.2.31.17) agnipraveśādadhikaṃ māghoṣasyeva majjanam / jīvatā bhujyate duḥkhaṃ mṛtena bahulaṃ sukham // ### [2.31.18](https://indike.org/pramana/in.purana.narada.2.31.18) etasmātkāraṇādbhadre māghasnānaṃ viśiṣyate / ahanyahani dātavyāstilāḥ śarkarayānvitāḥ // ### [2.31.19](https://indike.org/pramana/in.purana.narada.2.31.19) meghapuṃṣpopapannena sahānnena sumadhyame / yāvakaiścaiva hotavyā gavyasarpiḥ samanvitaiḥ // ### [2.31.20](https://indike.org/pramana/in.purana.narada.2.31.20) mādhyāṃ snānasamāptai tu dadyādviprāya ṣaḍrasam / sūryo me prīyatāṃ devo viṣṇumūrtirnirañjanaḥ // ### [2.31.21](https://indike.org/pramana/in.purana.narada.2.31.21) vāsāṃsi dvijayugmāya sa saptānnāni cārpayet / triṃśacca modakā deyāstilānnāḥ śarkarāmayāḥ // ### [2.31.22](https://indike.org/pramana/in.purana.narada.2.31.22) bhāgāstrayastilānāṃ tu caturthaḥ śarkarāṃśakaḥ / tāṃbūlādīni bhogyāni bhaktyādakadyādvidhānavit // ### [2.31.23](https://indike.org/pramana/in.purana.narada.2.31.23) srotomukhaḥ sariti cānyatra bhāskarasaṃmukhaḥ / snāyādāvāhya tīrthāni gaṅgādīnya karmaṇḍalāt // ### [2.31.24](https://indike.org/pramana/in.purana.narada.2.31.24) yadanekajanurjanyaṃ yajjñānājñānataḥ kṛtam / tvattejasā hataṃ cāstu tattu pāpaṃ sahasradhā // ### [2.31.25](https://indike.org/pramana/in.purana.narada.2.31.25) divākara jagannātha prabhākara namo 'stu te / paripūrṇaṃ kuruṣvedaṃ māghasnānaṃ mamācyuta // ### [2.31.26](https://indike.org/pramana/in.purana.narada.2.31.26) tīrthasnāyī varārohe māghasnāyī phalālpakaḥ / tīrthasnānādiyātsvargaṃ māghasnānātparaṃ padam // ### [2.31.27](https://indike.org/pramana/in.purana.narada.2.31.27) māghasya dhavale pakṣe bhavedekādaśī tu yā / ravivāreṇa saṃyuktā mahāpātakanāśinī // ### [2.31.28](https://indike.org/pramana/in.purana.narada.2.31.28) vināpi ṛkṣasaṃyogaṃ sā śuklaikādaśī nṛṇām / vinirdahati pāpāni kunṛpo viṣayaṃ yathā // ### [2.31.29](https://indike.org/pramana/in.purana.narada.2.31.29) kuputrastu kulaṃ yadvatkubhāryā ca patiṃ yathā / adharmastu yathā dharmaṃ kumantrī nṛpatiṃ yathā // ### [2.31.30](https://indike.org/pramana/in.purana.narada.2.31.30) ajñānaṃ ca yathā jñānaṃ kuśaucaṃ śucitāṃ yathā / yathā hantyanṛtaṃ satyaṃ vādassaṃvādameva ca // ### [2.31.31](https://indike.org/pramana/in.purana.narada.2.31.31) uṣṇaṃ himamanarthor'thaṃ pāpaṃ kīrtiṃ smayastapaḥ / yathā rasā mahārogāñchrāddhaṃ saṃketa eva ca // ### [2.31.32](https://indike.org/pramana/in.purana.narada.2.31.32) tathā duritasaṃghaṃ tu dvādaśī hanti sādhitā / brahmahatyā surāpānaṃ steyaṃ gurvaṅganāgamaḥ // ### [2.31.33](https://indike.org/pramana/in.purana.narada.2.31.33) mahānti pātakānyetānyāśu hanti harerdinam / samavetāni caitāni na śāmayati puṣkaram // ### [2.31.34](https://indike.org/pramana/in.purana.narada.2.31.34) na cāpi naimiṣāraṇyaṃ na kṣetraṃ kurusaṃjñitam / prabhāso na gayā devi na revā na sarasvatī // ### [2.31.35](https://indike.org/pramana/in.purana.narada.2.31.35) na gagā yamunā caiva prayāgo na ca devakā / na sarāṃsi nadāścānye homadānatapāṃsi ca // ### [2.31.36](https://indike.org/pramana/in.purana.narada.2.31.36) na cānyatsukṛtaṃ subhru purāṇe paṭhyate sphuṭam / pāpasaṃghavināśāya muktvaikaṃ harivāsaram // ### [2.31.37](https://indike.org/pramana/in.purana.narada.2.31.37) upoṣaṇātsakṛddevi vinaśyantyagharāśayaḥ / ekataḥ pṛthivīdānamekato harivāsaram // ### [2.31.38](https://indike.org/pramana/in.purana.narada.2.31.38) na samaṃ brahmaṇā proktamadhikaṃ harivāsaram / tasminvarāhavapuṣaṃ kṛtvā devaṃ tu hāṭakam // ### [2.31.39](https://indike.org/pramana/in.purana.narada.2.31.39) ghaṭopari nave pātre dhṛtvā tāmramaye śubhe / sarvabījānvite caiva sitavastrāvaguṇṭhite // ### [2.31.40](https://indike.org/pramana/in.purana.narada.2.31.40) sahiraṇye sudīpāḍhye kṛtapuṣpāvataṃsake / vidhinā pūjayitvā cakuryājjāgaraṇaṃ vratī // ### [2.31.41](https://indike.org/pramana/in.purana.narada.2.31.41) prātarviprāya dadyācca vaiṣṇavāya kuṭuṃbine / tatkuṃbhakroḍasaṃyuktaṃ sanaivedyaparicchadam // ### [2.31.42](https://indike.org/pramana/in.purana.narada.2.31.42) paścācca pāraṇaṃ kuryāddvijānbhojya suhṛdvṛtaḥ / evaṃ kṛte varārohe na bhūyo jāyate kvacit // ### [2.31.43](https://indike.org/pramana/in.purana.narada.2.31.43) bahujanmārjjitaṃ pāpaṃ jñānājñānakṛtaṃ ca yat / tatsarvaṃ nāśamāyāti tamaḥ sūryodaye yathā // ### [2.31.44](https://indike.org/pramana/in.purana.narada.2.31.44) yathāśāstraṃ mayā tubhyaṃ varṇitā dvādaśī śubhe / yā sā kṛtā tvayā pūrvamāsīddevyanyajanmani // ### [2.31.45](https://indike.org/pramana/in.purana.narada.2.31.45) yasyāstavātulā puṣṭirvartate vartayiṣyati / bharttustava ca putrasya sarvadā sukhadāyinī // ### [2.31.46](https://indike.org/pramana/in.purana.narada.2.31.46) tasyāstvayā turīyāṃśo deyaścenmahyamādarāt / tadā prītā gamiṣyāmi tadviṣṇoḥ paramaṃ padam // ### [2.31.47](https://indike.org/pramana/in.purana.narada.2.31.47) vittāhrutijaṃ pāpaṃ yadbhūtaṃ mama suṃdari / tasya pāvanahetuṃ ca turīyāṃśaṃ prayaccha me // ### [2.31.48](https://indike.org/pramana/in.purana.narada.2.31.48) jīvitenāpi vittena bhartāraṃ vañcayettu yā / kṛmiyoniśataṃ gatvā pulkasī jāyate tu sā // ### [2.31.49](https://indike.org/pramana/in.purana.narada.2.31.49) surataṃ yācamānāya patye vittaṃ ca mānini / yā na yacchati durbuddhiḥ kāṣṭhīlā jāyate dhruvam // ### [2.31.50](https://indike.org/pramana/in.purana.narada.2.31.50) tatpātakaviśuddhyarthaṃ dehi me dvādaśībhavam / turīyāṃśamitaṃ puṇyaṃ yadyasti mayi te ghṛṇā // ### [2.31.51](https://indike.org/pramana/in.purana.narada.2.31.51) etacchrutvā vacastasyāḥ kāṣṭhīlāyāḥ sulocane / puṇyaṃ dattavatī tasyai pāṇau vāri pragṛhya ca // ### [2.31.52](https://indike.org/pramana/in.purana.narada.2.31.52) yatkṛtaṃ hi mayā pūrvamekādaśyā mupoṣaṇam / tatturīyāṃśapuṇyena kāṣṭhīleyaṃ vimucyatām // ### [2.31.53](https://indike.org/pramana/in.purana.narada.2.31.53) pūrvajanmakṛtātpāpātsatyaṃ satyaṃ mayoditam / evamukte tu vacane mayā vidyutsamaprabhā // ### [2.31.54](https://indike.org/pramana/in.purana.narada.2.31.54) dṛṣṭā divyavimānasthā gacchantī vaiṣṇavaṃ padam / patirhi daivataṃ loke vañcanīyo na bhāryayā // ### [2.31.55](https://indike.org/pramana/in.purana.narada.2.31.55) dehena cāpi vittena yadīcchecchobhanāṃ gatim / sā tvaṃ brūhi pradāsyāmi bharturarthe tavepsitam // ### [2.31.56](https://indike.org/pramana/in.purana.narada.2.31.56) vittaṃ dehaṃ tathā putraṃ yaccānyadvā varānane / kimanyaddaivataṃ loke strīṇāmekaṃ patiṃ vinā // ### [2.31.57](https://indike.org/pramana/in.purana.narada.2.31.57) tasyārthe vā tyajedvittaṃ jīvitaṃ vā sulocane / kalpakoṭiśataṃ sāgraṃ viṣṇuloke mahīyate // ### [2.31.58](https://indike.org/pramana/in.purana.narada.2.31.58) agnyādisākṣye vṛtamīkṣya niṣṭhurā yuktaṃ sudhorairvyasanairdvijātmajā / patiṃ dadau naiva ca yācitā dhanaṃ tenaiva pāpena babhūva kīṭā // ### [2.31.59](https://indike.org/pramana/in.purana.narada.2.31.59) etanmayā duṣṭamanaṅgayaṣṭi kaumārabhāve pitṛveśmavāse / jñātvā hitaṃ tathyamidaṃ svabharturdadāmi sarvaṃ ca gṛhāṇa subhru // ### [2.31.59.p1](https://indike.org/pramana/in.purana.narada.2.31.59.p1) iti śrībṛhannāradīyapurāṇottarabhāge mohinīcarite kāṣṭhīlopākhyāne māghamāhātmyaṃ nāmaikatriṃśo 'dhyāyaḥ ## Linked texts (3) - [Yoginītantra](https://indike.org/pramana/in.sampradaya.general.sakta.pitha.yoginitantra.27.80) — Sanskrit - [Rukmāṅgadacaritra](https://indike.org/pramana/in.purana.upakhyana.vamsa-rsi.rukmangadacaritra.105.75.1) — Sanskrit - [Vaidyanāthīya](https://indike.org/pramana/in.niti.dharma.nibandha.daksinatya.vaidyanatha.vaidyanathiya.8.10-2.2) — Sanskrit ## Discussed in (1) - [Studies in the Purāṇic Records on Hindu Rites and Customs](https://indike.org/pramana/ins.religion.hazra-1940.c14.s12.19) — Hazra 1940, English --- Source: [https://indike.org/pramana/in.purana.narada.2.31](https://indike.org/pramana/in.purana.narada.2.31) · Pramāṇa