[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.34 # Naradapurana 2.34 Nāradapurāṇa 2.34 - **Language:** Sanskrit ## Contents - [2.34.26](https://indike.org/pramana/in.purana.narada.2.34.26) — 1 part ### [2.34.1](https://indike.org/pramana/in.purana.narada.2.34.1) vasiṣṭha uvāca tatputravacanaṃ śrutvā rājā rukmāṅgadastadā / saṃdhyāvalīmukhaṃ prekṣya prahṛṣṭakamalopamam // ### [2.34.2](https://indike.org/pramana/in.purana.narada.2.34.2) mohinīvacanaṃ śṛṇvanbhuṅkṣva mā hana dehajam / mā bhuṅkṣva tanayaṃ hiṃsa cetyāgrahasamanvitam // ### [2.34.3](https://indike.org/pramana/in.purana.narada.2.34.3) etasminneva kāle tu bhagavānkamalekṣaṇaḥ / antarddhānagatastasthau vyomni dhairyāvalokakaḥ // ### [2.34.4](https://indike.org/pramana/in.purana.narada.2.34.4) trayāṇāṃ nṛpaśārdūla meghaśyāmo nirañjanaḥ / dharmāṅgadasya vīrasya tasya rukmāṅgadasya tu // ### [2.34.5](https://indike.org/pramana/in.purana.narada.2.34.5) saṃdhyāvalyā sametasya vīśasaṃstho janārdanaḥ / vacane bhuṅkṣva bhuṅkṣveti mohinyā vyāhṛte tadā // ### [2.34.6](https://indike.org/pramana/in.purana.narada.2.34.6) jagrāha vimalaṃ khaṅgaṃ hantuṃ dharmāṅgadaṃ sutam / supraharṣeṇa manasā praṇamya garuḍadhvajam / taṃ dṛṣṭvā khaṅgahastaṃ tu pitaraṃ dharmmaṃbhūṣaṇaḥ // ### [2.34.7](https://indike.org/pramana/in.purana.narada.2.34.7) praṇamya mātāpitarau devaṃ cakradharaṃ tathā / vadanaṃ prekṣya cādīnaṃ jananyā nṛpapuṅgavaḥ // ### [2.34.8](https://indike.org/pramana/in.purana.narada.2.34.8) vṛṣāṅgadena tu tadā svagrīvorvītale kṛtā / kaṃbugrīvāṃ samānāṃ tu suvarṇā sukomalām // ### [2.34.9](https://indike.org/pramana/in.purana.narada.2.34.9) bahurekhamatha sthūlāṃ khaṅgamārge jyadarśayat / pitṛbhaktyā yutenaiva mātṛbhaktyādhikena vai // ### [2.34.10](https://indike.org/pramana/in.purana.narada.2.34.10) grīvāpradāne tanayasya bhūpa harṣākule cārusudhāṃśuvaktre / gṛhītakhaṅge jagadīśanāthe cacāla pṛthvīṃ sanagā samagrā // ### [2.34.11](https://indike.org/pramana/in.purana.narada.2.34.11) siṃdhuḥ pravṛddhaśca babhūva sadyo nimajja nārthaṃ bhuvanatrayasya / nipeturulkāḥ śataśo dharāyāṃ nirghātayuktāḥ sataḍitkhamadhyāt // ### [2.34.12](https://indike.org/pramana/in.purana.narada.2.34.12) vivarṇarūpā ca babhūva mohinī na devakāryaṃ hi kṛtaṃ mayeti / nirarthakaṃ janma mamādhunābhūtkṛtaṃ tu daivena dajagadvidhāyinā // ### [2.34.13](https://indike.org/pramana/in.purana.narada.2.34.13) vimohanaṃ rūpamidaṃ viḍaṃbanaṃ yadbhūmipālena na bhuktamannam / harerdine pāpabhayāpahe tu tṛṇaiḥ samāhaṃ bhavitā triviṣṭape // ### [2.34.14](https://indike.org/pramana/in.purana.narada.2.34.14) satvādhiko yāsyati mokṣamārgaṃ gantāsmi pāpa narakaṃ sudāruṇam // ### [2.34.15](https://indike.org/pramana/in.purana.narada.2.34.15) samudyate tadā khaṅge nṛpeṇa nṛpapuṅgava / mohinī mohasaṃyuktā papāta dharaṇītale // ### [2.34.16](https://indike.org/pramana/in.purana.narada.2.34.16) rājāpi tena khaṅgena bhrājamānaḥ samudyataḥ / grīvāyāśchedanārthāya vṛṣāṅgadasutasya tu // ### [2.34.17](https://indike.org/pramana/in.purana.narada.2.34.17) sakuṇḍalaṃ cāru śaśiprakāśaṃ bhrājiṣṇu vaktraṃ tanayasya bhūpaḥ / pracicchide yāvadatīva harṣāddhairyānvito rukmavibhūṣaṇo 'sau // ### [2.34.18](https://indike.org/pramana/in.purana.narada.2.34.18) tāvadgṛhītaḥ svakareṇa bhūpaḥ kṣīrābdhikanyāpatinā mahīpaḥ / tuṣṭo 'smi tuṣṭo 'smi na saṃśayo 'tra gacchasva lokaṃ mama lokanātha // ### [2.34.19](https://indike.org/pramana/in.purana.narada.2.34.19) priyānvitaścātmajasaṃyutaśca kīrtiṃ samādhāya mahītale tu / trailokyapūjyāṃ vimalāṃ ca śuklāṃ kṛtvā padaṃ mūrdhni yamasya bhūpa // ### [2.34.20](https://indike.org/pramana/in.purana.narada.2.34.20) prayāhi vāsaṃ mama dehasaṃjñaṃ sa cakriṇo bhūmipatiḥ kareṇa / saṃspṛṣṭamātro virajā babhūva priyāsametastanayena yuktaḥ // ### [2.34.21](https://indike.org/pramana/in.purana.narada.2.34.21) upetya vegena jagāma dehaṃ devasya divyaṃ sa nṛpo mahātmā / vihāya lakṣmīmavanīprasūtāṃ vihāya dāsīḥsudhanaṃ sa kośam // ### [2.34.22](https://indike.org/pramana/in.purana.narada.2.34.22) vihāya nāgāṃsturagānrathāṃśca svadāravargaṃ svajanādikāṃśca / jagāma dehaṃ madhusūdanasya tatoṃ'barātpuṣpacayaḥ papāta // ### [2.34.23](https://indike.org/pramana/in.purana.narada.2.34.23) saṃhṛṣṭasiddhaiḥ suralokapālaiḥ saṃtāḍitā dundubhayo vineduḥ / rājan jagurgītamatīva ramyaṃ devāṅganāḥ saṃnanṛturmudānvitāḥ // ### [2.34.24](https://indike.org/pramana/in.purana.narada.2.34.24) gandharvakanyā nṛpakarmatuṣṭāstadadbhutaṃ prekṣya dineśasūnuḥ / harestanau bhūmipatiṃ praviṣṭaṃ sadāraputraṃ svalipiṃ pramārjya // ### [2.34.25](https://indike.org/pramana/in.purana.narada.2.34.25) lokāṃśca sarvānnṛpadiṣṭamārge kṛtvā kṛtajñānharilokamārgān / bhītaḥ punaḥ prāpya pitāmahāntikaṃ provāca devaṃ caturānanaṃ rudan // ### [2.34.26](https://indike.org/pramana/in.purana.narada.2.34.26) nāhaṃ niyogī bhavitā hi deva ājñāvihīnaḥ suralokanātha / vidhehi cānyatprakaromi tāta nideśanaṃ māstu madīya daṇḍam // ### [2.34.26.p1](https://indike.org/pramana/in.purana.narada.2.34.26.p1) iti śrībṛhannāradīyapurāṇottarabhāge mohinīcarite sutavadhodyatasya rukmāṅgadasya bhagavaddarśanaṃ nāma catustriṃśattamo 'dhyāyaḥ ## Linked texts (1) - [Rukmāṅgadacaritra](https://indike.org/pramana/in.purana.upakhyana.vamsa-rsi.rukmangadacaritra.108.30) — Sanskrit --- Source: [https://indike.org/pramana/in.purana.narada.2.34](https://indike.org/pramana/in.purana.narada.2.34) · Pramāṇa