[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.42 # Naradapurana 2.42 Nāradapurāṇa 2.42 - **Language:** Sanskrit ## Contents - [2.42.44](https://indike.org/pramana/in.purana.narada.2.42.44) — 1 part ### [2.42.1](https://indike.org/pramana/in.purana.narada.2.42.1) mohinyuvāca dhanyāhaṃ kṛtakṛtyāhaṃ saphalaṃ jīvitaṃ mama / yacchrutaṃ tvanmukhāṃbhojādgāmāhātmyamuttamam // ### [2.42.2](https://indike.org/pramana/in.purana.narada.2.42.2) aho gaṅgāsamaṃ tīrthaṃ nāsti kiñciddharā tale / yasyāḥ saṃdarśanādīnāmīdṛśaṃ puṇyamīritam // ### [2.42.3](https://indike.org/pramana/in.purana.narada.2.42.3) guḍadhenvādidhenūnāṃ vidhānaṃ ca yathākramam / tathā kathayaviprendra bhaktāhaṃ tava sarvadā // ### [2.42.4](https://indike.org/pramana/in.purana.narada.2.42.4) vasiṣṭha uvāca tacchrutvā mohinīvākyaṃ vasustasyāḥ purohitaḥ / vedāgamānāṃ tattvajñaḥ smayamāna uvāca ha // ### [2.42.5](https://indike.org/pramana/in.purana.narada.2.42.5) vasuruvāca śṛṇu mohini vakṣyāmi yatpṛṣṭaṃ hi tvayā mama / guḍadhenuvidhānaṃ ca yathā śāstre prakīrtitam // ### [2.42.6](https://indike.org/pramana/in.purana.narada.2.42.6) kṛṣṇājinaṃ caturgrīvaṃ vinyasedbhuvi / gomayenopaliptāyāṃ kuśānāstīrya yatnataḥ // ### [2.42.7](https://indike.org/pramana/in.purana.narada.2.42.7) praṅmukhīṃ kalpayeddhenumudakpādāṃ savatsakām / uttamā guḍadhenustu caturbhāraiḥ prakīrtitā // ### [2.42.8](https://indike.org/pramana/in.purana.narada.2.42.8) vatsaṃ bhāreṇa kurvīta bhārābhyāṃ madhyamā smṛtā / arddhabhāreṇa vatsaḥ syātkaniṣṭhā bhārakeṇa tu // ### [2.42.9](https://indike.org/pramana/in.purana.narada.2.42.9) caturthāṃśena vatsaḥ syād gṛhavittānusārataḥ / prabhuḥ prathamakalpasya yo 'nukalpena vartayet // ### [2.42.10](https://indike.org/pramana/in.purana.narada.2.42.10) na sāṃparāyikaṃ tasya durmaterjāyate phalam / dhenuvatsau ghṛtasyaitau sitaślakṣṇāṃbarāvṛtau // ### [2.42.11](https://indike.org/pramana/in.purana.narada.2.42.11) śuktikarṇāvikṣupādau śuddhamuktālekṣaṇau / sitasūtraśirālau ca sitakaṃbalakaṃbalau // ### [2.42.12](https://indike.org/pramana/in.purana.narada.2.42.12) tāmragaṇḍūkapṛṣṭhau tau sitacāmaralomakau / vidrumakramago petau navanītastanānvitau // ### [2.42.13](https://indike.org/pramana/in.purana.narada.2.42.13) kāṃsyadohāvindranīlamaṇikalpitatārakau / suvarṇaśṛṅgābharaṇau śuddharaupyakhurāvubhau // ### [2.42.14](https://indike.org/pramana/in.purana.narada.2.42.14) nānāphalaṃ samāyuktau ghrāṇagandhakaraṇḍakau / ityevaṃ racayitvā tu dhūpadīpairathārcayet // ### [2.42.15](https://indike.org/pramana/in.purana.narada.2.42.15) yā lakṣmīḥ sarvabhūtānāṃ yā ca deveṣvavasthitā / dhenurūpeṇa sā devī mama śāntiṃ prayacchatu // ### [2.42.16](https://indike.org/pramana/in.purana.narada.2.42.16) dehasthā yā ca rudrāṇāṃ śaṅkarasya sadā priyā / dhenurūpeṇa sā devī mama pāpaṃ vyapohatu // ### [2.42.17](https://indike.org/pramana/in.purana.narada.2.42.17) viṣṇorvakṣasi yā lakṣmīḥ svāhārūpā vibhāvasoḥ / candrārkaśakraśaktiryā dhenurūpāstu sā śriye // ### [2.42.18](https://indike.org/pramana/in.purana.narada.2.42.18) caturmukhasya yā lakṣmīrlakṣmīryā dhanadasya ca / lakṣmīryā lokapālānāṃ sā dhenurvaradāstu me // ### [2.42.19](https://indike.org/pramana/in.purana.narada.2.42.19) svadhā yā pitṛmukhyānāṃ svāhā yajñamujā ca yā / sarvapāpaharā dhenuḥ sā me śāntiṃ prayacchatu // ### [2.42.20](https://indike.org/pramana/in.purana.narada.2.42.20) evamāṃmatrya tāṃ dhenuṃ brāhmaṇāya nivedayet / vidhānametaddhenūnāṃ sarvāsāmiha paṭhyate // ### [2.42.21](https://indike.org/pramana/in.purana.narada.2.42.21) yāstu pāparvināśinyaḥ kīrtitā daśadhenavaḥ / tāsāṃ svarūpaṃ vakṣyāmi śāstrokaṃ śṛṇu mohini // ### [2.42.22](https://indike.org/pramana/in.purana.narada.2.42.22) prathamā guḍadhenuḥ syād ghṛtadhenurathāparā / tiladhenustṛtīyā ca caturthī jalasaṃjñitā // ### [2.42.23](https://indike.org/pramana/in.purana.narada.2.42.23) pañcamī kṣīradhenuśca ṣaṣṭhī madhumayī smṛtā / saptamī śarkarādhenurdadhidhenustathāṣṭamī // ### [2.42.24](https://indike.org/pramana/in.purana.narada.2.42.24) ratnadhenuśca navamī daśamī tu svarūpataḥ / kuṃbhāḥ syurdravadhenūnāṃ cetarāsāṃ tu rāśayaḥ // ### [2.42.25](https://indike.org/pramana/in.purana.narada.2.42.25) survaṇadhenumapyatra kecidicchanti sūrayaḥ / navanītena tailena tathā ke 'pi maharṣayaḥ // ### [2.42.26](https://indike.org/pramana/in.purana.narada.2.42.26) etadeva vidhānaṃ syādeta eva hyupaskarāḥ / mantrāvāhanasaṃyuktāḥ sadā parvaṇi parvaṇi // ### [2.42.27](https://indike.org/pramana/in.purana.narada.2.42.27) yathāśraddhaṃ pradātavyā bhuktimuktiphalapradāḥ / anekayajñaphaladāḥ sarvapāpaharāḥ śubhāḥ // ### [2.42.28](https://indike.org/pramana/in.purana.narada.2.42.28) ayane viṣuve puṇye vyatīpāte 'thavā punaḥ / yugādau caiva manvādau coparāgādiparvasu // ### [2.42.29](https://indike.org/pramana/in.purana.narada.2.42.29) guḍadhenvādayo deyā bhaktiśraddhāsamanvitaiḥ / tīrtheṣu svagṛhe vāpi gaṅgātīre viśeṣataḥ // ### [2.42.30](https://indike.org/pramana/in.purana.narada.2.42.30) evaṃ datvā vidhānena dhenuṃ dvijavarāya ca / pradakṣiṇīkṛtya vipraṃ dakṣiṇābhiḥ pratoṣya ca // ### [2.42.31](https://indike.org/pramana/in.purana.narada.2.42.31) ṛtvijaḥ prītisaṃyukto namaskṛtya visarjayet / tataḥ saṃpūjayedgaṅgāṃ vidhinā susamāhitaḥ // ### [2.42.32](https://indike.org/pramana/in.purana.narada.2.42.32) aṣṭamūrtidharāṃ devīṃ divyarūpāṃ nirīkṣya ca / śālitandulaprasthena dviprasthapayasā tathā // ### [2.42.33](https://indike.org/pramana/in.purana.narada.2.42.33) pāyasaṃ kārayitvā ca datvā madhu ghṛtaṃ tathā / pratyekaṃ palamātraṃ ca bhaktibhāvena saṃyutaḥ // ### [2.42.34](https://indike.org/pramana/in.purana.narada.2.42.34) tatpāyasamapūpāṃśca modakā maṇḍalāni ca / tathā guñjārddhamātraṃ ca suvarṇaṃ rūpyameva ca // ### [2.42.35](https://indike.org/pramana/in.purana.narada.2.42.35) candanāgarukarpūrakuṅkumāni ca guggulam / bilvapatrāṇi dūrvāśca rocanā sitacandanam // ### [2.42.36](https://indike.org/pramana/in.purana.narada.2.42.36) nīlotpalāni cānyāni puṣpāṇi surabhīṇi ca / yathāśakti mahābhaktyā gaṅgāyāṃ caiva nikṣipet // ### [2.42.37](https://indike.org/pramana/in.purana.narada.2.42.37) mantreṇānena subhage purāṇoktena cāpi hi / oṅgaṅgāyai nārāyaṇyai śivāyai ca namonamaḥ // ### [2.42.38](https://indike.org/pramana/in.purana.narada.2.42.38) etadeva vidhānaṃ tu māsi māsi ca mohini / paurṇamāsyāmapāyāṃ vā kāryaṃ prātaḥ samāhitaiḥ // ### [2.42.39](https://indike.org/pramana/in.purana.narada.2.42.39) varṣaṃ yastu naro bhaktyā yathā śaktyarcayanmudā / haviṣyāśī mitāhāro brahmacaryasamanvitaḥ // ### [2.42.40](https://indike.org/pramana/in.purana.narada.2.42.40) dine vāpi tathā rātrā niyamena ca mohini / saṃvatsarānte tasyeṣā gaṅgā divyavapurddharā // ### [2.42.41](https://indike.org/pramana/in.purana.narada.2.42.41) divyamālyāṃbarā caiva divyaratnavibhūṣitā / pratyakṣarūpā puratastiṣṭatyeva varapradā // ### [2.42.42](https://indike.org/pramana/in.purana.narada.2.42.42) evaṃ pratyakṣarūpāṃ tāṃ gaṅgāṃ divyavapurddharām / dṛṣṭvā sva cakṣuṣā martyaḥ kṛtakṛtyo bhavecchubhe // ### [2.42.43](https://indike.org/pramana/in.purana.narada.2.42.43) yānyānkāmayate martyaḥ kāmāṃstāṃstānavāpnuyāt / niṣkāmastu labhenmokṣaṃ viprastenaiva janmanā // ### [2.42.44](https://indike.org/pramana/in.purana.narada.2.42.44) etaddhidhānaṃ ca mayoditaṃ te pṛṣṭaṃ hi sarvaṃ guḍadhenupūrvam / gaṅgārcanaṃ muktikaraṃ vrataṃ tta sāṃvatsaraṃ śrīpatituṣṭidaṃ hi // ### [2.42.44.p1](https://indike.org/pramana/in.purana.narada.2.42.44.p1) iti śrībṛhannāradīyapurāṇottarabhāge mohinīvasusaṃvāde gaṅgāmāhātmye guḍadhenuvidhikathanaṃ nāma dvicatvāriṃśattamo 'dhyāyaḥ ## Linked texts (4) - [Agnipurāṇa (Nag Publishers edition, Delhi)](https://indike.org/pramana/in.purana.agni*nag.210.15) — Sanskrit - [Tīrthacintāmaṇi](https://indike.org/pramana/in.niti.dharma.tirtha.tirthacintamani.9.p109) — Vācaspatimiśra, Sanskrit - [Smṛtisāroddhāra](https://indike.org/pramana/in.niti.dharma.nibandha.smrtisamgraha.smrtisaroddhara.2.p85) — Nārāyaṇa, Sanskrit - [Cakranārāyaṇīyanibandha](https://indike.org/pramana/in.niti.dharma.nibandha.mahanibandha.cakranarayaniyanibandha.2.p85) — Viśvambharatrivedin 1600, Sanskrit --- Source: [https://indike.org/pramana/in.purana.narada.2.42](https://indike.org/pramana/in.purana.narada.2.42) · Pramāṇa