[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Naradapurana](https://indike.org/pramana/in.purana.narada) › 2.9 # Naradapurana 2.9 Nāradapurāṇa 2.9 - **Language:** Sanskrit ## Contents - [2.9.49](https://indike.org/pramana/in.purana.narada.2.9.49) — 1 part ### [2.9.1](https://indike.org/pramana/in.purana.narada.2.9.1) sautiruvāca rukmāṅgadastu rājendro bhuktvā bhogāṃstumānuṣān / saṃpūjya bahuśo devaṃ pītāṃbaradharaṃ haram // ### [2.9.2](https://indike.org/pramana/in.purana.narada.2.9.2) datvā mūrdhni padaṃ viprāḥ śatrīṇāṃ raṇaśālinām / kṛtvā śūnyaṃ yamapathaṃ jitvā vaivasvataṃ yamam // ### [2.9.3](https://indike.org/pramana/in.purana.narada.2.9.3) vaikuṇṭhasya tu panthānaṃ saṃpūrṇaṃ mānavaiḥ kṛtam / āhūya tanayaṃ kāle dharmāṅgadamabhāṣata // ### [2.9.4](https://indike.org/pramana/in.purana.narada.2.9.4) etāṃ vasumatīṃ putra vasupūrṇāṃ samantataḥ / paripālaya vīryeṇa svadharme kṛtaniścayaḥ // ### [2.9.5](https://indike.org/pramana/in.purana.narada.2.9.5) putra samarthe jāte yo rājyaṃ na pratipādayet / tasya dharmastathā kīrtirvinasyati na saṃśayaḥ // ### [2.9.6](https://indike.org/pramana/in.purana.narada.2.9.6) samarthena ca putreṇa yo na yāti pitā sukham / avaśya pātakī so 'pi vijñeyo bhuvanatraye // ### [2.9.7](https://indike.org/pramana/in.purana.narada.2.9.7) piturbhārakṣamaḥ putro bhāraṃ nodvahate tu yaḥ / māturuccāravajjāto dvijihvo viṣavarjitaḥ // ### [2.9.8](https://indike.org/pramana/in.purana.narada.2.9.8) sa putro yo 'dhikakhyātaḥ piturbhavati bhūtale / prakāśayati sarvatra svakarairiva bhāskaraḥ // ### [2.9.9](https://indike.org/pramana/in.purana.narada.2.9.9) putrāpanayajairduḥkhai rātrau jāgartiṃ yatpitā / sa putro narakaṃ yāti yāvadābhūtasaṃplavam // ### [2.9.10](https://indike.org/pramana/in.purana.narada.2.9.10) piturvacanamādṛtya sarvaṃ yaḥ kurute gṛhe / sa yāti deva sāyujyaṃ stūyamāno divi sthitaiḥ // ### [2.9.11](https://indike.org/pramana/in.purana.narada.2.9.11) so 'haṃ prajākṛte putra āsaktaḥ karmabhiḥ kṣitau / na bhuktaṃ naiva suptaṃ tu svecchayā pālane sthitaḥ // ### [2.9.12](https://indike.org/pramana/in.purana.narada.2.9.12) asamarthe tvayi suta na prāptaṃ hi mayā sukham / viṣṇuvāsarabhoktṝṇāṃ nigrahe kṛtabuddhinā // ### [2.9.13](https://indike.org/pramana/in.purana.narada.2.9.13) kecicchaive sthitā mārge saure kecidvyavasthitāḥ / viriñcimārgagāścānye pārvatyāśca sthitāḥ pare // ### [2.9.14](https://indike.org/pramana/in.purana.narada.2.9.14) sāyaṃ ca prātarāsīnā agnihotre vyavasthitāḥ / bālo yuvā vā vṛddho vā gurviṇī vā kumārikā // ### [2.9.15](https://indike.org/pramana/in.purana.narada.2.9.15) sarogo vikalo vāpi na śaknoti hyupoṣitum / ityevaṃ jalpitaṃ yaistu tānnirasya samantataḥ // ### [2.9.16](https://indike.org/pramana/in.purana.narada.2.9.16) vacobhistu purāṇoktairvāsarairbahubhistvaham / saṃbodhayitvā bahuśaḥ prajānāṃ sukhahetave // ### [2.9.17](https://indike.org/pramana/in.purana.narada.2.9.17) nigṛhya tānharidine nirāhārānkaromi ca / śāstradṛṣṭyā tu viduṣo mūrkhāndaṇḍanapūrvakam // ### [2.9.18](https://indike.org/pramana/in.purana.narada.2.9.18) śāsayitvā kṛtāḥ sarve nirāhārā harerdine / tena me na sukhaṃ kiñcidavalīḍhaṃ dharātale // ### [2.9.19](https://indike.org/pramana/in.purana.narada.2.9.19) kaccinna duḥkhena janānyojayetkila putraka / svebhyo vāpi parebhyo vā yā rakṣecca prajā nṛpaḥ // ### [2.9.20](https://indike.org/pramana/in.purana.narada.2.9.20) tasyāmī hyakṣayā lokāḥ purāṇeṣu prakīrtitāḥ / so 'haṃ prajākṛte saumya saṃsthito nātmanaḥ kvacit // ### [2.9.21](https://indike.org/pramana/in.purana.narada.2.9.21) saukhyamicchāmyahaṃ bhoktuṃ mṛgayādisamudbhavam / na pānadyūtajaṃ putra kāmaye 'haṃ kadācana // ### [2.9.22](https://indike.org/pramana/in.purana.narada.2.9.22) eṣu sakto 'cirātputra vināśaṃ yāti pārthivaḥ / tvatprasādādahaṃ putra mṛgayāvyājato 'dhunā // ### [2.9.23](https://indike.org/pramana/in.purana.narada.2.9.23) girīnvanāni saritaḥ sarāṃsi vividhāni ca / bhoktukāmaḥ priyānkāmāṃstvayi bhāraṃ niveśya ca // ### [2.9.24](https://indike.org/pramana/in.purana.narada.2.9.24) etatsarvaṃ samākhyātaṃ yatsthitaṃ hṛdaye mama / kṛte tava mahākīrtirakṛte narakasthitiḥ // ### [2.9.25](https://indike.org/pramana/in.purana.narada.2.9.25) dharmāṅgada uvāca sarvametatkariṣyāmi bhuṅkṣva bhogānmano 'nugān / gurvīṃ rājyadhuraṃ tāta tvadīyāmuddharāmyaham // ### [2.9.26](https://indike.org/pramana/in.purana.narada.2.9.26) nahi me 'nyaḥ smṛto dharmastvadvākyakaraṇaṃ vinā / piturvākyamakurvāṇaḥ kurvandharmānadho vrajet // ### [2.9.27](https://indike.org/pramana/in.purana.narada.2.9.27) tasmātkariṣye vacanaṃ tvadīyaṃ prāñjaliḥ sthitaḥ / evamukte tu vacane rājā hṛṣṭo babhūva ha // ### [2.9.28](https://indike.org/pramana/in.purana.narada.2.9.28) gantukāmo mṛgānbhūyolabdhvā jñātvā vanaṃ tataḥ / dharmāṅgado 'pi dṛṣṭātmā prajā āhūya cābravīt // ### [2.9.29](https://indike.org/pramana/in.purana.narada.2.9.29) pitrā niyukto bhavatāṃ pālanāya hitāya ca / piturvākyaṃ mayā kāryaṃ sarvathā dharmamicchatā // ### [2.9.30](https://indike.org/pramana/in.purana.narada.2.9.30) nānyo hi dharmaḥ putrasya piturvākyaṃ vinā prajāḥ / mayi daṇḍadhare śāstā na yamo bhavati kvacit // ### [2.9.31](https://indike.org/pramana/in.purana.narada.2.9.31) evaṃ jñātvā tu yuṣmābhiḥ smartavyo garuḍadhvajaḥ / brahmārpaṇaprayogeṇa yajanīyo janārdanaḥ // ### [2.9.32](https://indike.org/pramana/in.purana.narada.2.9.32) mamatvaṃ hi parityajya svajātivihitena ca / yena vo hyakṣayā lokā bhaveyurnātra saṃśayaḥ // ### [2.9.33](https://indike.org/pramana/in.purana.narada.2.9.33) pitṛmārgādhiko hyeṣa bhavatāṃ darśitaḥ prajāḥ / brahmārpaṇakriyāyuktā bhavantu jñānakovidāḥ // ### [2.9.34](https://indike.org/pramana/in.purana.narada.2.9.34) na bhoktavyaṃ haridine paitro mārgastu śāśvataḥ / viśeṣo hi mayākhyāto bhavatāṃ brahmasaṃsthitiḥ // ### [2.9.35](https://indike.org/pramana/in.purana.narada.2.9.35) prayoktavyā ca tattvajñaiḥ punarāvṛtti durlabhā / yadupoṣyaṃ haridinaṃ tadavaśyamiti sthitiḥ // ### [2.9.36](https://indike.org/pramana/in.purana.narada.2.9.36) anunīya prajāḥ sarvāḥ samāśvātyata punaḥ punaḥ / na divā na ca śarvaryāṃ śete dharmāṃ gadaḥ sadā // ### [2.9.37](https://indike.org/pramana/in.purana.narada.2.9.37) sarvatra bhramate śauryātkurvanniṣkaṇṭakāṃ kṣitim / paṭaho raṭate nityaṃ mṛgāriripumastake // ### [2.9.38](https://indike.org/pramana/in.purana.narada.2.9.38) abhuktvā dvādaśīṃ lokā mamatvena vivarjitāḥ / trividheṣu ca kāryeṣu deveśaścintyatāṃ hariḥ // ### [2.9.39](https://indike.org/pramana/in.purana.narada.2.9.39) havyakavyavaho devaḥ sa eva puruṣottamaḥ / sūrye yo hi kṛśākāśe visarge jagatāṃ patiḥ // ### [2.9.40](https://indike.org/pramana/in.purana.narada.2.9.40) smarttavyo manujaiḥ sarvairdharmakāmārthakāmukaiḥ / svajātivihito 'pyevaṃ sanmārge caiva mādhavaḥ // ### [2.9.41](https://indike.org/pramana/in.purana.narada.2.9.41) sa eva bhoktā bhoktavyaḥ sa eva puruṣottamaḥ / viniyogastu tasyaiva sarvakarmasu yujyate // ### [2.9.42](https://indike.org/pramana/in.purana.narada.2.9.42) evaṃ raṭanti viprendrāḥ paṭahe meghaniḥsvane / evaṃ dharmamavāpyātha pitāṃ dharmāṅgadasya hi // ### [2.9.43](https://indike.org/pramana/in.purana.narada.2.9.43) jñātvā putraṃ kriyopetamātmano hyadhikaṃ dvijāḥ / uvāca bhāryāṃ saṃhṛṣṭaḥ sthitāṃ lakṣmīmivāparām // ### [2.9.44](https://indike.org/pramana/in.purana.narada.2.9.44) saṃdhyāvali hyahaṃ dhanyastvaṃ cāpi varavarṇinī / ubhayorjanitaḥ putraḥ śaśāṅkadhavalaḥ kṣitau // ### [2.9.45](https://indike.org/pramana/in.purana.narada.2.9.45) karṇābhyāṃ śrūyate mokṣo na dṛṣṭaḥ kenacitkvacit / so 'smābhiradhikaṃ prāpto mokṣaḥ satputrasaṃbhavaḥ // ### [2.9.46](https://indike.org/pramana/in.purana.narada.2.9.46) putre vinayasaṃpanne vṛttāśauryasamanvite / pratāpini varārohe piturmokṣo gṛhe dhruvam // ### [2.9.47](https://indike.org/pramana/in.purana.narada.2.9.47) ānandaṃ brahmaṇo rūpaṃ śatānandaḥ sutena yaḥ / pitā bhavati cārvaṅgi satkarmakaraṇaiḥ śubhaiḥ // ### [2.9.48](https://indike.org/pramana/in.purana.narada.2.9.48) naitatsāmyaṃ bhaveddevi loke sthāvarajaṅgame / satputraḥ piturādāya bhāramudvahate tu yaḥ // ### [2.9.49](https://indike.org/pramana/in.purana.narada.2.9.49) so 'haṃ gamiṣyāmi vanāya hṛṣṭo vihāraśīlo mṛgahiṃsanāya / svecchācaraścātha viśālanetre vimuktapāpo janarakṣaṇāya // ### [2.9.49.p1](https://indike.org/pramana/in.purana.narada.2.9.49.p1) iti śrībṛhannāradīyapurāṇottarebhāge rukmāṅgadadharmāṅgadasaṃvādo nāma navamo 'dhyāyaḥ ## Linked texts (1) - [Rukmāṅgadacaritra](https://indike.org/pramana/in.purana.upakhyana.vamsa-rsi.rukmangadacaritra.87.52.1) — Sanskrit --- Source: [https://indike.org/pramana/in.purana.narada.2.9](https://indike.org/pramana/in.purana.narada.2.9) · Pramāṇa