[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.41 # Naradapurana 2.41 Nāradapurāṇa 2.41 - **Language:** Sanskrit ## Contents - [2.41.72](https://indike.org/pramana/in.purana.narada.2.41.72) — 1 part ### [2.41.1](https://indike.org/pramana/in.purana.narada.2.41.1) vasuruvāca athāvagāhanādīnāṃ karmaṇāṃ phalamucyate / sāvadhānā śṛṇuṣva tvaṃ brahmaputri nṛpapriye // ### [2.41.2](https://indike.org/pramana/in.purana.narada.2.41.2) yaiḥ puṇyavāhinī gaṅgā sakṛdbhaktyāvagāhitā / teṣāṃ kulānāṃ lakṣaṃ tu bhavāttārayate śivā // ### [2.41.3](https://indike.org/pramana/in.purana.narada.2.41.3) sāmānyasthānato devi tatra saṃdhyā hyupāsitā / puṇyaṃ lakṣaguṇaṃ kartuṃ samarthā dvijapāvanī // ### [2.41.4](https://indike.org/pramana/in.purana.narada.2.41.4) dattāḥ pitṛbhyo yatrāpastanayaiḥ śraddhayānvitaiḥ / akṣayāṃ tu prakurvanti tṛptiṃ mohini durlabhām // ### [2.41.5](https://indike.org/pramana/in.purana.narada.2.41.5) yāvantaśca tilā martyārgṛhītāḥ pitṛkarmaṇi / tāvadvarṣasahasrāṇi pitaraḥ svargavāsinaḥ // ### [2.41.6](https://indike.org/pramana/in.purana.narada.2.41.6) pitṛlokeṣu ye kecitsarveṣāṃ pitaraḥ sthitāḥ / tarpyamāṇāḥ parāṃ tṛptiṃ yānti gaṅgājalaiḥ śubhaiḥ // ### [2.41.7](https://indike.org/pramana/in.purana.narada.2.41.7) ya icchetsaphalaṃ janma saṃtatiṃ vā śubhānane / sa pitṝṃstarpayedgaṅgāmabhigamya surāṃstathā // ### [2.41.8](https://indike.org/pramana/in.purana.narada.2.41.8) ye matā durgatā martyāstarpitāstatkulodbhavaiḥ / kuśaistilairgāṅgajalaiste prayānti hareḥ padam // ### [2.41.9](https://indike.org/pramana/in.purana.narada.2.41.9) svargasasthāśca ye kecitpitaraḥ puṇyaśīlinaḥ / te tarpitā gāṅgajalairmokṣe yānti vidhervacaḥ // ### [2.41.10](https://indike.org/pramana/in.purana.narada.2.41.10) māsaṃ tarpaṇamātreṇa piṇḍasaṃpātanena ca / gaṅgāyāṃ pitaraḥ sarve suprītāḥ sūryavarcasaḥ // ### [2.41.11](https://indike.org/pramana/in.purana.narada.2.41.11) apsaro gaṇaṇasaṃyuktānhemaratnavibhūṣitān / muktājālaparicchannānveṇuvīṇānināditān // ### [2.41.12](https://indike.org/pramana/in.purana.narada.2.41.12) bherīśaṅkhamṛdaṅgādinirghoṣānsragvibhūṣitān / gandharvadeharucirāndivyabhogasamanvitān // ### [2.41.13](https://indike.org/pramana/in.purana.narada.2.41.13) āruhya tu vimānāgryānbrahyalokaṃ prayānti hi / gaṅgāyāṃ tu naraḥ snātvā yo nityaṃ liṅgamarcayet // ### [2.41.14](https://indike.org/pramana/in.purana.narada.2.41.14) ekena janmanā mokṣaṃ paramānpoti sa dhruvam / agnihotrāṇi vedāśca yajñāśca bahudakṣiṇāḥ // ### [2.41.15](https://indike.org/pramana/in.purana.narada.2.41.15) gaṅgāyāṃ liṅgapūjāyāḥ koṭyaṃśenāpi no samāḥ / pitṝnudiśya vā devāngaṅgāṃbhibhiḥ prasiṃcayet // ### [2.41.16](https://indike.org/pramana/in.purana.narada.2.41.16) tṛptāḥ syustasya pitaro narakasthāśca tatkṣaṇāt / mṛtkuṃbhāttāmrakuṃbhaistu snānaṃ daśaguṇaṃ smṛtam // ### [2.41.17](https://indike.org/pramana/in.purana.narada.2.41.17) raupyaiḥ śataguṇaṃ puṇyaṃ hemaiḥ koṭiguṇaṃ smṛtam / evamarghe ca naivedye balipūjādiṣu kramāt // ### [2.41.18](https://indike.org/pramana/in.purana.narada.2.41.18) pātrāṃ taraviśeṣeṇa phalaṃ caivottarottaram / vibhave sati yo mohānna kuryādvidhivistaram // ### [2.41.19](https://indike.org/pramana/in.purana.narada.2.41.19) na sa tatkarmaphalabhāgdevadrohī prakīrtyate / devānāṃ darśanaṃ puṇyaṃ darśanātsparśanaṃ varam // ### [2.41.20](https://indike.org/pramana/in.purana.narada.2.41.20) sparśanādarcanaṃ śreṣṭhaṃ ghṛtasnānamataḥ param / prāhurgaṅgājalaiḥ snānaṃ ghṛtasnānasamaṃ budhāḥ // ### [2.41.21](https://indike.org/pramana/in.purana.narada.2.41.21) arghyaṃ dravyaviśeṣeṇa gaṅgātoyena yaḥ sakṛt / māgadhaprasthamātreṇa tāmrapātrasthitena ca // ### [2.41.22](https://indike.org/pramana/in.purana.narada.2.41.22) devatābhyaḥ pradadyāttu svakīyapitṛbhiḥ saha / putrapautraiśca saṃyuktaḥ sa ca vai svargamāpnuyāt / āpaḥ kṣīraṃ kuśāgrāṇi ghṛtaṃ dadhi tathā madhu // ### [2.41.23](https://indike.org/pramana/in.purana.narada.2.41.23) raktāni karavīrāṇi tathā vai raktacandanam / aṣṭāṅgaireṣa yuktor'gho bhānave parikīrtitaḥ // ### [2.41.24](https://indike.org/pramana/in.purana.narada.2.41.24) viṣṇoḥ śivasya sūryyasya durgāyā brahmaṇastathā / gaṅgātīre pratiṣṭhāṃ tu yaḥ karoti narottamaḥ // ### [2.41.25](https://indike.org/pramana/in.purana.narada.2.41.25) tathaivāyatanānyeṣāṃ kārayatyapi śaktitaḥ / anyatīrtheṣu karaṇātkoṭiguṇaṃ bhavet // ### [2.41.26](https://indike.org/pramana/in.purana.narada.2.41.26) gaṅgātīrasamudbhūtamṛdā ligāni śaktitaḥ / salakṣaṇāni kṛtvā tu pratiṣṭhāpya dine dine // ### [2.41.27](https://indike.org/pramana/in.purana.narada.2.41.27) mantreśca patrapuṣpādyaiḥ pūjayitvā ca śaktitaḥ / gaṅgāyāṃ nikṣipennityaṃ tasya pupayamanantakam // ### [2.41.28](https://indike.org/pramana/in.purana.narada.2.41.28) sarvānandapradāyinyāṃ gaṅgāyāṃ yo narottamaḥ / aṣṭākṣaraṃ japedbhaktya muktistasya kare sthitā // ### [2.41.29](https://indike.org/pramana/in.purana.narada.2.41.29) namo nārāyaṇāyeti praṇavādyaṃ niyamya ca / ṣaṇmāsaṃ japataḥ sarvā hyupatiṣṭhanti siddhayaḥ // ### [2.41.30](https://indike.org/pramana/in.purana.narada.2.41.30) namaḥ śivāyeti mantraṃ satāraṃ vidhinā tu yaḥ / caturviśatilakṣaṃ vai japetsākṣātsaśaṅkaraḥ // ### [2.41.31](https://indike.org/pramana/in.purana.narada.2.41.31) pañcākṣarī siddhavidyā śiva eva na saṃśayaḥ / apavitraḥ pavitro vā japanniṣpātako bhavet // ### [2.41.32](https://indike.org/pramana/in.purana.narada.2.41.32) pūjitāyāṃ tu gaṅgāyāṃ pūjitāḥ sarva devatāḥ / tasmātsarvaprayatnena pūjayedamarāpagām // ### [2.41.33](https://indike.org/pramana/in.purana.narada.2.41.33) caturbhujāṃ trinetrāṃ ca sarvāvayavaśobhitām / ratnakuṃbhasitāṃbhojavarābhayakaraṃ śubhām // ### [2.41.34](https://indike.org/pramana/in.purana.narada.2.41.34) śvetavastraparīdhānāṃ muktāmaṇivibhūṣitām / suprasannāṃ suvadanāṃ karuṇārdrahṛdaṃbujām // ### [2.41.35](https://indike.org/pramana/in.purana.narada.2.41.35) sudhāplāvitabhūpṛṣṭhāṃ trailokyanamitāṃ sadā / dhyātvā jalamayīṃ gaṅgāṃ pūjayanpuṇyabhāgbhavet // ### [2.41.36](https://indike.org/pramana/in.purana.narada.2.41.36) māsārddhamapi yastvevaṃ nairantaryeṇa pūjayet / sa eva devasadṛśo bahukāle phalādhikaḥ // ### [2.41.37](https://indike.org/pramana/in.purana.narada.2.41.37) vaiśākhaśuklasaptamyāṃ jahnunā jāhnavī purā / krodhātpītā punastyaktā karṇaraṅghrāttu dakṣiṇāt // ### [2.41.38](https://indike.org/pramana/in.purana.narada.2.41.38) tāṃ tatra pūjayeddevīṃ gaṅgāṃ gaganamekhalām / akṣayāyāṃ tu vaiśākhe kārtike 'pi śubhānane // ### [2.41.39](https://indike.org/pramana/in.purana.narada.2.41.39) rātrau jāgaraṇaṃ kṛtvā yavānnaiśca tilaistathā / viṣṇuṃ gaṅgāṃ ca śaṃbhuṃ ca pūjayedbhakti bhāvataḥ // ### [2.41.40](https://indike.org/pramana/in.purana.narada.2.41.40) tathā sugandhaiḥ kusumaiḥ kuṅkumāgarumandanaiḥ / tulasībilvapatrādyairmātuluṅgaphalādibhiḥ // ### [2.41.41](https://indike.org/pramana/in.purana.narada.2.41.41) dhūpairdīpaiśca naivedyairyathā vibhavavistaraiḥ / kalpakoṭisahasrāṇi kalpakoṭiśatāni ca // ### [2.41.42](https://indike.org/pramana/in.purana.narada.2.41.42) divyaṃ vimānamāsthāya viṣṇuloke mahīyate / tato mahītalaṃ prāpya rājā bhavati dhārmikaḥ // ### [2.41.43](https://indike.org/pramana/in.purana.narada.2.41.43) bhuktvā vividhasaukhyāni rūpaśīlaguṇānvitaḥ / dehānte jñānavānbhūtvā śivasāyujyamāpnuyāt // ### [2.41.44](https://indike.org/pramana/in.purana.narada.2.41.44) yajño dānaṃ tapo japyaṃ śrāddhaṃ ca surapūjanam / gaṅgāyāṃ tu kṛtaṃ sarvaṃ koṭikoṭiguṇaṃ bhavet // ### [2.41.45](https://indike.org/pramana/in.purana.narada.2.41.45) yastvakṣayatṛtīyāyāṃ gaṅgātīre dadāti vai / ghṛtadhenuṃ vidhānena tasya puṇyaphalaṃ śṛṇu // ### [2.41.46](https://indike.org/pramana/in.purana.narada.2.41.46) kalpakoṭisahasrāṇi kalpakoṭiśatāni ca / sahasrādityasaṃkāśaḥ sarvakāmasamanvitaḥ // ### [2.41.47](https://indike.org/pramana/in.purana.narada.2.41.47) hemaratna maye citre vimāne haṃsabhūṣite / svakīyapitṛbhiḥ sārddhaṃ brahmaloke mahīyate // ### [2.41.48](https://indike.org/pramana/in.purana.narada.2.41.48) tatastu jāyate vipro gaṅgātīre dhanānvitaḥ / ante tu brahmavidbhūtvā mokṣamāpnotyasaṃśayaḥ // ### [2.41.49](https://indike.org/pramana/in.purana.narada.2.41.49) tathaiva gopradānaṃ ca vidhinā kurute tu yaḥ / golomasaṃkhyavarṣāṇi svargaloke mahīyate // ### [2.41.50](https://indike.org/pramana/in.purana.narada.2.41.50) jāyate ca kule paścāddhanadhānyasamākule / ratnakāñcanabhūpūrṇe śīlavidyāyaśonvite // ### [2.41.51](https://indike.org/pramana/in.purana.narada.2.41.51) sa bhuktvā vipulānbhogānputrapautrasamanvitaḥ / mokṣabhāgī bhavennṛnaṃ nātrakāryā vicāraṇā // ### [2.41.52](https://indike.org/pramana/in.purana.narada.2.41.52) kapilā yadi dattā syādvidhinā vedapārage / narakasthānpitṝnsarvānsvargaṃ nayati vai tadā // ### [2.41.53](https://indike.org/pramana/in.purana.narada.2.41.53) bhūmiṃ nivartanamitāṃ gaṅgātīre dadāti yaḥ / bhūmireṇupramāṇābdaṃ brahmaviṣṇuśivātigaḥ // ### [2.41.54](https://indike.org/pramana/in.purana.narada.2.41.54) jāyate ca punarbhūmau saptadvīpapatirbhavet / bherīśaṅkhādinirghoṣairgītavāditraniḥsvanaiḥ // ### [2.41.55](https://indike.org/pramana/in.purana.narada.2.41.55) stutibhirmāgaghānāṃ ca supto 'sau pratibudhyate / sarvasaukhyānyavāpyeha sarvadharmaparāyaṇaḥ // ### [2.41.56](https://indike.org/pramana/in.purana.narada.2.41.56) narakasthānpitṝnsarvānprāpayitvā divaṃ tathā / svargasthitānmokṣayitvā svayaṃ jñānī ca mohini // ### [2.41.57](https://indike.org/pramana/in.purana.narada.2.41.57) ante jñānāsinā chitvā avidyāṃ pañcaparvikām / paraṃ vairāgyamāpannaḥ paraṃ brahmādhi gacchati // ### [2.41.58](https://indike.org/pramana/in.purana.narada.2.41.58) saptahastena daṇḍena triṃśaddaṇḍā nivartanam / tribhāgahīnaṃ gocarma mānamāha vidhiḥ svayam // ### [2.41.59](https://indike.org/pramana/in.purana.narada.2.41.59) grāmaṃ gaṅgātaṭe yo vai brāhmaṇebhyaḥ prayacchati / brahmaviṣṇuśivaprītye durgāyā bhāskarasya ca // ### [2.41.60](https://indike.org/pramana/in.purana.narada.2.41.60) sarvadāneṣu yatpuṇyaṃ sarvayajñeṣu yatphalam / tapovrateṣu puṇyeṣu yatphalaṃ parikīrtitam // ### [2.41.61](https://indike.org/pramana/in.purana.narada.2.41.61) sahasraguṇitaṃ tattu vijñeyaṃ grāmadāyinaḥ / sūryakoṭipratīkāśe vimāne vaiṣṇave pure // ### [2.41.62](https://indike.org/pramana/in.purana.narada.2.41.62) krīḍate śāṅkare vāpi stuto devādibhirmudā / bhūmireṇvabdasaṃkhyākaṃ kālaṃ sthitvā ca tatra saḥ // ### [2.41.63](https://indike.org/pramana/in.purana.narada.2.41.63) aṇimādiguṇairyukte yogināṃ jāyate kule / akṣayāyāṃ tu yo devi svarṇaṃ ṣoḍaśamāsikam // ### [2.41.64](https://indike.org/pramana/in.purana.narada.2.41.64) dadāti dvijamukhyāya so 'pi lokeṣu pūjyate / annadānādviṣṇulokaṃ śaivaṃ vai tiladānataḥ // ### [2.41.65](https://indike.org/pramana/in.purana.narada.2.41.65) brāhmaṃ ratnapradānena gohiraṇyena vāsavam / gāndharvaṃ svarṇavāsobhiḥ kīrtiṃ kanyāpradānataḥ // ### [2.41.66](https://indike.org/pramana/in.purana.narada.2.41.66) vidyayā muktidaṃ jñānaṃ prāpya yāyānnirañjanam / gaṃmātīre naro yastu nānāvṛkṣaiḥ samanvitam // ### [2.41.67](https://indike.org/pramana/in.purana.narada.2.41.67) ārāmaṃ kārayedbhaktyā gṛhaṃ copavanānvitam / kadalīnārikeraiśca kapitthāśokacaṃpakaiḥ // ### [2.41.68](https://indike.org/pramana/in.purana.narada.2.41.68) panasairbilvavṛkṣaiśca kadaṃbāśvatthapāṭalaiḥ / āmraistālairnāgaraṅgairvṛkṣairanyaiśca saṃyutam // ### [2.41.69](https://indike.org/pramana/in.purana.narada.2.41.69) jātīvijayasaṃyuktaṃ tathā pāṭalarājitam / nicitaṃ kārayitvaivamāvāsaṃ puṣpaśobhitam // ### [2.41.70](https://indike.org/pramana/in.purana.narada.2.41.70) śivāya viṣṇave vāpi durgāyai bhāskarāya ca / prayacchati tathā bhaktyā sarvārthaṃ parikalpya ca // ### [2.41.71](https://indike.org/pramana/in.purana.narada.2.41.71) tasya puṇyaphalaṃ vakṣye saṃkṣepānnatu vistarāt / yāvanti teṣāṃ vṛkṣāṇāṃ puṣpamūlaphalāni ca // ### [2.41.72](https://indike.org/pramana/in.purana.narada.2.41.72) bījāni ca vicitrāṇi teṣāṃ mūlāni vai tathā / tāvatkalpasahasrāṇi teṣāṃ lokeṣu saṃsthitiḥ // ### [2.41.72.p1](https://indike.org/pramana/in.purana.narada.2.41.72.p1) iti śrībṛhannāradīyapurāṇottarabhāge mohinīvasusaṃvāde gaṅgāmāhātmye dānādividhivarṇanaṃ nāmaikacatvāriṃśattamo 'dhyāyaḥ ## Linked texts (4) - [Tīrthacintāmaṇi](https://indike.org/pramana/in.niti.dharma.tirtha.tirthacintamani.9.p81) — Vācaspatimiśra, Sanskrit - [Skandapurāṇa (early; "Ambikākhaṇḍa") (ed. Bakker)](https://indike.org/pramana/in.purana.skanda*early*bakker.17.40.113.p3) — Sanskrit - [Nityācārapradīpa](https://indike.org/pramana/in.niti.dharma.acara.ahnika.nityacarapradipa.9.p58) — Narasiṃha Vājapeyin, Sanskrit - [Kṛtyasārasamuccaya (Amṛtanātha Jhā Śarman)](https://indike.org/pramana/in.niti.dharma.nibandha.krtya.krtyasarasamuccaya.2.p448) — Amṛtanātha Jhā Śarman 1800, Sanskrit --- Source: [https://indike.org/pramana/in.purana.narada.2.41](https://indike.org/pramana/in.purana.narada.2.41) · Pramāṇa