[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.32 # Naradapurana 2.32 Nāradapurāṇa 2.32 - **Language:** Sanskrit ## Contents - [2.32.68](https://indike.org/pramana/in.purana.narada.2.32.68) — 1 part ### [2.32.1](https://indike.org/pramana/in.purana.narada.2.32.1) vasiṣṭha uvāca saṃdhyāvalīvacaḥ śrutvā mohinī duhitā vidheḥ / uvāca tatparā svīye kārye mohakaraṇḍikā // ### [2.32.2](https://indike.org/pramana/in.purana.narada.2.32.2) yadyevaṃ tvaṃ vijānāsi dharmādharmagatiṃ śubhe / bharturarthe pradātrī ca dhanajīvitayorapi // ### [2.32.3](https://indike.org/pramana/in.purana.narada.2.32.3) tadāhaṃ yācaye vittaṃ jīvitādadhikaṃ śubhe / dehi putraśiroḥ mahyaṃ yadiṣṭaṃ hṛdayādhikam // ### [2.32.4](https://indike.org/pramana/in.purana.narada.2.32.4) yadi no bhojanaṃ kuryātsaṃprāpte harivāsare / tadā svahaste saṃgṛhya khaḍgaṃ rājā patistava // ### [2.32.5](https://indike.org/pramana/in.purana.narada.2.32.5) dharmāṅgadaśiraścāru candrabiṃbopamaṃ śubham / ajātaśmaśrukaṃ caiva kuṇḍalābhyāṃ vibhūṣitam // ### [2.32.6](https://indike.org/pramana/in.purana.narada.2.32.6) chitvā śīghraṃ pātayatu mamotsaṃge sulocane / etadvā kurutadbhadre yadānnaṃ na bhunakti ca // ### [2.32.7](https://indike.org/pramana/in.purana.narada.2.32.7) dine mādhavadevasya pāpasaṃghavināśane / tacchrutvā vacanaṃ tasyā mohinyāḥ kaṭukākṣaram // ### [2.32.8](https://indike.org/pramana/in.purana.narada.2.32.8) pracakaṃpe kṣaṇaṃ devī śītārtā kadalī yathā / saṃdhyāvalī tato dhairyamāsthāya varavārṇinī // ### [2.32.9](https://indike.org/pramana/in.purana.narada.2.32.9) uvāca mohinīṃ vākyaṃ sumukhī prahasaṃtyapi / śrūyante hi purāṇeṣu gāthāḥ subhru samīritāḥ // ### [2.32.10](https://indike.org/pramana/in.purana.narada.2.32.10) dvādaśī prati saṃbaddhāḥ svargamokṣapradāyikāḥ / dhanaṃ tyajettyajeddārāñjīvitaṃ ca gṛhaṃ tyajet // ### [2.32.11](https://indike.org/pramana/in.purana.narada.2.32.11) tyajeddeśaṃ tathā bhūpaṃ svargaṃ mitraṃ guruṃ tyajet / tyajettīrthaṃ tyajeddharmaṃ tyajedatyantasupriyam // ### [2.32.12](https://indike.org/pramana/in.purana.narada.2.32.12) tyajedyogaṃ tyajeddānaṃ jñānaṃ puṇyakriyā tyajet / tapastyajettyajedvidyāṃ siddhiṃ mokṣaṃ tyajecchubhe // ### [2.32.13](https://indike.org/pramana/in.purana.narada.2.32.13) na tyajeddvādagaśīṃ puṇyāṃ pakṣayorubhayorapi / iha saṃbandhinaḥ sarve putrabhrātṛsuhṛtpriyāḥ // ### [2.32.14](https://indike.org/pramana/in.purana.narada.2.32.14) aihikāmuṣmike devi sādhanī dvādaśī smṛtā / dvādaśyāstu prabhāveṇa sarvaṃ kṣemaṃ bhaviṣyati // ### [2.32.15](https://indike.org/pramana/in.purana.narada.2.32.15) dāpaye tava tuṣṭyarthaṃ dharmāṅgadaśiraḥ śubhe / viśvāsaṃ kuru me vākye sukhinī bhava śobhane // ### [2.32.16](https://indike.org/pramana/in.purana.narada.2.32.16) ihārthaṃ śrūyate bhadre itihāsaḥ purātanaḥ / kathayiṣyāmi te bhadre sāvadhānā śruṇuṣva me // ### [2.32.17](https://indike.org/pramana/in.purana.narada.2.32.17) āsīdvirocanaḥ pūrvaṃ daityo dharmaparāyaṇaḥ / tasya bhāryā viśālākṣī dvijapūjanatatparā // ### [2.32.18](https://indike.org/pramana/in.purana.narada.2.32.18) nityamekamṛṣiṃ prātaḥ pūjayitvā yathāvidhi / pādodakaṃ tasya subhru bhaktyā pibati hṛṣṭadhīḥ // ### [2.32.19](https://indike.org/pramana/in.purana.narada.2.32.19) prāhlādiśaṅkitā devā āsanpūrvaṃ mṛte sati / hiraṇyakaśipau rājyaṃ śāsati hyugratejasi // ### [2.32.20](https://indike.org/pramana/in.purana.narada.2.32.20) prāhlādau hlādasaṃyukte cerurvyagrā mahītale / ekadā śakramukhyāste devāḥ samantrya vākpatim // ### [2.32.21](https://indike.org/pramana/in.purana.narada.2.32.21) procuḥ kiṃ kāryamadhunāsmābhiḥ śatru pratāpitaiḥ / tacchrutvā vacanaṃ teṣāṃ devānāṃ gururabravīt // ### [2.32.22](https://indike.org/pramana/in.purana.narada.2.32.22) viṣṇurvijñāpanīyo 'dya duḥkhaṃ prāptaiḥ suravrajaiḥ / tacchrutvā bhāṣitaṃ tasya guroramitatejasaḥ // ### [2.32.23](https://indike.org/pramana/in.purana.narada.2.32.23) virocanaprāṇahatyai jagmurvaikuṇṭhamantike / tatra gatvā suraśreṣṭhaṃ vaikuṇṭhaṃ tuṣṭuvuḥ stavaiḥ // ### [2.32.24](https://indike.org/pramana/in.purana.narada.2.32.24) devā ūcuḥ namo devādhidevāya viṣṇave 'mitatejase / bhaktavighnavināśāya vaikuṇṭhāya namo namaḥ // ### [2.32.25](https://indike.org/pramana/in.purana.narada.2.32.25) haraye 'dbhutasiṃhāya vāmanāya mahātmane / kroḍarūpāya matsyāya pralayābdhinivāsine // ### [2.32.26](https://indike.org/pramana/in.purana.narada.2.32.26) kūrmāya mandaradhṛte bhārgavāyābdhiśāyine / rāmāyākhilanāthāya viśveśāya ca sākṣiṇe // ### [2.32.27](https://indike.org/pramana/in.purana.narada.2.32.27) dattātreyāya śuddhāya kapilāyārtihāriṇe / yajñāya dhṛtadharmāya sanakādisvarūpiṇe // ### [2.32.28](https://indike.org/pramana/in.purana.narada.2.32.28) dhruvasya varadātre ca pṛthave bhūrikarmaṇe / ṛṣabhāya viśuddhāya hayaśīrṣabhṛtātmane // ### [2.32.29](https://indike.org/pramana/in.purana.narada.2.32.29) haṃsāyāgamarūpāyāmṛtakumbhavidhāriṇe / kṛṣṇāṃya vāsudevāya saṃkarṣaṇavapurdhṛte // ### [2.32.30](https://indike.org/pramana/in.purana.narada.2.32.30) pradyumnāyāniruddhāya brahmaṇe śaṅkarāya ca / kumārāya gaṇeśāya nandine bhṛṅgiṇe namaḥ // ### [2.32.31](https://indike.org/pramana/in.purana.narada.2.32.31) gandhamādanavāsāya naranārāyaṇāya ca / jagannāthāya nāthāya namo rāmeśvarāya ca // ### [2.32.32](https://indike.org/pramana/in.purana.narada.2.32.32) dvārakāvāsine caiva tulasī vanavāsine / namaḥ kamalanābhāya namaste paṅkajāṅghraye // ### [2.32.33](https://indike.org/pramana/in.purana.narada.2.32.33) namaḥ kamalahastāya kamalākṣāya te namaḥ / kamalāpratipālāya keśavāya namo namaḥ // ### [2.32.34](https://indike.org/pramana/in.purana.narada.2.32.34) namo bhāskararūpāya śaśirūpadharāya ca / lokapālasvarūpāya prajāpativapurdhṛte // ### [2.32.35](https://indike.org/pramana/in.purana.narada.2.32.35) bhūtagrāmasvarūpāya jīvarūpāya tejase / jayāya jayine netre niyamāya kriyātmane // ### [2.32.36](https://indike.org/pramana/in.purana.narada.2.32.36) nirguṇāya nirīhāya nītijñāyākriyātmane / buddhāya kalkirūpāya kṣetrajñāyākṣarāya ca // ### [2.32.37](https://indike.org/pramana/in.purana.narada.2.32.37) govindāya jagadbhartre 'nantāyādyāya śārṅgiṇe / śaṅkhine gadine caiva namaścakradharāya ca // ### [2.32.38](https://indike.org/pramana/in.purana.narada.2.32.38) khaḍgine śūline caiva sarvaśastrāstraghātine / śaraṇyāya vareṇyāya parāya paramātmane // ### [2.32.39](https://indike.org/pramana/in.purana.narada.2.32.39) hṛṣīkeśāya viśvāya viśvarūpāya te namaḥ / kālanābhāya kālāya śaśisūryyadṛśe namaḥ / pūrṇāya parisevyāya parātparatarāya ca // ### [2.32.40](https://indike.org/pramana/in.purana.narada.2.32.40) jagatkartre jagadbhartre jagaddhātreṃ'takāya ca / mohine kṣobhine kāmarūpiṇe 'jāya sūriṇe // ### [2.32.41](https://indike.org/pramana/in.purana.narada.2.32.41) bhagavaṃstava saṃprāptāḥ śaraṇaṃ daityatāpitāḥ / tadvidhatsvākhilādhāra yathā hi sukhino vayam // ### [2.32.42](https://indike.org/pramana/in.purana.narada.2.32.42) putramitrakalatrādisaṃyutā viharāmahe / tacchrutvā stavanaṃ teṣāṃ vaikuṇṭhaḥ prītamānasaḥ // ### [2.32.43](https://indike.org/pramana/in.purana.narada.2.32.43) pradadau darśanaṃ teṣāṃ daityasaṃ saṃtāpitātmanām / te dṛṣṭvā devadeveśaṃ vaikuṇṭhaṃ snigdhamānasam // ### [2.32.44](https://indike.org/pramana/in.purana.narada.2.32.44) virocanavadhāyāśu prārthayāmāsurādarāt / tacchrutvā śakramukhyānāṃ kāryaṃ kāryavidāṃ varaḥ // ### [2.32.45](https://indike.org/pramana/in.purana.narada.2.32.45) samāśvāsya surānprītyā visasarja mudānvitān / gateṣu devavargeṣu sarvopāyavidāṃvaraḥ // ### [2.32.46](https://indike.org/pramana/in.purana.narada.2.32.46) vṛddhabrāhmaṇarūpeṇa virocanagṛhaṃ yayau / dvijapūjanakāle tu saṃprāptaḥ kāryasādhakaḥ // ### [2.32.47](https://indike.org/pramana/in.purana.narada.2.32.47) taṃ tu dṛṣṭvā viśālākṣī brāhmaṇaṃ hṛṣṭamānasā / apūrvaṃ bhaktibhāvena dadau satkṛtya cāsanam // ### [2.32.48](https://indike.org/pramana/in.purana.narada.2.32.48) so 'naṅgīkṛtya taddattamāsanaṃ prāha tāṃ śubhe / nāhaṃ samādade devi tvaddattaṃ paramāsanam // ### [2.32.49](https://indike.org/pramana/in.purana.narada.2.32.49) śṛṇu me kāryamatulaṃ yadarthamahamāgataḥ / yanme manogataṃ kāryaṃ tadvijñāya ca mānini // ### [2.32.50](https://indike.org/pramana/in.purana.narada.2.32.50) yoṃ'gīkaroti tatpūjāṃ grahīṣyāmi varānane / tacchrutvā vṛddhaviprasya vākyaṃ vākyaviśāradā // ### [2.32.51](https://indike.org/pramana/in.purana.narada.2.32.51) māyayā mohitā viṣṇoḥ strītvāccāhātiharṣitā / viśālākṣyuvāca yatte manogataṃ vipra taddāsyāmi gṛhāṇame // ### [2.32.52](https://indike.org/pramana/in.purana.narada.2.32.52) āsanaṃ pādasalilaṃ dehi me vāñchitārthadam / ityuktaḥ sa dvijaḥ prāha na pratyemi striyā vacaḥ // ### [2.32.53](https://indike.org/pramana/in.purana.narada.2.32.53) tava bhartā yadi vadettadā me pratyayo bhavet / tadākarṇya dvijenoktaṃ virocanagṛheśvarī // ### [2.32.54](https://indike.org/pramana/in.purana.narada.2.32.54) patimākārayāmāsa tatraiva dvijasannidhau / sa prāpto dūtavākyena prāhlādirhṛṣṭamānasaḥ // ### [2.32.55](https://indike.org/pramana/in.purana.narada.2.32.55) antaḥpuraṃ yatra bhāryā viśālākṣī samāsthitā / tamāgataṃ samālokya patiṃ dharmaparāyaṇā // ### [2.32.56](https://indike.org/pramana/in.purana.narada.2.32.56) utthāya natvā viprāgryamāsanaṃ punararpayat / yadā tu jagṛhe naiva dattamāsanamādarāt // ### [2.32.57](https://indike.org/pramana/in.purana.narada.2.32.57) rājānaṃ kathayāmāsa daityānāṃ patimātmanaḥ / taddṛttāntamupājñāya daityarāṭ sa virocanaḥ // ### [2.32.58](https://indike.org/pramana/in.purana.narada.2.32.58) bhāryāsnehena mugdhātmā tattadāṅgīcakāra ha / aṅgīkṛte tu daityena tadvijñāya ca mānasam // ### [2.32.59](https://indike.org/pramana/in.purana.narada.2.32.59) uvāca brāhmaṇo hṛṣṭaḥ svamāyurmama kalpaya / tatastu daṃpatī tatra mugdhau svakṛtayā śucā // ### [2.32.60](https://indike.org/pramana/in.purana.narada.2.32.60) muhūrtaṃ dhyānamāsthāya karau baddhocaturdvijam / gṛhāṇa jīvitaṃ vipra dehi pādodakaṃ mama // ### [2.32.61](https://indike.org/pramana/in.purana.narada.2.32.61) tvayoktaṃ vacanaṃ satyaṃ kurvaḥ prītimavāpnuhi / tatastu vipraḥ protātmā tadaṅgīkṛtya cāsanam // ### [2.32.62](https://indike.org/pramana/in.purana.narada.2.32.62) pādodakaṃ dadau tasyai bhaktyā prīto janārdanaḥ / prakṣālya pādau viprasya viśālākṣī mudānvitā // ### [2.32.63](https://indike.org/pramana/in.purana.narada.2.32.63) patyā saha dadhau mūrdhni apaḥ pādāvanejanīḥ / tatastu sahasā subhru daṃpatī divyarūpiṇau // ### [2.32.64](https://indike.org/pramana/in.purana.narada.2.32.64) vimānavaramāruhya jagmaturvaiṣṇavaṃ padam / tataḥ prasanno bhagavān devaśalyaṃ vimocya saḥ // ### [2.32.65](https://indike.org/pramana/in.purana.narada.2.32.65) yayau vaikuṇṭhabhavanaṃ sarvairdevagaṇaiḥ stutaḥ / evaṃ mayāpi dātavyaṃ tava devi pratiśrutam // ### [2.32.66](https://indike.org/pramana/in.purana.narada.2.32.66) na satyāccālaye devi patiṃ rukmāṅgadābhidham / sattayameva manuṣyāṇāṃ gatidaṃ parikīrtitam // ### [2.32.67](https://indike.org/pramana/in.purana.narada.2.32.67) satyācccutaṃ manuṣyaṃ hi śvapākādadhamaṃ viduḥ // ### [2.32.68](https://indike.org/pramana/in.purana.narada.2.32.68) ityevamuktvā kanakāvadātā sā mohinīṃ paṅkajajanmajātām / jagrāha bhartuścaraṇau sutāmnau raktāṅgulī pāṇiyugena subhrūḥ // ### [2.32.68.p1](https://indike.org/pramana/in.purana.narada.2.32.68.p1) iti śrībṛhannāradīyapurāṇottarabhāge mohinīcarite saṃdhyāvalīkathanaṃ nāma dvātriṃśattamo 'dhyāyaḥ ## Linked texts (1) - [Rukmāṅgadacaritra](https://indike.org/pramana/in.purana.upakhyana.vamsa-rsi.rukmangadacaritra.106.17) — Sanskrit ## Discussed in (2) - [History of Dharmaśāstra (Ancient and Mediaeval Religious and Civil Law in India)](https://indike.org/pramana/ins.polity.kane-1930.v6.c81.447) — Kane 1930, English - [Purāṇic Encyclopaedia: A Comprehensive Dictionary with Special Reference to the Epic and Purāṇic Literature](https://indike.org/pramana/ins.reference.mani-1975.c9.4526) — Mani 1964, English --- Source: [https://indike.org/pramana/in.purana.narada.2.32](https://indike.org/pramana/in.purana.narada.2.32) · Pramāṇa