[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.38 # Naradapurana 2.38 Nāradapurāṇa 2.38 - **Language:** Sanskrit ## Contents - [2.38.63](https://indike.org/pramana/in.purana.narada.2.38.63) — 1 part ### [2.38.1](https://indike.org/pramana/in.purana.narada.2.38.1) vasiṣṭaṃ uvāca sa vasurnṛpaśārdūla mohinīṃ yājyakāminīm / uvāca ślakṣṇayā vācā sarvalokahite rataḥ // ### [2.38.2](https://indike.org/pramana/in.purana.narada.2.38.2) vasuruvāca śṛṇu mohinī vakṣyāmi tīrthānāṃ lakṣaṇaṃ pṛthak / yena vijñātamātreṇa pāpināṃ gatiruttamā // ### [2.38.3](https://indike.org/pramana/in.purana.narada.2.38.3) sarveṣāmapi tīrthānāṃ śreṣṭhā gaṃmā dharātale / na tasyā sadṛśaṃ kiñcidvidyate pāpanāśanam // ### [2.38.4](https://indike.org/pramana/in.purana.narada.2.38.4) tacchrutvā vacanaṃ tasya vasoḥ svasya purodhasaḥ / praṇatā mohinī prāha gaṅgāsnānakṛtādarā // ### [2.38.5](https://indike.org/pramana/in.purana.narada.2.38.5) mohinyuvāca bhagavanvāḍavaśreṣṭha gaṅgāmāhātmyamuttamam / sarveṣāṃ ca purāṇānāṃ saṃmataṃ vada sāṃpratam // ### [2.38.6](https://indike.org/pramana/in.purana.narada.2.38.6) śrutvā māhātmyamatulaṃ gaṅgāyāḥ pāpanāśanam / paścātpāpavināśinyāṃ snātuṃ yāsye tvayā saha // ### [2.38.7](https://indike.org/pramana/in.purana.narada.2.38.7) tacchrutvā mohinīvākyaṃ vasuḥ sarvapurāṇavit / māhātmyaṃ kathayāmāsa gaṅgāyāḥ pāpanāśanam // ### [2.38.8](https://indike.org/pramana/in.purana.narada.2.38.8) vasuruvāca te deśāste janapadāste śailā ste 'pi cāśramāḥ / yeṣāṃ bhāgīrathī puṇyā samīpe vartate sadā // ### [2.38.9](https://indike.org/pramana/in.purana.narada.2.38.9) tapasā brahmacaryeṇa yajñaistyāgena vā punaḥ / tāṃ gatiṃ na labhejjanturgaṅgāṃ saṃsevya yāṃ labhet // ### [2.38.40](https://indike.org/pramana/in.purana.narada.2.38.40) pūrve vayasi pāpāni kṛtvā karmāṇi ye narāḥ / śeṣe gaṅgāṃ niṣevante te 'pi yānti parāṃ gatim // ### [2.38.11](https://indike.org/pramana/in.purana.narada.2.38.11) tiṣṭhedyugasahasraṃ tu pādenaikena yaḥ pumān / māsamekaṃ tu gaṅgāyāṃ snātastulyaphalāvubhau // ### [2.38.12](https://indike.org/pramana/in.purana.narada.2.38.12) tiṣṭhetārvākchirā yastu yugānāmayutaṃ pumān / tiṣṭhedyatheṣṭaṃ yaścāpi gaṅgāyāṃ sa viśiṣyate // ### [2.38.13](https://indike.org/pramana/in.purana.narada.2.38.13) bhūtānāmiha sarveṣāṃ duḥkhopahatacetasām / gatimanveṣamāṇānāṃ na gaṅgāsadṛśī gatiḥ // ### [2.38.14](https://indike.org/pramana/in.purana.narada.2.38.14) prakṛṣṭaiḥ pātakair ghoraiḥ pāpinaḥ puruṣādhamān / prasahya tārayedguṅgā gacchato niraye 'śucau // ### [2.38.15](https://indike.org/pramana/in.purana.narada.2.38.15) te samānāstu munibhirnūnaṃ devaiḥ savāsavaiḥ / ye 'bhigacchanti satataṃ gaṅgāmabhimatāṃ suraiḥ // ### [2.38.16](https://indike.org/pramana/in.purana.narada.2.38.16) andhāñjaḍāndravyahīnāṃśca gaṅgā saṃpāvayedbṛhatī viśvarūpā / devaiḥ seṃdrairmunibhirmānavaiśca niṣevitā sarvakālaṃ samṛddhye // ### [2.38.17](https://indike.org/pramana/in.purana.narada.2.38.17) pakṣādau kṛṣṇapakṣe tu bhūmau saṃnihitā bhavet / yāvatpuṇyā hyamāvāsyā dināni daśa mohini // ### [2.38.18](https://indike.org/pramana/in.purana.narada.2.38.18) śuklapratipadādeśca dināni daśa saṃkhyayā / pātāle sannidhānaṃ tu kurute svayameva hi // ### [2.38.19](https://indike.org/pramana/in.purana.narada.2.38.19) ārabhya śuklaikādaśyā dināni daśa yāni tu / pañcamyaṃ tāni sā svarge bhavetsannihitā sadā // ### [2.38.20](https://indike.org/pramana/in.purana.narada.2.38.20) kṛte tu sarvatīrthāni tretāyāṃ puṣkaraṃ param / dvāpare tu kurukṣetraṃ kalau gaṅgā viśiṣyate // ### [2.38.21](https://indike.org/pramana/in.purana.narada.2.38.21) kalau tu sarvatīrthāni svaṃ svaṃ vīryaṃ svabhāvataḥ / gaṅgāyāṃ pratimuñcanti sā tu devī na kutracit // ### [2.38.22](https://indike.org/pramana/in.purana.narada.2.38.22) gaṅgāṃbhaḥ kaṇadigdhasya vāyoḥ saṃsparśanādapi / pāpaśīlā api narāḥ parāṃ gatimavāpnuyuḥ // ### [2.38.23](https://indike.org/pramana/in.purana.narada.2.38.23) yo 'sau sarvagato viṣṇuścitsvarūpī janārdanaḥ / sa eva dravarūpeṇa gaṅgāṃbho nātra saṃśayaḥ // ### [2.38.24](https://indike.org/pramana/in.purana.narada.2.38.24) brahmahā guruḍā goghnaḥ steyī ca gurutalpagaḥ / gaṅgāṃbhasā ca pūyante nātra kāryā vicāraṇā // ### [2.38.25](https://indike.org/pramana/in.purana.narada.2.38.25) kṣetrasthamṛddhṛtaṃ vāpi śītamuṣṇamathāpi vā / gāṅgeyaṃ tu harettoyaṃ pāpamāmaraṇāntikam // ### [2.38.26](https://indike.org/pramana/in.purana.narada.2.38.26) varjyaṃ paryuṣitaṃ toyaṃ varjyaṃ puryuṣitaṃ dalam / na varjyaṃ jāhnavītoyaṃ na varjyaṃ tulasīdalam // ### [2.38.27](https://indike.org/pramana/in.purana.narada.2.38.27) meroḥ suvarṇasya ca sarvaratnaiḥ saṃkhyopalānāmudakasya vāpi / gaṅgājalānāṃ na tu śaktirasti vaktuṃ guṇākhyāparimāṇamatra // ### [2.38.28](https://indike.org/pramana/in.purana.narada.2.38.28) tīrthayātrāvidhiṃ kṛtsnamakurvāṇo 'pi yo naraḥ / gaṅgātoyasya māhātmyātso 'pyatra phalabhāgbhavet // ### [2.38.29](https://indike.org/pramana/in.purana.narada.2.38.29) cintāmaṇiguṇāccāpi gaṅgāyāstoyabindavaḥ / viśiṣṭā yatprayacchanti bhaktebhyo vāñchitaṃ phalam // ### [2.38.30](https://indike.org/pramana/in.purana.narada.2.38.30) gaṇḍūṣamātrato bhaktyā sakūdgaṅgāṃbhasā naraḥ / kāmadhenu stanodbhūtānbhuṅkte divyarasāndivi // ### [2.38.31](https://indike.org/pramana/in.purana.narada.2.38.31) śālagrāmaśilāyāṃ yastu gaṅgājalaṃ kṣipet / apahatya tamastīvraṃ bhāti sūryo yathodaye // ### [2.38.32](https://indike.org/pramana/in.purana.narada.2.38.32) manovākkāyajairgrastaḥ pāpairbahuvidhairapi / vīkṣya gaṅgāṃ bhavetpūtaḥ puruṣo nātra saṃśayaḥ // ### [2.38.33](https://indike.org/pramana/in.purana.narada.2.38.33) gaṅgātoyābhiṣiktāṃ tu bhikṣāmaśnāti yaḥ sadā / sarpavatkañcukaṃ muktvā pāpahīno bhavetsa vai // ### [2.38.34](https://indike.org/pramana/in.purana.narada.2.38.34) himavadvindhyasadṛśā rāśayaḥ pāpakarmaṇām / gaṅgāṃbhasā vinaśyanti viṣṇubhaktyā yathāpadaḥ // ### [2.38.35](https://indike.org/pramana/in.purana.narada.2.38.35) praveśamātre gaṅgāyāṃ snānārthaṃ bhaktito nṛṇām / brahmahatyādipāpāni hāhetyuktvā prayāntyalam // ### [2.38.36](https://indike.org/pramana/in.purana.narada.2.38.36) gaṅgātīre vasennityaṃ gaṅgātoyaṃ pibetsadā / yaḥ pumānsa vimucyeta pātakaiḥ pūrvasaṃcitaiḥ // ### [2.38.37](https://indike.org/pramana/in.purana.narada.2.38.37) yo vai gaṅgāṃ samāśritya nityaṃ tiṣṭhati nirbhayaḥ / sa eva devairmartyaiśca pūjanīyo maharṣibhiḥ // ### [2.38.38](https://indike.org/pramana/in.purana.narada.2.38.38) kimaṣṭāṅgena yogena kiṃ tapobhiḥ kimadhvaraiḥ / vāsa eva hi gaṅgāyāṃ sarvato 'pi viśiṣyate // ### [2.38.39](https://indike.org/pramana/in.purana.narada.2.38.39) kiṃ yajñairbahubhirjāpyaiḥ kiṃ tapobhirdhanārpaṇaiḥ / svargamokṣapradā gaṅgā sukhasevyā yataḥ sthitā // ### [2.38.40\_2](https://indike.org/pramana/in.purana.narada.2.38.40_2) yajñairyamaiśca niyamairdānaiḥ saṃnyāsato 'pi vā / na tatphalamavāproti gaṅgāṃ sevya yadāpnuyāt // ### [2.38.41](https://indike.org/pramana/in.purana.narada.2.38.41) prabhāse gosahastreṇa rāhugraste divākare / yatphalaṃ labhate martyo gaṅgāyāṃ taddinena vai // ### [2.38.42](https://indike.org/pramana/in.purana.narada.2.38.42) anyopāyāṃśca yastyaktvā mīkṣakāmaḥ suniścitaḥ / gaṅgātīre sukhaṃ tiṣṭhetsa vai mokṣasya bhājanam // ### [2.38.43](https://indike.org/pramana/in.purana.narada.2.38.43) vārāṇasyāṃ viśeṣaṇa gaṅgā sadyastu mokṣadā / pratimāsaṃ caturdaśyāmaṣṭamyāṃ caiva sarvadā // ### [2.38.44](https://indike.org/pramana/in.purana.narada.2.38.44) gaṅgātīre nivāsaśca yāvajjīvaṃ ca siddhidaḥ / kṛcchrāṇi sarvadā kṛtvā yatphalaṃ sukhamaśnute // ### [2.38.45](https://indike.org/pramana/in.purana.narada.2.38.45) sadā cāndrāyaṇaṃ caiva tallabhejjāhnavītaṭe / gaṅgāsevāparasyeha divasārddhena yatphalam // ### [2.38.46](https://indike.org/pramana/in.purana.narada.2.38.46) na tacchakyaṃ brahmasute prāptuṃ kratuśatairapi / sarvayajñatapodānayogasvādhyāyakarmabhiḥ // ### [2.38.47](https://indike.org/pramana/in.purana.narada.2.38.47) yatphalaṃ tallabhedbhaktyā gaṅgātīranivāsataḥ / yatpuṇyaṃ satyavacanairnaiṣṭhikabrahmacāriṇām // ### [2.38.48](https://indike.org/pramana/in.purana.narada.2.38.48) yadagnihotriṇāṃ puṇyaṃ tattu gaṅgānivāsataḥ / samātṛpitṛdārāṇāṃ kulakoṭimanantakam // ### [2.38.49](https://indike.org/pramana/in.purana.narada.2.38.49) gaṅgābhaktistārayate saṃsārārṇavato dhruvam / saṃtoṣaḥ paramaiśvaryaṃ tattvajñānaṃ sukhātmanām // ### [2.38.50](https://indike.org/pramana/in.purana.narada.2.38.50) vinayācārasaṃpattirgaṅgābhaktasya jāyate / kṛtakṛtyo bhavenmartyo gaṅgāṃ prāpyaiva kevalam // ### [2.38.51](https://indike.org/pramana/in.purana.narada.2.38.51) tadbhaktastatparaśca syānmṛto vāpi na saṃśayaḥ / bhaktyā tajjalasaṃsparśī tajjalaṃ pibate ca yaḥ // ### [2.38.52](https://indike.org/pramana/in.purana.narada.2.38.52) anāyāsena hi naro mokṣo pāyaṃ sa vindati / dīkṣitaḥ sarvayajñeṣu somapānaṃ dine dine // ### [2.38.53](https://indike.org/pramana/in.purana.narada.2.38.53) sarvāṇi yaṃṣāṃ gaṅgāyāstoyaiḥ kṛtyāni sarvadā / dehaṃ tyaktvā narāste tu modante śivasannidhau // ### [2.38.54](https://indike.org/pramana/in.purana.narada.2.38.54) devāḥ somārkasaṃsthāni yathā śakrādayo mukhaiḥ / amṛtānyupabhuñjanti tathā gaṅgājalaṃ narāḥ // ### [2.38.55](https://indike.org/pramana/in.purana.narada.2.38.55) kanyādānaiśca vidhivadbhūmidānaiśca bhaktitaḥ / annadānaiśca godānaiḥ svarṇadānādibhistathā // ### [2.38.56](https://indike.org/pramana/in.purana.narada.2.38.56) rathāśvagajadānaiśca yatpuṇyaṃ parikīrtitam / tataḥ śataguṇaṃ puṇyaṃ gaṅgāṃbhaśculukāśanāt // ### [2.38.57](https://indike.org/pramana/in.purana.narada.2.38.57) cāndrāyaṇasahasrāṇāṃ yatphalaṃ parikīrtitam / tato 'dhikaphalaṃ gaṅgātoyapānādavāpyate // ### [2.38.58](https://indike.org/pramana/in.purana.narada.2.38.58) gaṇḍūṣamātrapāne tu aśvamedhaphalaṃ labhet / svacchandaṃ yaḥ pibedaṃbhastasya muktiḥ kare sthitā // ### [2.38.59](https://indike.org/pramana/in.purana.narada.2.38.59) tribhiḥ sārasvataṃ toyaṃ saptabhistvatha yāmunam / nārmadaṃ daśabhirmāsairgāṅgaṃ varṣeṇa jīryati // ### [2.38.60](https://indike.org/pramana/in.purana.narada.2.38.60) śāstreṇākṛtatoyānāṃ mṛtānāṃ kvāpi dehanām / taduttaraphalāvāptirgaṅgāyāmasthiyogataḥ // ### [2.38.61](https://indike.org/pramana/in.purana.narada.2.38.61) cāndrāyaṇasahasraṃ tu yaścaretkāyaśodhanam / yaḥ pibettu yatheṣṭhaṃ hi gaṅgāmbhaḥ sa viśiṣyate // ### [2.38.62](https://indike.org/pramana/in.purana.narada.2.38.62) gaṅgāṃ paśyati yaḥ stauti snāti bhaktyā pibejjalam / sa svargaṃ jñānamamalaṃ yogaṃ mokṣaṃ ca vindati // ### [2.38.63](https://indike.org/pramana/in.purana.narada.2.38.63) yastu sūryyāṃśuniṣṭaptaṃ gāṅgeyaṃ pibate jalam / gomūtrayāvakāhārādgāṅgapānaṃ viśiṣyate // ### [2.38.63.p1](https://indike.org/pramana/in.purana.narada.2.38.63.p1) iti śrībṛhannāradīyapurāṇottarabhāge mohinīvasusaṃvāde gaṅgāmāhātmyavarṇanaṃ nāmāṣṭatriṃśattamo 'dhyāyaḥ ## Linked texts (7) - [Southern recension](https://indike.org/pramana/in.lit.mahabharata.vyasa*southern.12.375.9_3257) — Sanskrit - [Kūrmapurāṇa](https://indike.org/pramana/in.purana.kurma.1.35.36) — Vyāsa, Sanskrit - [Vīramitrodaya](https://indike.org/pramana/in.niti.dharma.nibandha.viramitrodaya.259) — Mitramiśra 1610, Sanskrit - [Tīrthacintāmaṇi](https://indike.org/pramana/in.niti.dharma.tirtha.tirthacintamani.9.p1) — Vācaspatimiśra, Sanskrit - [Tīrthaprakāśa](https://indike.org/pramana/in.niti.dharma.tirtha.tirthaprakasa.4.p208) — Mitramiśra, Sanskrit - [Kṛtyasārasamuccaya (Amṛtanātha Jhā Śarman)](https://indike.org/pramana/in.niti.dharma.nibandha.krtya.krtyasarasamuccaya.2.p439) — Amṛtanātha Jhā Śarman 1800, Sanskrit - [Skandapurāṇa (early; "Ambikākhaṇḍa") (ed. Bakker)](https://indike.org/pramana/in.purana.skanda*early*bakker.17.40.175.p2) — Sanskrit --- Source: [https://indike.org/pramana/in.purana.narada.2.38](https://indike.org/pramana/in.purana.narada.2.38) · Pramāṇa